Бесерман егитъёс огазеяськыны кулэ

Элькунысь тодосчиос но ӧнерчиос дышетӥзы-тодматӥзы бесерман егитъёсты туннэлы азинлыко проектъёсын, огазеяськонъёсын, соослэн ужан амалъёсынызы. Та пумиськон люкаськем калыкез асьсэлы нимысьтыз дэменлык кылдытонлы сӥземын вал.
 
«Бесерманъёс – Россиысь ичи лыдъем калыкъёс пӧлы пыро, – шуэ Эшъяськон Юртлэн кивалтӥсезлэн воштӥсез Татьяна Фёдорова. – Асьме азьын ужпум сылэ утьыны соослэсь кылзэс, сям-йылолъёссэс. Со ужез егитъёс нуыны кулэ. Та нырысетӥ семинар бере, ми оскиськом, егит бесерманъёс огазеяськозы, асьсэлэсь дэменлыкзэс кылдытозы. Со ужаны кулэ луоз удмуртъёслэн «Шунды», бигеръёслэн «Иман», поръёслэн «Ужара» огазеяськонъёссы выллем».
 
Луонлыкъёс вань – гуртъёсын бесерман культурая центръёс кылдытэмын, калык аснамбльёс ужало. Огазеяськыны гинэ кулэ.
«Шамарданысь егит калыкез басьтоно ке, соос милям котькытчы пырисько, – вера Юкаменск ёросысь Шамардан гуртысь мерлыко лулчеберетъя огъетысь ӧнерчи Мария Берсенева. – Милям вань пиналъёслы «Спутник», «Зарни крезь» ансамбльёсмы. Со коллективъёс фестивальёсы но, конкурсъёсы но пыриськыло».
 
Таиз бесерман егитъёсын пумиськон берпуметӥез ӧвӧл. Туэ эшшо одиг семинар радъяны чакламын. Со дырлы нимысьтыз огазеяськон кылдытон пумысен мылкыдъёс но пумен юнмалозы ни — верало Эшъяськон Юртысь ӧнерчиос.

Дом Дружбы народов
Добавить комментарий