Ижкарысь вить воргоронъёс Удмуртилэсь куншетсэ Россиысь тужгес ӝужыт гурезь йылъёсы пуктыны малпало

«Ми Удмуртилэсь куншетсэ Россиысь тужгес ӝужыт гурезь йылъёсы тубытыны малпаськомы. Тросэз соос 5 сюрслэсь ӝужытэсьгес, ваньмыз сямен Кавказын. Озьы милям элькунмы пала саклыкез кыскеммы, асьмедыз спортсменъёсты сямен возьматэммы но пӧламы калыкез кыскеммы потэ», — вераз ӵектосэз радъясь Артём Шутов.

Кутсконэз 14-тӥ пӧсьтолэзьлы чакламын, нырысь ик мынозы Кабардино-Балкарие, Безенги ёросэ.

«Милемын ӵош мынӥсьёс — со 28 но солэсь трос аресъем спортсменъёс. Командаямы вить адями луоз. Со агай-вынъёс Дмитрий но Денис Ильиных, Михаил Горбачёв, мон но милемын мынэ эмчи Михаил Зимин. Али ми кык туж тодмо гурезь йылъёсты вормыны малпаськомы — Дыхтау но Мижирги. Тросэз пятитысячникъёс со ёросын ни. Кавказ, Казбек, Эльбрус. Отчы ми таяз сезонэ вуылыны малпаськомы. Вуонояз — Камчатка но Белуха. Куинь арскын 10 гурезь йылъёс. Куазь бен воштонъёс пыртэ», — вераз Артём Шутов.

Альпинистъёс ӵектоссэс Быдӟым Вормонлы 75 ар тырмонэз пусъёнлы йылпумъяны чаклало.

«Со дырлы Россиысь тужгес ӝужыт гурезез — Эльбрусэз — вормеммы потэ. Оскисько, 9-тӥ куартолэзе ми быгатомы Удмуртилэсь куншетсэ солэн шундыпуксён палысьтыз йылаз ӝутыны», — веразы альпинистъёс.

Ужбергатӥсь альпинизмен «висьыны» кутскиз 10 ар талэсь азьло. Артём Шутовлэн верамезъя, со Россиысь тужгес кужмо альпинистъёсын трос тунсыко интыосы ветлӥз ни, озьы ик со Сергей Сумберглэсь (Нефёдовлэсь) альпинизмъя но гурезьёстӥ ветлонъя школазэ ортчиз.

Михаил Горбачёв альпинизмен кык арлэсь тросгес выре. Тренеръёслэн верамзыя, вакчи дыр куспын со умой быгатонлыкъёс басьтӥз.

«2015-тӥ арын отпускме кызьы ке тунсыко ортчытэме потӥз, «Энергия» клубен Крыме мынӥ. Монэ соку ик кыскиз. Туж кельшиз, мон валай, соин выреме потэ шуыса», — тодаз вае альпинизмен тунсыкъяськись.

Та дыре альпинистъёс тренировкаосы ветло, радъян ужен выро но спонсоръёсты утчало.

http://udmurt.media/udm/news/obshchestvo/20856/

Контентмейкер, мемолог и журналист

Дом Дружбы народов
Добавить комментарий