«Кинолэн уез» огъяросси ужрад Удмуртиын 81 интыын ортчоз

“Удмурт Элькунъя ваньмыз 81 площадка ялэмын, со пӧлысь 13-ез инбам улын но 68-эз липет улын. Со элькунысь лулчеберет юртъёс, лыдӟиськонниос, озьы ик паркъёс но музейёс. Фильмъёсты интыысь дыръя 20 часысен возьматозы”, – ивортэ Удмуртиысь Лулчеберетъя министерстволэн пресс-службаез.

Ужрадэ пыриськись интыослэсь лыдметсэс министерстволэн сайтысьтыз учкыны луоз.

Тодэ вайытом, ужрадлы фильмъёсты быръён понна кунын куара сётон ортчытӥзы. Йылпумъянъёсъя нырысетӥ интыосты басьтӥзы Андрей Волгинлэн «Балканский рубеж» (16+), Евгений Бедаревлэн «Домовой» (6+) но Илья Куликовлэн «Полицейский с Рублёвки. Новогодний беспредел» (16+) фильмъёссы.

Лулчеберетъя одӥгезлэн тужгес тодмо ужрадлэн ужпумез – росси кинематографлы юрттон но вӧлмытон

«Кинолэн уез» ужрадэз Россиысь Лулчеберетъя министерство, Киноя фонд но Россиысь лулчеберет кылёсбуръя но йылолъёсъя «Культура.РФ» портал радъяло, Удмуртиын – элькунысь Лулчеберетъя министерство.

Ватсалом, али Удмуртиын 8 кинозалъёс ужало. Арнялы быдэ соос Россиысь но кунгожсьӧрысь фильмъёсты возьмато. «Культура» йӧскалык ӵектос улсын 2019-тӥ ар пумозь эшшо 4 кинозалъёс усьтозы – Глазкарын, Сарапулын, Кизнерын но Ярын, оглом 20 миллион манет тыр.

https://udmurt.media/udm/news/kultura-i-turizm/63081/

 

Контентмейкер, мемолог и журналист

Дом Дружбы народов
Добавить комментарий