«Бадӟым этнографи диктантлэн» юанъёсызлы шонер валэктонъёсты шараязы

Пусъём, Удмуртиысь нимысьтыз площадкаосын тодон-валанъёссэс эскерем муртъёс быдэсак вань диктантсэс эскерыны Калыкъёслэн эшъяськон юртсылэн нимлыко сайтаз 8-тӥ шуркынмонысен быгатозы. Ӵапак ӵуказе радъясьёс отчы улосвыл юанъёслы шонер валэктонъёсты интыялозы, вераз акцилэн элькунъя координаторез Наталья Шергина.

Россиын «Бадӟым этнографи диктант» ужрад 4 сюрс 567 интыын ортчиз. Тужгес трос площадкаос Москваын (1187), Саха (Якутия) Элькунын (259) но Удмуртиын (222) ужазы. Этнографияя тодон-валанъёссэ 392 сюрс 645 мурт эскериз, со пӧлысь ог 180 сюрс адями тестэз онлайн амалэн гожтӥз.

Вань юанъёслы шонер валэктонъёс сётыса, 100 балл басьтыны луэ вал. Удмуртиын шоро-куспо балл 55,12 луиз, кунъя – 56,1. Россиысь йӧскалык политикаез, калыкъёслэсь йылолъёссэс тужгес умой тодэмзэс Уйпал Осетиын возьматӥзы – 75 балл. Соослэсь одӥг баллы Карачаево-Черкесия кылиз. 72 баллэн куинетӥ луизы Татарстанысь пыриськисьёс.

Ужрадэ пӧртэм арлыдъемъёс пыриськизы. Тужгес пичиез Санкт-Петербургын пусъемын – солы 5 арес. Тужгес арлыдоез диктантэз гожтӥсь – Москваысь 96 аресъем мурт.

Диктантэз вань континентъёсысь 35 кунъёсын улӥсьёс гожтӥзы, соос пӧлын Калыккуспо космической станциын ужасьёс но Антарктидаын улӥсьёс.

Кунгож сьӧрын улӥсьёсын возьматэм тодонлыкъёсты эскерон мынэ на. Ужрадэ пыриськисьёслэн нима-нимаз ужъемышъёссы 12-тӥ толсуре тодмо луозы.

Тодэ вайытом, Удмуртиысь Йӧскалык политикая министерствоен кичӧлтэм «Бадӟым этнографи диктант» туэ 2-тӥ гудырикошконэ Россиысь ваньмаз улосвылъёсын ортчиз. Удмуртиын 222 площадкаосын диктантэз 10 сюрслэсь трос адями гожтӥз.

https://udmurt.media/udm/news/obshchestvo/44744/

 

Контентмейкер, мемолог и журналист

Дом Дружбы народов
Добавить комментарий