Венгер тодосчиос удмурт кылъя электрон учебникъёслы синмаськизы

Ужрадэ Венгриысь но Словакиысь университетъёсын венгер кылэз дышетӥсь тодосчиос но пыриськизы. Куноос удмурт кылъя электрон учебникъёслы синмаськизы, вераз институтлэн кивалтӥсез Надежда Ураськина.

Солэн кылъёсызъя, институтысь ӧнерчиос, учебникъёсты кылдытӥсьёс вуоно арын тулыс Венгрие вуылыны малпало. Отын та ужен вырисьёсын пумиськыны, учкыны, кызьы соос электрон учебникъёсты лэсьто.

«Вань электрон учебникъёсмес возьматӥмы, куинь направленизэ ик. Милемлы туж тунсыко вал, потӥмы ке, луонлык луоз-а милем авторъёсын пумиськыны Венгриын, учкыны, кызьы соос лэсьто электрон учебникъёсты. Сю юанлы Жужа (Жужанна Шаланки, философияя доктор, Будапештысь Этвеш Лоранд нимо университетысь тодосъя ӧнерчи — ред.) шуиз, милям одӥг электрон книга но ӧвӧл венгер кылын учебниклы, азьланяз со чакламын, шуиз», — вераз Надежда Ураськина.

Асьме электрон учебникъёсты гожтыса нуыны куро вылэм Словакиын ужась тодосчиос но. Со удмурт кылэз дышетыны мылкыд карисьёслы но, дышетӥсьёслы но ужаны умой луысал. «Куарусён котыр лэзём», шуиз институтлэн кивалтӥсез.

Со дыре ик асьме ӧнерчиослы но вань марлы дышетскыны кунгож сьӧрысь ужъюлтошъёссылэсь. Надежда Ураськиналэн кылъёсызъя, асьмелэн тодосъя грамматика но вуж, кыллюкамъёс но ӧжыт. Венгриын та ласянь ужзы ӟечгес азинске.

Котыре ӝӧклы йылпумъянъёс лэсьтыса, Дышетон удысысь йӧскалык ужпумъёсты тодон-экеронъя институт, но венгер дышетӥсьёс, но тодосчиос валче ужалозы шуыса кенешизы. Но Венгрие ветлыкузы, оло, тупанкыл, но юнматыны луоз.

Али институтын мадьяръёслы но, элькунмылы но тунсыко луыны быгатӥсь ӵектос кылдытон бордын ужало.

«Ми сое нырысь ик адӟиськомы, оло, кыллюкам гожтыны школалы, внеурочной ужлы, кин малпа финн-угор институтэ пырыны, соослы кылдытыны кыллюкам — удмурт но венгер, венгер но удмурт. Со школаос азе пуктэм вань куронъёсъя луоз. Кутскисьёс понна со вань, но со куронъёслы бадӟым саклык висъямын ӧвӧл. Оло, электрон кыллюкамъёс лэсьтыны кулэ. Собере авторъёсын пумиськыны быгатысалмы ке отын, школаослы книгаос гожъясь венгер авторъёсын, оло, кыӵе но концепция кылдытысалмы нылпи садлы — бадӟымгес нылпиослэн группаоссылы мар ке кылдытыны, озьы ик электрон учебник анай-атаен ужаны — венгер кылэз дышетыны но удмурт кылэз Венгриын дышетыны», — азьланезлы малпанъёссы сярысь вераз Надежда Ураськина.

Солэн кылъёсызъя, та прикладной ӧръя ӵектоссы, собере фундаментальной, тодос ӵектоссы но кылдоз, оло. Институт арлы — кык арлы одӥг пол кылъя бадӟым эскеронъёс ортчытъя. Сыӵе эскеронъёсты Венгриысь но Финляндиысь студентъёсын яке ӧнерчиосын ӵош радъяны луысал.

http://udmurt.media/udm/news/obrazovanie-i-nauka/20800/

Контентмейкер, мемолог и журналист

Дом Дружбы народов
Добавить комментарий