«Анай тусо анай кылы» фестиваль радъяськоз Пичи Пургаын

«Кылем арын «Удмурт нылкышно кенеш» огазеяськонмылэн конференциез ортчиз. Отын кенешим, таяз арын ёросъёсысь вань «Удмурт нылкышно кенешъёс» ужалом «Анайлэн веттан гурез», сетевой ӵектос шуиськом ми сое, со ӵектосъя. Котькудӥз ёрос малпа та темаен герӟаськем ужрад. Но сыӵе ужрад со луыны кулэ, кудзэ котькуд гуртын, котькуд ёросын ортчытыны луоз. Пургалэн али сыӵе пилотной ӵектосэз «Анай тусо анай кылы». Тани та фестивальлы луыса кылдоз ужанрадмы, модель, кызьы «Удмурт нылкышно кенешлы» сямъёсмес, йылолъёсмес утёнъя дышетонъя огазеяськонъёсын — нылпи садъёсын, школаосын — валче ужаны», — «Удмурт нылкышно кенеш» огазеяськонлэн тӧроез Надежда Степанова.

Солэн верамезъя, али «Анай тусо анай кылы» ужрад улсын Пичи Пурга ёросысь 5-тӥ классъёсын дышетскисьёс сыӵе ик нимо темая сочинениос гожъяло. Бӧрысь жюрилэн ёзчиосыз, кытчы пырозы «Удмурт нылкышно кенеше» пыриськисьёс но дышетӥсьёс, куинь устооссэ быръёзы. Соосты оштолэзе фестивальлэн йылпумъян ужрадаз пусъёзы.

«Милям кыӵе ужпуммы? Возьматыны, кызьы анай-атайёсын ужаны луоно сямъёсмес, йылолъёсмес, кылмес медаз вунэтэ шуыса. Малы ке шуоно улон возьматэ, пиналъёсын гинэ ужано ӧвӧл, нырысь ик анай-атайёсын ужано шуыса. Семья, дышетон но мерлыко огазеяськонъёс валче ужаса гинэ емышез луоз», — пусйиз «Удмурт нылкышно кенеш» огазеяськонлэн тӧроез.

Фестиваль улсын ортчоно семинар кык люкетъем луоз: теоретической но практической. Отын вераськозы, кыӵе темаосъя анай-атайёсын ужано, кыӵе технологиосты уже кутыны луоно.

«Тани ми Пургалан кылдытӥм «Шудон корка» клуб. Со ӟучомыны кутскем удмурт пиналъёс понна. Со клублэсь ужамзэ возьматом. Озьы ик луоз презентация. «Италмас» нылпи садын ми нылкышно клуб кылдытӥськом. Соос асьсэос мылкыд каризы. Милям клубъёс трос ужало ни лулчеберетъя юртъёсын, библиотекаосын <…> Ужрадмы бере школаосын яке нылпи садъёсын мед кылдытозы сыӵе семьяен ужан клубъёс», — вераз Степанова.

Ар ӵоже анайлыклы сӥзем ужрадъёс мукет ёросъёсын но ортчозы.

http://udmurt.media/udm/news/obshchestvo/17525/ 

Поделитесь с друзьями:

Контентмейкер, мемолог и журналист

Дом Дружбы народов
Добавить комментарий