Анай кыллэсь калыккуспо нуналзэ пусйыны дасясько Удмуртиын

«21-тӥ тулыспалэ, анай кыллэн калыккуспо нуналаз, ортчытыны малпаськом дышетон практикум, семинар-практикумшуод-а сое, анай-атайёсын удмурт кылэз азинтонъя валче ужан. Отчы ӧтемын луозы дышетӥсьёс но, воспитательёс но. Отын луоз теоретической люкетэз но, практической люкетэз но. Практической люкетаз возьматэммы потэ, кызьы «Шудон корка» клубъёс пыр анай-атайёсын удмурт кылэз вӧлмытонъя ужаны», — вераз «Удмурт нылкышно кенеш» огазеяськонэн кивалтӥсь Надежда Степанова.
 
Егитъёслэн «Шунды» огазеяськонзы «Мафия» шудон ортчытыны чакла.
 
«Ми ортчытӥськом туала шудон, «Мафия» порма. Коми кылын. Коми геройёсын. Вераськыса удмурт кылын, но коми кылъёсын но тодматскыса. Малы ке шуоно со тужгес матын милемлы. Одӥг нуналэ со шудон ортчоз «Лифтын», — ивортӥз огазеяськонлэн кивалтӥсез Алина Чернова.
Нош ёросъёсын, солэн верамезъя, кылсярысь Пургалан, пӧртэм ужрадъёсын быдэсак месячник ортчоз, дэбесъёс портэм акциос, фото-кроссъёс, конкурсъёс радъялозы, нош Можгаысь егит семьяос ӵошен люкаськыса пельнянь пӧраны ӧдъяло.
 
Дэри ёросын но пӧртэм ужрадъёс радъяськозы. Соос ласянь пыр-почгес кенешон понна ёросын 8-тӥ тулыспалэ люкаськозы на. «Удмурт Кенеш» огазеяськонлэн ёрос ёзэтэныз кивалтӥсьлэн Лидия Бияновалэн верамезъя, соослэн ужпумзы – удмурт калыкез сяна, пӧртэм калыкъёсты огазеян. Та уж борды мыло-кыдо кутскизы ини ӟуч лулчеберетъя, украин лулчеберетъя огазеяськонъёс но мукетъёсыз.

Дом Дружбы народов
Добавить комментарий