Быдэ вуымтэос понна анай кылъёслы сӥзем ужрад ортчытӥзы Глазкарын

Ужрад Нылпиослы но быдэ вуымтэослы центрын ортчиз. Отчы «ХОК» коллективысь шор но бадӟым классъёсын дышетскись 50-лэсь ятыр пиналъёс пыриськизы.

Шудон но дышетон музэн Глазкарысь быдэ вуымтэос ас выжыоссы, элькунын тужгес вӧлмем кылъёс сярысь тодонлык басьтӥзы, озьы ик командаен ужаны мылкыдзэс юнматӥзы.

Ужрадын пиналъёс удмурт кылын 15 падежъёс, бигер кылын нырысетӥез книга Германиын поттэмын вал, чуваш кылын «чебер» кылэз 50 амалэн вераны луэ шуыса но трос мукетсэ тодӥзы.

“Малпасько, пиналъёслэн мар каремзы, маин тунсыкъяськемзы шоры учкытэк таӵе ужрадъёсты ортчытъяны кулэ, малы ке шуоно анай кыл – со милям калык кылёсбурмы, егитъёслы туэ кулэ ас историзэс дунъяны но гажаны”, – вера  Юлия Зорина, удмурт кылъя станциез нуись.

“Чакламмыя, пыриськисьёслэн ужрад кутскытозь тодон-валанзы туж ичи вал, но соослэн выль ивор тодыны мылкыдзы милемлы оскон сётӥз, ортчытэм конкурсъёсмы юнме ӧй вал, вордӥськем шаерзы сярысь тодон-валанзэс соос трос аръёс ортчыса но уз вунэтэ ни шуыса”, – верало  Дамир Абашев но Егор Иванов, бигер кылъя станциез нуисьёс.

https://udmurt.media/udm/news/obrazovanie-i-nauka/70284/

Контентмейкер, мемолог и журналист

Дом Дружбы народов
Добавить комментарий