Глаз ёросысь Ирина Никитина финн-угор чеберлыкъя «Тыло толэзь» вожвылъяськонын вормиз

«Тыло толэзь» вожвылъяськонэ 12 чеберайёс пыриськизы, одӥгез соос пӧлысь – Татарстанысь.

Кызьы вераз Ирина Никитина, 2011-тӥ арын со асьсэ муниципал кылдытэтазы чеберлыкъя конкурсэ пыриськиз но отын вормиз вал. Со дырысен вожвылъяськонъёсы ӧз пыриськылы. «Тыло толэзе» сое кужмысь сямен мыныны косӥзы, озьы ке но егит кышномурт рос-прос дасяськыны тыршиз – оскемзэс зэматыны кулэ вал.

Нырысетӥ эскеронын нылъёс асэнызы тодматӥзы, быгатонлыкъёссэс возьматӥзы. Ирина суредаськыны яратэ бере, возьматонзэ соин герӟаз.

«Мон возьматӥ, кызьы мон чеберлыкъя быгатонлыкъёсме улонэ пыӵатӥсько. Аслэсьтым улонме буёлъёсын суредасько кадь шуыса верай. Кӧня ке эктӥмы но… Собере йылпумъян лэсьтӥ: мынам вань пиналъёсы, но мон соосты нокыӵе буёлэн возьматыны, суреданы уг быгатӥськы, малы ке шуоно ӧвӧл сыӵе буёл, сыӵе яратонэ мынам аслам нылпиосылы. Визиткае ваньмызлы кельшиз шуизы», – шуиз Ирина Никитина, «Тыло толэзь» вожвылъяськонын вормись.

Собере вожвылъяськонэ пыриськисьёс вылтуссылэсь чеберлыксэ возьматӥзы – сцена вылэ купальникъёсын потӥзы. Соос одно ик йӧскалык шӧмо луыны кулэ вал. Ирина Никитина верамъя, купальниксэ, озьы ик визиткалы дэремзэ со ачиз вуриз.

Куинетӥе эскеронлэсь пуштроссэ пыриськисьёс берло гинэ тодӥзы – соослы гидроциклэн ворттылоно луиз. Дунъясьёс дырез, уськытэм фишкаосты чаклазы.

Вожвылъяськонын вормисьлы нылкышнолы сокем ик тупасьтэм, но гуртын туж кулэ луись кузьым сётӥзы – турнан арбери.

https://udmurt.media/udm/news/kultura-i-turizm/41068/

 

Контентмейкер, мемолог и журналист

Дом Дружбы народов
Добавить комментарий