Библилэн удмурт но финн-угор кылъёсын потэмезлы сӥзем ӟечлэсьтон праздник ортчиз Финляндиын

Пумиськонэз Хельсинкиысь Библиез берыктонъя институтлэн Священной Гожтэмез финн-угор кылъёсы берыктон ужез чаклась ёзэтэз радъяз.

Ӟечлэсьтон празднике Священной Гожтэмез удмурт кылэ берыктӥсь, кылосбур тодосъя доктор, протодиакон Михаил Атаманов но ӧтемын вал. 5 ар талэсь азьло канонэн юнматэм Библия потӥз, 2016-тӥ арын – канонэн юнматымтэ люкетэныз тодматӥз.

Хельсинкиын ортчем ужрадын Атаманов берыктон бордын тыршемез сярысь вераськиз но та ужын юрттӥсьёслы тау кариз.

“Удмуртъёс – Россиын витетӥез калык (ӟучьёс, чувашъёс, тувинецъёс, чеченецъёс бере), кудӥзлэн анай кылын Библиез кылдӥз. 2016-тӥ Библилэн канонэн юнматымтэ люкетэныз тодматон ортчиз. Собере удмуртъёс луизы Россиысь ӟуч луисьтэм калыкъёс пӧлын нырысетӥосыз, кинлэн быдэс Библиез удмурт кылын вань”, – вера Михаил Атаманов, Библиез берыктӥсь.

Озьы ик со пусйиз, берыктэм Библиын удмурт кыллэн вань узырлыкез адӟиське шуыса. Уже кутэмын пӧртэм кылъёсысь асэстэмъёс, озьы ик чылкак выль кылъёс но малпано луиз. Кылсярысь, Кузё-Инмар – Господь, курон-косон – заповедь, дун-чылкыт – чистый, непорочный, святой но мукет.

Михаил Атаманов озьы ик ас калыкезлы тау кариз. Солэн кылъёсызъя, канонэн юнматэм Библиез поттыны кулэ луись коньдонлэсь 80 процентсэ удмурт христианъёс сётӥзы, нош канонэн юнматымтэезлы – 100 процентсэ. Со бадӟым лыдпус – 2 миллион 800 сюрс манет.

Тодэ вайытом, Михаил Атаманов Библиез берыктон бордын 25 ар ужаз. Ивортодэтъя «Удмуртия» агентстволэн корреспондентэныз вераськонын со пусйиз: «Библиез одӥг кылзэ но воштытэк берыктыны кулэ, сотэк Инмарлэсь вӧськарон басьтод».
Поделитесь с друзьями:

Контентмейкер, мемолог и журналист

Дом Дружбы народов
Добавить комментарий