Музейлэн нуналыз: Лудорвай, мультфильм но хоровод

18-тӥ мае 10 часысен 20 часозь вань мылкыд карисьёс дунтэк тодматскыны быгатозы музей-усадьбаен. Татын арлы быдэ «Усьтэм ӧс» ужрад ортчылэ. Кылем арын, кылсярысь, музей-усадьбаен тодматскыны 100 пала адями вуылӥз.

19-тӥ мае татын нырысьсэ ортчоз фин-угор мультипликацилы сӥзем фестиваль, отын 31 мультфильм возьматӥськоз. Удмуртиысь сяна, ужъёс вуэмын Марий-Элысь, но Ханты-Мансийскысь, нош Эстониысь но Комиысь мультипликаторъёс, ас мультфильмъёсызы тодматэм сяна, мастер-класс но ортчытозы.

20-тӥ мае ужрадэз йылпумъялоз «Ильинской хоровод». Туэ ужрад 7-тӥзэ радъяське, азьвыл аръёсы отчы пыриськизы ке пӧртэм ёросъёсысь но бускель улосъёсысь арлыдоослэн коллективъёссы, таяз учыре — шаерысьтымы искусствоосъя школаосын дышетскисьёс. Кызьы ивортӥз музей-заповедникын ужась Елена Келарева, хороводэ пыриськыны мылкыд каремзэ ивортӥз 12 коллектив, соос понна 10 станция дасямын. Пиналъёслэсь кырӟаны-вераны быгатэмзэс сяна, эскерозы инкуазез, гурт улонэз тодэмзэс. Угось быдэс ужрад сӥземын Инкуазез утён арлы. Ужрад йылпумъяськоз ӝук сиёнэн.

http://udmdunne.ru/2017/05/muzejjlehn-nunalyz-ludorvajj-multfilm-no-khorovod/

Контентмейкер, мемолог и журналист

Дом Дружбы народов
Добавить комментарий