Ижкарын 22-тӥосыз Герд лыдӟонъёс ортчизы

«Туж кулэ юанъёсты туннэ сэрттӥм-пертчим, – шуэ «Удмурт кенеш» огазеяськонлэн тӧроез Татьяна Ишматова. – Кызьы Кузебай Герд – ачиз туж егит ай – но сюлмаське вал ини пӧртэм удысъёсын егит кадръёсты дасян бордын. Со тема туж актуальной луиз туннэ ми понна. Асьмеос но малпаськыны кулэ кызьы дышетыны, кызьы будэтыны егит тодосчиосмес, кивалтӥсьёсмес, кылбурчиосмес но гожъяськисьёсмес».

Ӵапак та темаез эскере педагогика тодосъя кандидат Валентина Ившина. Кызьы Кузебай Герд школа дорозь учреждениосын, нылпи юртъёсын удмурт кадръёсты дасянъя уж нуэ. Со одӥг аръем курсъёс усьтэ, дышетӥсьёсты дасясь вань 5 техникумъёсын дошкольной ёзэтъёс усьтыны кичӧлтись луэ.

«Герд шуэ, удмурт пиналъёсты одно ик дышетыны кулэ удмурт кылын. Соос ӟуч кылэз умой уг валало. Нош удмурт кылын дышетон понна сыӵе кадръёс кулэ, кудъёсыз удмурт кылэз валало но валтӥсез – удмурт пиналлэсь психологизэ валало», – шуэ Валентина Ившина.

Герд лыдӟонъёсын Кузебай Герд нимо йӧскалык премилэсь 2018-тӥ ар понна лауреатъёссэ пусйизы. Данъетэз Удмуртиысь калык суредась Семён Виноградов но Грак ёросысь депутатъёслэн кенешсылэн тӧроез Михаил Крестьянинов басьтӥзы.

Семён Виноградов – Россиысь но Удмуртиысь суредасьёслэн огазеяськонъёссылэн ёзчиез. Можгаысь педучилищеын но Казаньысь художественной училищеын дышетскиз, собере тодон-валанъёссэ Москваысь Василий Суриков нимо художественной институтын будэтӥз. Ӵапак со Удмурт кун университетын живописья кафедра кылдытытӥз, татын ик профессорозь будӥз. Тужгес тодмо суредъёсыз Удмуртиысь Суредан устолыкъя музейын утисько. Озьы ик ужъёсыз Францие, Китае, Америкае, Саудовской Аравие нуэмын. Семён Виноградов 18 пумо удмурт дӥськутэз улӟытӥз.

Михаил Крестьянинов – 20 ар пала Грак ёросысь «Родина» возёсын ужаз, нырысь инженер луыса, собере тӧроез вал. Кивалтон дыръяз бадӟым саклык висъяз гуртоослэсь улонзэс умоятонлы, озьы гуртъёсын спортзал, нылпи садъёс пуктӥзы, вакчи дыр куспын ньыль гуртэ чагыр эстӥськон пыртӥзы. Берло аръёсы Михаил Крестьянинов Грак ёросысь депутатъёслэн кенешенызы кивалтэ.

Контентмейкер, мемолог и журналист

Дом Дружбы народов
Добавить комментарий