Даур кузьда ӵушкон

Ӵушконлэсь огшорыгес арбери ӧвӧл ни кадь, нош кыӵе кузь солэн историез. Котькуд композиция кыӵе ке вакытэз возьматӥз. Адӟытонэ быдэс ёросысь 64 ӵушконъёс люкамын вал, соос пӧртэм амалъёсын пужыятэмын, пӧлазы вань етӥнлэсь куэмез но. Тужгес вашкалаез 18-тӥ даурын куэмын вылэм. Куд-ог нылкышноос вуж арбериосты выжыысь выжые утялтыса, чакласа возё. Туж ушъямон со.

Ёросысь искусствоосъя но киужъёсъя центрын ужась методист Надежда Нагорных верамъя, адямилэн улоназ ӵушкон бадӟым инты басьтэ. Вордскем нуныез ӵушконэ бинялто, чукыно, зыбказэ но ӵушконэн шобырто вылэм, урод синъёс медаз адӟе шуыса. Армие кошкись пиослы чыртыязы ӵушкон ошо, бызьыны дасяськем нылъёс ӵушкон пужыято.

Ас ужъёсыныз паймытӥз Бертло гуртысь Нина Бобкова. Пенсие потыса, киужен вырыны кутскем, нош 70 аресэзлы 16 пумо ӵушкон пужыятыса дасям. Киужъёсыныз пӧртэм конкурсъёсы пыриське, ёрослэсь данзэ эшшо но вылӥегес ӝутэ. Мукетыз кибашлы кышномурт — Ӟуч Сармак гуртысь Татьяна Филиппова. Со но та адӟытонэ пӧртэм амалъёсын быдэстэм ӵушконъёссэ ваем.

Нимысьтыз инты висъямын вал буёлэн суредам ӵушконъёслы. Надежда Нагорных верамъя, вашкала дыръя, пе, гуртъёстӥ воргорон ветлэм, ӵушконъёс вылэ пужы пуктылыса. Та адӟытонын одӥг сэрегаз чукен ӵушконъёс вал. Нылкышноос ог-огзылэсь ӵушконъёссэс басьяло вылэм пужызэ асьсэлы кельтон вылысь. Нош киужлы син медаз усьы шуыса, чук понылӥллям.

https://udmdunne.ru/

Контентмейкер, мемолог и журналист

Дом Дружбы народов
Добавить комментарий