Боко но Моко сярысь выль удмурт мультфильмъёс поттӥзы Ижкарын

«Шунды» огазеяськонлэн тӧроез Алина Черновалэн верамезъя, та выжыкылэз эшъяськыны дышетэмезлы, мифологиен, фольклорен герӟаськемезлы луыса бырйизы. Со сяна, тунсыко, геройёсыз мусоесь. Та выжыкылъя 9-10 минутъем одӥг мультфильм лэсьтыны чаклазы вал, но бӧрысь сериослы люкыны малпазы. Озьы Боко но Моко сярысь куинь сериен мультфильм пӧрмиз.

Мультфильмез Москваысь 1147 PRODUCTIONS компания лэсьтӥз. Нош куараосты Удмурт йӧскалык театрысь артистъёс Максим Григорьев но Иван Плотников гожтӥзы. Крезьгурзэ Анатолий Эркишев дасяз.

«Ваньмызлы конкурс ортчытэмын – геройёсты суредась дизайнерлы но, крезьгур гожтӥсьлы но, артистъёслы но. Куара гожтыны трос вазиськонъёс келямын вал, трос пӧртэм адямиослэсь. Таосыз тужгес тупамон луизы кадь», — вера  Алина Чернова.

Мультфильмъёс бордын ар ӵоже тыршизы. Али соослы ӟуч но англи кылъёсын субтитръёс дасяло.

«Эшшо та ӵектос улсын ик потӥзы кык мобильной приложениос: «Удмурт алфавит» но «Удмурт лыдпусъёс». Озьы ик пиналъёслы, мед дышетозы шуыса, удмуртлык борды мед кыстӥськозы шуыса. Со сяна ӝӧквыл шудонъёс – «Липет-кампет» но «Кучыран». Сооссэ «Удмуртия» издательство милемын ӵош поттӥз ини», — шуэ Алина Чернова.

Тодэ вайытом, ӝӧквыл шудонъёсты кылем арын куарусёнэ поттӥзы. Алина Черновалэн верамезъя, ӝӧквыл шудонъёс вань ёросъёсы лулчеберетъя управлениосы, лыдӟетъюртъёсы, школаосы но нылпи садъёсы дунтэк вӧлмытэмын луозы. Со сяна, соосты мукет улосвылъёсын улӥсь удмуртъёслы но келялозы.

Вераны кулэ, та уж «Шудком: шудыса дышетскиськом» ӵектос 2017-тӥ арын Азьмуртлэн фондысьтыз грант утэмен улонэ пыӵаз. Со сяна, солы Удмуртиысь Йӧскалык политикая министерство коньдон висъяз.

https://udmurt.media/udm/news/obshchestvo/53743/

Поделитесь с друзьями:

Контентмейкер, мемолог и журналист

Дом Дружбы народов
Добавить комментарий