Калыкъёслэн эшъяськонзылы сӥзем «Бай-Тэрек» калыккуспо фестиваль ортчоз Алнаш ёросын

Фестиваль туэ нырысьсэ ортчоз но этнофутуристической ним нуллоз.

«Этнофутуристической – малы ке шуоно отчы пыриськозы суредасьёс. Малпамы вал Удмуртиысь но, Эстониысь но художникъёс, кудъёсыз перформансъёс возьмато, мар ке но выль лэсьто. Декоративно-прикладной центрысь Алнашысь тоже мастер-художник пыриськоз. Кыӵе ке но объект лэсьтоз. Коръёс дасяны косэм», – вера фестивальлэн огез радъясез, Байтэрекысь лыдӟетъюртысь валтӥсь библиотекарь Алевтина Тарасова.

Алевтина Тарасовалэн кылъёсызъя, фестиваль эшъяськонлы сӥземын, нырысь ик сету но удмурт калыкъёслэн.

«Милям эшъяськонмы кутскиз 2004-тӥ арысен, куке Юрий Николаевич Лобанов радъяз вал татын Байтэрекын «Юр-Яр» фестиваль. Со тоже вал этнофутуристической калыккуспо фестиваль. Тӥни отысен ми сетуосын тодматским – ми, Тарасовъёс, но сету семья. Озьы милям потӥз кык семьяысь калыкъёслэн эшъяськонзы. Ми доры туж трос калыкъёс, сету коллективъёс вуылӥзы ини», – шуэ Алевтина Тарасова.

«Бай-Тэреке» пӧртэм интыосысь 21 коллективъёс вуозы.

Фестивалез усьтон дыръя возьвылын бадӟым круген бергаса шудон радъялозы. Ужрадэ пыриськисьёс кык круге султозы но пӧртэм калыкъёслэн – поръёслэн, удмуртъёслэн, бесерманъёслэн, сетуослэн – крезьгуръёссы улсын бергалозы но крезьгур дугдон вакытэ вадьсазы тупам адямиосын тодматскозы.

Фестиваль улсын коллективъёслэн возьматонъёссы, калык шудонъёс, шулдыръяськонъёс радъяськозы. Со сяна, Эстониысь куноосын но Ижкарысь «Мадён» группаен Татарстанысь Огырчи ёросысь Варклед-Бӧдья гуртэ, Удмуртиысь «Лудорвай» музее, Можгае но Можга ёросэ вуылозы. Радъясьлэн кылъёсызъя, соос отын ас лулчеберетэнызы тодматозы.

https://udmurt.media/udm/news/kultura-i-turizm/58981/

 

Контентмейкер, мемолог и журналист

Дом Дружбы народов
Добавить комментарий