Итчи-Докъя гуртысь суредась

Юлия Софронова 40 ар ни школаын покчи классъёсты дышетэ. Вань мылкыдзэ сётэ ужезлы. Но вань на солэн эшшо одӥг ужез, кудӥзлы сётэ вань сюлэмзэ, со – суредаськон. Пичи дырысеныз ик Юлия кыстӥськиз та ӧре.

«Мон бадӟым семьяын будӥ, атайтэк, – шуэ суредась. – Рос-прос суредаськон арбериосы но ӧй вал, собере педучилищеын, пединститутын дышетскон аръёс – дыр ӧй вал, нош бӧрысь нылпиосы вордскизы – суредаськон чылкак вунӥз, шуыны луоз. Али гинэ, арлыды йылыса, ганяк суредаськыны кутски».

Нимысьтыз художниклы дышетскытэк но, Юлия Софроновалэн вордӥсько зэмос суредъёсыз. Соос удмурт шӧмын пыӵамын.

«Мон ӵемгес суредасько коркаосты, писпуосты, – шуэ Юлия Николаевна. – Нош адямиосты суредаме уг поты, уг но быгатӥськы. Суредаськыкум мон шутэтскисько. Вань малпанъёсы быдэстоно ужам выжо, сюлмаськонъёсы но вуно кадь, мылкыды но капчи луэ. Суредъёсме нырысь ик возьматӥсько кузпалэлы, собере ӵош ужан эшъёсылы но дышетоно пиналъёсылы. Соос ваньзы ушъяло, мылкыдме ӝуто».

Итчи-Докъя гуртын Юлия Софроновалэн адӟытонэз нырысетӥез. Суредъёызлы синмаськыса, гуртысь пенсионеръёслэн но мылкдзы бурдъяськем, ноку вырымтэ удысэ вамыштэмзы потэм.

«Табере мон соосты суредаськыны дышетӥсько, – азьланьтэ Юлия. – Котькуд пятницае люкаськиськом, суредаськиськом. Мойыослы, аслым кадь ик, гуртъёсты, инкуазез суреданы кельше».

 

Контентмейкер, мемолог и журналист

Дом Дружбы народов
Добавить комментарий