Мар вите куноосты «Семыкын»?

Оргкомитетлэн ужаз пыриськизы Удмурт Элькунысь йӧскалык политикая министрлэн воштӥсез Людмила Соковикова, Калыкъёслэн Эшъяськон юртсылэн кивалтӥсезлэн воштӥсез Татьяна Федорова, Удмурт Элькунысь пор калыклэн национально-культурной автономизылэн кивалтӥсез Анатолий Радыгин, «Алнаш ёрос» муниципал кылдытэтлэн тӧроез Виктор Бобров.

Охотничий гурт (пор нимыз Изи маскиял)бадӟым ӧвол- 10 корка гинэ, озьы ке но татын улисьёс мыло-кыдо пырисько Семыкез дасянэ.

Алнашын кенешемзы бере, праздникез ортчытонъя оргкомитет тодматскиз шулдыръяськонэз ортчытон интыосын. Али Охотничий гурт дорысь одӥгаз бусыын липем сцена пуктэмын ини. Отын 3-тӥ инвожое, Семыклэн нырысетӥ нуналаз, пор эктонъёсъя мастер-класс ортчытыны чакламын. Со понна юри Марий Элысь ӧтемын тодмо артистъёс – Сергей Пакеев но Раиса Данилова. Та нуналэ ик Варали гурт дорысь кызьпу арамаын вӧсяськон ортчоз. Озьы ик чакламын этнодискотека ортчытыны (Охотничий гуртын)

Элькун шулдыръяськонэз сиё-дано усьтозы 4-тӥ инвожое 11 часын. Котьку сямен ик, ортчозы воргоронъёс куспын «МАРИЙ ПАТЫР» но нылкышноос куспын «УСТА ПАМПАЛЧЕ» нимо ӵошатсконъёс. Ужалозы элькунысьтымы устоочиослэн киужъёсынызы адӟытон но пӧртэм площадкаос.

Элькун шулдыръяськон чотын Семык кызь одигетӥ арзэ радъяське ни. Ужрадэз дасясьёс верамъя, туэ нимысьтыз саклык висъяськоз пор калыклэн пӧйшуран сям-йылолъёсызлы но вашкала ӵыжы-выжыосты сӥлы каронлы.

Дом Дружбы народов
Добавить комментарий