«Мынам Удмуртие — Сӥзьыл» фото но видео конкурсэ куриськонъёсты кутон кутскиз Удмуртиын

Вожвылъяськонэ «Сӥзьыл» темая туспуктэмъёсты но видеовозьматонъёсты куто. Фотоужъёсты куинь ӧръёсъя дунъялозы:

  • Инкуазь. Удмуртилэсь сӥзьыл чеберзэ возьматӥсь туспуктэмъёс;
  • Кар. Сӥзьыл вакытэ карлэн тусыз;
  • Сӥзьыл портрет. Одӥг яке кӧня ке адямиослэн вылтуссы.

Пыриськисьёс котькуд номинацие быдэн 10 туспуктэмъёс келяны быгато. Со сяна, мылкыд каремзыя, ужъёс борды асьсэ кылбурзэс ватсамзы луэ.

Видеолы валтӥсь курон – со сӥзьыл темая Удмуртия но элькунын улӥсь адямиос сярысь гожтэмын мед луоз. Кузьдалаез – 58 секунд.

Конкурс куинь люкетэн ортчоз. Нырысетӥез – ужъёсты кутон – 1-тӥ коньывуонысен 18-тӥ шуркынмонозь кыстӥськоз. Собере, 19-25 шуркынмонэ, туспуктэмъёсты но видеороликъёсты жюри дунъялоз. Вожвылъяськонлэн йылпумъян люкетэз но вормисьёсты пусъён 30-тӥ шуркынмонэ Ижкарысь Киров нимо паркын радъяськоз.

Вожвылъяськонэ пыриськон понна мылкыд карисьёс udmphoto.ru сайтын куриськон гожтыны кулэ. Конкурслэн кузьымъёсын фондэз – 100 сюрс манет.

Ватсалом, «Мынам Удмуртие – Сӥзьыл» конкурсэз элькунысь кивалтэт но Лулчеберетъя но туризмъя министерство юрттэмен «Ижкар паркъёс» радъяло.

Тодэ вайытом, 12-тӥ инвожое «Мынам Удмуртие» фотоконкурс йылпумъяськиз. Отчы ваньмыз ог 9 сюрс туспуктэмъёс вуизы.

Контентмейкер, мемолог и журналист

Дом Дружбы народов
Добавить комментарий