Глазкарысь Ольга Ашихмина «Мисс студенчества Финно-Угрии – 2019» вожвылъяськонэ мыноз

«Мон удмурт кылын кырӟало. Отын сценка возьматом, мюзикллы кельше. <…> Мукет конкурсын мон легендаез верало. Мон луисько вашкала выжыысь, солэн нимыз Пельга вал. Кучыран — тотемной тылобурдо. Сое гажало но утё. Вот тӥнь та выжы сярысь верало мукет калыкъёслы», — шуэ Ольга Ашихмина.

Ольга Ашихмина финн-угор дышетсконниосысь чеберайёслэн вожвылъяськоназы нырысьсэ уг мыны: институтысьтызы азьвыл аръёсы пыриськисьёслы юрттӥсь сямен Петрозаводске, Йошкар-Олае но Сыктывкаре ветлэм ни. Конкурсэз пуш ласянь тодэмез ӟеч дасяськыны юрттоз, оске нылаш.

Тодэ вайытом, «Мисс студенчества Финно-Угрии – 2019» калыккуспо вожвылъяськон 20-24 куартолэзе Ханты-Манскийскын ортчоз. Отчы Карелиысь, Ямало-Ненец но Ханты-Манси автоном округъёсысь, Комиысь, Мордовиысь, Мрий Элысь, Удмуртиысь нылъёс пыриськозы. Удмурт кун университетлэсь данзэ утёз Юлия Сунцова. Кылем арын та дышетсконниысь Евгения Аркова конкурслэн вормисез луиз, Глазкарысь Елизавета Третьякова «Мисс вокал» ним басьтӥз.

Ватсалом, вожвылъяськон егитъёслэн «Финн-угор тулыс – 2019» калыккуспо фестивальзы улсын ортчоз. Озьы ик со улсын «Юграын финн-угор пумиськонъёс» огъяросси форум радъяськоз. Фестивальлэн ужпумез – финн-угор улосвылъёсысь вылӥ дышетсконниос куспын лулчеберет, тодос но дышетон удысын валчеужез радъян, финн-угор калыкъёслэсь лулчеберетсэс но кылъёссэс утён но вӧлмытон ужпумъёсты сэрттон-пертчон понна кужымез огазеян.

https://udmurt.media/udm/news/kultura-i-turizm/55604/

 

Поделитесь с друзьями:

Контентмейкер, мемолог и журналист

Дом Дружбы народов
Добавить комментарий