Ми сямен — быдэс дуннеын

Нациосын ужан политикая министерство но Ижкарысь Эшъяськон юрт егитъёслэн «Шунды» огазеяськонэнызы ӵош удмурт кылэн тодматӥсь урокъёс ортчытозы. Озьы удмуртлыкен тунсыкъяськисьёслэн но удмурт кылэз дышетыны мылкыд карисьёслэн лыдзы будоз. Акцие пыриськыны школаос но, библиотекаос но, заводъёс но быгатозы. Эшъяськон юртлэн вотэс бамаз урокез ортчытыны юрттӥсь пособие интыямын ни.

Нош егитъёслэн «Юмок» театрысьтызы актёръёс «Лудорвай» музейлэн выль залаз Дарали Лелилэсь «Алнаш зомби» пьесазэ лыдӟозы.

Сарапулын «Яратӥсько удмурт кылме» темалы эссеос гожтозы но устооссэ быръёзы. Озьы ик «Вуюись» ансамбльлэн концертэз, удмурт писательёслы сӥзем викторина ортчозы.

26-тӥ шуркынмонэ удмурт литература сярысь вераськыны дэмла «Кенеш» журнал. «Туала удмурт литература: шедьтонъёс но ыштонъёс» котырес ӝӧке вань мылкыд карисьёсты ӧтча. Нош Вера Пантелеева тодосчи Москваын 20-тӥ даурысь удмурт литературалэн сюресэз сярысь мадёз.

Кылем аре сямен ик, Удмурт кыллэсь нуналзэ кунгож сьӧрын но пусъёзы. Венгриын Сегед карысь университетын Ашальчи Окилэн улонэз но творчествоез сярысь вераськозы, удмурт кырӟанъёсты быдэстозы.

Удмурт кыллэсь нуналзэ пусъён сярысь вераськонъёс кемалась ветлӥзы вал ни, но сое 27-тӥ ноябре ортчытъян сярысь решение 2018-тӥ арын Елабугаын удмуртъёслэн 1-тӥ съездзылэн 100 ар тырмонэзлы сӥзем конференциын кутӥзы. 2001-тӥ арын 27-тӥ шуркынмонэ удмурт кыл кун кыл сямен юнматэмын вал.

https://udmdunne.ru/

Контентмейкер, мемолог и журналист

Дом Дружбы народов
Добавить комментарий