Быдэ вуэмез пусйизы Шаркан ёросын

Алнаш, Вавож, Эгра, Шаркан, Якшур-Бӧдья ёросъёсысь но Башкириысь командаосты Мувыр Вишур гуртын улӥсьёс кылем арын кадь ик шумпотыса, пӧсь табанен, ческыт чаен но шулдыр кырӟанъёсын пумитазы.

Вожвылъяськонъёсын егитъёс возьматӥзы асьсэлэсь кужмо, чырткем но «бадӟым улонлы» дась луэмзэс. Нош квест-шудон кулэ кариз соослэсь удмурт лулчеберетэз но сям-йылолъёсты тодэмзэс.

Шулдыръяськонлы лирической мылкыд пыӵатӥз егитъёс пӧлысь тужгес но яратӥсь парез быръёнъя «Кык дыдыкъёс» вожвылъяськон. Таӵе ним басьтон понна яратӥсьёс куать эскеронъёс пыр потоно луизы. Кылсярысь, егит пиос пу пильылӥзы, нош нылъёс дась артаносты люказы. Озьы ик возьматӥзы пыжен уяны, карнанэн ву нуллыны быгатэмзэс. «Кык дыдыкъёс» ним басьтӥз Вавож ёросысь яратӥсь пар.

Вань эскеронъёс ортчем бере тодмо луиз Мувыр Вишур гуртысь егитъёслэн "бадӟым улонлы" тужгес но дась луэмзы. Вавож ёрослэн командаез кыкетӥ инты басьтӥз, нош Кам сьӧрысь, Башкириысь, егитъёс куинетӥ инты утӥзы.

Дом Дружбы народов
Добавить комментарий