Ува ёросын экологи ужпумъёслы сӥзем «Меми дор сяськаос» семинар ортчоз

«Нырысьсэ кутскиськом экологической проект борды. Удмуртъёс котьку но огкыл шедьто вал инкуазен. Идеологиез сыӵе — вунэтоно ӧвӧл со сямъёсмес, йылолъёсмес.  Кылэз но азинтӥсь ӵектос. Малы ке шуоно вань ужрадъёс луозы удмурт кылын. Тани семинаре ӧтимы профессормес Виктор Васильевич Туганаевез, со «Удмурт калык — инкуазез гажась калык» темая лекция лыдӟоз. Со, но шуэ, экологияя, пе, вераськисько но — удмурт кылын секытгес, отын валатонъёс, маръёс. Вот асьмеос удмурт кылын вераськыны быгатыны кулэ котьма сярысь», — пусйиз «Удмурт нылкышно кенеш» огазеяськонлэн тӧроез Надежда Степанова.

Петровскойысь школаын удмурт кылэз уг ке но дышето, пиналъёс юри та нуналлы Михаил Покчи-Петровлэн «Италмас» поэмаысьтыз люкетэзъя возьматон дасязы. Со семинарез усьтон луоз. Собере пусъем темая ивортонъёсын тодматыны кутскозы, соос пӧлын — «Сяська но сяська буёл нимъёс — удмурт кылын», «Удмурт нылкышно кенеш: утёмы кылмес но инкуазез» но мукет.

«Удмурт нылкышно кенеш» огазеяськонлэн Ува ёросысь ёзэтэзлэн кивалтӥсез Валентина Яковлева сяська будэтон ужен выре. Солэн малпамезъя, мемилэн сяськаез — со герань. Нылкышно ачиз но туж трос гераньёс будэтэ, соосты но мукет сяськаосты учкыны луоз семинар улсын радъям адӟытон-вузкаронын.

Семинар радъяське «Удмурт нылкышно кенеш» огазеяськонлэн Ува ёросысь ёзэтэзлэн кичӧлтэмезъя «Меми дор сяськаос» фестиваль улсын. Ужрадэ пыриськозы биологи тодосъя доктор, профессор Виктор Туганаев, элькунысь «Удмурт нылкышно кенешлэн» правлениезлэн ёзчиосыз, Сюмси, Ува, Вавож, Сьӧлта, Можга ёросъёслэн делегациоссы.

Надежда Степановалэн верамезъя, «Меми дор сяськаос» фестиваль улсын семинаръёс сяна, интернет-конкурс но ортчытыны чакламын.

http://udmurt.media/udm/news/inkuaz/18904/

Поделитесь с друзьями:

Контентмейкер, мемолог и журналист

Дом Дружбы народов
Добавить комментарий