Бадӟым этнографи диктантлэсь кырӟанзэ гожтӥзы Удмуртиын

«Мон сое гожтӥ  ӟуч кылын гинэ, малы ке шуоно со быдэс Россилы гожтэмын, диктантэз туэ котькуд улосвылын гожтозы  Гимнлэн валтӥсь кылъёсыз: «Калыкъёс — трос, кун — одӥг». Отын вакчияк верамын та диктант сярысь, калыкъёс куспын эшъяськон сярысь», – шуиз Богдан Анфиногенов.

Кызьы вераз кылбурчи, гимнэз со тодмо удмурт кырӟасен Алина Антоноваен быдэстэ. Соос кырӟанэз 30-тӥ коньывуонэ гожтӥзы ни. Со сяна, этнографи диктантлэн гимнэзлы видео но лэсьтэмын луоз.

Ӵектослэн кураторез Мария Созыкина ивортэмъя, кырӟан но видео этнографи диктантлы сяна, Калыкъёслэн огазеяськон нуналзылы но сӥземын. 3-тӥ шуркынмонэ гимн диктантэз гожтонъя Россиысь вань площадкаосын чузъяськоз. Озьы ик ужрадэ пыриськись 11 кунъёсын но сое кылзӥськыны быгатозы.

Тодэ вайытом, Бадӟым этнографи диктантэз Россиын ортчытъяны кутскизы Удмуртиысь Йӧскалык политикая министерстволэн кичӧлтэмезъя. Туэ ужрад 3-тӥ шуркынмонэ радъяськоз. Удмуртиын диктант гожтыны 200-лэсь трос площадкаос ужалозы. Со сяна, Бадӟым этнографи диктантэз ӵектослэн нимлыко сайтаз онлайн амалэн гожтыны луоз, 3-тӥ шуркынмонэ 11 часысен но 6-тӥ шуркынмонэ потытозь.

http://udmurt.media/udm/news/kultura-i-turizm/26512/

Контентмейкер, мемолог и журналист

Дом Дружбы народов
Добавить комментарий