Бигер шаерысь «Кенеш» огазеяськонлэн юбилеезлы сӥзем пумиськон ортчиз

Юбилейлы сӥзем ужрадэ люкаськизы пӧртэм улосвылъёсысь лыктэм куноос. «Удмурт Кенеш» ассоциацилэсь ӟечкыланы вуылӥз огазеяськонлэн вице-президентэз Алексей Серебренников, Удмуртиысь лулчеберетъя но туризмъя Министерлэн воштӥсез Пётр Данилов. Со ачиз но ӵапак Балтач ёросын вордӥськемын. Пётр Павлович удмурт огазеяськонлэн азьветлӥсьёсызлы таукаронъёс но данъян кагазъёс сётъяз.

Ветлӥзы Татарстанысь куноос: Калыкъёслэн Эшъяськон юртэнызы кивалтӥсь, Кун кенешысь депутат Ирек Шарипов, бигерысь удмуртъёслэн автономиенызы кивалтӥсь Андрей Герасимов, казах огазеяськонлэн кивалтӥсез Сагит Джаксыбаев. Соос но юбиляръёсты ӟечкылан гожтэтъёсын пусйизы.

Ужрад йылпумъяськиз «Шулдыр ӝыт» фестивальлэн гала-концертэныз.

«Удмурт Кенеш» огазеяськонлэн вице-президентэз Алексей Серебренников паймемез сярысь вера: «Балтач черкогуртысь ульчаосын одӥг кадь чузъясько удмурт, бигер но ӟуч кылъёс. Шӧдӥське, пӧртэм выжы калыкъёс ог-огзэс гажаса уло шуыса. Юбилейлы сӥзем ӝытын но сцена вылын быгатонлыкъёссэс возьматӥзы пӧртэм кылъёсын вераськись коллективъёс. Залын но пукизы Балтач ёросын улӥсь вань выжы калыкъёс. Шумпотымон, удмурт огазеяськонлы бадӟым юрттэт сётэ кызьы ёрос кивалтэт, озьы ик элькун кивалтэт но».

Вань аръёссэ «Кенешен» быгатыса кивалтэ Леонид Сапожников. Огазеяськон кичӧлтэмен, ёросысь 10 гуртъёсын удмурт коллективъёс кылдытэмын. Соос удмурт кырӟанъёсты, эктонъёсты быдэсто. Нош тужгес но данъяськымонэз луо удмурт кылъя урокъёс. Туннэ ёросысь унояз школаосын анай кылэз урок чотын дышето.

 

Контентмейкер, мемолог и журналист

Дом Дружбы народов
Добавить комментарий