Можга ёросын «Мистер Этно-2017» нимез басьтӥз 17 аресъем Кирилл Меркушев

Ужрадэ пыриськыны анай кылзэс, ас калыксылэсь йылолъёссэс тодӥсь 16–25 аресъем егитъёсты ӧтизы. Люкаськизы 6 пиос, ваньзы удмуртъёс.

«Одӥг ӟучез вал пӧлазы, но со лыктыны ӧз быгаты Русский Пычасысь, сюресъёс алама луэмен. Ваньмыз удмуртъёс луизы озьы. Со эшшо одӥг пол валэктэ, милям удмуртъёсгес-а, мар-а мыло-кыдоесьгес пыриськыны», — вераз Можга ёрос администрациысь Лулчеберетъя, спортъя но егитъёсын ужанъя управлениысь лулчеберетъя но егитъёсын ужан политикая ёзэтысь ӧнерчи Надежда Сапожникова.

Пиос асьсэнызы тодматыны, Удмуртия но Можга ёрос сярысь тодонлыкъёссэс, творчествоя быгатонлыкъёссэс возьматыны, вашкала йӧскалык арбериосын тодматыны но соос сярысь вераны кулэ вал.

Надежда Сапожниковлэн верамезъя, творчествоя конкурсын дунъясьёсты Кватчиос паймытӥзы. Соос Керемет гурезьзы сярысь видео лэсьтӥллям.

«Егитъёс великен мыно со гурезе, экто. <…> Видеоез возьматон дыръя Кватчиысь егитъёслэн фольклор коллективзы потӥз — нылъёс, пиос удмурт дӥськутэн дӥсяськыса постановка лэсьтэмын вал. Туж йӧспӧртэм», — вераз егитъёсын ужась ӧнерчи.

Вашкала арбериосын тодматонын Кватчиос армие келян йылолэз возьматӥзы — чук шуккизы. Мукетъёсыз пулэсь лэсьтэм саникез, мушкан тӥрлыкъёсты, кисеткаез, нуны веттан кӧкыез возьматӥзы.

Надежда Сапожниковалэн верамезъя, визьбур ӵошатсконлы пиос оглом умой дасяськиллям. Зэм, янгышанъёссы вал ик, кылсярысь, куд-огез ӧз тодэ, кӧня муниципал кылдытэтъёс Удмуртиын, кыӵе арын но кыӵе толэзе кылдӥз Можга ёрос.

Вожвылъяськонлэн вань люкетъёсызлы йылпумъянъёс лэсьтыса, дунъясьёс валтӥсь кузьымез но «Мистер Этно-2017» нимез 11-тӥ классын дышетскись Кирилл Меркушевлы сётыны пумкылъян кутӥзы.

Вуоно арын вожвылъяськон Кватчиын ортчыны быгатоз. Нырысетӥез конкурссы Нышаын вал. Гуртысь гуртэ ветлыса, егитъёсын ужась ӧнерчиос тросгес калыкез мер улонэ пыриськытыны оско.

«Ар куспын быдэс Можга ёросысь гуртъёсы ветлыны чакламын милям. Вань гуртъёсын пичиен-пичиен ужрадъёс ортчытъяськомы, черодэн-черодэн. Таяз Воложикья вал», — валэктӥз Надежда Сапожникова.

Тодэ вайытом, «Мистер Этно» вожвылъяськон Можга ёросын нырысьсэ кылем арын ортчиз. Соку Пичи Сюга гуртысь 11-тӥ классын дышетскись таджик пияш Хасан Атаев вормиз вал.

http://udmurt.media/udm/news/kultura-i-turizm/28002/

Поделитесь с друзьями:

Контентмейкер, мемолог и журналист

Дом Дружбы народов
Добавить комментарий