Шаерамы улӥсь пӧртэм выжы калыкъёслэсь выжыкылъёссэс пинал артистъёс удмурт кылын возьмато.Пиналъёслэсь Выжыкыл дуннеын удмурт кылын шудыны быгатонлыкъёссэс эскеризы Удмурт нылкышно кенеш огазеяськонлэн кивалтӥсез Надежда Степанова, Калыкъёслэн Эшъяськон юртысьтызы финн-угор кусыпъёсъя ёзэтысь валтись ӧнерчи Елена Келарева но Ижкарысь покчиосты школалэсь азьло визьноданъя Управлениысь ӧнерчи Галина Коренева.
«Арысь-аре пиналъёс вожвылъяськонлы ӟечгес дасясько. Визьнодасьёс но выжыкыл пуктон бордын рос-просгес ужаны кутскизы. Шумпотоно, постановкаез дасянын быдэс коллектив ужа ке – крезьгуръя ӧнерчи, хореограф но мукетъёсыз. Шӧдиське анай-атайёслэн но ужам емышсы» – пусйиз жюрилэн тӧроез Надежда Степанова.
Кема кененешемзы бере, учкем выжыкылъёс пӧлысь устоеныз жюри нимаз «Атаслэн шудэз» нимо удмурт калык выжыкылэз. Пуктӥзы сое 70-тӥ номеро нылпи садысь покчи артистъёс. Та нылпи садын удмурт кылъя кема аръёс ӵоже ужа ини Зайцева Тамара Николаевна.
Ижкарысь туэ фестивале пырисько удмурт кылэз, йылолъёсты дышетӥсь18 нылпи садъёс. Туннэ, 19-тӥ куартолэзе, 112-тӥ номеро нылпи садын люкаськозы Октябрь ёросысь покчиос.
