«Куара вера» – удмуртлык сярысь вакчи лекциосын ӝыт ортчоз Ижкарын

«Куара вера» – со удмуртлык сярысь вакчи лекциосын ӝыт. Отчы пыроз ваньмыз, мар удмурт лулчеберетэн, туала удмурт обществоен, удмуртъёслэн ортчеменыз герӟаськемын но мукетыз. Та милям нырысетӥ таӵе ужрадмы, кудӥз мерлыко вотэслэн инъетысьтыз потӥз но зэмос улонэ пыӵа ини. Та дырозь «Куара» тросгес туала удмурт медиа сямен ужаз», – вера Владислав Степанов, «Куара» огинлэн кивалтӥсез.

Владислав Степановлэн верамезъя, таӵе лекциосын ӝытъёс али быдэс дуннеын вӧлмемын, нош удмуртлыкен, удмуртъёсын, удмурт кылын герӟаськем площадка ӧй вал на.

Лекторъёс луозы:

Наталья Дмитриева – Ижысь Столичной лицейысь историяя но обществозания дышетӥсь, удмуртлыкез азинтӥсь, пӧртэм удмурт но фин-угор проектъёслэн авторзы.
Со удмурт кылын вералоз, кызьы будэтоно нылпиез карын. Наталья – трос нылпиё анай, соин умой тодэ, кызьы кык кылын вераськись пиналъёсты будтоно.

Дарали Лели – егит прозаик но драматург, дизайнер, Арт-резиденциысь удмурт проектъёслэн кураторзы.
Берло дыре Дарали пыр-поч басьтӥськиз театр борды. Со ЮМОК театрлэн кылдытӥсез но кивалтӥсез луэ, режиссёрлэсь но артистлэсь ужъёссэс эскере. Дарали Лели вераськоз удмурт драматургия сярысь.

Богдан Анфиногенов – егит кылбурчи, кырӟась, удмуртлыкез азинтӥсь, Эшъяськон юртысь ӧнерчи.
Богдан трос тырше “Вконтакте” бамез удмурт кылэ берыктон понна, ӝытамы со вералоз та ужез сярысь: малы, кинлы со кулэ но кызьы берыктон уж нуиське.

Елена Ильина – Кузебай Герд нимо гимназиысь дышетӥсь, блогер.
Елена вералоз удмурт кылын Инстаграмлэн аспӧртэмлыкъёсыз сярысь, сэрттоз-пертчоз солэсь туала туссэ. Со сяна, куд-ог дэмланъёс сётоз Инстаграмын аккаунтэз тунсыко но адӟымон карон пумысен.

Александр Митряков – археолог, история наукаосъя кандидат.
Александр вералоз, кызьы вашкала адямиос улӥзы шаерамы вакытэ, кудӥз сярысь нокытын гожтыса кельтэмын ӧвӧл.

 

Контентмейкер, мемолог и журналист

Дом Дружбы народов
Добавить комментарий