Ижкарын “Удмурт нылкышно кенеш” огазеяськонлэн конференциез ортчиз

Туннэ нуналлы «Нылкышно кенешлэн» ёзэтъёсыз кылдытэмын 13 ёросъёсын, Вотка но Можга каръёсын. Берло 4 ар ӵоже движение нимысьтыз саклык висъяз удмурт семьяен ужанлы, анайлэсь данлыксэ вӧлмытонлы, анай-атайёслы но пиналъёслы удмурт кылэз гажан мылкыд пыӵатонлы.

Вера «Удмурт нылкышно кенеш» огазеяськонлэн тӧроез Надежда Степанова:

«Ивор вӧлмытон ёзъёс пыр данъяно семья кусыпъёсты но тазалыко улонэз. Трос нылпиё но ёрмыса улӥсь семьяослы юрттэт сётонъя ужрадъёс но проектъёс чаклано. Министерствоосын но ведомствоосын, интыосысь ас кивалтэтъя ёзъёсын ӵош радъялляно гуртъёсысь нылпиосты эмъянэз, Удмурт Элькунысь кивалтэтэ вазиськоно гуртъёсын ФАП-ёс усьтыны, медикъёсты кутыны курыса»

Туннэ удмурт нылкышно движениен кылдытэм тросэз проектъёс – нылпиослы чаклам "Шудон корка", бадзымъёслы "Табань клуб" вӧлмемын но ужало тросаз ёросъёсын. Каллен улонэ пыӵало выльёсыз но. Соос пӧлын "Удмурт кыл муниципал кылдытэтъёсын" грант утэм ӵектос. 
Вера «Удмурт нылкышно кенеш» огазеяськонлэн ёзчиез Людмила Чернова:
«Та проект улсын Ижкарысь 97 номеро школаысь, Хохрякиысь, Пичи Пургаысь пиналъёс нырысетӥ классэ мынӥсь пиналъёс дышето удмурт кылэз. Со туж пусйымон, малы ке шуоно али гинэ школае мынэм пиналъёс удмурт кылэн ке пумисько, удмурт кылэз ке дышетыны кутско соослэн удмурт кыллы гажанзы, тунсыксы тросгес луэ».

Огазеяськонлэн азьпалан ужпумъёсыз озьы ик кыле – анай кылмес утён, сое пиналъёс пӧлы вӧлмытон. Матысь аръёсы «Удмурт нылкышно кенешен» кивалтыны люкаськемъёс нош ик оскизы Надежда Степановалы.

Дом Дружбы народов
Добавить комментарий