Можга ёросын ортчем «Мистер Этно-2016» конкурсын вормиз таджик пияш

Ужрадэ пыриськизы анай кылзэс, ас калыксылэсь йылолъёссэс тодӥсь 16–30 аресъем егитъёс.

Вера Можга ёрос администрациысь лулчеберетъя но егитъёсын ужанъя секторлэн кивалтӥсез Валентина Берёзкина:

«11 адями пыриськисьёсмы вал — 7 удмуртмы вал, одӥг таджик, одӥг армян, одӥг ӟуч, одӥг чиган. Вормиз Малая Сюга гуртысь таджик Атаев Хасан. Соослэн кутсконысеныз ик сыӵе шуныт лыктӥз, адӟиське анайзы бордысен кутске лулчеберет со семьяын. Отын таджик кылын верасько, таджик сиёнъёс но озьы ик пӧрало. Собере анайзы возьматӥз бызён дӥськутъёссэс, аслэсьтыз но нылызлы дӥсяз, пиезлы но атаезлэсь дӥсяз… Отын адӟиське, сям-йылолъёс копак уло со семьяын шуыса. Ваньзэ тодэ, туж зол кельшиз со пияш милем», — вераз Валентина Берёзкина.

Хасанлэн семьяез Удмуртие лыктэмын Таджикистанысь. Али пияш 11-тӥ классын дышетске.

Нош учкисьёслэсь кузьым басьтӥз Тылой (Малая Валожикья) черкогуртысь Максим Яковлев.

«Сыӵе со визьмо кылъёсын вераське. Ӟуч сямен но озьы ик чебер вераське, озьы ик удмурт сямен чебер вераське. Куке вал йӧскалык дӥськутэз возьматон, соос возьматӥзы, кызьы вашкала дыръя, кыӵе дӥськутэн удмуртъёс вӧсясько вал… Возьматӥз кутсконысеныз пумозяз — кызьы дасяськыны кулэ, кин гинэ быгатэ керттыны кускерттон та пияшлы. Вӧсяськиз но чын удмурт кылын. Туж кельшиз, мон шуисько — интеллигентной будӥсь удмурт, туж синмаськымон пияш», — пусйиз Берёзкина.

Вожвылъяськон кӧня ке люкетэн ортчиз — асэнызы но калыкенызы тодматон, йӧскалык дӥськутэз возьматон — солэн кылдэме, но кутӥськемез сярысь веран, йӧскалык сиён-юонъёсын тодматон.

«Быдэс ӝӧквыл сиёнмы люкаськиз. Тыпыр-тапыр ваньзэ быдтӥзы утыр ик! Туж ческыт ваньмыз вал, сюлмысь пӧраськемын. Шӧдӥське, рос-прос дасяськемын конкурслы, котькудӥз маин ке но висъяськиз», — вераз Можга ёрос администрациысь лулчеберетъя но егитъёсын ужанъя секторлэн кивалтӥсез.

Валентина Берёзкиналэн верамезъя, таӵе вожвылъяськонэз ортчытыны мылкыд сётӥз Можга ёросысь Григорий Чирковлэн «Мистер Этно» калыккуспо конкурсэ ветлэмез. Отын Россиысь, СНГ-ысь но мукет кунъёсысь егитъёс ас калыкенызы тодматӥзы, Можга ёросын 40 пӧртэм выжы калыкъёс уло, соослэсь аспӧртэмлыксэс возьматэмзы потӥз аспалъёсазы но. 

Дом Дружбы народов
Добавить комментарий