Ми тӥ доры куное лыктӥмы

Тазьы нимазы пумиськонзэс «Удмурт Кенеш» огазеяськонлэн Глаз карысь но ёросысь ёзэтэзлэн азьветлӥсьёссы. Удмуртилэн кунлык басьтон нуналэз улсын соос Глазовысь В.Г. Короленко нимо инженерно-педагогической университетысь студентъёс доры потазы.

Ёзэтлэн кивалтӥсез Антонида Бёрдова дышетскисьёслы ассоциацилэн ужамез сярысь вераськиз. Огазеяськонэ пӧртэм удысъёсын тыршись адямиос пырисько шуыса пусйиз.

Пумиськонын ас уженызы озьы ик тодматӥзы Иосиф Наговицынлэсь нимзэ нуллӥсь 17-тӥ номеро школалэн директорез Нина Вершинина, шаерчиос Альбина Баженова но Светлана Щекалёва, этнодӥськутъя дизайнер Валентина Пряженникова но модая «Бирӟиё» удмурт театрез кылдытӥсь Марина Наговицына, удмурт кылэн герӟаськем уно проектъёсты улонэ пыӵатӥсь Ольга Боталова, «Иднакар» газетэн валтӥсь редакторез Альбина Бушмакина.

Пумиськонэз чебертӥз Ольга Боталовалэн Маргарита нылыз. Со Ашальчи Окилэсь кылбурзэ мадиз, муминыз ӵош удмурт кырӟан быдэстӥзы. Тунсыко пӧрмиз Валентина Пряженниковалэсь дӥськутсэ возьматон но. Студентъёс дӥсяса учкизы дизайнерлэсь этнодэремъёссэ.

Вераны кулэ, Валентина Пряженникова но Марина Наговицына кемалась ӧвӧл Росатом Госкорпорацилэн экологилы сӥзем акселератораз пыриськизы. Ортчиз со Москваын. «ЭкоЭтноМодно. Вторая жизнь одежды» ӵектосысь 106 адями пӧлысь 16 устоосыз пӧлы шедиз.

Азьветлӥсьёсмы оско, таӵе пумиськонъёс егитъёсты бурдъялозы удмуртлыкез утён но азинтон ужрадъёсы пыриськыны.