«АR-GOD» удмурт-эстон группа нырысетӥ крезьгуро альбомзэ поттӥз

Бичетэ 12 композициос пыртэмын. Со дунне вылысь калыкъёслэсь лулчеберетсэс гажась но дунъясь муртъёслы тунсыко луыны кулэ.

«Группалэн репертуараз удмуртъёслэн, бесерманъёслэн но эстонъёслэн крезьгуро фольклорзы, – вера «АR-GOD» группалэн ёзчиез Николай Анисимов. – Этно-ӵектос финн-угор калыкъёслэсь аспӧртэм гуръёссэс но кырӟанъёссэс выль сямен чузъяськытэ, озьы соосты узыргес каре но дуннеысь огъя крезьгур дуннее пыртэ».

«АR-GOD» этно-ӵектос 2014-тӥ арын кылдытэмын. Отчы пыро Удмуртиысь кырӟасьёс Мария Корепанова но Николай Анисимов, Эстониысь пӧртэм крезьгуро инструментъёсын шудӥсь Тойво Сымер.

Николай Анисимовлэн верамезъя, этно-ӵектослэн нырысетӥ бичетэныз тодматон Таллинын сяна, Тартуын, Выруын но Пыльваын ортчоз. Малпанъёс вань Удмуртиын но пумиськон радъяны, но ку со луоз, али тодмо ӧвӧл на.

ИА Удмуртия сайтлэн ивортонэзъя

Контентмейкер, мемолог и журналист

Дом Дружбы народов
Добавить комментарий