Егитъёслэн этнокультуразыя «Палэзян» 7-тӥез Калыккуспо финн-угор фестиваль

Финн-угор мифологиын, осконын, фольклорын палэзь туж паськыт кутӥське. Фестивалез радъясьёслэн верамзыя, со ӵыжы-выжы калыкъёсты огазеясь пус. Праздник финн-угор калыкъёслы удмурт шаерын пумиськыны муг луэ.

Туэ фестивале Венгриысь, Марий Элысь, Мордовиысь, Комиысь но Удмуртиысь творческой коллективъёс люкаськозы. Соос туала этнокультуралэн пӧртэм ӧръёсызъя быгатонлыкъёссэс возьматозы.

Фестивальлэн трос но турлы площадкаосыз ужалозы – мастер-классъёс, быгатонлыкъёсъя лаборатоийёс, концертъёс, тетр возьматонъёс, пресс-конференциос, крезьгурасьёслэн, кырӟасьёслэн, суредасьёслэн этнофутуризмъя перфомансъёссы, финн-угор эктонъёсъя ӝыт но мукет.

18-тӥ коньывуонэ 16 часын Калыкъёслэн Эшъяськон юртазы туала этномодалы сӥзем нырысетӥез котырес ӝӧк ортчоз. Сое нуоз модая «Ажиотаж» агентстволэн директорез Олег Ажгихин но удмурт дизайнер Полина Кубиста.

18 часын  Григорий Степановлэн туспуктэмъёсъя «Мукет адӟон. Другое Измерение» адӟытонэз ужаны кутскоз. Озьы ик Ксения Чимали Ворончихиналэн горд сюен быдэстэм ужъёсыныз но туспуктэмъёсыныз «Бус.Туман» адӟытонэз усьтӥськоз.

19 часын Комиысь, Марий Элысь, Пермь улосвылысь но Удмуртиысь туала дизайнеръёс  «Палэзян. Этномода» коллекцизэс возьматозы.

19-тӥ коньывуонэ фестиваль улсын юри ӧтем куноос пӧртэм интыосын пумиськылонъёс ортчытозы – Венгриысь мадьяр «Magyarhang»  ансамбльысь артистъёс Ижкарысь 11 номеро школаын пиналъёсты финн-угор культураен тодматозы. Со нуналэ ик «Magyarhang»  ансамбльысь артистъёс но дизайнер-модельеръёс Ижкарысь «Итеграл» лулчеберетъя юртын ИжГТУ-ысь студентъёслы асьсэлэн калык  культуразы сярысь вералозы.

19 часын Калыкъёслэн Эшъяськон юртазы «Эктон корка+» ӝыт ортчоз. Отчы пыриськоз Венгриысь «Magyarhang»  ансамбль но.

20-тӥ коньывуонэ 20 часын фестивальлэн валтӥсь ужрадэз «Палэзян» этновечеринка «Резиденция» клубын кутскоз. Отчы пыриськозы Москваысь OYME, Венгриысь «Magyarhang», Татарстанысь Shoner Paul, Марий Элысь Александр Речкин, Удмуртиысь «Малыми», «Suomi», «Post-Dukes», «Эрик» но Алексей Пикулев.

21-тӥ коньывуонэ Венгриысь «Magyarhang» ансамльысь артистъёс но туала удмурт кырӟасьёс Яр каргуртын концерт возьматозы.

«Палэзян» фестиваль сярысь ватсаса ивортон басьтыны луоз таӵе телефонъёсъя: 63-10-44, 63-10-26

Фестиваллэн вотэсбамез: http://vk.com/palezjan

 

Контентмейкер, мемолог и журналист

Дом Дружбы народов
Добавить комментарий