Глазкарысь пединститутын туэ удмурт кылэз дышетонъя выль группа усьтӥськоз

Удмурт кылэз тодӥсь воспитательёслы кулэяськон йылэ. Котькудаз сямен садъёсын йӧскалык компонент пыртэмен – анай кылэз, сое дышетон амалъёсты рос-прос тодӥсь визьнодасьёс уг тырмо.

Глазкарысь пединститутын туэ тодон-валан люкалозы та дыре нылпи садъёслы туж кулэ луись ӧнерчиос – удмурт кылэз тодӥсь воспитательёс.

«Пединститутамы удмурт кылъя группа кылдытон сярысь вазен ик вераськонъёс мыно ини, – шуэ Короленко нимо пединституэн кивалтӥсьлэсь ужзэ быдэсъясь Янина Чиговская-Назарова. – Уг ваты, кенешонъёсамы та ужпумъя вераськонъёс секытэн мынӥзы. Но ваньмыз радъяськиз. Ми малпаськом, ваньмыз пӧрмоз шуыса, выль группае дышетскыны мылкыд карисьёсты люканы быгатом».

Глазкарысь пединститут улонлэн куронъёсызъя ужа. Огвакытэ татын вылӥ образование сётӥзы покчи классъёсын удмурт дышетӥсьёслы. Бӧрысь потӥзы удмурт но кунсьӧр кылъёсы.

«Выль группаез йылпумъямъёс воспитательёс но удмурт кыл – литература тодметъёсъя дышетӥсьёс луыса потозы, – шуэ Короленко нимо пединститутысь дышетӥсь Ольга Никифорова. – Озьы ик луоз 2 профильем бакалавриат. Отын дышетскемъёс быгатозы нылпи садъёсын ужаны но удмурт кыллы 9-тӥ классозь дышетыны».

Выль группае 10 егитъёсты кутозы. Но пединститутын пусъё – кулэяськон бадӟымгес луиз ке, дышетскисьёслэсь лыдзэс будэтозы.  

Дом Дружбы народов
Добавить комментарий