Ижкарын пусйизы выль емышъёслы сӥзем «Виль» шулдыръяськонэз

Сяме пыӵам ужрадэ озьы ик вуизы карлэн, удмуртъёслэн йӧскалык огазеяськонъёссылэн кивалтӥсьёссы.


Ижкарлэн тӧроез Юрий Тюрин, Йӧскалык политикая министрлэн воштӥсез Людмила Соковикова, Ижкарысь Индустри ёрос администрацилэн тӧроез Любовь Зайцева, «Удмурт кенеш» огазеяськонлэн кивалтӥсез Татьяна Ишматова, историяя, кылъя но литературая Удмурт институтлэн кивалтӥсез Алексей Загребин, Кун Кенешысь депутат Андрей Ураськин вазиськизы люкаськем калыклы ӟечкыласа но котькуд нуналлы ӝӧк тыр сиён-юонъёс сӥзыса.

Людмила Соковикова пусйиз, макем узыр удмуртъёслэн лулчеберетсы, чебер кылзы. «Та праздник аспӧртэм удмурт йылолъёсты мургес валаны луонлык сётэ. Озьы ик со калыкъёслэсь кусыпъёссэс юнматыны юрттэ, угось та шулдыръяськонэ удмуртъёс гинэ ӧвӧл, шаерамы улӥсь мукет выжыысь калыкъёс но лыкто. Ӵошен ужан но ӵошен шулдыръяськон калыкъёсты огазея, соин ик таӵе ужрадъёс милемлы туж кулэ», — вераз Соковикова.


Собере выль бакча сиёнъёсты но емышъёсты, выль ӝукез вӧсян ортчиз. Вӧсясьёс инмаръёслы тау карон кылъёсын вазиськизы. Ог-огзэс вошъяса, сцена вылэ потазы творчествоя коллективъёс, эстрадаысь яратоно артистъёс. Пӧсь ужан нунал бере, писпуослэн саюлазы, салкым вож гуждор вылын шулдыръяськонъёс, шудонъёс ӝытозь кыстӥськизы. 

Тросгес туспуктэм: https://vk.com/album-6721781_234823452

Дом Дружбы народов
Добавить комментарий