Искусствоосъя нылпи школаосысь 10 дышетскисьёсты  «Наследники» элькун премиен пусйизы

Искусство удысын бадӟым вормонъёс баьстэм нылъёслы но пиослы данъетъёсты сётъяз элькун кивалтэтлэн тӧроезлэн воштӥсез Анастасия Муталенко.

Искусствоя элькун нылпи школаын дышетскись Ольга Байсароваез «Вокальное исполнительство» номинациын пусйизы.

«Мон „Фольклоре“ ветлӥсько, быгатӥсько шудыны крезен, фортепианоен но кӧня ке гармошкаен. Алигес ми Москвае ветлӥм, „Союз талантов России“ конкурс вал, нырысетӥ инты басьтӥм. Собере татын Ижкарын вал конкурс, „Зарни Пилем“ нимаське вал, отын гран-при басьтӥм» — шуиз Ольга Байсарова.

Солэн фольклоръя дышетӥсез Юлия Павлова верамъя, Ольга туж тыршись нылаш, со котьку занятиослы дась, кырӟанъёсты но, эктонъёсты но ӝоген дышетэ, туж мыло-кыдо, вань сюлэмзэ поныса, ужрадъёсы пыриське.

«Со сямызъя ик мукет нылаш. Со туж ас калыкезлы матын, мон шуысал. Со ачиз но куке вералляз, пичигес дыръяз кылылӥз пересьёслэсь кырӟанъёссэс, вашкала гуръёсты, со туж кельшем солы. Солы синмызъя ик келеше та крезьгур», – вераз Юлия Павлова.

Дышетӥсь пусйиз, Ольгалэсь кырӟан борды кыстӥськемзэ анай-атаез адӟизы но дурбасьтӥзы шуыса. Нылашлэн анаез Светлана Байсарова верамъя, соос пичи гуртын уло бере, Ольгалэсь быгатонлыксэ азинтон понна вить ар талэсь азьло сое Ижкаре келяны малпазы.

«Со пичи дырысен кырӟаса ветлэ ни вал. Татчы лыктӥм (Ижкарысь Искусствоя элькун нылпи школае — ред.), татын дышетскиськом ини 5 ар. Умой ваньмыз солэн, тырше туж. Туж капчиен уг сётӥськы, дыр, всё равно тыршыны кулэ» — шуиз Светлана Байсарова.

Удмуртиысь лулчеберетъя но туризмъя министр Владимир Соловьёв верамъя, талантэз пичи дырысен ик шедьтыса будэтоно. Солы ӟеч кылъёс вераськод, грамота, пичияк коньдон сётӥськод ке, нылпилэн азьланяз но искусствоен вырыны мылкыдыз ӝутске.

«Куке удысужлыко коллективъёсы асьмелэн будэтэм нылъёс но пиос берытско, мыным со кык-куинь поллы бадӟымгес шумпотон луэ. Тани туннэ кырӟанъёс вал. Удмурт кырӟанъёс но, бигер но, ӟуч но кырӟанъёс тросгес ке чузъяськизы, асьме лулчеберетмы но огъя ӝутӥськоз», – шуиз Удмуртиысь лулчеберетъя но туризмъя министр Владимир Соловьёв.

Тодэ вайытом, «Наследники» элькун премиез Удмуртиысь кивалтэт 2009-тӥ арын юнматӥз. Со дырысен арлы быдэ искусствоя школаосын дышетскись 10 устооссэ пиналъёсты пусъё. Премиез туннэ басьтэмъёсын ӵош огъя лыдзы 90-озь вуиз ни.

Ватсалом, сӥё-дано ужрадын эшшо кык адямилы Геннадий Корепанов-Камский нимо стипендиос сётӥзы, искусствоя школаосын ужась дышетӥсьёсты сӥлы каризы.

http://udmurt.media/udm/news/kultura-i-turizm/25340/

Контентмейкер, мемолог и журналист

Дом Дружбы народов
Добавить комментарий