Йӧскалык модая «Чильтыр-вальтыр» вожвылъяськонэ пыриськыны ӧтё Удмуртиысь вуриськисьёсты

Та нуналлы ужрадэ пыриськон понна Можгаысь, Ижкарысь, Можга ёросысь 10 вазиськонъёс вуизы ини. Со сяна мукет ёросъёсысь мылкыд карисьёсты но возьмало на.

“Ми татчы ӧтиськомы гуртысь огшоры вуриськисьёсты. Со вуриськисьёс-ӧнерчиос ӧвӧл, огшоры гуртын улӥсьёс, гурт возёсъёсын ужасьёс, не профессионалъёс. Асьмеос дышемын ини ӧнерлыко дизайнеръёслэсь учкыны, мастеръёслэсь. Нош татчы, кин сыӵе киужен выре, яратэ, соосты ми ӧтиськомы”, – вера  Можга ёрос администрациысь лулчеберетъя, спортъя но егитъёсын ужан политикая управлениысь ӧнерчи Надежда Сапожникова.

Вожвылъяськонэ пыриськисьёс понна таӵе номинациос луозы:

– «Этнографи костюм»;

– «Туала авторской костюм»;

– «Сцена вылэ потан костюм»;

– «Нуналлы быдэ нуллон костюм».

Котькуд дизайнер аслэсьтыз бичетсэ возьматоз. Бичетэ ӧжытэз вить модель пырыны кулэ.

Дизайнеръёслэсь вурем дӥсьёссэс «Катар» студиысь но «Шунды» огазеяськонысь егитъёс возьматозы.

Со сяна, вожвылъяськонэ пыриськытэк, асьсэлэсь бичетъёссэс ачиз Надежда Сапожникова, Можга ёросысь киужъя центр но «Милица» салон возьматозы.

Вожвылъяськонэ пыриськон куронъёсын положениез лыдӟыса пыр-почгес тодматскыны луэ.

Ужрад 8-тӥ куарусёнэ 11 часын Кватчи гуртысь лулчеберетъя юртын ортчоз.

https://udmurt.media/udm/news/kultura-i-turizm/63634/

 

Контентмейкер, мемолог и журналист

Дом Дружбы народов
Добавить комментарий