Москваын «Гербер» шулдыръяськон ортчиз

Ужрадэз усьтӥзы тӧролэн но правительстволэн администациеныз кивалтӥсь Сергей Смирнов, правительстволэн тӧроезлэн воштӥсез Михаил Хомич, Москваысь национальной политикая но калык кусыпъёсъя департаментэн кивалтӥсь Виталий Скачков, Москваысь удмуртъёслэн огазеяськонэнызы кивалтӥсьлэн воштӥсез Любовь Амбрамцумян. Ужрад сӥземын Удмуртиен тодматсконлы но Калашниковлэн 100 ар тырмонэзлы.

«Тросгес учкисьёсты шаерлэн быгатонлыкъёсыныз тодматон, туристъёслэсь лыдзэс будэтон, элькунын поттэм сиён-юонъёсты мукет каръёсы келяны луонлыкъёс утчан – сыӵе валтӥсь мугъёсыз Мускоын ортчись «Гербер» фестивальлэн. Ваньмыз со элькунлэсь экономиказэ ӝутонын бадӟым инты басьтэ», – вераз элькун тӧролэн но правительстволэн администрациенызы кивалтӥсь Сергей Смирнов.

Праздник «Удмуртская миля» бызьылонэн кутскиз. Бадӟымъёслы 1 но 3 иськемез бызьыны ӵектӥзы, пиналъёслы – 150 метрез. Покчиослы сюресэз  ортчыны куасэн бызьылӥсь Максим Вылегжанин юрттӥз. Ваньмызлы ӵошатсконэ пыриськемъёслы медальёс но шоколадлэсь перепеч сётӥзы, нош вормисьёс юрттӥсьёслэсь кузьымъёс басьтӥзы.

Вераны кулэ, фестиваль улсын Ижкарысь Роман Скобкарёв выдыса штангаез ӝутъянъя рекорд пуктӥз но Гиннесслэн рекордъёсъя книгаяз шедиз. 32 аресъем пауэрлифтер 50 килограммез 103 пол ӝутӥз – со 5 тонна 150 килограмм. Азьвылзэ рекордэз Австралиысь Майкл Кэррол пуктӥз вал, со 2 минутскын 4 тонна 80 килограмм ӝутӥз.

Мускоын улӥсь удмуртъёс верало: «Быдэс ар чидатэк витиськом «Гербер» шулдыръяськонэз. Удмурт гуръёсты кылыса берытскиськом кадь вордӥськем интыосамы. Кӧт тырымон вераськиськом,  кырӟаськом улосчиосынымы ӵош».

«Гербер» ӵошатсконъёсы, квестъёсы пыриськемъёс пӧртэм кузьымъёс басьтӥзы. Тужгес но валтӥсез – Удмуртиысь пӧртэм объектъёсын тодматскыны луонлык сётӥсь сертификатъёс.

Контентмейкер, мемолог и журналист

Дом Дружбы народов
Добавить комментарий