«Бадӟым Удмурт диктантлы» йылпумъянъёс лэсьтэмын

«Бадӟым удмурт диктант» гожтэмез 0 баллэн дунъямын 9-тӥ классын дышетскисьлэн ужез. Нылаш ачиз ӟуч, удмурт кылэз уг тоды, соин ик 100-лэсь ятыр янгыш лэсьтэм. Озьы ке но, со ужрадэ пыриськыны кышкамтэ.

Оглом туэ 755 адями «Бадӟым Удмурт Диктантэз» гожтӥз но ужзэ эскерыны ыстӥз. Пусйыны кулэ, азьвыл аръёсын ӵошатыса, таяз радэ диктантэз дэмен гожтӥсьёс трос вал. Адямиос гуртысь калыкен, яке классэн люкаськыса ужрадэ пыриськиллям. Чылкак янгышъёстэк гожтӥсьёс туэ ӧй вал.

«Котькуд ар возьмаськомы 100 баллы гожтӥсь муртъёсты, – шуэ УдГУ-ысь доцент, кылосбур тодосъя кандидат Ольга Стрелкова. –  Но, жаляса верано, туэ но сыӵе муртъёс ӧвӧл. 3 мурт гинэ гожтӥз 97 баллы. Но таӵе ӧжыт балл бичамлэн мугез валамон – арысь аре текст шуггес луэ».

«Бадӟым Удмурт диктант» – со, нырысь ик, мерлыко акци, астэ эскерон. Калык арысь аре мыло-кыдо пыриське, котьку но мылкыдзэ вераны тырше. Соин но, ужрадлы нимысьтыз саклык висъяське.

Вань йылпумъянъёс – кин кӧня балл басьтӥз, интыямын «Мынам Удмуртие» телерадикомпанилэн сайтаз. Вотэсбамысь ик диктантлэсь текстсэ но шедьтыны луэ.

www.myudm.ru/

 

Контентмейкер, мемолог и журналист

Дом Дружбы народов
Добавить комментарий