Василий Мустаевлэн адӟытонэз

Василий Мустаев — тодмо удмурт график но иллюстратор. Солэн ужъёсыз 150-лэсь уно книгаосты но учебникъёсты чеберъяло. Ижысь техникая кун университетысь выставкаосъя залын адӟыны луэ карандашен но буёлэн быдэстэм ужъёссэ.

Василий Геннадьевич верамъя, суредъёсыз солэн кема кылдо. Куд-огъёсыз кык арня куспын улӟо, одӥг ужзэ вить ар лэсьтэмез но вань.

– Мынам малпамея, художниклэн валтӥсь интыын луыны кулэ пуш шӧдонэз. Тодон-валан, быгатэм кулэ, но суредэз уд шӧдӥськы ке, со борды кутсконэз но ӧвӧл. Тани мон туж умой шӧдӥсько нылпи дуннеез, мифологиез, нош ож тема сярысь озьы шуэме уг луы. Мон быгато солдатъёсты, войнаез суреданы, но со лул-сюлэм пыр поттытэк, пуш куарадэ кылзытэк лэсьтэм уж луоз.

Та адӟытонзэ суредась «Кизили» журналлэн 30 ар юбилеезлы сӥзиз. Отын со 1986-тӥ арысен тырше но сое кылдытӥсьёс пӧлы пыре.

– Та адӟытон вань творчествоысьтым 1 процентэз луэ. Книгалы-а, журналлы-а суредъёс лэсь-тӥсько, нимзэ лыдӟисько ке, йырам иллюстрация кылдэ ини. «Кизилилэсь» вылбамзэ мон ачим малпасько. Кин ке шуоз: соос лэсьтэмын, удмурт мифология, калык культура вылэ пыкиськыса, мур пуштросоесь, покчи лыдӟисьёслы валамон меда? Мон уг люкиськы учкисьёсты покчиослы но арлыдоослы, малы ке шуоно вань бадӟымъёс кылдэмын пичиослэсь, ваньмы асьмеос пичи дырысь потэмын. Озьы ик ноку но уг малпаськы, кинлы ке кельшоз-а та суредэ яке уз-а. Нырысь ик, со аслым мед яралоз. Уг ке кельшы, ужме сутӥсько, со мыным люкетыны кутске. Нош асме но учкисез пӧяса ужаны мон дышемын ӧвӧл, — шуэ Василий Мустаев. 

Дом Дружбы народов
Добавить комментарий