Кык дипломен пусйизы «Удмуртия» книгапоттоннилэсь ужъёссэ Туркменистанын калыккуспо ярмаркаын

Адӟытон-вузкарон но конференци 16 кунъёсысь издательствоосты люказ. Георгий Грязевлэн верамезъя, соос пӧлын Австриысь, Азербайджанысь, Китайысь, Пакистанысь, США-ысь, Турциысь, Франциысь, Россиысь 30 пала но Туркменистанысь 58 книгапоттонниос вал.

“Ми нырысьсэ пыриськимы тӥнь та конкурсэ, ум тодӥське вал кыӵе зэмос куронъёсыз. Ми нуимы сыӵе книгаосмес, кудъёсыз возьмато асьме республикамылэсь чеберлыксэ, асьме республикамылэсь узырлыксэ, калыкез”, – вера  Георгий Грязев, «Удмуртия» книгапоттонниысь валтӥсь редактор.

Ужрадын «Удмуртия» книгапоттоннилэсь «Удмурты: тайна тамги» но «Музей-заповедник «Лудорвай» книгаоссэ пусйизы.

Георгий Грязевлэн кылъёсызъя, дунъясьёс «Удмурты: тайна тамги» книгалэсь калыклы лыдӟымон, валамон луэмзэ пусйизы. Вунэм темаез, кыӵе луэ тамга, усьтыны, аспӧртэмлыксэ возьматыны быгатӥды шуизы. Нош «Музей-заповедник «Лудорвай» книгаез – калыкъёслэн эшласькемзы сярысь, калыкъёсын ӵош улыны быгатэмзы сярысь туспуктэмъёсын, суредъёсын возьматэм понна.

 

Контентмейкер, мемолог и журналист

Дом Дружбы народов
Добавить комментарий