Ижын возьматӥзы удмуртъёслэн вӧсяськемзы сярысь кино

«Удмурт дунне» газет ивортэмъя, та фильм лэсьтэмын Башкортостанысь Татышлы ёросысь Бальӟуга гуртын. 60 аръёс ӵоже отысь Назип Садриев бадӟым нуналъёсы, праздникъёсы вӧсяськиз. Элен вӧсъёсты утемез но азинтэмез понна кылем арын солы Эстониысь «Дунне писпу» премия сётэмын вал. Кӧня ке аръёс талэсь со дышетӥз Фридман воргоронэз. Фильмын арлыдо вӧсясь учке чакла, кызьы вӧсез ортчытэ солэн дышетэм адямиез.

– 24 арам куриськыны башлай (кутски), — вера Назип Садриев. — Первой 2 арзэ монэ пересьёс кеньыр октытӥзы, 3-тӥ араз валэз, пе, кыткыса вай. Шыд пӧзьтӥм но, куриськеммес казыр кылзӥськыса, пе, кылльы. Тусьты кутытӥзы, киям тусьтые куаляса (куалекъяса) улэ. Уромъёс (эшъёс) шуо: тусьтыед, индэ, усёз киысьтыд. 4-тӥ араз куриськись пересьёс висьыны башлазы, сӥзьылаз кыкназы ик кулыса кошкизы. Огнам  кыли ук, ярам, куриськемзы йырам пыриз вал ни. Гуртъёс табере шуо, куриськыны, пе, вакыт вуиз ни. Уром утчаны мынӥ но, огез — юэмын, мукетыз — бла-бла-бла, юэмын. Лучше огнам курисько, шуи! Ой, рахмат, рахмат, шуо пересьёс.

Бальӟюгаын та дырозь но курисько на. Но азьвыл кадь уг ни — сьӧд ыжез Му-Кылчин понна, тӧдьы ыжез Югыт дунне понна, нош ӟазег-ӵӧжез улэп макеос понна уг вандыло ни, тӧдьы ыжез гинэ курбонлы ваё. Назип Садриев ас гумыраз олокӧня куриськисез дышетӥз ни, али но со доры, визь-кенеш юаса, ветло на.

— Татышлыын азьвыл Мӧр (бадӟым) вӧсь вал, отчы 12 гурт лыктэ вал. Но со интые нефтекачалка пуктӥзы. Табере ми Мӧр вӧсез Выльгуртэ тупатӥм, — вераз воргорон.

 

Контентмейкер, мемолог и журналист

Дом Дружбы народов
Добавить комментарий