Удмуртские стихи для детей

    Рисунок кошка с котятами собирается пить чай, художник василий мустаев

    Сборник детских стихотворений на удмуртском языке о природе, животных, родителях, удмуртской кухне, спорте, друзьях и праздниках.

    Детские стихи удмуртских поэтов в помощь родителям и воспитателям детских садов.

    Также советуем к прочтению страницу с удмуртскими загадками

    Для удобного поиска воспользуйтесь сочетанием клавиш «Ctrl F» (для ПК)

    Елена Миннигараева

    Удмуртские стихи для детей 1
    Елена Васильевна Миннигараева.
    Родилась в 1976 году.
    Прозаик, поэт, публицист, член Союза журналистов РФ, заслуженный журналист Удмуртский Республики

    Дор

    - Мар меда сыӵе со – дор? -
    Мемейлэсь юаз Егор.
    - Дор – со Удмурт шаермы,
    Дуно, чебер музъеммы.
    Дор – со вордӥськем гуртэд,
    Анаед но атаед,
    Дор - капка азьысь палэзь,
    Нюлэскысь ческыт эмезь,
    Дор - со гурт пумысь ошмес,
    Дор бурдъя, шунтэ ваньмес!
    Шумпотэ пичи Егор:
    - Соку тон но мемей – ДОР!

    Бадӟым Софи

    Софимы будӥз бадӟым,
    Шуэ ни:
    -Ачим! Ачим!
    Штаниме, пе, дӥсяло,
    Курткаме бирдыяло,
    Тани поно изьыме,
    Кутчало кроссовкиме -
    Куинь арес тырмиз мыным,
    Эн люкетэ, мон - ачим!
    Анаез нош куаретэ:
    - Беромом ук садике!
    Но нылаш ӝуштэ, уг вазь:
    Тани тазьы, тани тазь…
    Ӵок, кырыж ке курткаез,
    Синмаз усе изьыез,
    Со понна ваньзэ – ачиз!
    Учке ай, кыӵе будӥз!

    Гондыръёс

    - Ойдо, тон луод гондыр,
    Мон – пичи гондырпиед.
    Ӝӧк улэ тазьы ик пыр,
    Та луоз бабон гуэд.
    - Кема-а тазьы пуком?
    - Гондыр папа бертытозь.
    - Отчыозь ялан бабом?
    - Ойдо, чупа-чупс сюпсём!

    Корка кузё

    Гур сьӧрын корка кузё,
    Йырыныз сэзъя лусьтро:
    - Ой-ёй-ёй, коркан бардак!
    Софи, утялскы чаляк!
    Мон но тыныд юрттӥсько,
    Посудаез коть мисько,
    Анаед соку паймоз,
    Ческыт табанен сюдоз!

    Тол вуиз

    Шыпыт луиз кырын,
    Тӧдьы-тӧдьы карын.
    Пурӟе тӧдьы лымы -
    Ӧвӧл ни сюресмы.
    Тӧдьы-тӧдьы юртъёс,
    Тӧдьы троллейбусъёс,
    Тӧдьы быдэс дунне -
    Пӧзьы керттэ нэнэ…

    Погъёс

    Лэсьтӥмы ми лымыпог,
    Собере - лымы апок.
    Собере – эшшо погъёс,
    Лымылэсь олокинъёс.
    Собере эшшо, эшшо -
    Ужамы сыӵе сюлмо!
    Но…
    Анаймы доре ӧтиз,
    Сиськыны, пе, дыр вуиз.
    Пырим гинэ - чабкиськиз:
    - Ой-ёй-ёй, лымы погъёс,
    Воксё котмиллям таос!
    Ойдо, кылиське ай ӝог,
    Ачим пыжи кӧжыпог!

    Выль аре

    Выль аре, Выль аре,
    Султомы кыз котыре,
    Кырӟалом но вералом,
    Тол Бабаез паймытом.
    Кытын саламед, Бабай?
    Мон чебер кылбур верай!

    Пуклё

    Пичи Веньяминлы
    Вордскем нуналэзлы
    Яратоно атаез
    Кузьмаз лусьтро кучапиез.
    Пияш туннэ пилем йылын,
    Шат вералод сое кылын?
    Кучапилы сётӥз лёлё
    - Я, ю, ойдо, пичи пуклё.
    Тӥни озьы ик потӥз ним,
    Ми но Пуклё сое шуим.
    Нош кучапи вожзэ уг вай.
    Лёлё гинэ куре: «Вай! Вай!»
    Бадӟым колошаез сыске,
    Ассэ герой выллем возе.
    Веньяминэз туж яратэ –
    Паськыт ныраз ик нюлыштэ!

    Просто так

    Ӝук пӧзьтэ пичи Али:
    «Мунёме сюдо али».
    «Нош мыным сётод-а бен?» -
    Юасько серем тусъем.
    Карыса йырзэ кырыж,
    Алие шорам учке,
    Кутыса шудон тэркы,
    Со киям мыным мыче:
    «Си, ойдо, ӝуке ческыт –
    Гырпумме веттай уго.
    Нош мусо мунёелы
    Мон сёто быглес улмо».
    Кутыса пичи пуньы,
    Сиськыны мон дасяськи,
    Пальпотса быдэс бамын,
    Тэркые шоры учки…
    «Ма-ма-ма… Я мар т таӵе?
    Кытын бен ческыт ӝукед?
    Малы тон монэ пӧяд –
    Буш тэркыен кунояд?»
    Йырзэ кур кариз Али:
    Ӝӧк сьӧрысь тон пот али!
    Тон уд валаськы монэ,
    Просто так со – сиёнэ!»

    Паймымон эшъёс

    Пичи гинэ кузьыли -
    Чупрес но шаян Васи
    Эшъяськем зӥбыт слонэн
    Африкаысь куноен.
    Ӵош соос шудо, изё,
    Рок-эн-ролл усто экто.
    Только огез алама:
    Слон эктэ – музъем зурка.
    Нош Васи бен кытын ай?
    Кытчы ке ышем я шай?
    Ма тӥни ук, ерпечка –
    Слон вылэ тубем уга!

    Вани

    - Вани, Вани, тон-а со?
    Чик ӧй тодма, тумошо!
    Штаниед но кесиськем,
    Нырыд шат сюез гырем?
    Пальпотэ со пумитам:
    - Бертӥсько али дорам,
    Быдэс нунал бызьылӥ,
    Великеным ворттылӥ.
    Шудыса кӧты ӧз тыр -
    Вакчигес нунал укыр!

    Анай кылын

    Тон вазь мыным анай кылын,
    Тон кырӟа, вера мылкыддэ.
    Уно кылъёс та дуннеын,
    Но удмуртэз юнгес шунтэ.
    Но удмуртэз – анай тусо,
    Ненег, валась, сыӵе мусо!
    Тон вазь мыным удмурт кылын,
    Тон вазь мыным, анай сюлмын!

    Ожо вылын — бадӟым дунне

    Ожо вылэ выдӥ: «Ӟечбур, эше!»
    Вешай мон Музъемлэсь вож йырсизэ,
    Веттай лызгырлылэсь чингылизэ,
    Жальмай узы шоры: «Кисьмад-а, мусое?»
    
    Модос вылын пуке ӵуж зоркибы,
    Кӧлэ, лэся... Ярам, уг люкеты.
    Кин ке бичиятэ ни пыдъёсме,
    Кузьылипи... Ворсад, пе, сюресме.
    
    Я, я, эн куректы, палэнскисько каллен,
    Чагыр бубылиез кышкатӥсько пумен.
    Ваське зӧк чонари синъёс азям,
    Гозы вылаз лейка, кырыж учке шорам.
    
    Ожо вылын улэ бадӟым дунне,
    Кузьмало, пе, мемилы,
    Шумпотоз быгатэмлы.
    
    - Ой, кыӵе чебер суред,
    Тон, нылы, пӧрмытэмед, -
    Топ-топ веша анаез,
    Бурдъя пичи дыдыез.
    
    Холодильникез усьтэ,
    Гужемлэсь салам поттэ.
    Шумпотэ пичи Оля,
    Сие узы варення...
    Эн уллялэ, мон часталы гинэ!

    Анайлэн нуналэзлы

    Анайлэн нуналэзлы
    Суредаз Оли узы.
    Кузьмало, пе, мемилы,
    Шумпотоз быгатэмлы.
    
    - Ой, кыӵе чебер суред,
    Тон, нылы, пӧрмытэмед, -
    Топ-топ веша анаез,
    Бурдъя пичи дыдыез.
    
    Холодильникез усьтэ,
    Гужемлэсь салам поттэ.
    Шумпотэ пичи Оля,
    Сие узы варення...

    Михаил Покчи-Петров

    Удмуртские стихи для детей 2
    Михаил Покчи-Петров (1930-1959). Удмуртский поэт и театральный режиссёр. Член Союза писателей СССР. Заслуженный деятель искусств УАССР. Лауреат Государственной премии УАССР

    Ӟольгыри

    Кин укно йылэ пуксиз?
    Чи-ли-рик, чи-ли-рик ӟольгыри.
    Утчаськиз, бурдзэ выртӥз,
    Собере караз пыриз.
    
    Нош караз нуныосыз –
    Сизьым кузя пиосыз.
    Ӵуж-ӵужесь ымдуръёссы,
    Уг лу али лобамзы.
    
    Мон уг усьты укноез,
    Медаз курда бурдое.
    Со уго сиён вайиз,
    Пиосыз доры пыриз.

    Ю. Владыкин

    Лымылы шумпотон

    Толон гинэ котькытын
    Калык нӧдӥз дэриын.
    Нош туннэ лымы усиз,
    Дуннемы ик югектӥз.
    Кин меда шобыр вализ,
    Музъемлы шуныт лэсьтӥз?
    Кузёез солэн тодмо —
    Тол бабай вуиз уго.
    Ужзэ усто со тодэ,
    Лымызэ сюлмысь пужнэ.
    Лымы сюрес жингыртэ,
    Спортсменлы вормон кулэ.
    Гажано эшъёс, мынам
    Вуэ Выль ар пумитан.
    Тол бабай но со дыръя
    Юн трос ваньзэ котыръя.
    Вуылоз со школае,
    Клубъёсы, нылпи садэ.
    Ваньмызлы салам ваёз,
    Ӟеч улон тӥлед сӥзёз.
    Тол вуэмлы шумпотэ,
    Дорады ичи пуке.
    Ветлэ тросгес куное,
    Тол бабайлы тау каре

    Лия Малых

    Удмуртские стихи для детей 3
    Малых Лия Яковлевна. Родилась в 1960 году.
    Удмуртская писательница. Член Союза журналистов РФ. Заслуженный журналист УР. Лауреат национальной премии им. А. Оки, награждена памятной медалью «Патриот России», Почетной грамотой УР

    Уй песяй вӧлдэ вӧтъёс

    Инбамын толэзь пиштэ,
    Кизилиослы югдэ.
    Пӧрало соос вӧтъёс,
    Тырмемын ин кеносъёс.
    
    Уй песяйлэн ныпъетаз
    Люкамын вӧтъёс тыраз.
    Пуксьыса пилем йылэ,
    Васька со музъем вылэ.
    
    Укно улъёстӥ ветлэ,
    Кӧкыысь миндэр улэ
    Вӧлдылэ шудо вӧтъёс,
    Котькудаз трос шудонъёс.
    
    Мунёен вӧт Олилы,
    Питранъёсын - Колилы.
    Кин уг кылзӥськы, бӧрдэ,
    Со дорысь вӧтэз пегӟе.
    
    Изе, изе, дыдӥос,
    Изе, изе, этеос!
    Уй ортчоз, шунды пиштоз,
    Выльысез нунал вуоз.

    Дыдыкъёс, шуо, шудлы

    Нюлэскын силе кикы,
    Пиезлы утча кӧкы.
    Нуные вӧтъёс адӟе,
    Небыт валесын изе.
    
    Шур сьӧрын чирдэ уӵы,
    Эшезтэк сюлмыз уг ӵыд.
    Вашкала кылдэм сямъя
    Котькинлы кулэ семья.
    
    Сиг йылын гурла дыдык,
    Караз солэн пиез кык.
    Инбамын пиштэ шунды,
    Дыдыкъёс, шуо, шудлы.
    
    Тон эн кыӵырты, коӵо,
    Лобӟы палэнтӥ, куӵо!
    Мед изёз лулыкае,
    Мед будоз пичикае!

    Ӧбӧбез улляломы!

    Ӧб-ӧб-ӧб! луиз Лиза,
    Бам вылтӥз синву ӟиза.
    Фу-фу-фу! пелляломы,
    Ӧбӧбез улляломы:
    - Кош-кош-кош, дорад берты!
    Вӧсьёстэ сьӧрад басьты!
    Ӧнь-ӧнь-ӧнь, пичикае!
    Эн бӧрд ни, гыдыкае!

    Лыдъяськонъёс

    Гизи-гази, кенӟали!
    Олӥ, олӥ, чимали,
    Ватскемен шудом али.
    Чималиез утчалом,
    Ваньмы ӵошен лыдъялом:
    Чуки-беки, туки-тук,
    Лики-ляки, луки-лук!
    Гизи-гази, кенӟали,
    Луод, Оля, чимали,
    Милемыз тон кут али!
    ***
    Одӥг тури, кык тури,
    Ньыль, вить, куать -
    Тон палтури!
    Ми пегӟом тури-пари,
    Утча пар аслыд, тури!

    Ӝог веранъёс

    Вал вылын Вало вылэ
    Ветлоно вал. Вал ӧвӧл.
    
    Шур сьӧры кизи сезьы,
    Сезьы пызь сӥзьыл изӥ.
    
    Макар куре макарон,
    Ма каром та Макарен?
    
    Шупуын шула шушы:
    - Шуэз эн ишкы Саши.
    
    Кыӵыртэ куӵо куӵо:
    - Коӵышлэн куэз куӵо.
    
    Уг сиы ӟичы чечы,
    Сиысал ӟазег ӟичы.
    
    Лёг вылэ будӥз губи,
    Лёгиз губиез Габи,
    
    Сима сие сима,
    Сьӧмзэ сялӟе Сима.
    
    Гужем куазь кузьмаз эмезь,
    Инкуазьлэн со эмъюмез.

    Кин кызьы сётэ куара

    - Писпуэ пегӟиз коньы.
    Ав-ав-ав! - утэ....пуны.
    ***
    - Сётэ вал мыным ёрыш, -
    Нургетэ мур-мур!... коӵыш.
    ***
    - Кытын меда кенер пась?
    Хрю-хрю-хрю! - нурскетэ... парсь.
    ***
    - Азбаре уг лэзь ӧскал.
    Му-у-у! - бӧксэ ӵукнаосы... скал.
    ***
    - Мон ӧвӧл кышкась луд кеч.
    Ме-е-е! - бӧксэ сюро гурт кеч.
    ***
    - Бле-бле-бле! - бӧксэ сьӧд ыж. -
    Ӵышкыны качыед ныж!
    ***
    - И-го-го! - гырдалля вал. -
    Куке но мон вал пинал!
    ***
    - Ку-ка-ре-ку! Мон ӵук час. -
    Сюрыын чоръя.атас.
    ***
    - Ко-ко-ко! - котка курег.
    - Га-га-га! - вазе ӟазег.
    ***
    - Жу-жу-жу! - гужгетэ муш. -
    Эн йӧтылы, луод шуш!
    ***
    Тыысь ву «кырӟа» ква-ква!
    Озьы куаккетэ бака.

    Кылын шудонъёс

    Визьмо ӝук пӧраз анай,
    Тэркы тыр сии-веръяй:
    Макем трос ӝукын кеньыр,
    Сокем визьмо луоз йыр.
    ***
    Ӟукыр-ӟакыр ӟечыран
    Вазь ӵукна мытӥз кырӟан.
    Уллань-выллань кечыра,
    Изьыны уг сёт маза.
    ***
    Лекъяське пичи качы:
    - Пиньтэм шуса эн учкы,
    Кичи-качи, кичи-кач,
    Чиньыдэ куртчо мон шлач!
    ***
    Инметӥ мырдэм-мырдэм
    Уя сьӧд тушо пилем.
    Укыр трос, лэся, юэм -
    Инвуэн кӧтыз тордэм.
    ***
    - Пӧсялод ни, кубиста,
    Кушты вылысьтыд дӥсьтэ!
    - Дэрем мынам сю полэс,
    Кудзэ кылём со пӧлысь?
    ***
    - Малы бӧрдӥськод, Онтон?
    - Сии убоысь сугон.
    Со укыр курыт будэм,
    Кисьтоно сакыр вуэн,
    ***
    Арбузэз шунды вешаз,
    Сюрсо дэремен дӥсяз,
    Вурымтэ бирды дӥсяз:
    Пертчытэк емыш кисьмаз.
    ***
    Ку-ку-ку! - силе кикы, -
    Пиелы кытын кӧкы?
    Анай солэсь пӧрмымтэ,
    Мурт каре пизэ кельтэ.
    ***
    Нюр вуэ тури-пари
    Пыриз кузь куко тури.
    Эбекпи ури-бери
    Вуэ зымиз: «Ой, быри!».
    ***
    Пал кукын сылэ ӟазег.
    Пыдыз гольык, соин лек.
    Кутчалом солы сапег,
    Шуналоз, уз лу керӟег.
    ***
    Гидкуазьын бӧрдэ чипы:
    - Чиоп-чиоп! Мон пичи,
    Кышкасько, куртчоз бӧчы!
    Буйгатэ курег пизэ,
    - Мар понна нырыд, пие!

    Мыным — куать!

    Одӥг, кык, куинь,
    Учкелэ, потӥз выль пинь!
    Ньыль, вить, куать,
    Мыным луиз ини куать.
    Сизьым, тямыс, укмыс, дас,
    Школае мынны мон дась!

    Бамъёссэ пыже табань

    Ӝытазе котӥм ыльнянь,
    Нош туннэ пыжом табань.
    Ӟырдамын ни бадӟым гур,
    Ӝуало писъёс шулдыр.
    
    Гур азьысь пӧсь табаын
    Бамъёссэ пыже табань.
    Огназлы солы пань-пань,
    Ох, ческыт луоз табань!
    
    Пиналъёс пуко ӝӧк тыр,
    Возьмало соос кӧттыр,
    Люкимы табань котыр,
    Шат кӧтыд тынад ӧз тыр?
    
    Эшшо табань пыжомы,
    Тыбырдэс вешаломы:
    - Пыжем, нуные, нянед,
    Бадӟым, бадӟым будэмед!

    Йыромем пилем

    Нуназе шорын пилем
    Эшъёсызлэсь йыромем.
    Котыръяса инбамез
    Пумитам со шундыез,
    Ӝожомыса вазиськем:
    - Ойдо шудомы ӵошен
    Пилем сьӧры ватскемен,
    Потэ на мынам зорем!
    Шунды пилемлы каллен
    Кӧтурдэсаз мырӟытэм:
    - Мын ни берты тон дорад,
    Зореныд эн кар нерад!

    Пичи чеберай

    Удмурт кыл анай йӧлын
    Пыӵам, лэся, кӧкыын.
    Оло нош кырӟан-айкай
    Веттаз тонэ, чеберай?
    
    Пичи, пичи чеберай,
    Быгатэмдэ адӟыт ай!
    Мед учкоз пичи батыр
    Ӟечокмы макем сабыр.
    
    Чеберай, ой, чеберай,
    Котыр ласянь устокай.
    Дэремез нош, учке ай!
    Вожъяськоз чебер апай.
    
    Пальыштэмез но мусо,
    Кырӟаны но туж усто,
    Пыдъёсыз тапыр экто.
    Кинлэн меда нылыз со?

    Владимир Романов

    Удмуртские стихи для детей 4
    Владимир Васильевич Романов (1943 — 1989).
    Удмуртский поэт, заместитель председателя прав­ления Союза писателей Удмуртской АССР, лауреат премии Комсомола Удмуртии, член Союза писателей СССР

    Выжыкыл

    Ми азьын паськыта урам,
    Езъёс кырӟало ми понна.
    Мон вӧзын вамышъя Зара,
    Ачим — Туганай.
    Паймымон чебер ӝыт туннэ
    Ваньмыз кырӟанэ куриське.
    Мусое,
    Яратско тонэ,—
    Шуиз нырысьсэ.
    — Кизили-а кулэ? Мон дась! -
    Зара, ӵуказе лобисько...
    Выжыкыл-а, зэм ик-а та? —
    Ачим паймисько.

    Кактус

    Та будос —
    пересь, луткам
    куака тус.
    Веньёсыз пигон кадь ӵогырско.
    Тусызъя ке учконо,
    та кактус
    Шушеныз гинэ кадь
    тунсыко.
    Нош эн оскы шушезлы,
    эн оскы!
    Калыкын но вань
    тустэмезгес.
    Маин-о куке со
    паймытоз кадь?
    Дыр вуэ, воштэ
    малпанъёсмес.
    Паймымон
    выжыкылысь сяська
    тус
    Усьтӥське адямилэн
    сюлмыз…
    Уть ай, чимызэ усьтэ ни кактус,
    Сяськаез — зэмзэ! —
    выжыкылысь!

    Мунчо

    Сюресъёс но вольыт,
    Кезьытлэсь но
    уг кышкаськы.
    Нош гуртысь эшъёсы
    Витьыса жадиллям.
    Изьыме куштыса,
    Шуисько ни:
    — Я тышкаське!
    Шуисько:
    — Ваньмонмы
    Сыӵегес ни милям.
    Ох, мунчо вал!
    Сюриз!
    Сизьдӥзы ук —
    ӧз жалялэ…
    Нош зэмос мунчозэс
    Эстӥзы ӝытазе.
    Ах, таӵе мунчое
    Пыраме ик ӧй вал али:
    Ӟырдатэм изъёсты
    Пуштытъяй сюкасен.
    Венике — вож ньылпу!
    Ӟечсэгес уг ик
    тодӥськы!
    Веньёсыз нош —
    Тэлез вунэтӥд, пе, —
    Бышко.
    Эркынак шокчыса,
    Малпасько мон:
    — Усто ик та,
    Тон сярысь малпаса,
    Ӟеч сюлмын ке жуго.

    Берга, берга дунне

    Вож нуны кадь
    вож но еж
    Вож тулыс вакыт.
    Со дыре вуоноез
    Тодмотэм тыныд.
    Чебер ныл кадь сяськая,
    Пальпотэ гужем.
    Крезьгура но мусоя,
    Шумпоттэ ужен.
    Зарни ӵук сӥзьыл
    лыктэ,
    Ӵужкенак сямен.
    Емышсэ ини октэ,
    Лулскылэ пумен.
    Тӧдьы тол кисьтэ
    азвесь,
    Жалятэк пазя.
    Пересьлэн но йырсиез
    Азвесё, лэся.
    Пересьлэн кузь сюресэз
    Бус пӧлы ышоз.
    Вож тулыс кадь
    вож но еж
    Вож нуны вордскоз.
    Ог-огзы бӧрсьы ветло,
    Арез ар воштэ.
    Та дунне вылын улон
    Ноку быронтэм!

    Флор Васильевлы

    — Ах, кылбурчи, ах,
    ӵуж уӵы! —
    Куддыр калык шуэ,
    Сяська пӧлын, пе,
    кылбурчи
    Кайгырытэк улэ.
    Огзэ уг тодо:
    сюлэмыз
    Кыӵе тылын ӝуа.
    Соин ик но паймо:
    пумыз
    Шуак вуэ, шуак.
    Соку тӥни котькуд
    ласянь
    Учко котькуд чурез.
    Тӥни соку шуо: «Пӧсям!»
    Нош мар на табере!
    Ах, кыӵе кырӟанэз
    вакчи…
    Озьы но кенжытэ.
    Ачиз ӧвӧл ни кылбурчи —
    Сюлэм пеньыз сутэ!

    Г. Красильниковлы

    Огъя ужмы понна
    Сюлмаськыса, вылды,
    Шуид вал огнунал:
    — Давай верос борды!
    — Шат кылбуре… уггес?.. —
    Юай мон могаса.
    — Кылбурчиос — нюлэс! —
    Верад мыньпотыса.
    Сыӵе осконэныд
    Лӧптӥ ке но инмозь,
    Ӧй пуксьы пӧраны
    Коть уродос верос.
    Кылбурасьёс уно,
    Уно — кыл пӧрасьёс…
    Мыным али ке но
    Уг тырмо ПОЭТЪЁС.

    Вова пиелы

    Выжез тудву нуэм,
    Сыӵе усто выжез!
    Бӧрдэ ини сюлэм,
    Лулы-сюлмы пыже.
    Выжез тудву нуэм.
    Мӧзмыт ни ярдуръёс:
    Туэ гинэ, туэ
    Люкиськемын соос.
    Нош кӧня ар ӵоже
    Герӟаськемын вал юн!
    Тудву кесям выжзэс,
    Бугыръяськись тудву.
    Яръёс огъя выжзэс
    Ӧз тодэ утьыны.
    Нош кудӥз янгышгес —
    Бергес ни тунаны.
    Одӥг вакчи уйскын
    Выжез тудву тарказ.
    Кык ярдуръёс куспын
    Лэйка пичи лодка.

    Любовь Тихонова

    Удмуртские стихи для детей 5
    Любовь Ивановна Тихонова родилась в 1959 году. Удмуртская писательница и журналистка,
    член Союза писателей и Союза журналистов России.
    Заслуженный работник культуры Удмуртии

    Нюлэс кушын

    Тӧдьы-тӧдьы лымы усе музъем вылэ.
    Лумбыт ини дугдылытэк пужнэ.
    Небыт мамык вылтӥ лудкеч тӥни бызе,
    Тӧдьы луэм — воштэм, иське, кузэ.
    Выжыкылын выллем нюлэс быдэс гӧртэм.
    Пичи кызэз лымы пырак, ява, согем.
    Горд палэзьёс котыр гинэ горд шушыос,
    Ӟабыль потто, шудо туннэ соос.
    Мискинь гондыр кӧлэ, дыр, мур гуаз,
    Льӧль гужемез адӟе, дыр, уйвӧтаз.
    Ӟичы, коньы, сяла но пӧйшуръёс,
    Выль ар пумитаны дасесь ини соос.
    Тани ӝоген кыззы ни ӝуатскоз.
    Нюлэс шоры пиштоз ни тыр толэзь.
    Пересь тушо Бабай Лымы нылын
    Вамышъяло секыт кузьымъёсын.
    Кинэз гинэ ӧвӧл та нюлэскын,
    Пересь кион чиган кышно дӥсяськемын.
    Пужей сюрын табань, пе, пыжемын.
    Шулдыр туннэ, шулдыр нюлэс кушын.

    Выль арез пумитаськом

    Вамыштэ ни дорамы
    Выль вуись армы.
    Тани-тани ӝуатскоз
    Пичи ёлкамы.
    
    Лымыез пурӟытыса,
    Пар валъёс бызё.
    Ми доры, туж дыртыса,
    Куноос лыкто.
    
    Песьтэраз Тол бабаймы
    Саламъёс вае.
    Чеберай Лымы нылмы
    Милемын шудэ.
    
    Кырӟаськом ми, бергаськом
    Ёлка котыртӥ.
    Выль арез пумитаськом,
    Эн, эн кыле тӥ.

    Удмурт шаере!

    Дуно удмурт шаере,
    Мусо, чебер анае!
    Сюлэмам тӥ пыремын,
    Вунонтэмлы пыӵамын.
    
    Пичиос мед будозы,
    Визьнодо мед луозы.
    Егитъёс, кивоштӥсьёс
    Таза нылпи ваёзы.
    
    Чебер удмурт шаере
    Вӧл-вӧл бызись Кам шуре.
    Ой, шулдыр вордскем доре,
    Сюлмо ужась калыке.
    
    Мусо, ненег анае,
    Кужмо, визьмо атае,
    Муспотон сузэр-выны,
    Мусо удмурт семьяе.

    Афанасий Лужанин

    Удмуртские стихи для детей 6
    Афанасий Васильевич Лужанин (Корепанов) (1912-1966 гг.)
     председатель правления Союза писателей Удмуртии, поэт-сатирик, баснописец

    Тол вуиз

    Ма кытысь бен уй куспын
    Сомында мамык пурӟиз?
    Кин озьы колхоз садын
    Паймымон чильтэр керттӥз?
    
    Мальдытӥсь шобыр улын
    Бусыос шуныт кӧло.
    Пужымъёс нюлэс дурын,
    Мӧзмыса кадь, шып сыло.
    
    Кыдёкысь кезьыт палась
    Тол бабай та уй лыктэм.
    Со пересь – усто ужась,
    Ваньзэ сó озьы лэсьтэм.

    Александр Вотяков

    Удмуртские стихи для детей 7
    Вотяков Александр Дмитриевич (1928-1985).
    Удмуртский поэт, автор текстов песен для спектаклей, лауреат Всесоюзного конкурса за создание лучшей туристической песни

    Выль ар

    Тол буба, эшъёс, маке
    Лекъяське,
    кышкатьяське.
    Кынтыны малпай, шуэ,
    Бусые, гуртэ вуэ.
    
    Ми соин ик бызьыса
    Вуимы нюлэс шоры.
    Вож кызэз нош жаляса
    Вайимы асьме доры.
    
    Дӥсямы чеберъяса,
    Со сылэ бадӟым залын.
    Выль арез пумитаса
    Кырӟаськом со котырын.
    
    Дед Мороз но милемын
    Ӵош эктэ, шулдыръяське.
    Со ваем уно кузьым –
    Пельпумыз ик зӥбиське.
    
    Тол буба, пе, лек туннэ,
    Нош милем умой гинэ.
    Вож кызмы но пальпотэ,
    Зарниям тылын пиштэ.

    Сӥзьыл

    Урамъёстӥ,
    Лудъёс вылтӥ
    Ветлэ сӥзьыл буяськыса.
    Пыдъёс улэ,
    Пельпум вылэ
    Усё куаръёс куалекъяса.
    Садъёс, нюлэс
    Азьвыл туссэс
    Ини быдэсак воштӥллям.
    Оло, зэмен
    Зарни вуэн
    Соос пуж-пуж пыласькиллям.
    Куаръёс усё,
    Каллен пуксё,
    Востэм бубылиос сямен.
    Кынмиз, пе, ай
    Музъем-анай –
    Выдо небыт шобыретэн.
    Чебер, мусо,
    Жадем тусо
    Котыръяське ини шунды.
    Гужем ӵоже, уно ужез
    Шутэтскытэк лэсьтӥз, вылды.
    Шаерэтӥ
    Ветлэ сӥзьыл,
    Кузё сямен жингыртыса.
    Нош ми соин
    Ини вуим
    Чаляк гинэ эшъяськыса

    Лымы вера

    Усё тӧдьы бубылиос,
    Усё.
    Бубылиос оло кизилиос
    Музъем вылэ пуксё.
    Тӧллэн капчи бурд вылъёсаз
    Лобо соос каллен,
    Веттаськыса,
    Ненег мамык сямен.
    
    Усё тӧдьы бубылиос,
    Усё.
    Юртъёс, садъёс вылэ соос
    Пуксё.
    Быдэс музем тани
    Тӧдьы шобыретэн
    Шобыртӥськиз ини
    Люкиськонтэм.
    Син мальдымон югыт,
    Азвесь пыры выллем
    чылкыт
    Нырысь лымы.
    
    Пӧйшурасьлы
    Али гинэ татчы
    Пытьы кельтэм ӟичы.
    Юрмег* зурод улысь
    потам,
    
    Дыдык
    Сиён дуре, вылды,
    Музъем вылэ васькам.
    Ваньзэ -
    Зэмзэ,
    Чик ватытэк, шара
    Нырысь лымы вера.
    
    Юрмег* - ласка

    Мар-о ческытгес?

    Ньыль эшъёс: коньы,
    лудкеч,
    Кескич ӟичы но гондыр -
    Улӥзы тэльын туж ӟеч,
    Улӥзы соос шулдыр.
    
    Кытчы ке ӟичы чортэ,
    Пумит ӧвӧл эшъёсыз.
    Гондыр ке куноятэ,
    Шумпото мукетъёсыз.
    
    Вот одӥг ласянь эшшо
    Та дырозь уг тупало,
    Ӵукнаозь ик даллащо,
    Собере ини кӧло.
    
    - Мар-о самой
    ческытгес? -
    Гондырлэсь юа ӟичы.
    - Мар со сярысь юанэз,
    Валамон ини - чечы.
    -Тон бадӟым ке но,
    визьтэм,
    Курег сӥль ведь
    ческытгем.
    
    - Мар куреглэн
    ческытэз,
    Тодэ вал пушмульыез, -
    Коньы потэ азьпала. -
    Пилиськод кӧмзэ куалак,
    Нош пушкыз сыӵе
    корел...
    
    - Ваньдэсты потэ
    горем, -
    Ымдурзэ лудкеч нюлэ,-
    Дуннеын кубисталэсь
    Ческытэз ӧвӧл номыр.
    Нош шеде ке на кешыр,
    Пиньёс, ява, лычсузё...
    
    - Я, тырмоз, туннэ
    изём, -
    Эшъёслы гондыр вазе, -
    Кенешом ни ӵуказе.
    
    Ӵуказе нош огсямен
    Кутскозы даллашыны:
    Котькудиз дышем сямен
    Ӧдъялоз ушъяськыны.

    Эрик Батуев

    Удмуртские стихи для детей 8
    Валерий Николаевич Батуев (1969-2002)
    удмуртский поэт, русский писатель, журналист-международник

    Атас

    Азбартӥ атас ветлэ:
    – Ок-ок-ок! Лымы усе!
    Нош ик, нош кезьыт лыктэ!
    Сюдӥсе уг шӧд – изе!
    
    Нош сайказ ке, мон куро:
    Мед вӧлдоз гидэ куро,
    Мед пыртоз отчы ю тысь, –
    Мон уг пота ни гидысь.

    Шунды

    Вазь ӵукна
    Сайкась инме,
    Турнике сямен,
    Горд шунды каллен ӝутске,
    Ӟырдаса пумен.
    Ӟигарыз кызьы тырме? –
    Ӝук, лэся,
    Уно сие.

    Иосиф Бобров

    Удмуртские стихи для детей 9
    Иосиф Петрович Бобров (1943-2013)
    Удмуртский поэт

    Комбайн

    Горд шунды инвис
    йылтӥ ик
    Питырскиз но ватӥськиз.
    Нош комбайн ветлӥз, ветлӥз но
    Жадьыса, лэся, дугдӥз.
    Кускозяз ик выйыса, со
    Сюрс котыр лудын лэсьтӥз.
    Ӧз, ӧз вутты валаса но —
    Аранэз йылпумъяськиз.
    Со колоннаын бертоз ни,
    Эшъёсыз вӧзы дугдоз.
    Вуоно аран дырозь со
    Шутэтскоз но выльдӥськоз.
    Уз, нокин сое уз валты.
    Уз ни тайдыре ужен.
    Уйвӧтаз но лулӟылоз ни:
    — Ку вуоз выльысь гужем?

    Лобе улон

    Валъёс лобо, валъёс.
    Уг йӧто пыдъёссы.
    Дагаосысь — тылъёс,
    Тӧлъя изнэсъёссы!
    Валъёс лобо, валъёс,
    Сюлэм шудэ, кырӟа.
    Шулто, вольтчо тӧлъёс,
    Ширтэ паймем ульча.
    Валъёс лобо, валъёс,
    Кылё лудъёс, шуръёс…
    Макем умой, эй-эй!
    Я, эн кышка, мемей!
    Валъёс вортто, валъёс,
    Лобо чырткем, пезьгыт.
    Аръёс ширто, аръёс…
    Улон лобе озьы!

    Кыл

    Сьӧд кылэз кылыса,
    Улон ӧр но ыше,
    Малпатэк,
    Дыртыса
    Кылын эн шуд, эше!
    Ӝыны кыл но тырме
    Сюлэмез чигыны,
    Мылкыдлэсь бурдъёссэ
    Дэрие лёганы.
    Кыл ӧвӧл пукыӵ ньӧл,
    Нош мертче сюлэме.
    Кыл эмъюм но ӧвӧл —
    Кужмогес, эмогес!
    Кыл — со йӧ. Кыл —
    со тыл.
    Со ӵушка но кынтэ.
    Сюлэмысь потэм кыл
    Куинь толэзь но
    шунтэ.

    Уӵы но шушы

    Сьӧд кылэз кылыса,
    Улон ӧр но ыше,
    Малпатэк,
    Дыртыса
    Кылын эн шуд, эше!
    Ӝыны кыл но тырме
    Сюлэмез чигыны,
    Мылкыдлэсь бурдъёссэ
    Дэрие лёганы.
    Кыл ӧвӧл пукыӵ ньӧл,
    Нош мертче сюлэме.
    Кыл эмъюм но ӧвӧл —
    Кужмогес, эмогес!
    Кыл — со йӧ. Кыл —
    со тыл.
    Со ӵушка но кынтэ.
    Сюлэмысь потэм кыл
    Куинь толэзь но
    шунтэ.

    Вунэтӥд ке но…

    Льӧль шунды пуксиз ке но,
    Тыр толэзь ӝужаз ке но,
    Сьӧд пилем лыктӥз ке но —
    Возьмало тонэ.
    Кытчы ке кожид ке но,
    Вожой шур
    куасьмиз ке но,
    Тон монэ ыштӥд ке но —
    Мон шедьто тонэ.
    Италмас тӧлӟиз ке но,
    Чипчирган чалмиз ке но,
    Сюресэд ышиз ке но —
    Ярато тонэ!
    * * *
    Инбамлэн чеберез
    Чагыро-чагыро.
    Дуннелэн чеберез
    Шудбуро, шудбуро.
    Шундылэн чеберез —
    Та улон, та улон.
    Улонлэн чеберез —
    Яратон, яратон!
    * * *
    Дас укмыс аресъем пиос
    Султӥзы эзельлы
    пумит.
    Ышизы-быризы соос:
    Гомак!
    ньылӥз
    пеймыт.
    Тросэзлэн шайгузы но ӧвӧл.
    Келясьтэк кылизы
    нылъёс.
    Ой! Шудо-а, шудтэм-а тӥ вал,
    Кызь витетӥ
    арын
    вордскемъёс?!

    Кӧл, шаере!

    Вылэтӥ, Сямвыр бамтӥ,
    Дыртыса сюрес кошке.
    Мон уг кӧлы на али,
    Вамышто. Толэзь
    пиштэ…
    Гондыргурт гурезь улын
    Чус уммен кӧлэ, вӧта.
    Сымвырйыл нош
    Четкерен
    Каньылля сое ветта.
    Казённой, Ушкоп нюлэс
    Шунтозы
    Гондыргуртэз.
    Вожой шур, Тӧдьы
    ошмес
    Удозы юзмыт вузэс.
    Я, бен, кӧл, мусо шаер!
    Лу тон котьку но чебер!
    Кӧлондэ ми сак утём,
    Шундыен ӵош
    сайкатом!

    Юлия Байсарова

    Удмуртские стихи для детей 10
    Юлия Павловна Байсарова удмуртская детская поэтесса, член Союза писателей России

    Чиньыос

    Пӧлыос пумиькиллям,
    Чуп-чуп-чуп чупаськиллям
    Азьчиньы эшсэ адӟем,
    Ӝип-ӝип ик ӟыгыръяськем.
    
    Шорчиньы но эшеныз
    Вераськем ас кылыныз,
    Нимтэмез гинэ сылэм,
    Со угось кылтэм вылэм.
    
    Нош чӧльы - пичи чӧльы -
    Улыны корка пырем.
    Улыны корка пырем,
    Со отын кузё луэм.

    Перепеч

    Пере-пере, перепеч
    Песянай пӧра туж ӟеч.
    Лыктэлэ тӥ дорамы,
    Ваньдэс куно каромы.

    Атаслэн кырӟанэз

    Ко-ко-ко, ко-ко-ко,
    Нумырез мон утчасько.
    Ко-ко-ко, ко-ко-ко,
    Кибыез мон кутӥсько.
    Ко-ко-ко, ко-ко-ко,
    Курегъёсты ӧтисько.
    Ко-ко-ко, ко-ко-ко,
    Ко-ко-рико!

    Юасько мемиелэсь

    Юасько мемиелэсь:
    - Тон шаплы, дыр, котькинлэсь?
    Со уг вера, серекъя:
    Валасько учкемезъя.
    
    Ушъямез ассэ уг пот,
    Шат ачиз но со уг тод:
    Уж дураз со азьмынӥсь,
    Нош гуртын – утись-вордӥсь.
    
    Юасько на мемилэсь:
    - Тон визьмо, дыр, котькинлэсь?
    Нош уг вера, серекъя:
    Валасько синъёсызъя.
    
    Ушъямез ассэ уг пот,
    Шат ачиз но со уг тод:
    Котькин соин вераське,
    Кенеше, юалляське.
    
    Тон мусо ук, мемие,
    Тон дуно ук, мемие.
    Ӟыгырто ай мемиме,
    Монэ утись-вордӥсьме.

    Барабан

    Там, тара-рам, там, тара-рам!
    Ваньды вамыштэ сьӧрам.
    Кырӟалом но гурлалом.
    Вань урамез шулдыртом.

    Чуки чук

    Чуки-чук, чуки-чук,
    Парсьтэ сюд али, Манюк
    Ӧд ке сюд, со куатаськоз,
    Йырйыны тусьсэ кутскоз.

    Мемилэн

    Мемилэн пыжем нянез
    Буй-буй небыт но ческыт.
    Мемилэн пӧзьтэм шыдэз
    Нясь-нясь каре сюлэмез.

    Пичи Вовик

    Тыр толэзь инбаметӥ
    Дыртытэк уя огназ.
    Со шоры укно пыртӥ
    Вовик кема кырмышъяз.
    
    Малпаське, кызьы туж сэзь
    Сокеме туба толэзь,
    Кызьы отын возиське,
    Мар борды-о кырмиське?
    
    Нош малы кизилиос,
    Кизем кадь ик, пумтэм трос
    Мар каро отын соос?
    Уез уйбыт, ӵукнаозь?
    

    Векчи зор

    – Векчи зор укное йыгаське,
    Коркамес миськыны куриське.
    – Ойдо миськы ай тон ульчаез,
    Мон ачим миськисько ни выжез.

    Мон ворттылӥсько

    Вал вылын ворттылӥсько,
    Но-о-о! кесяськисько.
    Нош валэ – ныдо ӵужон,
    Бызисько – потэ тузон.

    Колӟо

    – Мон толон пӧрай колӟо.
    – Возьматы ай, вай адӟо.
    – Мон сии ини сое,
    Возьматыны немае.

    Анатолий Уваров

    Удмуртские стихи для детей 11
    Уваров Анатолий Николаевич (1933-2005).
    Удмуртский поэт, литературовед, критик, кандидат филологических наук

    Кубик-рубик

    Кубик-рубик
    Туж кескич.
    Рудикмы
    Выре шумприч.
    Позыръя,
    Утча радзэ,
    Огазея буёлзэ.
    Ӝог шедьтэ ке
    Кулэзэ,
    Тэтчыса
    Чабе кизэ.
    Ӟеч шудон-
    Кубик-рубик.
    Юн гажа сое
    Рудик

    Кин суреда?

    Туж ик туж мынам
    Тодэме потэ:
    Кин укно бордам
    Суредъёс лэсьтэ?
    Тол укно синмын-
    Пужымъёс, кызъёс.
    Гурезьёс сьӧрын
    Уть ай-пальмаос.

    Луд кеч

    Пурысь луд кечме
    Мон пуктӥ
    Выж вылэ.
    Тани со тэтчэ
    Оппи-оп!
    Туж вылэ.
    Я, мын,
    Кузь пельдэ
    Чоркки-чорк
    Ӝутыса,
    Эн учкы
    Мыштэ,
    Монэ мурт
    Кожаса.

    Вик-вак арганэ

    Вик-вак арганэ,
    Экты, пичи Такъянэ!
    Йырдэ солань кырыжты,
    Йырдэ талань кырыжты.
    Кикиеныд чаб,чаб!
    Пыддэ лёгы тап-тап!

    Гужем ӵукна

    Вазь ӵукна султыса,
    Шур дуре васькисько.
    Вырйылэ тубыса,
    Котырак учкисько.
    Тэль сайкам ни - кырӟа,
    Возь кӧлэ на-паймод!
    Назьылске ыр тӧлъя,
    Султэме, пе, уг пот.
    Лыз-чагыр инбамын
    Сьӧд душес гожеръя,
    Пурысь бус гурт валлин
    Лӧсъяське каньылля.

    Курмем Коли

    Кин Колиез тодмалоз,
    Кин сое Коли шуоз?
    Бамыз солэн таш-таш сьӧд,
    Киосыз но копак нӧд.
    Уть, пуны но тодматэк
    Колиез утэ туж лек.
    Коӵышпи но кышкамын,
    Юбо йылэ тубемын.
    Курегъёс но пазьгисько,
    Пегӟе, пе, кутоз моко!
    Мар Колилы кароно?
    Валамон: мисьтаськоно!
    Чылк-чылк Коли мисьтаськиз,
    Туж чебер луиз етӥз.
    Пунымы сое тодмаз,
    Кочышпи лыктӥз дораз.
    Курегъёс но люкасько,
    Эш карыса верасько:
    - Мисьтаськид ке, туж усто -
    Ваньмыз тонэ ярато!

    Асьме солдатъёс

    Мыно солдатъёс дыртыса,
    Капчи вамышто кырӟаса.
    Шулдыр кырӟамзы кудёке
    Котыр улосэ чузъяське.
    Асьме солдатъёс кужмоесь,
    Утё калыкмес сьӧсьёслэсь
    Вордскем музъеммес лёганы
    Уз сётэ соос тушмонлы.

    Чебер кызмы

    Кисьтаськись дисен
    Жильккетись весен
    Тон, чебер кызмы,
    Султид заламы.
    Ми ваньмы туннэ
    Котыртом тонэ,
    Кырзалом, эктом,
    Кылбуръес мадем.
    Шумпотэ кызмы,
    Выль ар куномы:
    "Будэ етизэсь,
    Луэ чырткемесь!"

    Вордскем кыл

    Одӥг малпан монэ курадӟытэ —
    Вордскем кылмы понна сюлэм висён.
    Монэ гинэ-а — ваньмес ранӟытэ
    Куанер но ултӥям данэ усён.
    Оло кысӥз кылмес яратонмы?
    Кыӵе гӧрлэсь дуно кылмы кынме?
    Марлы меда жингрес вераськонмы
    Садысь уллям уӵы выллем чалме?
    Уг ни дӥсьты ас кылыныз удмурт
    Калык пӧлын вераськыны пезь-пезь.
    Оло ас шаераз луиз со мурт?
    Оло кышка мыскыл каремзылэсь?
    Вордскем гуртаз со вазьылӥз: «Нэнэ!»
    «Яратӥсько!» — шуиз гажанэзлы.
    Али Ижын со, кухняяз гинэ
    Вераськыны дӥсьтэ удмурт кылын.
    Туннэ бырем гуртъёс вералозы,
    Кызьы укнооссэс ӵогалляса,
    Сыӵе муртъёс каре кошкылӥзы,
    Пӧсь синвуэн гадьзэс пылатыса.
    Али соос гербер дыре карысь
    Гуртъёссылэн бервылазы берто.
    Ортчем дырзэс буре ваё сюлмысь —
    Вордскем кылын кырӟанъёссэс мыто.
    Нылпиоссы мыкыртыло йырзэс,
    Ӝожесь ик та бырем гуртысь гуръёс.
    Сюлмын кайгу, уг валало кылзэс,
    Вордскем кылзэс ӧз дышетэ соос.
    Нош кыдёкын — инльӧль. Вуэ ӵук пал.
    Ӝужась шунды, тон кисьты выль кужым!
    Чалмись кылмес тон улӟыты, нунал,
    Сёт юн луон, медаз быр лул-выжы!

    Пегась кечтака

    Чупчилэн сопал дураз
    Кечтака кылиз огназ.
    Уллёезлэсь палэнэ
    Пегӟылэ со ӵем гинэ.
    Ӝомытозь ик со калгиз,
    Ветлонъяз нош йыромиз.
    
    Черекъя ни кечтака:
    "Ме-ке-ке, ме-ке-ке!
    Пумитаз вазе бака:
    "Бре-ке-ке, бре-ке-ке!
    Чиргето солы ӟозъёс:
    "Огнадэ кион сиёз!"
    Пегасьлэн кышкаменыз
    Дырекъя ини сюлмыз.
    
    Бен ярам, нош кеч возьмась
    Утчаса шедьтӥз.
    Ӝомытэн шур сопалась
    Пегасез поттӥз.
    
    Табере думет йылын,
    Гид вӧзысь кӧс кыз улын,
    Кечтака сиське огназ,
    Пегаса ветлэм понназ.

    Оксана Бисар

    Удмуртские стихи для детей 12
    Оксана Бисар. Поэтесса, певица, шоувумен, журналистка, победительница литературно-музыкального конкурса «Современникъ» в номинации «Поэзия»(2019), актриса стендапа

    Инкуазь сярысь

    Ныр вылам кинке пуксиз -
    Чепылля но бичатэ.
    Йӧпыры усе инмысь,
    Вуэ ини толалтэ.
    ***********************
    Кин вузэ уй но нунал,
    Шат, кион уг кӧл?
    Мискиньлэн кӧтыз сюмам,
    Эн кышка, со вузэ тӧл.
    ***********************
    Чимаса но ватскыса
    Нылпиос шудо педлон.
    Бус пӧлы зымкылыса
    Кема кыстӥське шудон.
    ***********************
    Кыӵеке но сӥньысъёс
    Валес дорам нуйтӥсько.
    Резь шудо шунды сиос -
    Адямиен эшъясько.
    ***********************
    Жильырак кичкем коньы
    Сюй вылэ - пайме Вани.
    Усиллям куаръёс озьы,
    Малпалод - кичкем зарни.
    ***********************
    ШоколАд малпа Вери
    Кисьтӥллям сюрес вылэ.
    Анаез шуэ - дэри
    Зор бере музъем луэ.

    Пудоос сярысь

    Ыжы-жыж, киы кынме:
    Тол Бабай куртчылӥське.
    -Пото иське коргидэ
    Ыжлэсь куро ыжгонзэ.
    Шуныт пӧзь нэнэй керттоз,
    Ыжмы нош сэре кынмоз?!
    Нэнэй пизэ лӥятэ:
    -Ыжлэн выль гонэз будэ.
    *************************
    Самовар пӧзе бугыр,
    Ойдо чай юом йӧлын.
    Йӧл, бен-ай кытысь шедьтом?
    Ойдо скалмылэсь куром.
    Ӝыныез кунянмылы,
    Кылемез нылпиослы.
    ************************
    Йӧвалег азбарамы -
    Кытыське потэм чипы.
    -Чипы-чип,- ӧте курег,
    Мынын уг сёт йӧвалег.
    Сюлмаське пичи Олёш -
    Чипы азбарын кынмоз.
    Ойдо пыртом коркамы
    Йыромем чипыосты!
    ************************
    Кин сием чужонъёсмес,
    Погыръям ведраосмес?
    Вуылэм татчы маймыл,
    Ох, пайме ук пичи ныл.
    Маймыл кадь ик со туж сэзь -
    Кузь сюро йыртэмась кеч.

    Мынон-ветлонъёс сярысь

    Кин уг сёты кӧлыны,
    Ӵукна вазь сайка?
    Ох, кутске таргетыны -
    Дыгыр коркамы зурка.
    Тар но тар вазе со зол,
    Ужаны мынэ.
    Нош нимыз солэн - трактор
    Калыклы юрттэ.
    *************************
    Цоки -цок - вазе улос,
    Кинке корккетэ.
    Серметам Вани валэз -
    Вылаз ворттылэ.
    Толалтэ думе дӧдьы,
    Трос муртэз нуэ.
    Вал луэ тӧдьы-тӧдьы,
    Ӝытсэ ке жаде.
    ************************
    Ветлысал сьӧрлось гуртэ,
    Нош маин отчы мынод?
    Зар гинэ Саши бӧрдэ,
    Мар таре карод?
    Тани, пие, питыри
    Я, велосипед.
    Ворттылы ури-бери
    Котькытчы вуттод!
    *************************
    Корт тылобурдо лобе -
    Паймемын пичи Ани.
    Самолёт со нимаське -
    Пушказ пуке адями.
    
    Нош музэ ке со пуксе -
    Коркалэсь бадӟым.
    Кызьы инбаме ӝутске?
    Валантэм мыным.

    Даниил Яшин

    Удмуртские стихи для детей 13
    Яшин Даниил Александрович.
    удмуртский поэт, литературовед, фольклорист, кандидат филологических наук, доцент.

    Натӥ бадӟым ни

    Кин шуиз, Натӥ пичи на?
    Кин вераз, каллен будэ?
    Табере Натӥ бадӟым ни,
    Со ветлэ ни детсадэ.

    Шедьто дэри

    - Марлы кутчад сапегдэ?
    Педлон кӧс ук - зорымтэ.
    Нош Натӥ шуэ:
    - Юри.
    Кӧс ке но - шедьто дэри.

    Табань

    Нэнэмы пыжем табань
    Туж ческыт, зырет ке вань.
    Шумпотэ пичи Натӥ,
    Весь берга гур котыртӥ.
    Гур дорысь кошкиз нэнэ,
    Ныл возьма тае гинэ,
    Табапуд кияз кутӥз,
    Табазэ гуре донгиз.
    Выремзэ адӟиз мумиз,
    Пӧрасьлы чылкак паймиз.
    - Эх, Натӥ, шуэ, - Натӥ,
    Оло табань пӧрмытӥд?
    Зэм но, туж умой вылэм,
    Ӧжыт гинэ сутӥськем.
    Ӵок, ӝуаз ке нырысез,
    Мукетыз пӧрмоз ӟечгес!

    Галина Романова

    Удмуртские стихи для детей 14
    удмуртский прозаик, поэт – автор поэтических сборников, рассказов, пьес, юморесок, сказок и песен, Заслуженный работник культуры УР и РФ

    Малпаське Семи

    Азбаразы кор вылын
    Малпаське Семи:
    "Кытысь меда тӧл потэ?
    Нош малы шунды пуксе?
    Кытысь нош лысву усе?
    Чалякгес мед будысал,
    Ваньзэ-ваньзэ тодысал".

    Вордскем нуналаз

    Вордскем нуналыз
    Туннэ эшелэн.
    Кыӵе шудонме
    Солы кузьмалом?
    Ай ачим солы
    Суредъёс лэсьто:
    Горд пароходъёс,
    Лыз самолётъёс...
    Чебер буёлъёс
    Мед шулдыртозы
    Эшелэсь туннэ
    Вордскем нуналзэ.

    Зорем тӧдьы

    Выль лымы одӥг уйскын
    Быдэс музъемез согем.
    Азбармы но ураммы
    Мамыкен шобыртӥськем.
    Коли учкиз укнотӥз –
    Мальдытӥз синзэ лымы.
    Чан-чан корка тыр кеськиз:
    – Ой, педлон зорем тӧдьы!..

    Дырез утчало

    – Анай, ойдо ӵош шудом!
    – Дыр ӧвӧл – пӧраськоно.
    – Атай, ойдо пыж лэсьтом!
    – Дыр ӧвӧл – пу вандоно!
    – Агай, ойдо ворттылом!
    – Дыр ӧвӧл – лыдӟиськоно!
    Ай кошко мон ӵуказе,
    Шедьто дырлэсь корказэ.
    Ваё сое дорамы,
    Соку монэн шудоды.

    Василий Ванюшев

    Куке шуо мыным Чайковский…

    Куке шуо мыным Чайковский,
    Мон адӟисько кадь юсьёсыз.
    Тӧдьы пилем выллем лобӟо кадь,
    Инбам мыня кадь чагыр-лыз.
    
    Чик бурдъёсы мынам ӧвӧл но,
    Мон сьӧразы уйиськисько –
    Тӧдьы юсьёс бинялтӥсько но
    Вотка тыэ кадь лэзисько.
    
    Вотка тыын пи поттозы кадь,
    Нош лобӟозы чагыр инме.
    Юсё тыэз крезен данъяз шат
    Ачиз Чайковский но юнме?
    
    Вотка дуртӥ со лёгаськиз, дыр,
    Люказ аслыз дорпал сӥльвир.
    Куке-соку но малпаськиз, дыр:
    "Удмурт улос сюлмысь уз быр".
    
    Куке шуо мыным Чайковский,
    Югыт дунне монэн кылзэ
    Юсё тыэн пыӵам крезез но
    Уд шаерлэсь куараоссэ.

    Люза Бадретдинова

    Луло кыл

    Кыл уг пӧсьты
    Уг но кынмы.
    Кыл уг шуна,
    Уг но шока.
    Кыл уг выйы,
    Уг но кулы.
    Сылало но со ӧвӧл.
    Эмъюмез но чик ӧвӧл.
    Кыл лултэм но шокасьтэм,
    Шӧдӥсьтэм,
    Ӝожомисьтэм.
    
    Тон пушкын кыл вордӥське:
    Лульяське,
    Ӟигар басьтэ.
    Собере –
    Кузёяське.
    Кинэ ке шунтэ,
    Веша.
    Бурдоез кадь
    Лыз инме бурдъя.
    Кинэ ке нош
    Вӧсь каре,
    Чепыльтэ, ӝожомытэ.
    
    Одӥгез кыл висьытэ,
    Мукетыз - эмъя, лулъя.

    Ӵушъял но кешыр

    Кузьмаське туннэ ӵушъял,
    Ӵужкушманэз- быэс ал.
    Куатьсэ сётӥз лудкечлы,
    Сизьымзэ - мудӥсь шырлы.
    Одӥгзэ куриз куака,
    Мукетсэ - гольтрес курка.
    Палэнэ ӧз кыль сяла:
    Куиньзэ дор палаз кыска.
    Вуизы нарды*, коньы -
    Соослы ӧз ни шедьы.
    Лыдъя, кӧня кешырез
    Ӵушъял жалятэ кузьмаз?
    
    * нарды - барсук.

    Анатолий Леонтьев

    Пальпотэ шунды

    Зор ортчиз.
    Будос вылысь
    Тузонэз чылкыт гылтӥз.
    Шундыед пилем сьӧрысь
    Ӟеч мылкыдын потиз.
    
    Шуныт тӧл ыртэ небыт.
    Ӟоз кутскиз чикыртыны.
    Эх, пото ай гольык пыд
    Зор бере бызьылыны!

    Лыктӥськом садэ

    Ӵукналы быдэ
    Лыктӥськом садэ,
    Шудӥськом дэмен
    Пӧртэм шудонэн.
    Эшъёсмы тырос:
    Чебер мунёос,
    Пичи гондыръёс,
    Питырес шаръёс.
    Дэмен кутскыса,
    Корка лэсьтӥськом,
    Котыр пуксьыса,
    Шулдыр кырӟаськом.

    Поезд

    Чаль гурезь баме:
    Поезд лэсьтӥськом
    Шир-р-р гинэ дэмен
    Гурезьысь васьком!
    
    Шулдыр поездын
    Ваньмы асьмеос.
    Нош вагонъёсмы - 
    Пичи дӧдьыос.
    
    Э-ге-гей!
    Ӝоггес!
    Мед пурӟоз лымы.
    Сётэлэ сюрес
    Кин вань азямы,
    
    Чузъясько жингрес
    Пинал куараос,
    Юзмыт омырез
    Сэзъялто соос

    Мед адӟоз

    Тӧл, тырмоз ни тӧланы,
    Валалод-а дугдыны?
    Эн туга ай йырсиме,
    Эн сэртты пунэтъёсме.
    Нырысьсэ ачим пунӥ,
    Мед адӟоз али нэнӥ.

    Выль ар салам

    Учке ай, миндэр улам
    Кин ке но кельтэм салам!
    Вань отын ӵыж-ӵыж улмо,
    Кампетъёс пӧртэм пумо.
    
    Кин ваньзэ тае ваем,
    Лушкемак татчы понэм?
    Бубае тодэ, оло,
    Мон солэсь ай юало.
    
    Пальпотӥз буба, вераз:
    – Тол буба уйин пыраз.
    Эх, малы сайкатымтэ,
    Саламзэ лушкем кельтэм?

    Тол Бабай чупаз

    Нискылаз Мики,
    Шудӥз,
    Волятӥз гурезь бамез.
    Коркасен гинэ шӧдӥз -
    Шудыкуз
    Кынмем бамыз.
    
    Бубаез шораз учкиз,
    Шыпытак солы шуиз:
    - Ма карод на бӧрдыса,
    Янгыш ӧвӧл гурезь бам.
    Со озьы
    Яратыса
    Тол Бабай тонэ чупам.

    Куака но кикы

    Кикылы вера куака:
    - КАР-Р-Р!
    КАР-Р-Р!
    Нош ик-а
    Номыр-р-р од КАР-Р-Р?
    Тыр-р-шытэк,
    Номыр-р-р КАР-Р-ТЭК,
    Весь улод, кикы, КАР-Р-ТЭК.
    Мынэсьтым адӟем тон КАР-Р-Р:
    Р-рос-прос кутскы,
    Лэсьты КАР-Р-Р.
    Коть кыр-р-лэсь*
    Юрттэт тон КУР-Р,
    Йырыз чик уз луы КУР-Р.
    Лэсьтӥське кыр-р
    Туж усто,
    Кар-р тыныд
    Лэсьтоз усто.
    
    *- зуч сямен: ронжа.

    Паймисько

    Ӟус уламы
    Кудымы,
    Пуке отын
    Курегмы.
    Возьматэ туннэ анай,
    Шуэ:
    - Пие, учкы ай,
    Чипымы мылысь-кыдысь
    Потыны выре пузысь.
    Адӟиське ини нырыз,
    Ӝоген потоз мугорыз.
    Учкисько но
    Паймисько,
    Валаны мон
    Тыршисько:
    Потыны бон
    Со потэм,
    Нош кызьы
    Отчы пырем?

    Е. Николаев

    Чимали

    Вожэктӥз ини гуждор,
    Шудыны потэм Педор.
    Экелэн эшез ватскиз:
    Кытчы меда со пегӟиз?
    Чики-чик, чики-чик,
    Выж улэ пырем Юрик!
    Курег ке ӧй коткасал,
    Тонэ мон ӧй шедьтысал.
    Юрик, пот, Юрик, чим,
    Табере ватско ачим...

    Удмурт калык кылосъя гожтэм кылбур

    Лыдъяськонъёс

    Вить, куать, дас куать,
    Тон но, мон но одӥг кадь.
    ***
    Гурезь ултӥ улмо питра,
    Кин ке кутэ – со потэ.
    ***
    Гондыр, гондыр городын,
    Чабей мешок гур вылын.
    ***
    Дӥго-дӥго, дӥго-дӥг,
    Кыкен лыдъяса – дас кык.
    ***
    Кык,тямыс, дас куать,
    Кыкнамы но одӥг кадь.
    ***
    Красной, суди, води, пот!
    ***
    Куар вылын нумыр кылле,
    Сое поттыны кулэ.
    ***
    Мон но, тон но Паримон,
    Онтонлы луоз коньдон!
    **
    Мон, тон, со,
    Мон, тон, со,
    Ми, тӥ, соос,
    Ми, тӥ, соос,
    Кин вылэ лыдӟон дугдоз,
    Со ик чимали луоз.
    ***
    Микта –кукта, чаба-бильма,
    Чи-бу, ладь-бадь.
    ***
    Нюк улэ питран питра,
    Кин ке утӥз, со чима.
    ***
    Одӥг, кык, куинь, ньыль,
    Вить, куать, сизьым,
    Тямыс, укмыс, дас.
    Чорыг уя тусьты пыдсын,
    Кин ке кутӥз,
    Со потоз.
    ***
    Тумба-тач, тумба -тач,
    Тумба-тумба, тумба-тач.
    ***
    Тури, тури, палтури,
    Вӧйын нянь тыныд кури,
    Кытчы ыштӥд бурдъёстэ?
    Кытчы кельтӥд пыдъёстэ?
    Тӥни инмын кизили,
    Монэ туннэ кут али!
    ***
    Чима, чима, чимали,
    Чимыостэ кынь али,
    Чимыостэ усьты ни,
    Пегӟемъёсты утча ни.
    ***
    Чима, чима, чимали,
    Азбар тыр вазиз Коли.
    ***
    Чиклё-пуклё, чиклё-чик,
    Кинлы луиз, со потоз.

    Инкуазьлы, нымы-кибыослы вазиськонъёс

    Шунды мама, пот, пот,
    Пилем атай, кош, кош,
    Вӧё гинэ карыса,
    Выль пуньыен ӝук сёто.
    ***
    Шунды-меми, пот-пот,
    Пилем агай, кош-кош,
    Ми потом дорад дэмен,
    Ваньмы сяська дэремен!
    ***
    Шунды мама, пот, пот,
    пилем атай, кош, кош,
    Чебер гинэ пуньыен,
    Вӧё гинэ ӝук сёто.
    ***
    Шунды пот, шунды пот,
    Пияла ката кутчало,
    Сяська дэрем дӥсяло.
    ***
    Зор, зор, куазие,
    Ведра дурын кисьтӥсе.
    Зор,зор, куазие,
    Мед потоз ай сяськае.
    ***
    Зор, зор, зорые,
    Тон весь усьы улӥе.
    Мон тыныд шумпотӥсько,
    Усьыны мон дэмласько.
    ***
    Зор, зор, зорые,
    Узые но борые,
    Сезьые но тарие,
    Кыз йылын куака пуке,
    Со но зорыез куре.
    ***
    Пот, пот, сяськае,
    Мушъёс чечы бичало.
    ***
    Пот, пот, узьыме,
    Тонэ лымы ӵоксалоз,
    Будыны капчи луоз.
    ***
    Льӧмпу, льӧмпу, вай льӧмдэ
    Пичи ке но веръяны.
    ***
    Зорода-лобода,
    Бурддэ кылёд-а?
    Инме лобод-а?
    ***
    Зорода-лобода,
    Чебер дэремдэ
    дӥсялод-а?
    ***
    Лоб-лоб, папае,
    Анаед-атаед вӧёкен,
    Чечокен няня сётоз.
    ***
    Шыр, шыр, вай вудэ,
    Тусьты-пуньы миськыны,
    Гидысь валъёс люктаны.
    ***
    Дӥго-дӥго, дӥго дӥг,
    Шуре мын ай, нянь сёто.
    Кеч-пеле, кеч-пеле,
    Малы бакчаям пырад,
    Малы кубиста сиид?
    ***
    Коӵо-куӵо нянь куӵо,
    Малы нянез нуллӥксьод?
    ***
    Кут-кудак, кут-кудак,
    Кудыын ӧй пукы так,
    Мон пуки, кукей пузай,
    Со понна сезьыдэ вай.
    ***
    Кучыран, кучыран,
    Гурезь улэ питыран.

    Вуюись

    Вуюись, вуюись,
    Тон зэмзэ-а ву юись?
    Ву шурысь-а юиськод,
    Лыз инбаме пызйиськод?
    Нош кытысь-о буёлъёс
    Утчаськод но шедьтӥськод?
    Кызьы-озьы карнан кадь
    Гуртмы вадьсы лэзькиськод?

    Лудкечпи

    Урамысь кенер дуре
    Лудкечпи усем.
    Нош кырын зоре-зоре,
    Пӧйшур зол котмем.
    Вурем тӧдьы лудкечпи
    Кыллиз туж кема.
    Киргатӥз, дыр, пичи пи,
    Бӧрдӥз, дыр, эхма!
    Мед шедьтоз вал со эшсэ
    Ветлыкуз татӥ.
    Гуждор вылысь кечпизэ
    Вылэ юнматӥ.
    Трос вакыт ортчиз ини,
    Вунэмын шудон.
    Сумкаям сое понӥ:
    «Мынам луы тон».
    Дорам сое нуыса,
    Жуг-жагзэ куртки,
    Майталэн ик зыраса,
    Лудкечме миськи.
    Выль, небыт эше мынам —
    Кыӵе шудо мон.
    Аслам пичи дыръёсам
    Ӧй вал таӵе шудон.

    Анна Байдуллина

    Ческыт виртырем

    Чидатэк пуке Мани
    Барсак, шаньги, юача,
    Анаез пыжса дася.
    Чидатэк пуке Мани,
    Урокъёс уг быро ни.
    Бызьыса бертӥз дораз,
    Уралтэм ини пумаз.
    Туннэ ӧвӧл пыжиськем,
    Анай пӧзьтэм виртырем.
    Виртырем но туж ческыт,
    Лӧптэмын ныллэн мылкыд.
    Вандыса ымаз понӥз,
    Виртрем сӥльтырем луиз.
    
    Анна Байдуллина

    Мынам ужпие

    Тон, мынам ужпие,
    Туж чырткем Тӧрие,
    Изнэстэ сынасько,
    Вылтырдэ сузясько.
    Си, Тӧри, сезьыез,
    Ю, Тӧри, дун вуэз,
    Собере гырдалод,
    Монэ тӧл кадь нуод.

    Куас

    Атае мыным куасаз
    Туж капчи, чебер выль куас.
    Куасэлы мон куанӥсько,
    Тӧл кадь азьлань ширтӥсько.

    Изь, изь, нуные

    Изь, изь, нуные,
    Зарни бугоре.
    Чагыр бурдо бубыли
    Йыр улад валес валёз.
    Зарни бурдо пичи муш
    Тонэ чечыен сюдоз.
    Изь, изь, нуные,
    Зарни бугоре!

    Нэнэлы сяська

    Ойдо, Вани, возь вылэ
    Льӧль сяськалы,
    Пуктом сое ӝӧк вылэ
    Нэнэмылы.

    Городысь кузьым

    Ижевске ветлӥз атай,
    Мар басьтэм со - учкы ай:
    Мишилы - ӵуж питран,
    Колилы - горд шулан,
    Петилы- чагыр шар,
    Нош мыным - выль букварь!

    Буд ини

    Буд ини,
    Покчи нылы,
    Зарни бугоре,
    Дыш ини пӧртэм ужлы,
    Лэсьты котьмае.
    Тон миськылы буям выжмес
    Чылкыт.
    Тон утялты азбармес
    Ӝикыт.
    
    Буд ини,
    Покчи пие,
    Нуныкае-чебере,
    Атаедлы юрттӥсе
    Яралод ни табере.
    Соин котьмар кароды,
    Садэ писпу мерттоды.
    Ужаны дышетскоды,
    Юртъер кутӥсь луоды.

    Шунды мемей

    Шунды мемей, пот али,
    Шорамы тон учкали,
    Витиськом тонэ дэмен,
    Ваньмы сяська дэремен!

    Олилы сяська

    Чагыр сяська - дыдыксин
    Олилы бичам, ваим.
    Оли кутиз, пальпотиз.
    Шумпотыса зыгыртиз.

    Чебер сяська

    Чебер нылъес
    Возь вылэ пото,
    Сяська окто,
    Тугоко кертто.
    Чуж мертчан йырсиязы
    Италмас быртто.

    Коӵо-куӵо

    Коӵо-куӵо ӝук пӧӟьтэм,
    Пиналъёссэ со сюдэм:
    Таизлы дурыен,
    Таизлы тусьтыен,
    Таизлы тэркыен,
    Таизлы пуньыен.
    Нош таиз чиньы азьтэм,
    Гур вылын со изем,
    Солы номыр ӧвӧл!

    Тополь ӝужыт

    Сопал ярысь чагыр сяська,
    Тапал ярын мед луоз вал.
    Толон адӟем яратонэ,
    Туннэ татын мед луоз вал.
    
    Тополь ӝужыт, тополь ӝужыт
    Учкисько ке, шурдӥсько…
    Тон шоры ке учкисько,
    Тон чебер - возьдаськисько…
    
    Ӝужыт-ӝужыт гурезь йылэ
    Кыкнамы тубом али.
    Ог-огмес яратыса,
    Валче уломы али.
    
    Легезьпулэсь, ой, сяськазэ
    Малы сокем яратӥ?
    Нылъёс пӧлысь одӥг тыныд,
    Малы сокем синмаськи?
    
    Ой, италмас, италмас,
    Тӧл ке потэ, кисьтӥське.
    Милям пинал дауръёсмы,
    Италмас кадь, кисьтӥське.
    
    Учкы, туган, учкы шорам,
    Учкы мынам синъёсам,
    Учкы мынам синъёсам -
    Тон соку луод мынам.

    Александр Белоногов

    Удмуртские стихи для детей 15
    Белоногов Александр Егорович (1932-?)
    удмуртский поэт, Член Союза Писателей СССР с 1962 г. Народный поэт Удмуртии (2002)

    Ӝук

    Мыным туннэ мемие
    Пӧсьтӥз йыды ӝук.
    Понӥз сыӵе тэркые -
    Кык киын уд ӝут!
    - Си, пие, - шуэ меми, -
    Ойдо, ӝук тырмоз.
    Эсьмаса, йырад но, пе,
    Трос кеньыр пыроз.

    Кышкась Педор

    Чилектэ но гудыртэ -
    Кисьтэ шуныт зор.
    Куинь-ньыль полэс шобретэн
    Ӝокатскем Педор.
    
    Лудкечпи кадь шымырскем,
    Дӥсьтытэк шока.
    Со кожа тани ӝоген
    Куашкалоз корка.
    
    Пыласько вож писпуос,
    Шумпотэ гуждор.
    Педорез гинэ лекос
    Кышкатэ та зор.
    
    Тӥни, Педор, эшъёсыд
    Потӥллям дэмен.
    Шопыль ветло гольык пыд,
    Пазясько вуэн.
    
    Серекъя ини шунды,
    Дугдэмын ни зор.
    Пеймыт шобрет улысьтыд
    Пот ини, Педор!

    Фуфу

    Со бен кин сыӵе,— Фуфу?
    Кудпалась вуэм маке?
    Сыӵезэ нимез ноку
    Кылэмды ӧвӧл, шӧдске.
    
    Эн тӥялэ йырвизьдэс:
    Асьмелэн ик со эшмы.
    Со Лели вал азьлогес,
    Табере Фуфу нимыз.
    
    Лелиез маке косо
    Я ӵекто солы маке
    «Яралоз» уг шуы со,
    "Фу!" но "Фу!" гинэ кеське.
    
    Жӧк вылэ пукто сиён
    Нырыз нош ик ошиське.
    «Фу,— шуэ,— уг сиы мон,
    Мар кулэ, уд пӧзьтӥське».
    
    Ноку но дӥсян-кутчан
    Мылкыдъяз солы уг лу.
    Кыӵе ке шексэ утча,
    Ныр кузяз нёртэ со: «Фу-у!..»
    
    Школаын яке дораз
    Минутлы быдэ кадь «Фу!».
    Оло, туж солы яраз
    Выль мудрон нимыз Фуфу?

    Бадӟымъёс сьӧры

    Кытысь мае тодӥськом, пе,
    Пичи мурт йырын.
    Валантэм шат, учкиськом ук
    Бадӟымъёс шоры.
    
    Кытчы-о вамыштӥськом, пе,
    Та улон ӧрын.
    Тодмотэм шат, мынӥськом ми
    Бадӟымъёс сьӧры.

    Кузёбай Герд

    Удмуртские стихи для детей 16
    Кузьма Павлович Чайников (1898-1937)
     удмуртский поэт, прозаик, драматург, переводчик, национальный и общественный деятель.

    Айно нылылы

    Вазь ӵукна султыса
    Пыласько дыртыса
    Кин вуэн, кин пенен,
    Кин куарен, кин зорен:
    Ӵӧжпиос,
    Чипыос,
    Сьӧд коӵыш,
    Вож-вож пыш,
    Куакъёс,
    Сяськаос,
    Кут, гондыр,
    Чуньы, шыр...
    Тон гинэ ас бамдэ
    Жоб, сапрес возиськод.
    Ме майтал! Вай кидэ!
    Тани: кыӵе чебер
    Табере адскиськод!
    

    Бӧчы

    - Бз-з-з!
    Бз-з-з!
    Бз-з-з! -
    Кин-о со?
    Оло кут,
    Оло лузь
    Уйшорозь лоба:
    - Бз-з-з!
    Бз-з-з!
    - Иван, кут, кут!
    Иван бӧрсяз бызе.
    - Ӧб-ӧб-ӧб!
    Кымесэ шуккиськиз.
    Тӥни, музэ усиз.
    Пасе пегӟе.
    Чаляк кут!
    Уть-уть!
    - Дугдали, уром!
    Тэ-тэ-тӥ!
    Шедьтӥ! Шедьтӥ! Кутӥ!
    - Учкали: бӧчы.
    Сьӧд-сьӧд!
    Тыбырыз лыз.
    Куать кукъёсыз.

    Вень

    - Ой, мон юн, ой, мон зол!
    Ненокин но чик ӧвӧл
    Мон кадь юн та дуннеын! -
    Вень ушъяське борд пулсын.
    Вуриськись венез басьтӥз,
    Шубазэ вурны кутскиз...
    - Ой, мон юн, ой, мон зол!..
    -Тэрк! - веньлэн йылыз чигиз,
    Вуриськись венез куштӥз.

    Луд кеч

    Мон табере
    Юг-юг тӧдьы...
    Учкали, тӧдьы бугор
    Тӥ монэ шуоды.
    Тэльёстӥ ветлӥсько,
    Пипуэз йырйисько,
    Итыме лыктӥсько -
    Ӟег, сезьы шедьтӥсько.
    Гурт дорын
    Бакчаын
    Яблокпу туж ческыт.
    Мон мынсал, дыр, отчы,
    Йырйысал, но кышкыт -
    Пуныос кутозы.

    Герман Ходырев

    Удмуртские стихи для детей 17
     Герман Алексеевич Ходырев (1932 — 1995)
    удмуртский детский поэт, редактор и переводчик, педагог. Народный писатель Удмуртии

    Лыкты, Тол Буба!

    Нюлэскы ми ветлыса,
    Вож кызэз ваим.
    Лымызэ ми курткыса,
    Коркамы пыртӥм.
    
    Чебересь шудонъёсын
    Куномес дӥсям.
    Воректӥз ук тылъёсын
    Ёлкамы милям.
    
    Ваче ки кутӥськыса
    Султӥмы круге ...
    Кытӥ бен йыромыса
    Тол Буба калге?
    
    Тани кин ке но ӧсэ
    Йыгаськись луиз.
    Адӟимы сое ассэ –
    Тол Бабай вуиз!
    
    Милемын шумпотыса
    Со эктӥз, кырӟаз.
    Выль арен ӟечкыласа,
    Кузьымъёс сётъяз

    Курка

    Горд дӥсен адямиез
    Чик уг луы адӟемез.
    Песьтэр быдӟа
    Пештырске,
    Интыяз котыръяське.

    Горд айшет

    Писпу вайын шушыед
    Туж чебер пуке.
    Чылкак абдра Микалед,
    Паймыса учке.
    Песяйзэ ӧте Микаль:
    - Песяй,
    Чаль татчы,
    Я, чаль,
    Учкы али, шушыед
    Гадяз ошем горд айшет!

    Ӵӧжпиос

    Оло ыжъёс,
    Оло скал
    Тусьысь вуэз
    Быдтӥллям,
    Пичиесь ӵӧжпиослы
    Кельтыны
    Вунэтӥллям.
    Черекьяло ӵӧжпиос:
    - Ух, со пудоос!

    Коӵыш

    Куазь зорыку,
    Азбарын
    Коӵышмы
    Сучыр котмиз.
    Пук вал, коӵыш,
    Гур вылын,
    Потаны нош
    Кин косӥз?

    Чипыос

    Пуж-пуж
    Курег бурд улэ
    Чипыосмы ватскиллям.
    - Матамы
    Тӥ эн ветлэ,
    Анаймы ведь
    Лек милям!

    Скал

    Тӧдьыен-куӵо скалмы
    Лёгаське азбарамы.
    Мынысал, пе, возь вылэ -
    Эх, пастух кема кӧлэ!

    Анаймылэн праздникез

    Туннэ котькин шумпотэ,
    Туннэ котькин пальпотэ.
    Мылкыдмы ӟеч ваньмылэн - 
    Праздникез анаймылэн
                 Праздникез, праздникез,
                 Праздникез анаймылэн
    Кыӵе кузьым дасялом,
    Кыӵе ӟеч кыл утчалом - 
    Асьмелэн анаймылы,
    Сюлмаськись анаймылы?
                   Сюлмаськись, сюлмаськись,
                   Сюлмаськись анаймылы
    Солы салам сётомы,
    Солы ӟеч кыл шедьтомы.
    Нош солэсь но бадӟымез - 
    Юн яратом анаймес.
                  Анаймес, анаймес,
                  Мусо, чебер анаймес

    Мар бадӟым

    – Мар улонын бадӟымез?
    Огез шуэ:– Узырлык
    
    Бергатэ кыкетӥез:
    – Янгышаськод–
    Та-за-лык!
    
    Куинетӥез вера:
    – Шуд!
    Сотэк котьку но
    Туж шуг.
    
    Ньылетӥез вазе:
    – Куазь,
    Тон солы
    Пумит уд вазь!
    
    Витетӥез шуиз
    – Нянь!
    Мар бадӟымез солэсь вань!
    Со – ШУДБУР но,
    ТАЗАЛЫК,
    Ноку быронтэм БАЙЛЫК!

    Турлы буёлъёс

    Мон ӵукна возь вылэ васькыса
    Синмаськи трос пумо сяськалы.
    Кин меда, буёлъёс вайыса, –
    Лушкемак буяськем возь вылын?
    
    Ӟарыт-лыз, пеймыт-лыз, ӵужалэс,
    Гордпыръем, лемлетэз, куренез…
    Мон ачим но чебер возь вылын, –
    Пӧрмытски кадь мусо сяськалы.
    
    Тӧл вуттӥз шыпыртэм куараез,
    Берытски но – адӟи буясез.
    Со вылэм шундылэн тылсиез, –
    Тӥни кин шулдыртэм возь вылэз.
    
    Сяськаен ӵош кузьмаз буёлэз,
    Мон ӧй адӟы таӵе чеберзэ.
    Возь мадиз мыным выль выжыкыл… –
    Таӵезэ ӧй на кылзы, ӧй кыл!

    Эчеше

    Пыдкутчанэз сураськиз - 
    Эчеше.
    Усьтэм капка ворсаськиз - 
    Эчеше.
    Пуныез ӧз кылзӥськы - 
    Эчеше.
    Эшъёсыз ӧз ватсаське - 
    Эчеше.
    Шур дуре вазь кошкиллям - 
    Эчеше.
    Тӧл но юри кадь пелля - 
    Эчеше.
    Кытын али,
    Утча, мын,
    Ветлэ Эчеше?
    Нюлэскын, пе,
    Кыз йылын
    Э-че-ше!

    Лымы гондыр

    Лопатаен,
    Салазкиен
    Ми ураме потӥм.
    Серекъяса,
    Шумпотыса
    Лымы гондыр лэсьтӥм.

    Кескич Толя

    Ӟырт кезьыт дыръя корка
    Бус пыре, ӧс усьяку.
    Потыны Коля кышка,
    Гур вылэ пегӟе соку.
    - Уд-а пот нискыланы? -
    Толялэсь юа выныз.
    - Бус пыре шунтӥськыны.
    Мон потом-а кынмыны?
    

    Ӟазег

    Кожой куко
    Кузь чырты,
    Кинэ ке но чепыльты!
    Чепыльтэмед
    Луоз ке, -
    Сут, иське!

    Ӟазегпи

    Огпол ӵукна
    Коргидэ -
    Учкись, лэся,
    Луымтэ -
    Огназ кылем
    Ӟазегпи:
    - Кытын о тӥ,
    Пи-пи-пи!
    
    "Машилэн азбараз" бичетысь

    Владимир Котков

    Удмуртские стихи для детей 18
    Котков Владимир Васильевич Родился в 1958 году.
    Член Союза писателей России, самодеятельный композитор, поэт-бард, драматург, детский писатель

    Кыӵе вылэм Витали!

    Сямзэ воштэ Витали
    (Выльдӥськон вакыт али):
    Курегез ӧз уйылы,
    Заборысь ӧз усьылы,
    Дэрие ӧз пыра, ӧз -
    Дэремез но тани кӧс.
    
    Ӧз даллашы Олиен,
    Ӧз жугиськы Колиен.
    Нош бускель садысь улмо
    Луэм ини горд бамо.
    Ӧз иса сое эке:
    Лушкаськон - урод маке.
    
    Мумизлы ӧчкарытэк,
    Убо уриз дыртытэк.
    Витали утиз вынзэ,
    Книгазэ лыдӟиз ваньзэ.
    Нош сиськыны ӧтьыку
    Ӧз шуы ни: "Вить али..."
    Мед луоз вылэм котьку
    Таӵе сямо Витали.

    Пуньыпи

    Скаллэн пиез - 
    Со - кунян,
    Валлэн пиез - 
    Со - чуньы,
    Куреглэн пиез - 
    Чипу,
    Ӟазеглэн пиез - 
    Тютю,
    Кучапи со - 
    Пуныпи...
    Тӥни озьы малпаське
    Ас понназ пичи апи, -
    Чечы пуньы но, иське,
    Мукет сямен - 
    Пу-ньы-пи!
    

    Висе вӧтэ

    – Малы бӧрдӥськод, Вали?
    Кытӥыд висе, Вали?
    – Уг адӟиськы пеймытэн,
    Тылэз ӝуаты али.
    Мумиз тылэз ӝуатэ.
    – Ээ...
    Висе вылэм вӧтэ.

    Толшор-2020

    Куддыр
    Гужем
    Куазь шундыё дыре зоре.
    Соку
    (Со зэм)
    Гурлась кужым пыре вань мугоре.
    Луэ озьы но –
    Толшоре ваське инмысь шапык.
    Таӵе куазьлы мон
    Уг куанӥськы.
    Пегас но ватскемын,
    Уг гырдалля. Шыпыт.

    Лык выжыкылам

    Выжыкыл азьланьтӥське,
    Татӥегес кариське.
    Гур вылам интыяськом,
    Люкмес дорамы васьком.
    Чипейлэсь куром шудзэ,
    Утчаськом ваньмы кудзэ…

    Кинлы ма

    Яген йырин ӧвӧл, Йыгин
    Чорыг уг зыгаты ягын.
    -Чорыг чарак шурын
    Сьӧрад яге уг мын.

    Лагерьын

    Дышетским но
    Табере
    Ветлӥськом ни
    Лагере.
    Шутэтским ми
    Лагерьын
    Школа берын.
    Отын бусыез
    Кузь -
    кузь-
    кузь уга.
    Отын - куузика.

    Малы мыня Маня?

    Ульчаысь пыриз Маня,
    Учкисько - понназ мыня.
    «Мар мынян йӧтӥз, Маня,
    Ульчаын мынян вань-а?»
    Мынян мында мар, пе, вань.
    Шуэ: «Мынӥсько вал гань,
    Сюрес урдсысь адӟисько -
    Кык «атасъёс» жугисько.
    Огез зӥбем мукетсэ,
    Вадьсаз урдэм мыжыксэ.
    Тодмотэм пиос со вал,
    Милямъёс сыӵе ӧй вал.
    Тодмотэм ке но, одно,
    Малпасько, ӟечъяськоно.
    «Ӟечбуресь!» - шуи, ортчи,
    Син пумтӥм соку адӟи:
    Кыкназы ик султӥзы,
    Мышкам синзэс золтӥзы.
    Мон кыдёке вуытозь,
    Ялан сылӥзы на озь.
    Паймемзыя мон валай:
    Мар кариськом, пе, вал ай?
    Пумен куртко ог-гзэс,
    «Атас» веша «атасэз».
    Чистозэ вунэтӥзы,
    Мар вал мон кошкон азьын.
    Мар-о мон сыӵе лэсьтӥ?
    Ӟечъяськи но пальпотӥ.
    Тӥнь али но мынясько…
    Оло, мыным синмасько?»
    «Бен, тыныд но кылыдлы,-
    Шуисько мон нылылы,-
    Ӟеч кыллэсь котькытын ӟеч,
    Ӟеч котырын котьку - ӟеч.
    Ӟеч кылъёс нош, о кӧня!..»
    Валасько, пе.
    Нош мыня…

    Каратэ

    Курданэлы вуиз пум,
    Бакатыр мон та виын:
    Митыркаез мыжгыкум,
    Борддорез пасьяй киын!

    Учке, борддор пасьямын,
    Пыртӥз адӟиське урам!
    Вань эшъёсы паймемын,
    Люкаськизы котырам.

    Кутыло нярӟем киме,
    Ӵошато асьсэлэнэн.
    Мон нош: «Мар ай та гинэ!..
    Данъяськоды ай монэн!»

    Ветлӥсько классысь классэ.
    Учкелэ тань та киме!
    Пешкытоз витьсэ, дассэ,
    Эсьма, олома кеме.

    Митырка кутэ суйтӥм,
    Ӟечъяськем кадь зуркатэ…
    Умйылтӥм кылӥ: «Султӥм!»
    Мар? Монэ-а курдатэ?

    «Адӟиськод-а со пасез!?»
    Учкисько но — пась ӧвӧл…
    Мон уг тодмаськы классэз,
    Ма та воксё класс ӧвӧл!

    Син азям — ӝужыт спортзал.
    Митырка сылэ вадьсам…
    Таиз каратэ, пе, вал.
    Султы, тодмато боксэн…

    Учкисько мыжык шорам,
    Нярӟем азьыз кытын-о?
    Ӟеч малпан лыктӥз йырам:
    Секцие гожтӥськоно!

    Мон юрттӥ но…

    Анае табань пыже,
    Нош мынам мукет уже:
    Анай котыр бергано,
    Бергано, улля ке но.

    Но тани быриз берган —
    Анае пыжиз табань.
    Тэркыын поттэ со бус,
    Ачиз копак шунды тус.

    Синъёсме со гочатэ,
    Нырпелесэз бичатэ.
    Нош кыӵе луэм ческыт,
    Сиыса уз тыр кӧтыд.

    Ой-ля, ой-ля, тӥн-на-на,
    Кыӵе пӧрмытӥм, анай!
    Котыртӥд бергай но — тань
    Туж ческыт пыжиз табань!

    Уг паймы

    Мар понна ваньмыз, малпаськоды?
    Малы мон кутӥ шонер боды?
    Малы мон йылаз думи гозы?
    Малы мон сюло лэсьтӥ озьы?

    Малы мон соин шлачкетӥсько,
    Ураме ӵукна ке потӥсько?
    Малы ветлӥсько на йыр вылам?
    Малы мон лэсьтӥ на ай шулан?

    Малы, малы,малы но малы
    Усточи кариськисько мон котьмалы?
    Эсьмаса ни эктыны но дась,
    Горд кышет ке адӟиське школа палась.

    Вань быгатонме возьматӥсько,
    Огезлы гинэ юн паймисько:
    Кызьы мыным паймытэк чида
    Кыкетӥ классэ ветлӥсь йӧно Лида?

    Кылбурась

    Мон дыши кылбураны,
    Кин сярысь гожтом али?
    Исьток пыраз дорамы,
    Со сярысь мадё али.

    Ваньзэ тодам ваёно,
    Ма карим соин толон.
    Кӧяно но вӧяно —
    Чебергес луоз оло.

    Солэн йыраз вал картуз,
    Солэн кияз вал арбуз.
    Ой, кыӵе ческыт, жалем!
    Только со ӧз сёт милем.

    Кылбурам маке уг пот,
    Мылкыды куашказ пумен.
    Мар котькин сярысь зулёд,
    Ужлы ёрмыса сямен?

    Физкультура бере

    Пыд улам куштӥ дӥсьме —
    Мон туннэ куатаськемын.
    Дӥсяме уг лу асме,
    Эшъёсы — дӥсяськемын.

    Физкультура вал уга,
    Нош отын — кылиськоно.
    Кылеме мынам быга,
    Нош кызьы дӥсяськоно?

    Дорамы угось монэ,
    Валесысь султэм берам,
    Дӥсялля котьку нэнэ,
    Огкадь мыняса шорам.

    «Сайка, мусо пичие,
    Усьты синъёстэ, пие,
    Вай мон тонэ дӥсяло,
    Портфельдэ но дасяло».

    Сылӥсько куатаськыса.
    Физкультура вал туннэ.
    Нэнэе мед лыктысал,
    Дӥсяно вылэм монэ.

    Ваньмыз выль

    Тетраде но ӵыжак выль,
    Костюме но ӵыжак выль.
    Тетрадям ни —
    Выль-выль «вить» но «ньыль»,
    Костюмам ни —
    Ишь ты-ы!..
    Ӵыжак выль
    Вишты!

    Телик

    Мон со шоры учкисько,
    Со нош мон шоры учке.
    Школае ке мынӥсько,
    Мӧзмыны, лэся, кутске.

    Бен соин ик,
    Бертӥсько ке,
    Диван вылэ усисько ке,
    Возьматэ но возьматэ…
    Возьматэ но возьматэ…
    Возьматэ но возьматэ…

    Лыдъяськон

    Кӧл, Ондыр, кӧл, Ондыр,
    Вуиз ини кӧлон дыр.
    Пал синдэ кынь, Мукетсэ кынь.
    Потӥськод мынь?
    Кӧлэмед ке уг пот,
    Пот!

    Закон

    Оло кенер дуре
    Потэ пушнер?
    Оло пушнер дуре
    Пуксе кенер?
    Котькуд кенер дорын
    Тӥни — пушнер.
    Котькуд пушнер дорын —
    Ӝужыт кенер.

    Иське, сыӵе закон
    Вань дуннеын.
    Усьтӥз сое Онтон
    Ини миым.

    Бускель бакча дорын
    (Онтон тодэ)
    Уг ӝужалля турын —
    Пушнер будэ.

    Потыса каникулэ

    Кин меда кызьы улэ,
    Потыса каникулэ?
    Ветлоно ай, тодоно
    Одно, одно, одно,
    Но…
    Кин ке йыгаське, лэся.
    Оло, бускель Олеся?
    Кинэз ветлэ, пӧй, татӥ?
    Учкисько — пыре Натӥ.
    Бӧрысьгес пыриз Петыр,
    Малы ке потэ кепыр.
    Петыр дӥсьсэ ӧз кыль на —
    Сьӧраз вуэ Окыльна.
    Окыль сьӧрын кин вань на?
    Солэн эшез, дыр, — Анна.
    Учкыса ини тодӥм:
    Отын вылэм Никодим.
    Йыг! кариз ӧсэз Пильып,
    Кызьы шори ӧз пильы…
    Орина пырем бере,
    Малпанзы потӥз кыре:
    Огмы доры ветлытэк,
    Кылём, шуо, тодытэк,
    Кин меда кызьы улэ,
    Потыса каникулэ.

    Ӝог веран

    — Кыӵе коӵо та?
    — Куӵо.
    — Кыӵе куӵо та коӵо!!!

    Яды*

    Тӥ токма серекъяды
    Штангае усем бере.
    Песянай шуиз, яды
    Луисько мон табере.

    Корт улэ пачкам берам,
    Бен, яды ик луиськем.
    Песянае зэм верам,
    Бакатыре пыриськем.

    — Тон-а бакатыр, Вови?
    Тон-а луиськод яды?
    Чибинез но, дыр, уд ви,
    Бозгылы кутод боды.

    — Серекъяса улытозь,
    Кутэ штанга кияды.
    Тодом оп-па! шуытозь,
    Кин чибинь, нош кин — яды.
    ——
    *- батыр

    Пенкыли

    — Малы бен пичи кыли? —
    Бӧрдэ шурысь пенкыли. —
    Мон чипей ке луысал,
    Пенкылиез сиысал.
    Чик ӧй сётысал маза,
    Будысал быдӟым, таза.
    Нош али мон пенкыли…
    Малы пичи бен кыли?

    Син пумтӥз…

    — Мар озьы ветлӥськод дортӥм,
    Син пумтӥд учкыса, Вани?

    — Кампеттэ сётӥд ке, Мани,
    Мукетгес мон учко ини.
    Син пумтӥм уг ни —
    Син шортӥм.

    Ӟукыртон

    Ӧсмы ялан ӟукыртэ,
    Усьтӥське, кезьыт пыртэ.
    Атаез анай «пыже»:
    «Э-ке-ке, нодтэм ыже…»
    Инмаре, шуэ, остэ!
    Ку, пе, тупатод ӧстэ?
    Пумитаз атай вазе,
    Инмаре, шуэ, куазе…
    Мон но ӧй ни пукы тэк.
    Кызьы-о ӟукыртытэк?
    Ваньмыз ӟукыртэ бере,
    Малы мон кылём бере?

    Ӵукна

    Анае султэ туж вазь,
    Пыд йылаз со кемалась.
    Посудаен жингыртэ,
    Ческыт зынэн гочатэ.

    Султӥсько, назильскисько,
    Ӵукнаен ӟечъяськисько.
    — Ӟеч но бур, ӵукна эше!
    Мед пӧрмоз котьма уже!
    Одӥгзэ уг лу мынам:
    Анайлэсь вазьгес сайкам.

    Бирдыос

    Бирдылэсь юаз бирды:
    — Малы бен йырды курды…
    Ой,
    Малы бен курды йырды…
    Ой,
    Малы кур луиз йырды?

    Бирдылы вазе бирды:
    — Вожпотӥз, соин, вылды.

    — Малы бен вожаськоды…
    Ой,
    Малы вожъяськиськоды?

    — Вылынгес Тӥляд, бирды,
    Йырды.

    Изись Ондыр

    Султы ни валесысьтыд,
    Шат возьыт ӧвӧл тыныд?
    Куреген ӵош выдӥськод,
    Коӵышен ӵош сайкаськод.

    Уть, часэд мынэ дасэ.
    Утчатэк, сиёд дасьсэ:
    Вазь сайкасьёс пӧразы,
    Сиён — ӝӧк выл тыразы.

    Уд султӥськы?
    Ойдо изь.
    Трос ик люкалод, дыр, визь…
    Визь люкасьёс сайказы,
    Киязы ни книгазы.

    Шудӥсез ини шудэ,
    Ужасез мынэ лудэ.
    Тон вӧтъёс адӟон дыре
    Ветломы ми шур дуре.
    Карпалом но юшалом,
    Пужак! вуэ тэтчалом.

    Уйвӧтад коть адӟы вал,
    Макем ӟеч югыт нунал!
    Ӝоген — нош ик изён дыр.
    Я бен кӧл на,
    Изь, Ондыр.

    Ӧз тышкаськы

    Умой улэм
    Коӵышпилэн!
    Черниламе
    Толон нюлэм.
    Чернилаесь
    Кикыосыз,
    Саптам-наштам
    Валесъёсыз.
    Нош анаез
    Сое адӟиз,
    Ӧз тышкаськы…
    Чернилае
    Быжзэ веттӥз
    Ачиз.

    Мон ваньзэ яратӥсько

    Ма мыным ваиз тулыс?
    Быгыльскиз ческыт колыс.
    Поръяло лудъёс валлин
    Тюрагай,
    Шунды-павлин.

    Ма ужен лыктӥз гужем?
    Пыласьки, уяй пыжен,
    Емышан ветлӥ тэле.
    Октӥсько — уг быр, кыле.

    Ма кузьмаз мыным сӥзьыл,
    Соиз воксё выжыкыл!
    Тулкымен гыась ю-нянь,
    Вань губи, палэзь но вань,
    Выль кужым сётӥсь улмо…
    Ох, сӥзьыл, тон туж сюлмо!

    Ма выльзэ ваиз толмы?
    Валамон ни, выль лымы!
    Кин туннэ дораз пукоз?
    Салазки ширтӥз. Букос…

    Лымыпог дыртэ гуртэ,
    Ӧс доры лымы пырдэ…
    Мугорме шунтэ гурвыл,
    Песяе но выжыкыл.

    Лобасько выжыкылын
    Тулысын но гужемын,
    Сӥзьылэ но вуисько,
    Тол куазе но пырисько.
    Ум йылтӥм куаретӥсько:
    «Мон ваньзэ яратӥсько!»

    Шундыоc

    Сайкась город урамтӥ,
    Ӝужытэсь юртъёс вӧзтӥ
    Вазь ӵукна нылпи садэ
    Милемыз трамвай нулдэ.

    Трамвайын пукытозям,
    Садике вуытозям,
    Кӧня шундыос адӟи,
    Чиньыен ик

     мон лыдӟи.

    Пӧясько-а, шуоды?
    Котькуд юрт вискын —
    Шунды!
    Ваньмыз али сайкало,
    Инвис сьӧрысь ӝужало.

    Одӥг юрт,
    Висказ- шунды,
    Мукетыз юрт,
    Нош — шунды…
    Чиньые ӧз тырмы ни,
    Бертыкум лыдӟо ини.

    Сураськон

    Одӥг кырӟан эктӥмы,
    Одӥг эктон кырӟамы,
    Чупрес валме кутэтай,
    Мунёме мон серметай.

    Суредме музэ ляки,
    Бызьылӥ борддоретӥ,
    Туплэсь талай Олёшсэ,
    Мунёлэсь чигтӥ ӧссэ.

    Машиналэн йырсияз
    Лемта пунӥ. Туж яраз!
    Янгышен кеси пыдме,
    Уси, шукки штаниме.

    Только тон, анай, марым…
    Эн вера, ява, дорын.
    Песяйлы ведь со понна
    Мынэсьтым сюроз, анай.

    О-хо-хо, хо-хо, хо-хо,
    Штани понна зол йӧтто!

    Туп

    Ох, усто мынам тупе
    Ӵыжиськод — инме тубе.
    Нош инмысь усе ке туп,
    Муз вылын тэтча туп-туп!

    Одӥг пол гинэ тупе
    Туп-туп-туп! ӧз вазь маке.
    Жингыртӥз но куангыртӥз.
    Быриськи-из!..

    Кӧш арбуз

    Отимылэн кияз арбуз
    Нош Натӥлэн киыз ай буш.
    Арбуз, толэзь кадь,
    Вандэмын,
    Сьӧд тысьёсыз ик потэмын.
    Шумпотыса сие Оти,
    Вожъяськыса учке Натӥ.
    Ӧз чида ни Натӥ, вазиз:
    — Ой, кыӵе кӧш вылэм арбуз.
    Оти шуэ:
    — Кылдэ ньылод —
    Сыӵе ческыт арбуз та. Вот!
    — Эн пӧяськы.
    Сое толон
    Сии куинё-ньылё кило.
    Уг си ни ноку табере.
    Кызьы сиёд, туж кӧш бере?
    — Нош милямез ческыт, Натӥ.
    Ме куртчы ай тани татӥ.

    Со ик кулэ вал Натӥлы.
    Кӧмзэ кельтӥз на Отилы.

    Кытын будэ макарон?

    Улмоос будо садын,
    Тари будэ бусыын,
    Кушманъёс нош бакчаын.

    Вера ай милем, Матрон,
    Кытын будэ макарон?

    Кема ӧз малпа Матрон:
    — Кытын будэ?
    Ма… кырын.

    Юля но юла

    Тани Юля,
    Таиз — юла.
    Кыӵе пӧртэмлыксы?
    Берга юла,
    Берга Юля —
    Одӥг тусо кыксы.
    Пӧртэмлыксэс
    Ӧд-а вала?
    Одӥг пала
    Берга юла.
    Я со пала,
    Я та пала
    Берга Юля.

    Изён дыр

    Ӝыт вуиз ни —
    Изён дыр.
    Кызьпумы каре шильыр.
    Куар-нэнэос кырӟало,
    Куар-нунызэс веттало.
    Мон но пичи куар али.
    Выдо, ӧч уг кар али.
    «Я, умой!- шуоз нэнэ.-
    Чебер вӧт адӟод туннэ».
    Чалмозы кызьпу куаръёс —
    Ӟеч изе, нылъёс, пиос!

    Тунаськись

    Кытын кенер,
    Отын — сутэр,
    Кытын сутэр,
    Отын — пушнер.
    Уз туб Ондӥ кенер вылэ,
    Уз пыр Ондӥ пушнер тылэ.
    Со тунаса тани улэ:
    Кулэ — ӧвӧл,
    Ӧвӧл —
    Кулэ-э!

    Чабей

    -Мар бӧрдӥськод, Чачабей?
    -Син дурам потӥз чабей.
    -Умойтэм верад, дыды,
    Син дурад тынад йыды

    Ӟеч выжы

    — Кыӵе выжы та пуныед,
    Мики, я вералод-а?
    — Ма верало.
    Ӧвӧл секрет.
    Со — кышномурт порода.

    Вожъясько

    Ӟазеглы вожъяське Паримон:
    «Луысал ке ӟазег кадь ик мон,
    Нунал-лумбыт вуын уясал,
    Уяса, вуысь кӧс потысал!»

    Нош ӟазег вожъяське пияшлы,
    Луоно, пе, пияш кадь шаплы:
    Тыметэ
    Одӥг пол
    Зумыса,
    Мугорме
    Сучырак
    Коттысал!

    Куды

    Туж шудо туннэ Дыды:
    Басьтӥллям ӵыж выль куды.
    Мар-о нуллоз, шуоды.
    Выль куды пушказ дыды?
    — Ужтэк уз улы куды:
    Ву нулло,-
    Шуэ Дыды.

    Бадӟым мунё

    Тӥни кызьы но уг луы,
    Тӥни кызьы но луэ:
    Магазин доры ӧз вуы —
    Мыным, пӧй, мунё кулэ.
    — Эн акыльты Зина-Зин,
    Таиз мукет магазин,
    Мунёос ӧвӧл отын.
    Дӥсь кулэ ке, ойдо, мын.
    Нош Зини:
    — Мунё, мунё…
    Укно дурын тӥни. Вай.
    Бадӟым кутэтэ бинё.
    Басьтом кутэт но, агай.
    Агаез нош абдрамын:
    — Зэм но, мунё…
    Уть ай, мын!..
    Нош отын сылэ выль кен,
    Мукет сямен —
    Маникен.

    Кырӟа-вера вукарнан

    Лумбыт,
    Вертолёт сямен,
    Паськыт Туймы шур вамен
    Шир но шур,
    Уллань-выллань
    Лобаз чебер вукарнан.

    Лобаса но поръяса,
    Аслыз сиён утчаса,
    Ӟигарыз быриз, моӵез,
    Пуксиз пичи шормуӵе.

    «Шормуӵе ачим тусо, —
    Кырӟаны кутскиз мусо.-
    Ӵуж но вож но буёло,
    Табере татын уло».

    Кырӟа-вера вукарнан,
    Кылзэ сое чукырна.
    Адӟиз вуысь нумырез,
    Тюак! кыскиз чупырес.

    Шормуӵ тани пульк! вые,
    Вукарнан усе вуэ.
    Кытын сюрем эн пукы,
    Со шормуӵ ӧвӧл — пукы.

    Пужмер усем

    Куазед туннэ укыр чебер:
    Музъем вылэ усем пужмер.
    Микол дӧдьыеныз тӥни
    Гурезь пала дыртэ ини.

    Нош дӧдьыез уг мын,
    Сылэ.
    Уг дырты со гурезь улэ.
    Шуэ кадь:
    “Эн дырты, Микол,
    Тӧдьы пужмер —
    Ӧвӧл на тол.”

    Тулыс вуэ

    Тулыс вуэ, лэся,
    Шунды но мынектэ.
    Ма, тол уз лу весяк.
    Инкуазь юга, сактэ.

    Уг лу ни учкыны
    Шунды-мумы шоры.
    Бамам нош — вот тыныд —
    Потэм узы-боры!

    Ма мед, ойдо, ярам.
    Кузьым со шундылэсь.
    Тулыс ни ымнырам,
    Тулыс ик медло весь!

    Сумка

    Малы лӧптэмын Сёмка?
    Басьтӥзы солы сумка.
    - Вуиз школае мынон.
    Э, кыӵе майбыр улон!
    
    Книгаос выль сумкаяз
    Дыртыса тани донгаз.
    Мед татын, пе, визь улоз:
    Йырлы капчигес луоз.

    Арган

    Вик но вак!
    Тӧдьы но сьӧд бирды…
    Шонерзэ ке верано -
    Пичи арган.
    Кемалась сюлмы ни со бордын.
    Кузьмазы но
    Шулдыргес луиз коркан.
    
    Мон уг тодӥськы на,
    Кытын «до», «ре», «ми»,
    Кытыназ пуко меда
    «Фа», «соль», «ля», «си»?
    Резь но куаж!
    Вазе ми дорамы:
    Нырысьсэ уга
    Арган сьӧры пукси.
    
    Эх, кыӵе усто мон шудысал!..
    Гурелы нош
    Юрттысал на пыдыным.
    Шудыны ни кемалась быгатысал,
    Но, марым…
    Арган уг дышы на мыным…

    Куасьмем, пе

    Ну, пӧя ни, ну, пӧя:
    Кор кузьда, пе, вал пая.
    Паяез нош - чельы пум.
    - А-а…
    Куасьмем, дыр, вайыкум…
    
    Кисыосыз пегӟиллям
    
    Учкытэк азьзэ-берзэ,
    Натӥ дӥсяз дэремзэ.
    Кисыосыз пегӟиллям,
    Кытчы меда луиллям?

    Эмезяку

    - Ма чалмид озьы, пие?
    Вера ай коть выжыкыл.
    - Бӧрысь мадё, мемие:
    Ай уг ваньмо ым но кыл.

    Лымы мунё

    Ог люкето…
    Кыко…
    Куинё -
    Тани пӧрмиз лымы мунё.
    Изьы - ведра,
    Синъёс - эгыр,
    Ымыз - чекля,
    Нырыз - кешыр.
    Нош киосаз поно тэркы -
    Бурдоослы луоз эркын:
    Со тэркыын уго ю тысь,
    Емыш но нянь шедёз отысь.
    Та мунёме яратозы.
    Ма тӥ но лэсьтэлэ озьы.

    Эштэрек

    Уроктэ ваньзэ ини лэсьтӥд,
    Гур вылад тубид тон кыштырак.
    …Батыръёс сярысь книгаысьтыд
    Тон доры потэ ни Эштэрек.
    
    Лыдӟемъяд тынад кӧтыд уг тыр,
    Шудыны уд потӥськы кыре.
    …Шур дуре ваське удмурт батыр,
    Тӧл кадь вал утча ни Эштэрек.
    
    Изьыны кулэ ини тыныд,
    Утчаса,
    Мумид но куаш каре.
    …Вал вылэ пуксиз тани чырмыт,
    Тушмонэз пазя ни Эштэрек.
    
    Уйвӧтад ӧд малпаськы ятыр -
    Дась ини мечед но песьтэред.
    … «Эн сётскы тушмонъёслы, батыр,
    Ож лудын юртто мон, Эштэрек!»

    Вӧтъёс

    Кызьы вӧта вань калык?
    Учком.
    Дырыд вань ке, лык.
    Машина лэсьтӥ тани,
    Вӧтъёстэс уд ватэ ни.
    Усьтӥське чагыр экран.
    Ма меда вӧта Иван?
    Иванлэн кияз арган:
    Артистэ мыноз Иван.
    Нош таиз кинлэн вӧтэз?
    Малы чонари вотэс?
    А-а, валай:
    Вылэм со ез.
    Кин пукто шуиз вал ГЭС?
    Микталэн вӧтэз ук та.
    ГЭС лэсьтӥсь луоз Микта.
    Нош кызьы вӧта Вали?
    Экранын чылкыт али.
    Учкомы Митыркалэсь.
    Экранамы - тыр толэзь.
    Котыртӥз солэн берга
    Ракетаен Митырка.
    Суредэз воштэ суред:
    Ю бусы, мартен гуред,
    Пароход, подъёмной кран -
    Ваньзэ тэрытэ экран.
    Анае нош ма вӧта?
    Со тӥни нуны ветта.
    Экранын - чагыр инбам,
    Льӧль шунды тӥни ӝужам.
    Дыдыкъёс нуны вадьсын,
    Эшъёсы анай вӧзын.
    Вань вӧтъёсын ӟеч малпан.
    Мед луоз тазьы ялан.

    Музъемлы йыбыртъяло

    Бусыын,
    Кушман вылын
    Бубылиос поръяло.
    Ӵуж но,
    Горд но,
    Вож тылын
    Вуюись кадь пиштыло.
    
    Бубылиос вылымтэ,
    Со - пичи нылъёс-пиос.
    Бусы ужъёс вакытэ
    Лыктӥллям татчы соос.
    
    Мыкырско, жуг-жаг ишко.
    Бусыез озьы уро.
    Йӧнылэсь уг палэнско,
    Выжытӥз сое поро.
    
    Митырка, Пети, Оли…
    Быдэс класс татын, оло?
    Пичиесь ке но али,
    Музъемлы йыбыртъяло.
    

    Тюрагай

    Луд вылын нунал ӵоже
    Уж уг бырылы гужем.
    Сюлмо тыршо бадӟымъёс,
    Дыдыос но экеос.
    
    Шулдыр мыным бусыын
    Нылъёсын но пиосын.
    Тюрагай нош пужнӥське,
    Югытын со пылаське.
    
    Тю-ри-у-ри, тюрагай,
    Тон апай яке агай?
    Учкыса чагыр инме,
    Зырасько ини синме.
    
    Кин тонэ думиз отчы?
    Кырӟанэд тынад ортчыт!
    Ма сярысь бен гурласькод?
    Ушъяськод, я курласькод?
    
    Кылзӥськи - ваньзэ валай,
    Монэ данъя тюрагай:
    «Тюри-ури, тюри-тюр,
    Тыршемъяд луоз шудбур!»

    Кузь кыл

    Туж пичи ке но выны,
    Кутскиз ни паймытыны:
    Атайлы но анайлы,
    Песяйлы, песятайлы,
    Мыным, вань эшъёсызлы
    Вуэ кылзэ мычыны.
    
    - Кылыд пунылэн кадь кузь,-
    Шуисько мон вынылы,-
    Азяд пукто али тусь,
    Нюлод со кузь кылыныд.
    
    Вынылы ӧз яра та.
    Ӝожомиз ке но ачиз,
    Номыр но ӧз куареты -
    Пинь сьӧраз кылзэ ватӥз.

    Перемена

    Кин со, мар со - Перемена?
    Дэремтэк-а, дэремен-а?
    Перемена ма каре?
    Со - классысь потэ кыре.
    Чингыльтэ но жингыртэ,
    Коридорын дыбыртэ.
    Шуак потэ азбаре,
    Юр но яр отын каре.
    Кин со, мар со - Перемена?
    Серемтэк-а, серемен-а?
    Перемена - серемен,
    Перемена - дэремен.
    Пичи мурт кадь Перемена
    Ватӥське но, йыроме но.
    Йыр вылаз но ветлысал,
    Одӥгназ ке луысал.
    Атаез солэн - Урок -
    Пырыны косоз ни ӝог.
    Со дырозь нош шудоно,
    Бергано, серектоно.
    Перемена серектэ,
    Перемена черектэ.
    Собере питра классэ,
    Мын но утча на ассэ.

    Кытысь потӥз тӧлпери?

    Гурт пумысь школа дорын
    Кин озьы поттэ сурым?
    Жи-и, жу-у, а-у-а!
    О-лё-лё-лё, ай-я!
    
    Коӵышъёс шат кесясько?
    Пуныос шат пурисько?
    Кионъёс, оло, вузо?
    Я валъёс потто тузон?
    Кытчы пыром?
    Ой, быри!
    Тӧлпери со, тӧлпери!
    Кионъёс со вылымтэ,
    Тӧлпери но вылымтэ.
    Со озьы бызе Микол:
    Врач пуктоз, пе, лек укол.

    Малы ӵуказе?

    - Кезьыт ву эн юы трос:
    Ӵуказе висён сюроз.
    - Тон, песяй, ачид шуид ук,
    (Верам кылдэ вунэтӥд ук):
    «Туннэ быгатонозэ
    Малы лэсьтод ӵуказе?»
    Мыным туннэ висёно,
    Школалэсь мозмытсконо.
    «Кык» уг поты басьтэме:
    Ӧй дася вал урокме.

    Юмок

    - Малы бер тон, Иванов?-
    Юа дышетӥсь
    - Ма… берозь мынӥз кино…
    Уйшорозь ӧй изь.
    Дышетӥсь нош пальпотэ:
    - Я бен кушты пальтодэ.
    Парта сьӧры пуксьы но
    Вера, кыӵе вал кино.
    
    Пальтоме мон куштысал,
    Парта сьӧры пуксьысал…
    Укыр дыртӥськиз бере,
    Дэреме кылем доре,
    Пенжаке кылем доре.
    Нош малы ай класс горе?
    
    Тӥнь соку лыктӥз тодам:
    Портфеле но ук дорам!..

    Фаргелет

    Кин со, мар со - фаргелет,
    Вералэ, эшъёс, мыным.
    Кин вераз, солы - билет.
    Балетэ ӵошен мыном.
    
    - Тодӥсько, - шуиз Мако. -
    Вань сыӵе нимо балет.
    - Вот вераз ук! О-ко-ко!
    Со -учёной - Фаргелет.
    
    - Фарадеен сураськод.
    Фаргелет - пукыӵ ук со.
    - Вераськод ке, вераськод…
    Арбалет соиз, Санко.
    
    Митырка но кыл куре.
    Мон, шуэ, уг алдаськы.
    Вань сыӵе нимо гурезь,
    Татысен уг адӟиськы.
    
    - Мар? Гурезь? - горе Миквор.-
    Тодэмед али ичи.
    Фаргелет - бандит но вор.
    Со сярысь ачим лыдӟи.
    
    - Кин уг тод Фаргелетэз?..
    Государство ним ук со!
    - Вай балетэ билетэз,
    Фаргелет - со вуж уксё.
    
    Кема ӵаш поттысалзы.
    Ваньзылы кулэ билет.
    Бӧрысь Кимлэсь юазы:
    - Мар со сыӵе фаргелет?
    
    Пельпумъёссэ ӝутъя Ким:
    - Мон уг тодӥськы ачим.
    Оломар со, олокин.
    Городысь сое адӟим.
    
    Городэ пырыкумы,
    Гожтэмын вал: ФАРГЕЛЕТ,
    Городысь потыкумы,
    Учкисько но -ТЕЛЕГРАФ.

    Секрет

    Ох, кыӵе та секрет бичатэ!
    Кыл йылам ик берга секретэ.
    Секретлэсь но бадӟым та секрет -
    Кыл йылысь со медаз пот кыре.
    
    Но пӧсьтэ ини воксё чидан.
    Шат мынам чиданэ корт-андан?
    Агае вераны ӧз, ӧз лэзь.
    Я бен ӵок.
    Кылзӥсько ни солэсь.
    
    Уж дурысь но бертӥз ни анай.
    Секретме мон ӧй вера, чидай.
    Ӝӧк сьӧры но пуксем берамы,
    Мон ӧй дырты солы вераны.
    
    Нош тани чай юон вакытэ
    Потӥське вал кыре секретэ:
    Сакырез утчакуз
    Анайлы
    Ляп! гинэ шыпыртӥз ук кылы:
    - Бобиклы сюдэмын сакыред,
    Но сое мон уг вера:
    Секрет!

    Кыдатскисько

    Урамын кезьыт.
    Изьясько изьы.
    Киосам пӧзьы
    Пӧзьятэк кызьы?
    
    Шубаме кельто,
    Уг дӥся пальто.
    Кыдалоз мугор,
    Мон луо провор.
    
    Я, тани потай,
    Кынмыны шӧтай.
    …Кыллисько дорам:
    Пыэд мугорам.
    
    Мед быроз ни, мед
    Лэсянтэм пыэд.
    Чидатско!
    Выльысь
    Кыдатскон вылысь.

    Алама кырӟась

    - Клубамы туннэ ачиз
    Кырӟалоз дано артист.
    Только мон отчы уг мын,
    Нуиды ке но кужмын.
    Алама кырӟа вылэм.
    Кылзыса, потэ кӧлэм.
    - Тон сое кылзӥд ни шат?
    - Мон ӧй на.
    Кылзэм Миша.
    Кырӟаса ик возьматӥз.
    Ӧз, ӧз кельшы со артист.

    Ӟечбур, гужем!

    Лякиське на кие тополь куар,
    Унябей ворекъя на ӵужен.
    Сӥзьылозь шутэтскоз ни букварь.
    Ӟеч но бур, шундыё выль гужем!
    
    Ӧтиськод милемыз тон ваньмес
    Жадьытозь шудонэ но уже.
    Жингыртӥсь эгесмы кадь чангес -
    Ӟеч но бур,
    
    шундыё выль гужем!
    
    Возь вылтӥ гольык пыд бызиськом -
    Гужемез шат ортчод вамышен!
    Кунолы кадь солы вазиськом:
    Ӟеч но бур, шундыё выль гужем!
    
    Гужеммы ай одно паймытоз
    Сяськаен, турынэн, емышен.
    Гудыри но гурзэ ай мытоз.
    Ӟеч но бур, шундыё выль гужем!
    
    Ум но шӧдэ, кызьы чингыли
    Жингыртоз, ӧтьыса выльысен.
    Ваньмыз со азьпалан.
    Нош али:
    Ӟеч но бур, шундыё выль гужем!

    Юаны вунэтэм

    Сайказ гинэ но Петыр -
    Ӝогак шобырскиз выльысь.
    - Шат уммед тынад ӧз тыр?-
    Юаськомы огкылысь.
    
    - Тс-с! -шуэ Петыр милем.
    Эн, пе, куашетэ али.
    Петырмы вӧтам вылэм:
    Сизьым юш кутэм Коли.
    Юаны нош вунэтэм,
    Маин юшъёс шедьыло.
    Нош ик лыктӥз ке вӧтэ,
    Одно, шуэ, юало.

    Чорыгась Ондӥ

    - Кык кило чорыг кутӥ! -
    Ушъяське визнась Ондӥ.
    - Бадӟымез но вань, оло?
    - О-о.
    Одӥгез ог куинь кило!

    Эмезясь

    Эмезе, ымам эн пыр,
    Уть, эн пыр.
    Люкаськы тон сарба тыр,
    Сарба тыр!
    Нош эмезь сыӵе ческыт,
    Ой, ческыт!
    Мон сии сое лумбыт,
    Бен, лумбыт.
    Эн учкы, сарба, шорам,
    Мон шорам.
    Малы басьтӥськем сьӧрам,
    Ас сьӧрам?

    Сӥзьыл

    Пилемед инмын уя.
    Уя.
    Инбамысь зор ву вия.
    Вия.
    Инкуазед зарни тусо,
    Мусо.
    Бергаса куаръёс усё.
    Усё.

    Тол Бабай

    Ой, кыӵе мусо тон,
    Лякыт Тол Бабай!
    Пичи вож кызэн ӵош
    Ма гинэ ӧд вай!
    
    Тылъёс югекто ни
    Ӵужен но вожен.
    Туннэ туж шудо ми
    Пичи вож кызэн.
    
    Кызмес чебермам но
    Выж шоры пуктӥм.
    Йылаз кизили но
    Шулдыр воректӥз.

    Пумиськом пеймыт сэргын!

    - Ай учком, кудмы провор,-
    Борддорлы вазе борддор,-
    Улӥськод укыр эркын -
    Пумиськом пеймыт сэргын?
    
    Вордӥськиз вылез нунал,
    Малпады, луиз-а чал?
    
    - Тон вылын ковёр-шуба,
    Тон вӧзын шуныт труба.
    Улӥськод укыр эркын -
    Пумиськом пеймыт сэргын!
    
    Нош ик нунал вордӥське,
    Нош ик борддор вожъяське:
    
    - Мон бордын ке но укно,
    Тон вылын шунды-куно.
    Улӥськод укыр эркын -
    Пумиськом пеймыт сэргын!
    
    Сэрегын, пеймыт сэргын
    Пумиськон ӧй вал эркын.
    Йыг но дым! карем бере
    Борддор алэ борддорез:
    - Йыркуръёсмес вунэтом:
    Одӥг коркан улӥськом.

    Эшъёс

    Кампеттэ уд сётӥськы -
    Мон тонэн уг шудӥськы.
    Жадина-говядина,
    Аксым шоколадина.
    Учкы, учкы - бертӥсько.
    Малпаськод, берыктӥсько?
    Уг но малпа берытскын,
    Кошко тани син куспын.
    Уд сёт, иське?
    Жаляськод?
    Учкы -
    Огнад кылиськод,
    Жадина-говядина,
    Аксым шоколадина.
    Шуд огнад кампетэныд.
    Мон кошки.
    Бе-бе! тыныд.
    Уть, тани дӥсяськисько,
    Учкы, ӧсэз усьтӥсько.
    Кытысь шедьтод мон кадь эш?
    Матӥ, Коли - аксымесь,
    Мерон Петя - жугиськись,
    Боко Иван - куатаськись,
    Лазыр Микта - ушъяське,
    Чысы Таня - пӧяське,
    Кыштыриос - ворасько.
    Мон тыныд зэм верасько.
    Кампеттэ уд сётӥськы -
    Мон тонэн уг шудӥськы.
    Мар?
    Мар шуид?
    Сётод огзэ?
    Я бен, шудо туннэзэ.
    

    Сике ӧм нуллэ

    - Коньыез но адӟемед
    Ай ӧвӧл тынад?
    Луд кечез но адӟемед
    Ай ӧвӧл тынад?
    Ӟичыез адӟи, шуыса,
    Пӧялод-а?
    Киёнэз адӟи, шуыса,
    Кӧялод-а?
    - Коньыен со монэ
    Абдратэ!..
    Ӟичыен со монэ
    Абдратэ!..
    Гондырез но адӟи ини мон,
    Слондырез но адӟи ини мон!
    Кытысьсэ юаськод-а?
    Дорысь
    Буёло возьматӥсь
    Телевизорысь!..
    - Э-ке-ке!..
    Нош сикысь…
    Сикысен тон адӟид-а куке?
    -Теликмес ми ӧм нуллэ сике.
    

    Вынъёс берто шудэмысь

    Сукыр бӧчы, искал кук,
    Шуи вал ук: дорын пук.
    Уть, наштам ни пыдестэ,
    Вылэ ӝутъя пыдъёстэ!
    
    Вынъёс берто шудэмысь,
    Бер ӝыт футбол ӵыжамысь.
    
    - Синъёсыд шат йыр берад?
    Киосыд шат тыбырад?
    Нош ик усёд гаӵоло!
    Шат озьы канжаськылод?
    Сё, уг нуллы ни сьӧрам,
    Ато пуксёд сильсьӧрам.
    Лык инь, бертомы чаляк!..
    
    Шытыр-шатыр-жумбыляк!
    Огыр-бугыр, дымбыр-йыг!
    
    - У-у-х!
    Кин татчы куштӥз майыг!?.

    Э, пуные…

    Э, пуные, пуные,
    Эн мӧзмы Выль ар уе.
    Тани тыныд шоколад,
    Тани ческыт мармелад,
    Одӥг юдэс колбаса…
    Озьы кельтӥ алдаса
    Выль ар азьын Лусьтроме,
    Яратоно пуныме.
    
    Э, пуные, пуные,
    Жаль потӥськод, нуные:
    Уд валаськы Выль арез
    (Аслыд ини ньыль арес),
    Макем со шудо нунал!
    Шудон, серектон нунал!
    Кыз вӧзын кылан-буран,
    Огдэ-огед ӟечкылан!
    
    Э, пуные, пуные,
    Пыртысал, дыр, куное,
    Луысал тыныд шулдыр…
    Анае уз лэзьы, дыр.
    Ачим дорад потало,
    Вань шулдырзэ верало.
    Эн учкы йырыд курен.
    Я, Лусьтрое, Выль
    арен!
    Э, пуные, пуные…

    Ма вераз Борис?

    Жаль зор улэ потӥз Борис,
    Нош собере выльысь пыриз.
    - Малы, Борис, потад кыре?
    Уд адӟиськы шат - жаль зоре.
    
    Вераз ке со вераз милем:
    «Кайтуз кые кыем выем…»
    
    Кыӵе букваосты эке
    Уг йӧндыры на кӧня ке?

    Трамплин

    Ох, усто пӧрмиз трамплин!
    Салазки лобе ук - бли-ин!..
    Пилемозь ик тэтчытэ,
    Куштэ зӥртэ кытчы ке.
    
    Выльысен нискылтӥсько,
    Космонавт кадь потӥсько.
    
    Шылтыр-шалтыр, куажырак!
    Ӵыштыр-ӵаштыр, ӵажырак!
    
    Соку гинэ валатски:
    Выль басьтоно салазки.
    Э, штане но пась ук, блин.
    Ну, трампли-и-ин!..

    Мон тодам ваисько…

    - Борыен чай юыкуд,
    Ма тодад лыктэ, Ленуш?
    - Пыдам лексем муш.
    - Эмезен чай юыкуд,
    Мае малпад табере?
    - Пушнерез.
    - Бакча сиён сиыкуд нош
    Ма тодад меда, Ленуш?
    - Уж,
    уж,
    уж…

    Кисло-кусло-раката

    Алигес, оло, вазен,
    Пӧсь дыръя
    Гужем куазен
    Юзмытӥсь шур дуразы
    Куинь пиос питыразы.
    
    Шур дурын пуке пересь.
    «Пиналъёс, ӟечесь-буресь!
    Тӥ шуре эн тэтчалэ,-
    Пиосты пересь алэ.-
    
    Отын кисло куслоос,
    Ныре куртчисько соос.
    Шоразы ке ӝимиды,
    Серемес вераськоды».
    
    Пересьлэсь ӧз кылзӥське.
    Микой ини пылаське.
    Ярдуре потэ Микой
    «Ой, убо-ой!»
    Микалля тэтчиз вуэ,
    Потыса вуысь, шуэ:
    “Туж убой, уд алдаськы.
    Бикта, тод до пыдаськы.”
    Жумбыляк зумиз Микта
    Ву пушкы, чипей мактал.
    Эшъёсыз витё - ӧвӧл.
    Кытчы кариськиз, явол?..
    
    - Кеба улэ ди Бикта,
    Баке убойтэб ик та.
    Бикой, бар-о каробы?
    - Ойдо вуэ пыробы.
    
    Я, потӥз, лэся, Микта.
    Ымаз солэн - раката.
    Кисло-кусло ӵыжаське,
    Кисло-кусло тышкаське,
    Вузэ-бӧрдэ раката:
    «Лэзь бодэ, Бикта-а!..»

    Ма утча Костя?

    Тани кубиста бакча,
    Костя ма отысь утча?
    Ӝутӥське, мыкырскылэ,
    Учкылэ куаръёс улэ.
    Уриське шат Костямы?
    Ойдолэ юаломы.
    - Костя, ма тон кариськод,
    Кубистаын выриськод?
    - Татын, шуо, ватэмын
    Пичи сузэр яке вын.
    Мон но татысь шедиськем,
    Только огнам вылӥськем.

    Писэйпи миськон

    Писэйпизэ ваннаяз
    Петрован миське.
    Адӟиз сое анаез -
    Воксё чабкиське:
    - Писэйпидэ тон виёд,
    Вуын миськыса.
    - Уг,- шуэ пичи пиёк,-
    Мон - чакласькыса.
    
    Но тани бӧрдэм куара
    Чузъяськиз котыр.
    «Ма турттӥд тон, ма пӧрад?
    Э, Петыр, Петыр!..
    Мон тыныд верай, пие,
    Тон ӧд кылзӥськы.
    Ву - шудон ӧвӧл, пие,
    Писэйпиослы.»
    
    «Ву отын янгыш ӧвӧл,-
    Пеперскиз ымыз,-
    Миськыкум ӧз кулы вал -
    Пызьыртыкум…
    Быз-з-з…»
    Писэйпи
    Тэтчиз резь-пезь,
    Ватӥськиз гуре.
    «Пегӟоно сыӵэ эшлэсь,
    Вӧсь каре бере.»

    Ӵуказе куто

    Туннэ ветлӥм чорыганы.
    Шурын умой шеде кыны.
    Атай кутӥз дас одӥгзэ,
    Выны Олёш поттӥз куиньзэ.
    Мыным ӧз удалты туннэ,
    Монэ пӧяллязы гинэ.
    Оло, ай кутысал, вылды,
    Пеймыт луиз: пуксиз шунды.
    Ай ӵуказе но лыктомы,
    Куазь ӟардыку ик султомы.
    
    Ӵукна вазьгес ке потӥмы,
    Атай кутоз дас вить кыны.
    Олёш, шуом, ог вить пала,
    Нош мон куто ог… ог…
    Мон но куто…
    Одӥг пала.

    Кунян

    Милям скалмы
    Ваиз кунян,
    Нош кунянэз
    Воксё – «шунянь».
    Уг вырӟылы
    Интыысьтыз,
    Ӧвӧл на шат
    Киыз-пыдыз?
    Мумиз сое
    Шакыр нюлэ,
    Тани кунян
    Ини сылэ.
    Мон вешаны сое
    Ӧдъяй,
    Нош со пурӟиз ук -
    Ай-яй-яй…
    Гид пушкамы дыбыр поттэ
    Ньыль пыдъёсыз вылын
    Эктэ.
    Шуод на-а сое
    «Шунянь»?
    Нюлэм кунян -
    Шаян кунян!

    Ӧвӧл дыръяд, нэнэ

    Ӧвӧл дыръяд, нэнэ,
    Кырын шудӥ туннэ,
    Лэсьтӥ лымы мунё.
    Кышкыт - вазер пинё!
    Отчы гутё копай,
    Медаз усьы атай.
    Гутё со - Гутялы,
    Яке - Митыркалы.
    Така леказ монэ
    Ӧвӧл дыръяд, нэнэ.
    Мон но сое таркай,
    Юрттӥз эше Трокай.
    Бӧрысь ми Трокаен
    Шудӥм на коркаен.
    Лымы коркаямы
    Мырдэм тэриськомы.
    Шудӥм чималиен
    Титэн но Колиен.
    Эшшо нискыламы,
    Сиим небыт лымы.
    Мон йӧ ӟуски веръяй…
    Ай…
    Мултэссэ верай.

    Чик-чирик, ученик!

    Нырысьсэ школае мынӥсько,
    Нырысьсэ мон луо ученик.
    Ӟиллёос вай вылын исасько:
    «Чик-чирик, ученик, чик-чирик.»
    Возьмато мон тӥлед «чирик-чик.»
    Исады ке, уг вераськы чик.
    
    - Чик-чирик!
    Йыр вылын, шу, Ӟыбыль?
    Канжаськод, чик-чирик, дыртоннад.
    Я, шудом, чик-чирик, ойдо, кыль,
    Школаед ведь уз пегӟы тынад.
    Чик-чирик, ученик, чик-чирик,
    Ученик, чик-чирик, чик-чирик!
    
    - Школае бен уз пегӟы, тодмо,
    Визь пегӟоз.
    Быдтозы, чик-чирик.
    Тӥледын нош уг зуль ай токма.
    Палэнске,
    
     
    
    Мон туннэ - чик-чирик.
    Ой, тьфу тӥледын…
    Мон туннэ - ученик!
    Ученик мон туннэ, ученик,
    Ученик, чик-чирик, ученик!

    Ческыт маке

    Ой, ческыт вылэм хурма,
    Кыдёкысь ваем хурма!
    Сакырлэсь но, кампетлэсь но,
    Халвалэсь но, улмолэсь но.
    Виноградлэсь ческытгес,
    Вареннялэсь голькытгес.
    
    - Мар бен со сыӵе хурман?
    Тон сиид ни шат, Роман?
    - Мон ӧй сиы.
    Со, марым…
    Вузаське, пе, базарын.
    
    Песятай
    Базарысен,
    Туж бадӟым базарысен
    Сьӧд моко адямилэсь,
    Йырын-пыдын сьӧд муртлэсь
    Сиемзэ адӟем.
    Зэм!

    Полюсын

    - Мон нош ик Полюсэ ветлӥ,
    Гондыръёсын пумиськылӥ.
    У-у-у…
    Бадӟым вылэм тӧдьы гондыр!
    Нош кӧня вылтыраз гонтыр!
    Быдэс тушак гонтыретэз,
    Куамын сапег тыр ыжгонэз!
    - Мар?
    Тӧдьы гондыр тылы-гоно?
    Тӧдьы гондыр шат ыжгоно?
    Я, вера ай, кызьы, Люся,
    Тон вуылӥд со Полюсад?
    - Нош тӥ ӧд вуылэ на шат?
    Отчы ӧд вуылэ на шат?
    Огпол но, одӥг пол но
    Вуылэмды ӧвӧл на?!.
    Туж жаль мыным потӥськоды,
    Укыр мӧзмыт вӧтаськоды.

    Кузьым

    Атай мыным туннэ
    Ваиз дуно кузьым.
    Мыным угось тырме
    Туннэ ини сизьым.
    
    Ма кузьмазы, шуод,
    Потэ-а тодэмед?
    А мон уг вера, вот,
    Соиз али - секрет.
    
    Небыт со, вешамон,
    Асме но нюлыштэ.
    Кельши ик, лэся, мон,
    Ялан дорам лыктэ.
    Ой бен, яраз ук туж
    Культык быжо кузьым!
    Ачиз со - сьӧд но ӵуж -
    Кузь пель,
    Кузь ныр,
    Кузь ым…
    Кык пыд вылаз эктэ.
    Ми ваньмы паймемын.
    Коӵыш но шумпотэ -
    Ӵогыр пештырскемын…

    Шалтыртон

    Ӵуштыр-паштыр,
    Шылтыр-шалтыр -
    Со озьы мынэ Педор.
    Школаозь вамышъясал, дыр -
    Азьпалаз султӥз Миквор.
    - Педор, маид вань сыӵе,
    Урам тырос шалтыртэ?
    - Пичи на, уд вала тон.
    Мынам бордам - шалтыртон.
    Нош ик Педор вамыштэ,
    Ӵуштыр-паштыр шалтыртэ.
    Паймемын ини Миквор.
    - Ойдо, возьматы, Педор.
    - Шуисько ук - шалтыртон.
    Шуисько, уд вала тон.
    Шултыр-шалтыр,
    Ӵуштыр-паштыр…
    Микворлэн быре чидан
    - Возьматӥд ке - пуртме басьты.
    Ӟырыез но тани вань.
    - Ӟырыез но вань, иське,
    Ма бен, тани, учкы, ме.
    Нош Миквор учке, учке…
    Выльысен учке, учке…
    - Вай ай поно очкиме.
    Мыняса сылэ Педор,
    Бергатэ-учке Миквор.
    - О-ля-ля…
    Уд пӧяськы вылэм тон,
    Зэм но - шалтыртон!

    Кылбуран кружокамы

    Милям туннэ кружокмы,
    Кылан-буран кружокмы.
    Ми мынӥм матысь сике -
    Кыз йылын коньы сиське.
    
    Кыз улын будэ сяська,
    Куное коньы васька.
    Нюлэсмы милям узыр -
    Сьӧд сутэр, эмезь, узы…
    
    Милем ваньзэ адӟоно,
    Адӟоно но гожтоно.
    Ветлӥськом, чакласькиськом,
    Учкиськом, кылзӥськиськом.
    
    Ми ум поттӥське куара -
    Ручкамы ваньзэ вера,
    Кызьы чузъяське сик гур -
    Со сярысь маде кылбур.
    
    Гожъяськом бере сикын,
    Со «кылбур» уз лу татын.
    «Сикбур» сое нималом,
    Дэмен шӧмзэ веръялом.
    
    Коть «сикбур» шу, коть «кылбур».
    Коть пӧрмиз ке но «кылдур»,
    Чакласькыны дышимы,
    Инкуазен эшъяськимы.
    
    Валамы, дунне шулдыр,
    Чеберез ноку уз быр.
    Ӟеч омырен шокамы
    Кылбуран кружокамы.

    Тулыс хор

    Кап-кап-кап!
    
    Динь-дон!
    Динь-дон!
    Ко-ко-ко!
    Кукареку-у!
    Динь-дон!
    Динь-дон!
    Бе-е-е!
    Му-у-у!
    Динь-дон!
    Динь-дон!
    Чик-чирик!
    Чуф-чуф!
    Динь-дон!
    Динь-дон!
    Шупыль-шопыль!
    Пуж-ж! У-уф!
    Динь-дон!
    Динь-дон!
    Фырр-р!
    Сорр-р!
    Динь-дон!
    Динь-дон! -
    Хор.

    Возьдаськись

    Кыӵеез но ӧвӧл ми дорын.
    Тон кылзӥсь лу туннэ,
    Мон - верась.
    Тит шаплы адӟиське
    Мугорын,
    Но сыӵе возьдаськись-кепырась!..
    
    Мынэсьтым шудонме «маялтӥз»,
    Нош берен сётыны возьдаське.
    Сандӥлэн йыртышказ «утялтӥз»,
    Мон янгыш, шуыны возьдаське.
    
    Кепыра, мурт садэ ке пыра,
    Возьдаське тыронзэ тырыны.
    Урокын но ялан кепыра,
    Возьдаське уроксэ вераны.
    
    Атаслэсь тылызэ ишкалтэм.
    Кесяське ук атас ымтыраз:
    - Кукареку! Йӧнтэм! Укылтэм!
    Пон али ик сое интыяз!
    
    Тит сылэ ни мупыр вияса,
    Ӵыжектон паламын ымныраз.
    Нош берен
    Атаслэсь тылызэ
    Поныны интыяз
    Ке- пы - раз.
    
    Кыӵеез но ӧвӧл…
    Валады,
    Тӥнь сыӵе со милям кепырась.
    Вань меда сыӵеос пӧлады?
    Табере мон - кылзӥсь,
    Тон - верась.

    Зорлэсь ватскем

    Одӥг пол
    Пӧсь куазен
    Тэтчимы шуре ми.
    Пилемез
    Тӧл ваем,
    Учкиськом -
    Зоре ни.
    
    Потӥмы бызьыса -
    Зор кампет уз сёты!
    Ким кылиз уяса.
    Ӧтиськом -
    Уг поты.
    
    - Вож эбек, пот отысь!
    Дӥсьёсыд котмо ни.
    Нош Кимлы малы дӥсь?
    Ваменскоз, тодмо ни.
    
    - Песяе
    
    Кынманы
    Ноку, пе, уг яра.
    Зор улын котмыны -
    Мон шузи-а, мар-а?

    Лыдъяськисько

    Тракторен ужа атай.
    Кӧня со гыре -
    Чотай,
    Кӧня со кизе -
    Чотай,
    Кӧня со изе -
    Чотай.
    Шильк но шальк!
    Каре счётэ.
    Чиньыос но вань…
    Ответэз шонер потэ -
    Нянь!

    Беклёр но контролёр

    Трамвае пуксиз Беклёр
    Билеттэк.
    Шудтэм муртлы - контролёр!
    - Билеттэ?
    Кисыяз пыре эке,
    Гызмыльтэ.
    - Вал ик, лэся. кытын ке
    Билетэ…
    Мукетаз пыре эке,
    Гызмыльтэ.
    - Вал ик, лэся, кытын ке
    Билетэ…
    Куаретэ ни контролёр:
    - Я ӝоггес!
    Куалектэ пичи Беклёр:
    - Ма? Ӝоггес?
    Э, пурӟиз соку эке,
    Тачыртэ:
    - Вал ик, лэся, кытын ке
    Билетэ…
    Вал ик, лэся, кытын ке
    Билетэ…
    Вал ик, лэся, кытын ке
    Билетэ…

    Кылбур

    - Олёш, кылзы кылбурме,
    Туж умой, лэся, пӧрме.
    
    Лыдӟе ини сузэрез
    Али пӧрам кылбурез.
    
    Алёша кылзӥз-кылзӥз,
    Кырым пыдэсаз кызйиз:
    - Мон ӧй вала марымдэ…
    Зуль ай нош ик зулёндэ.

    «А» но «1»

    Букваос пӧлысь -
    «А»-ез гинэ,
    Цифраос пӧлысь -
    «Колэз» гинэ -
    Отӥзэ уг тодо шат соос,
    Тыл кыскись электрикъёс?
    
    Мон ке бен электрик луысал,
    Вань букваосты пуктылысал.
    Мынӥськод, шуом, ульча кузя -
    Лыдӟиськод верос
    Юбоосъя.

    Котнунал

    Кӧснунал, кӧснунал…
    Чик но тон медад лу вал.
    Та нуналэ улӟыло
    Веник, майтал, мучоло.
    
    Мунчое ке пырисько,
    Синвуэн пыласькисько.
    Синме-пеле ву пыре,
    Веник мерске котыре.
    Лу кымин, коть гаӵоло,
    Шедьтоз,
    Посоз мучоло.
    
    Кӧс нунал, кӧс нунал…
    Нош ик туннэ кӧс ӧй вал-
    Коттӥзы, пызьыртӥзы,
    Шобыртӥзы, пыртӥзы.

    Песяйзэ жаля

    Школаысь эке бертӥз,
    Портфельзэ пыдло зӥртӥз.
    Котьку сямен
    Экеез
    Пумита ни песяез:
    - Вай дневниктэ, Витали.
    - Песяй, ӧжыт вить али:
    Очкидэ ӧй ваты на,
    Сюлэмыд туж ляб тынад.
    Песяйёс ваньмыз дуно,
    Песяйёсты утёно.

    Обидизы

    Опонез обидизы,
    Опоньгуби, шуизы.
    Опоньгуби - лӥялын,
    Вочак одӥг интыын.
    Нош Опонь?
    Соиз - шӧртчи,
    Интыяз уг пукы чик.
    Ох, кыӵе обидизы,
    Опоньгуби, шуизы!
    Луӵӵе шуэ вал, коньы,
    Яке эрико чуньы.

    Малы?

    - Малы кудымульыез
    Нимало кудымульы?
    Нош кытысь потэм куды?-
    Малпаське пичи дыды,-
    Малы дыды я нылок
    Монэ гуртын нимало?
    Малы гуртэз шуо - гурт?
    Пуртлэн нимыз - одно пурт?
    Малы ву шуэмын - ву?
    Малылэн пумаз уд ву.

    Губи паровоз

    Милям сикамы губи
    Шедёз быдэс воз.
    - Вань на ай, - шуэ буби,-
    Губи паровоз.
    Возьматӥз мыным огпол -
    Губиос - чурен.
    “Вот усто таиз! Вот зол!”-
    Кырӟасько гурен.
    
    Котькудӥз губи - вагон.
    Кудыме кутӥ.
    Со нунал,
    Уд оске,
    Мон
    Сю вагон октӥ!

    Шыколад кампет

    - Бакчае потэм
    Кампет!
    - Ма потэм бере, потэм…
    Мар? Кампет?
    Кыӵе кампет?
    - Шыколад, лэся, потэм.
    
    Вань калык ни паймемын,
    Быдэс гурт бакчаямы.
    Шыколад удалтэмын,
    Со будэ син азямы.
    
    - Кытысь потӥз?
    Кыӵе уд?
    - Учке, сяськаясь… фантикъяське!
    - Коркалэсь ӝужыт уз буд,-
    Феофан тодэмъяське.
    
    Нош кампет будэ-будэ
    Часлы-минутлы быдэ.
    Инмозь будысал на ай -
    Эх,
    Сайкатӥз анай…
    
    Умойгес ке малпано,
    Чик ӧвӧл куректоно:
    Бакчаын кампет будӥз ке,
    Ваньмызлы кампет окмиз ке,
    Ма понна бӧрдод соку,
    Лавка дортӥ ортчыку?

    Лилия

    Куке соку тӧдь лилия
    Бакчаямы, пе, вал.
    Мушъёс но эскадрильеен
    Отчы пуксё, пе, вал
    Эшшо вылэм на - Лилия,
    Чебер нимо нылаш.
    Утялтымтэ со лилиез,
    Азьтэм вылэм угась.
    Нылаш вылэм на вожъяськись
    Чебер сяськаослы.
    Сяськаослэн кадь
    Чебер дӥсь
    Со вурытэм аслыз.
    Нош бакчаысь, пе, лилия
    Солэсь чебер вылэм.
    «Быдто, куасьто со лилиез». -
    Нылаш малпаськылэм.
    Куазь пӧсь дыръя но, сюлэмтэм,
    Ву киськатэк возем.
    Улэм-улэм сяська сютэм,
    Нош собере пегӟем.
    Тӥни соин, дыр, лилия
    Али но ву юэ.
    Тӥни соин, дыр, лилия
    Уг ву ни бакчае.

    Композитор

    Борддорез сэзъя куара:
    “Туру ру! но та-ра-ра!
    Ого-го! Ой-ёй-ёй!
    Э-ге-ге! но Ай-яй-яй!
    Жир-жур! Тра-та-та! -
    Кырӟан пӧра Митырка.
    Барабанъёс дыбырто,
    Чингыля гырлы.
    Бускельёс но шумпото
    Композиторлы.
    Гуртамы одӥг, пе, со,
    Туж дано луоз, пе, со!
    Куинь нунал ӧз улы чал.
    Табере каре ни ял.
    Нош пельын
    Арня пала
    Жонгетэ на:
    Ла-ла-ла!

    Мон

    Макем паймымон кыл -
    Мон!
    Синмаськемын солы мон.
    Со кылэз ке вераськод,
    Йырдэ урдыса,
    Пилеме кадь вуиськод,
    Эсьмаса.
    - Кудды,
    
     
    
    пиналъёс, кужмо?
    - Мон!
    - Кудды ваньмызлэсь визьмо?
    - Мон!
    - Кин гуртаз сюлмо ужа?
    - Мон!
    - Кин муртлэсь ужзэ гажа?
    - Мон!
    - Кин-о тӥ полысь етӥз?
    - Мон!
    - Кин гуртэ ужзэ лэсьтӥз?
    - М-м…
    Валантэм юан.
    Семонлы таиз.

    Яратэ — уг яраты

    «Яратэ- уг яраты»,-
    Марина туна сяськаен.
    Кылзыны уг яра, дыр,
    Тунамзэ солэсь
    Лушкемен.
    «Яратэ - уг яраты»,-
    Сяськаез вылэ мыкырскем.
    Номыр но ӧй куареты,
    Ма аслам но потэ кылзӥськем.
    «Яратэ Марина
    Возь кузя чырмыт бызьылыны,
    Уг яраты
    Бакчаын ужаны,
    Яратэ
    Эшъёсыныз ульчаын шудыны,
    Уг яраты
    Гуртэ ужзэ лэсьтыны,
    Яратэ
    Ӝӧк сьӧрын сиськыны,
    Уг яраты
    Тусьты-пыньы миськыны…»
    «Яратэ - уг яраты.
    Яратэ - уг яраты, -
    Сяськазэ пумен ишка,-
    Яратэ - уг яраты».-
    Гольык кылиз сяська…

    Огзэс огзы дышето

    Пуныен пичи Исьток
    Огзэс огзы дышето.
    Пуны каре:”Ыр-р-р!” -
    Коли сётэ сыр,
    Коли каре:”Ыр-р-р!” -
    Пуны - дыр-р-р…

    Визнасьёс

    Ёзо-ёзо ньӧреныз,
    Бамбук ньӧреныз,
    Ёрги ёршез «ёмыръя».
    «Ёмыръя» но «ёмыръя»,
    «Ёмыръя» но «ёмыръя»…
    Солэн пукы - ёрк-ёрк!
    Мынам сюлмы - нёрк-нёрк!
    Ёргиен ми одӥг ёз,
    Со сярысь уг тод шат ёрш?

    Балет

    Уть ай - балеринаос
    Сик куше пото.
    Светаос, Иринаос
    Бергаса экто.
    Тӧдьы-тӧдьы платьяос
    Дӥсяллям соос -
    Отяос, Огапьяос -
    Кечсин сяськаос.
    
    Милесьтым ӧз курелэ
    Нокыӵе билет.
    Тӥ но, эшъёс, пырелэ,
    Сик кушын -
    Балет!

    Тӧдьы губи

    Таиз ни воксё паймымон,
    Таиз ни воксё абдрамон:
    Губи но бызьылэ,
    Губи но кизьнылэ!
    
    Бызиз-бызиз, дугдӥз -
    Ап-чих!
    Фук-фук! кариз на со.
    Кыдёкысен монэ адӟиз,
    Пегӟиз питыраса.
    
    Бадӟым губи вал. Тӧдь-тӧдьы!
    Огназ - быдэс куды!
    Мон та дырозь ӧй ведь тоды,
    Кык шуыса
    Пыдыз.
    
    - Нош веньёсыз кузесь-а вал
    Тӧдьы губиедлэн?
    - Э-э, зэм но,
    Со вылэм ӵушъял.
    Губияны ветлэм.

    Олёшлэн кылдуръёсыз (Тупатъялэ Олёшлэсь кылбуръёссэ)

    Кизьыны гыремын ни усы,
    Со вылын ӵабъяське на бусы.
    ***
    Кесяське мыным губи:
    «Лык дорам, татын - буби!»
    ***
    Коркалэсь кышка Митырка,
    Бызьыса со пыре курка.
    ***
    Куное учки но -
    Лыктэ уно.
    ***
    Ми палан уно пельёс,
    Отын будо кужымъёс.
    ***
    Быжен уяны ӧй дыш,
    Гыж вылтӥ котӥ мон выж.
    Тышкаса-тышкаса котӥ:
    Куэз туж мур уга отӥ.
    ***
    Ымыз усьяське атаелэн.
    Ымзэ солэсь кышъяно вылэм.
    ***
    Койка улын лошъяське
    Пал Катя,
    Кытын ке
    Палыз но вал кадь ай.
    ***
    Вожектэм ни юбоды:
    Куаръяське ни бодыды.
    ***
    Шыр бызе, тулкымъяське,
    Со вылын ыж веттаське

    Рысак

    Эх, лобатэ монэ рысак,
    Кош азьысьтым, Сергей!
    Бадьпу ньӧрез вал карыса,
    Ворттылӥсько: э - гей!
    
    Валэ каре тапыр-тапыр,
    Тузон пурӟе бӧрсям.
    Пуксьы, Коли,
    Пуксьы, Петыр,
    Я пукселэ мышкам.
    
    Гуртмы пуме но вуимы,
    Лобом на луд вылэ.
    Шок-пуль шокась ни луимы.
    Тпру-у-у!
    Сезьы кулэ.

    О-ля-ля…

    До, Ре, Ми, Фа,
    Соль, Ля, Си, До.
    Доре ми фасоль
    Мерттӥм но
    Фа-фа-солез ми-ми
    Ремен си-си-имы.
    Фа соль нош - о-ля-ля -
    Кӧтын кырӟа : «До-ля!
    До-си, до-ля, ре-си-ми…»
    Токма, лэся, сиим ми.

    Лыкты, чорыге.

    Пичи Олёш чорыга.
    - Лыкты, лыкты, чорыге.
    Мон тонэ сюдо но,
    Мон тонэ куто но…
    Пеляд вань сипыртонэ,
    Музъемозь йыбырттонэ.
    Эн кышка, уг кур липет.
    Мон куро,
    Мон куро
    Пичизэ коть велоспед.

    Шунды но мемей

    Шунды,
    Мемей сямен,
    Туж вазь султэ котьку.
    Мемей,
    Шунды сямен,
    Мыня мон кӧлыку.
    Шунды,
    Мемей сямен,
    Веша монэ ӵукна.
    Мемей,
    Шунды сямен,
    Йырсиоссэ сына.

    Миндэре

    Ма гинэ уг тэры миндэре,
    Толалтэ
    Укыр кезьыт дыре!
    Ватскемын отын тӧдьы кечсин,
    Жильыра отын ик ошмес син.
    Ма гинэ уг тэры миндэре!
    Уллмопу улмоеныз тэре!
    Улмопу?
    Быдэс нюлэс отын
    Тюри-тюр! кырӟась бурдоосын!
    Ма гинэ уг тэры миндэре!
    Лэйканэ отчы быдэс тэре.
    Мон ачим но лобӟисько со миндэрын
    Миндэре пырем югыт шунды доры.
    Ваньзэ,
    Ма тэрем та миндэре,
    Вӧтасько но адӟисько мон
    Уйшоре.

    Кышъяськыны коть яраз

    Эн шудэ Тимен -
    Ушъяське.
    Тим ушъяськонэн
    Эшъяське.
    Кыз йылэ тубе -
    Ушъяське,
    Кыз йылысь ваське -
    Ушъяське.
    Ушъяське
    Забор вылысен,
    Ушъяське
    Забор улысен.
    
    Одӥг пол тубем
    Кенере,
    Ушъяське ук бен,
    Ну, выре!
    Урдыса йырзэ,
    Вамышъя,
    Ас быгатэмзэ
    Весь ушъя.
    Но тани кенер -
    Шатырак!
    Тимколэн дэрем -
    Ӵажырак!
    
    Маин туннэ Тим
    Ушъяське?
    Уг ни ушъяськы -
    Кышъяське.

    Юрттӥзы-шунтӥзы

    Музъемлы кезьыт
    Луэ ни сӥзьыл.
    Юрттыны кызьы?
    Шунтыны кызьы?
    Улмопу жаля,
    Куарзэ вале,
    Серыпу жаля -
    Дӥсьсэ кыле.
    Кызьпу но шальыр
    Куарен
    Вия.
    Пипу на казыр*
    Куарзэ
    Куя.
    Куштӥз на бадяр
    Пумтэм-йылтэм.
    Куар вылэ куар -
    Шобрет кылдэм!
    Музъемлы шуныт,
    Пужмер ке но.
    Лык, лымы мамык.
    Лык, куно!
    ------—
    *- али

    Висьыны капчи-а, ма?

    Кин-о яратэ меда
    Висьыны?
    Тодӥськод-а,
    Со - милям
    Васимы.
    Но
    Огпол но
    Ӧз вись на
    Васи.
    Черланы, пе, вылымтэ
    Капчи.
    Йыртэмпол со ветлэ
    Школае,
    Лымые, ява, гольык
    Выдылэ.
    Юромо вуэ
    Колаське,
    Со - отын,
    Кытын тӧлаське.
    Школалэсь шутэтскыны
    Малпаз,
    Черланы нош ӧз ву -
    Кыдаз.
    Только тӥ эн выре
    Озьы.
    Уроклэсь пеганы
    Возьыт.

    Витись книгаос

    - Мӧзмыт ӧвӧл-а, книгаос,
    Ӟоскыт ӝажыады?
    - Тани ӝоген Олёш вуоз,
    Лыдӟоз со милемды.
    
    - Тузонӟоды ук, книгаос,
    Озьы кыллёнъяды.
    - Тани ӝоген Олёш вуоз,
    Ӵушоз со милемды.
    
    - Трос-а лыдӟе бен книгаос
    Алёша шуонды?
    - Тани ӝоген ачиз вуоз,
    Соку ик адӟоды.
    
    - Ӧз ке ву дорады Олёш?
    Кутоз но вот -
    Пегӟоз.
    - Кызьы озьы уз ву Олёш?
    Кызьы озьы пегӟоз?

    Озьы вуэ ӵукна

    Атайлэн
    Газетэныз шалтыртыса,
    Анайлэн
    Йырсиеныз ӵаштыртыса,
    Апайлэн
    Мисьтӥськоназ колтыртыса,
    Вынылэн:
    «Пал катае кытын, анай?»-
    Озьы вуэ ӵукна.

    Мон ӧй

    Лык али татчы, Онтон,
    Малы сыӵе дэри тон?
    - Мон дэри?
    Ачид сыӵе.
    Уть ай, мон чылкыт кыӵе.
    - Вай бен эскером юри,
    Кудмы асьмеос дэри.
    Мае ке верам берам,
    Тон шуод: «Мон ӧй».
    -Ярам…
    - Миша дэриез адӟиз.
    - Мон ӧй.
    - Миша солэсь палэнскиз.
    - Мон ӧй.
    - Палэнскиз ке но, усиз.
    - Мон ӧй.
    - Миша дэриысь султӥз.
    - .......
    Вить ай,
    Усьыса учко юри,
    Потонтэм ик-а дэри.

    Зурод сюрон

    Сюриськом бадӟым зурод,
    Тыршыса.
    Толалтэ йӧло луод,
    Шуыса.
    Турынлэн ческыт зыныз
    Лӧсъяське,
    Агае кужыменыз
    Ушъяське.
    Йыр вылаз быдэс кабан
    Ӝутэмын.
    Агае мынам - чабан
    Колхозын.
    Турынлэсь данзэ вала
    Агае.
    Колхозмы соин йӧло
    Та вие.
    Пред сямен учке шунды
    Ужаммес.
    Зуродэ сюриськомы
    Гужемез.

    Тулыс мылкыд

    Урамын ӟиза апрель,
    Секытгес луэ портфель.
    Сюрес урдсы понӥськом,
    Пароходэн шудӥськом.
    
    Ӝог бызьылэ пароход,
    Сьӧраз мырдэм вуиськод.
    Кыдёке кыле портфель,
    Но сое отчы уд кельт.
    
    Выльысен берытсконо,
    Шур йылысен кутсконо.
    - Ой, кошкиз пароходэ! -
    Митыркамы шумпотэ.
    - Кызьы кошкиз?
    - Огшоры:
    Тулысысь -
    Гужем доры.
    
    - Мон но малпай маке но:
    Бадӟым фрегат лэсьтоно.
    Отчы поно сумкаме,
    Мед кошкоз ни гужеме.

    Азьланьзэ малпаса

    Вандӥськом,
    Пилиськом,
    Люкиськом,
    Люкаськом.
    Куасьмемзэ пыртоно,
    Лапасын - артана.
    Быдтыса ми ужмес,
    Кудымес кутӥськом.
    Дунъяса гужемез,
    Тол сярысь малпаськом.

    Шырась

    Оломарлы Муркае
    Ӝӧк вылэ шырзэ вае.
    Си, шуэ, быжзэ, Васи,
    Нош йырзэ йыръё ачим.
    Таин ке кӧтыд ӧз тыр,
    Мон эшшо ваё на шыр.
    Кеносын соос тыраз.
    Шыпак пукисько но - р-раз! -
    Шыред ымам сюремын.
    Уд оскиськы?
    Сьӧрам мын.
    Оп! шуытозь дышето…
    Тӥни - нош ик ӵашето.

    Шунды шорын

    Вани шоры учкисько -
    Шыкалат…
    Кати шоры учкисько -
    Шыкалат…
    Луо вылын пыжиськом,
    Шыкалатлы укшаськом.
    
    Пыжиськом
    Шунды шорын,
    Сӥятӥськиськом
    Шурын.
    
    Нош Вали вылын -
    Халат.
    Со но меда
    Шыкалат?
    Халатсэ кыле Вали,
    Э-э,
    Таид кисьмамтэ али…

    Шузи исьнер

    Бӧрдэ Исьток,
    Мискинь-куанер:
    - Мыным шедиз
    Шузи исьнер.
    Ӵужи, ӵужи,
    Ӵужи, ӵужи,
    Бӧрысь валай:
    Исьнер - шузи.
    Мынам уг адӟиськы
    Уже,
    Нош со ӵуже,
    Ӵуже, ӵуже..
    Тубат вылэ вуэм бере,
    Пушкам ӧз тэр ни йыркуре:
    Тубат улын сыӵе ик жаг.
    Шузи исьнер, мыдлань ужад!
    Улӥысен шат кутсконо?
    Вылӥысен, пӧй, ӵужоно!
    Выльысь кутски,
    Ӵужи-ӵужи,
    Ужме учки -
    Умой-тузӥ!
    Мын интыяд,
    Шузи исьнер!
    Ужантӥяд
    Коть пот вал кер.

    Кать

    Кытчы пыриз катед?
    Малы быриз катед?
    Кинлы сётӥд, агай?
    Аслыд кулэ ук ай.
    Шедьто мон тыныд кать.
    Эн кылльы пуклёк кадь.
    Кӧня бен кулэ кать?
    Куинен тырмоз-а кадь?
    Ярам бен, ваё куать,
    Мешок тыр ваё кать.
    Тон мадь гинэ, эн жадь,
    Выжыкылдэ, пӧй, мадь.

    Луд кырӟан

    Йыры поромиз кадь
    Потӥ но кыре.
    Шока, серектэ гадь
    Чылкыт омырен.
    Кытчы мон вуи ай,
    Ческыт зын котыр?
    Бен кытчы выйи ай,
    Тулкым но сабыр.
    Кырӟа тюрагай но
    Азвесь куараен,
    Сьӧраз нош - атай но.
    Кыксы ик парен!
    Ма мон но мыто ни.
    Кызьы кырӟатэк?
    Лудмес шулдыртом ми,
    Шудмес ватытэк.
    Туннэ ми ваньдэс ик
    Пыртом крезьгуре.
    Соку ӵуказе ик
    Пуштоз ужгуред.
    Куто гажаса мон
    Зарни тыр шепез.
    Шепын вань аслам но
    Мынам тыршеме.
    Лудын мон кырӟай ке -
    Атай но шудо.
    Ужзэ нош веръяй ке,
    Ачим но будо.

    Юбер вуиз

    - Ӟечбур, юбер!
    Вуид-а, ма?
    Малы-о бер?
    Малы кема?
    
    - Ма бер шат та?
    Вуи дыраз.
    Кырӟан шедьтӥ,
    Ваи тыраз.
    
    Эн кушетскы -
    Чидаз бурды.
    
    - Я, шутэтскы
    Но -
    Уж борды.

    Сьӧд кизили*

    Ма но ӧвӧл та югыт дуннеын!
    Туж паймемын ни туннэ Паримон.
    Вань, пе, инмын
    (Но уг адскы синмын),
    Сьӧд кизили но.
    Таиз абдрамон.
    
    Кызьы улэ со дэймон кизили?
    Малы уг пишты ваньмыз кадь ик со?
    Кызьы озьы югыттэк со кылиз?
    Макем бадӟым меда?
    Кыӵе тусо?
    
    Вань на эшшо экелэн кылэмез:
    Ваньзэ кыске кизили багорен.
    Ваньзэ луэ, пе, солэн ньылэмез,
    Тыл но югыт но уг пото берен.
    
    Ма со
    Семон кадь
    Аксым ук, иське:
    Ваньзэ басьтоз, номырзэ но уз сёт.
    Токма шорысь-а атай вазиське:
    «Лу кизили кадь,
    Но эн луы сьӧд».
    ------
    *-чёрная дыра

    Ӝӧк сьӧрын

    - Кытчы шуккыса пилём
    Та курегпузме?
    - Эн гинэ шуккы, Олён
    Ӝӧк пуме.
    Ӝӧк тонэ сюдэ-вордэ,
    Сое жаляно…
    Тӥни со кымес борды
    Шуккы, Олёна.

    Война но мир

    Кин со отын дыбыртэ,
    Кин отын сётэ куара?
    Перияське но бӧрдэ,
    Шузияське букварям?
    
    Букварьме усьтӥ-марай,
    Нош отын сыӵе ожгар!
    Оло мон маке сурай?
    Та букварь ик-а?
    Букварь!
    
    Букваос,
    Вожмаськыса,
    Ог-огзэс сэсто-гындо,
    Усьыло уйжомыса,
    Ӝуась танк сямен ӵындо.
    
    Малы жугисько соос,
    Синтэмез но, дыр, валаз.
    Огпалаз - согласнойёс,
    Гласнойёс - мукет палаз.
    
    Мон нош кин пала таре
    Итиськом граждан оже?
    Бордазы ӧтё Тэ, Ре,
    Лякисько Фе, Ха, Це, Же.
    
    Нош И, О, Ю, Е, У, Я
    Милемлы, пе, басьты дур.
    Гласнойёс -
    «Уя! Уя!»,
    Соосыз но -
    «Фр-р!» но «Бр-р!»
    
    Ма война бере война -
    Номырзэ уд вала ни.
    Шуисько вал ас поннам:
    «Мон татын мултэс ини…»
    
    Но пыриськытэк ӧйлась:
    Граждан ож - умой ӧвӧл.
    Ӧй но вала, куд палась
    Бордам мертчиз пукыӵ ньӧл.
    
    Шуи: «Тӥ озьы, иське!?
    Воксё ортчиды сьӧраз?!
    Я бен соку…
    Возиське!»
    Р-раз!-
    Чепыльтӥ Ц-лэсь быжзэ,
    У вылэ тани пукси,
    Ё-лэсь пытсай синъёссэ,
    Сучак Я азе уси.
    
    Пыдзэ вылам понӥз Я,
    С кортназ ини ымме,
    Р тӥрзэ шерын ӧдъя,
    О пуштӥз -
    …Быриз уме.
    
    Синпумтӥм
    Букварь шоры
    Учкисько дӥсьтытэкгес.
    Интыяз, лэся, йыры.
    Шумпотӥ:
    Йыры быглес!
    
    Букварьлэн кӧбер ӧвӧл,
    
    Номыр луымтэ выллем,
    Ӝӧк вылын кылле со вӧл.
    Мон - дораз,
    Каллен…
    Каллен…
    
    Оло, пӧй, снаряд пуштоз,
    Кытысь ке палдоз-а тӥр?..
    
    Нош отын ваньмыз усто,
    Букварьын,
    Азьло кадь, -
    Мир!

    Сайкан

    Азьлон пельзэ кыре поттӥз -
    Кылзэ,
    кылзэ,
    кылзэ…
    Тӥни кин ке но серектӥз,
    Отын - кин ке чипсэ.
    
    Юзмыт на ай, лэся, омыр,
    Лымы на кушамы.
    Оло, ӧз кылӥськы номыр?
    Вазьгес на ӝужаны.
    
    Но нош ик кылӥське куара,
    Кин ке мытэ крезьгур.
    Матаз ик вазизы шара:
    -Ӟечбур, кечсин!
    - Ӟечбур!
    
    Ӧз чида ни, поттӥз йырзэ -
    Син мальдымон шунды!
    Учке-чакла азьзэ-берзэ:
    - Огнам, лэся!?
    Шурдыт!..
    
    Нош кыз улысь солы вазё:
    - Потӥд ик-а, кышкась?
    - Ма тӥледын кызьы изёд?
    Мычиськытэк ӧйлась.
    
    - Я, ойдо лык ай дорамы.
    Кырӟан ни мытоно.
    Будильник медло куарамы -
    Ваньзэ сайкатоно!

    Ручка

    Сое сьӧрам нуллӥсько,
    Соин кылбур гожтӥсько.
    Гуртэ ужме но лэсьтэ,
    Азьтэм дыръям - азьтэмске.
    
    Ручка со - умой котыр,
    Соин, ява, кӧт но тыр
    Кылбуръёс гожтэм бере,
    Газетэ поттэм бере,
    Ысто гоно оломар.
    Гоно… гоно…
    Тодӥ - гонорар!
    Мукет сямен - получка -
    Уждунэд тынад, ручка.

    Висьыку

    Эмезь чай юи,
    Пӧсяй,
    Кыллисько шобрет улын.
    Лӥятэ монэ песяй:
    - Висёнэд кошкоз тылын.
    
    Баю бай но баю бай.-
    Кырӟамез но туж шуныт.
    Баю бай - кырӟа песяй,
    Косэ умме усьыны.
    «Урамын жоба-жоба,
    Кӧл ни, пие, баю-ба…»

    Клоун

    Витя киын колун.
    Колун, пе, со- клоун.
    Музэ пуклёк пуктэ,
    Соиз каре тэтэ.
    Витя ке шоналске,
    Пуклёк но шоналске.
    Сылэ-сылэ оград,
    Но ланьыра-погра.
    Выльысь Витя пуктэ,
    Шедьто, шуэ, куктэ.
    Сылод-а, уд-а тон,
    Калер, шайтан басьтон!
    Пуклёк оград сылэ,
    Витя куара кылэ,
    Вазе вылэм колун,
    Шуэ:
    «Ачид – клоун».

    Кут кулон губи

    Малы сое курлало,
    Лёгало гинэ кудӥз,
    Синазькыль кадь верало:
    «Кут кулон губи…»
    
    Нош мыным со жаль потэ,
    Курланы эн дыртэлэ.
    Уг луы губи чётэ -
    Чебер чётэ пыртэлэ.
    
    Мон сое уг лёгаськы,
    Мон сое уг ӵыжаськы.
    Тон но сое эн ӵыжа,
    Со но малы ке ӝужа.
    
    Сиыны уг яра ке,
    Учкыны коть яратэ.

    Бызе шунам лымы

    Сикысь шуназ туннэ лымы,
    Пайме лымы дуннемылы,
    Кызъёс вӧзтӥ жильыртонъяз,
    Сик омырлэсь дунзэ валаз.
    
    Али вордскем нылпи сямен,
    Со тодыны ӧдъя пумен,
    Малы улӟиз дунне вылэ,
    Со дунеын малы кулэ?
    
    Бызе, бызе шунам лымы,
    Макем чылкыт со луэмын!
    Дораз сяська но сузьтӥське,
    Вуын со мугорзэ миське.
    
    Пуксиз вӧзаз тылобурдо,
    Вуиз койык, лыктӥз урдо.
    Малы бен шумпото, малы
    Жильыртыса бызись вулы?
    Нош вылӥын кин ворекъя,
    Чебер апай кадь серекъя?
    Туж кыдёкын - копак лыз-лыз.
    Нош матынгес - чебер кыз лыс.
    
    «Тулыс, тулыс! - кырӟа улос,-
    Шуна лымы, вырӟо йӧос!»
    Сик лымымы вуиз шуре,
    Со итӥськиз улон ӧре.

    Алла Кузнецова

    Удмуртские стихи для детей 19
    Алла Алексеевна Кузнецова (1940–2003)
    удмуртская поэтеса, заслуженный работник культуры Удмуртии, лауреат Национальной премии им. Ашальчи Оки

    «Былие». Ӝог веран

    Были-были-былие,
    Со мынам быгылие
    Луд шорын ке но поръя,
    Сюрыныз шудэ огъя.
    Мынам мусо былие,
    Тӧдьы бабля
    Ыжпие.

    Чимасьлэн лыдъяськонэз

    Одӥг, кык,
    Дорам эн лык
    Куинь, ньыль, вить,
    Монэ эн вить.
    Куать, сизьым, тямыс,
    Лыдъяськонлэн вуэ пумыз.
    Шуисько ке укмыс, дас,
    Кин ӧз пегӟы ас дыраз,
    Ки улам шедёз,
    Чимась луоз!
    Лыдъяськонме быдтӥсько,
    Утчаськыны потӥсько.

    Кык

    Кык синмы
    Но кык пельы,
    Кык киы но
    Кык пыды.
    Пельёсы - кылзыны.
    Синъёсы - учкыны.
    Пыдъёсы - ветлыны.
    Киосы - ӟеч лэсьтыны.

    Лидия Чернова

    Удмуртские стихи для детей 20
    Чернова Лидия Дмитриевна
    удмуртская детская поэтесса

    Палэзьпу

    Вайёсыз някырскемын
    Яплак горд ӟускиосын
    Кыдёке яркыт пиштэ,
    Синэз долак! мальдытэ.
    Куное со табере
    Ӧте ини юберез.

    Тол суред

    Нюлэскы пыдло пыре
    Кык гожен ортчись сюрес.
    Выль лымы вылэ чурен
    Пуксьылэм ни тол суред:
    
    Пытьыос, трос пытьыос...
    Кин гожъям соосты, ку?
    Тябыкен, дыр, лудкечъёс
    Шудӥллям, куазь ӟардыку

    Ой, быри

    "Ой, быри, быри, быри!" –
    Туж шугъяське чонари.
    Та тӧлэн чылкак ёрмод,
    Калгыны маза уг сёт.

    Унябей

    Унябей кильтыръяське:
    Ваньдылэсь мон мудрон, пе.
    Тани пельтӥз уйпал тӧл -
    Унябей тӧлӟиз - ӧвӧл.

    Шулдыр

    Ӵыжыт эмезь бичасько,
    Каллен гинэ кырӟасько:
    "Горд эмезь,
    Кисьмам эмезь,
    Ческытгес со
    Кампетлэсь..."
    
    Муш но ужа,
    Мӧль бича.
    Гуж! гужла,
    Оло, кырӟа?
    
    Милемлы ӵошен
    Шулдыр.
    Горд емыше
    Ведра тыр.
    
    Ӝӧк вылэ эмезь пукто -
    Эшъёсме куноято!

    Уй

    "Уй-уй-уй!
    Уй-уй-уй!"-
    Шаере ваське сьӧд уй.
    
    Сайка пелёкучыран,
    Шур-шур лоба со, шыра.
    
    Синъёссэ кыниз сяська -
    Пеймыт уйлэсь со кышка.
    
    Кузьыли ӧссэ ворсаз -
    Тушмонэз уз лэзь корказ.
    
    Кибыос ватскылӥзы -
    Куаръёсын бинялскизы.
    
    Уй нумыр - пичи шыртыл -
    Ӝуатэм ини югтыл.
    
    Инме потэм тыр толэзь,
    Чакла котыр шаерез.
    
    "Уй-уй-уй!
    Уй-уй-уй!"-
    Шаере васькем сьӧд уй.

    Коӵыш сайкам

    Шыр-шыр-шыр!
    Шупыр-шапыр!
    Зор эктэ липет йылын.
    Нырулӥсь коӵыш сайкам:
    Оло, шыр
    Пыриз коркам?

    Куча

    Ӧч-ӧч-ча, курмича!
    Мон тонэн уг шуд, куча.
    Мын ай, мисьтӥськы ӟеч-ӟеч,
    Соку сёто перепеч.

    Т. Чернова

    ***

    Кылбурчиос лэсьто куазез.
    Котькытчы мед учком – возез,
    Льӧмпу садэз адӟиськомы,
    Сяська зынэн шокаськомы.
    Нош собере – зарни сӥзьыл:
    Вож пильыслы укша узьым,
    Тылскем выллем пипу ӝуа,
    Кызьпу ассэ зарнивуа.
    Тӧдьы пери вае толэз,
    Лымы кадь ӟарпотэ толэзь.
    Кыштыр-пуштыр усе лымы –
    Эшшо огез ортче армы.
    Липет пумын – йӧӟури.
    Гужем лымы – кот ӟустари
    Миське, гылтэ музъем бамез...
    Кылбурчиос лэсьто куазез.

    И. Гаврилов

    Ю-нянь бусы

    Паськыт ю бусы,
    Зарни ю бусы,
    Веттаське, шудэ,
    Зарезь кадь пиштэ.
    Вуись ю вылын
    Тюрагай кырӟа,
    Вӧлмыт бусыын
    Куара жингыра.

    В. Широбоков

    Анай

    Мар вань дунне вылын анайлэсь дуноез!
    Со сётэ тыныд улон, сюдэ-вордэ тонэ
    Берпум юдэс няньзэ но со тыныд кельтэ.
    Вань кужымзэ, сюлэмзэ, улонзэ жалятэк сётэ нылпиосызлы.
    Одӥгзэ но уг тэрга, соё-таё уг кары.
    Таиз сэзь, таиз востэм уг шуы.
    Сыӵе угось со анай.
    Со понна нылпиосыз сое сюлмысь ярато.

    Степан Широбоков

    Коньы

    Кузь быжо чебер коньы
    Чик уг кутылы пуньы
    Пыдъёсаз кырме ӵыжин,
    Йырйыса сиське кызын.

    Ф. Пукроков

    Вордӥськем шаер

    Мар дунне вылын
    Котьмарлэсь дуно?
    Котькытчы но мын,
    Солэсь мӧзмоно?!
    Мар дунне вылын
    Котьмарлэсь чебер?
    Со - одӥг кылын -
    Вордӥськем шаер.

    В. Широбоков

    Мусо мемие

    ...Тон мусо ук, мемие,
    Тон дуно ук, мемие.
    Зыгырто ай мемиме,
    Монэ утись-вордисьме.

    Р. Рылова

    Анай

    Тон юрт кутӥсь, пӧзьтӥсь-пӧрась.
    Пӧртэм ужын тон кичӧлтӥсь.
    Кезьыт-пӧсез — ваньзэ чидась,
    Дунне вылэ улон сётӥсь.
    
    Маин тонэ мон ӵошатом,
    Кыӵе чебер кылъёс шедьтом.
    Тонэ ӝутон, данъян понна,
    Ненег лулдэ данъян понна?
    
    Анай мурттэк ӧй луысал
    Музъем вылын чебер улон,
    Тонтэк сяська ӧй ӝужасал —
    Шунды но тон, улон но тон!

    Владимир Михайлов

    Гудыриӵашъён сяська

    Шобырскиз паськыт-паськыт
    Ковёрен возьмы.
    Гудыриӵашъён сяська
    Вӧлдӥськиз озьы.
    
    Соосты тулыс дыре
    Пилемо куазен
    Нырысетӥ гудыри
    Ӵашйыса кизем.
    
    Мусо ӵуж италмаслэн
    Покчи сузэрез
    Буёлзэ апаезлэсь
    Пунэмен курем.
    
    Гудыриӵашъён сяська
    Векчи но ненег.
    Гудыри ялан киська
    Вылаз ӵуж мӧлез.
    
    Калык вашкала дырысь
    Инкуазез чаклам.
    Нош таиз сяська сярысь
    Вань таӵе веран:
    
    «Эн курла гудыриез –
    Сяськазэ утёз.
    Эн ишка со чеберез –
    Астэ но ӵашъёз».

    Вордскем гуртэ (Сказочное село)

    Выжыкылысь шаер - вордскем гуртэ,
    Улон но паймымон отын потэ.
    ӵукна ке гуртамы тӥ лыктӥды –
    Зарезь вуысь юн батыръёс сямен,
    Нап бус пöлысь потоз пумитады
    Батыр отряд Черноморен ӵошен.
    Со батыръёс - гуртысь коркаосмы,
    Нош Черномор - бадӟым, ӝужыт школа.
    Одно ик кожалэ тӥ гуртамы,
    Зэмзэ но вуоды выжыкылэ.
    Школа вöзын кылле дун синучкон,
    Шунды шорын чиль-дол со воринъя.
    Котыр нош писпуос шораз учко -
    Тулкым куара, пе, чеберзэс данъя.
    Синучконын улэ пересь Вумурт,
    Артысь тэльын
    кузё, пе, Шурали
    Нокин но татчыозь
    ӧз ке но кут,
    Зарни чорыг но
    вань, пе, шурамы.
    Омыр - чылкыт,
    Ожо - вожо, ву – дун.
    Ма, лыктэ!
    Адӟоды-ай асьтэос.
    Ой, бызисько,
    Оте Лöпшо Педунь -
    Эшшо выльзэ выжыкылзэ мадёз.

    Ӝогверан

    Трактор дыбыр дыбыртэ,
    Тракт дуртӥ тэле дыртэ.
    Корка тыр кор ӟыгыртоз,
    Собере гуртэ бертоз.

    Песянай

    Песянай, песянай,
    Перепечтэ пыжы ай.
    Тынад пыжем-пöрамед
    Буй-буй небыт ӝутӥсъке,
    Ачиз ыме куриське.
    
    Песянай, песянай,
    Мыным пöзьы кертты ай.
    Тынад керттэм пöзьыед
    Луэ мамык кадь небыт,
    Луэ гурын кадь шуныт.
    
    Песянай, песянай,
    Монэ топ-топ веша ай.
    Тон ке монэ вешаськод,
    Вань висемме улляськод.
    Соку бадӟым будӥсько.
    
    Песянае пальпотӥз,
    Монэ ӝик-ӝик ӟыгыртӥз:
    - Тани ческыт пораме,
    Тани шуныт керттэме –
    Визьмо, бадӟым буд, пие!

    Ульфат Бадретдинов

    Пумтэмлык

    Пумтэмлык уг тэры йырвизе,
    Со валан лоба, дыр, жадьытэк.
    Шат улод дугдонэз тодытэк,
    Инмаре, шундые-толэзе?
    
    Йырвизьлэсь палэнтӥ со ортче,
    Аръёсты ас сьӧраз нуыса.
    Улонзэ шулдыргес карыса
    Лобалля вӧтъёсын ӵош-уртче.
    
    Пумтэмлык куке но кемалась
    Йырвизьмысь потӥз, дыр, огдырлы.
    Берытскон сюрессэ весяклы
    Вунэтӥз, шедьтыны но ӧзлась.
    
    Пумтэмлык уг тэры йырвизе,
    Со валан лоба, дыр, жадьытэк…
    
    Пумтэмлык - бесконечность

    Ӧвӧл

    Мыномы меда азьлань,
    Ӧвӧлэз карид ке Вань?
    Улонмес воштоз сильтӧл,
    Куке Вань луоз Ӧвӧл.
    
    Тонтэк уд вала ванез,
    Пӧяськонэз но зэмез.
    
    Данъяны тонэ йылол
    Кылдытэмын но ӧвӧл.
    Нош тонтэк кин ке пайда
    Дуннелы вае меда?

    Пумпус *

    Витёнтэм интые пуксе ке со шуак,
    Дунне но соку ик воштӥське кадь шыпак.
    Ӧжытак адӟиськись тусбуез-ымнырыз
    Кельшемысь дугдэ кадь ваньмызлы но … аслыз.
    
    Гожтэтысь пумпусэз воштыны но луэ,
    Трос кужым солы кулэ ӧвӧл ни туэ.
    Шайвылысь пумпусэз вырӟытод на меда?
    Йӧспӧртэм юанлэсь сюлэмы ик курда…
    
    Пумпус - точка

    Пӧзь но пӧсь

    Пӧзьлы уг яра пӧсь,
    Пӧсьлы уг кельшы пӧзь.
    Ог-огзэс адӟытэк,
    Уло чик мӧзмытэк.

    Ӵуказе

    Туннэ, пе, вордӥське Ӵуказе,
    Нош толон со пуксиз син азе.
    Вазь ӵукна ик потӥ со азе -
    Ӵуказе малы ке но изе.

    Дырды

    Вань ке ваньмон дырды,
    Ваське ошмес дуре.
    Отын питрес дырды
    Вулэсь тулкым «дуре».

    Усьтон

    Кисыысьтым эн усь тон,
    Верасько тыныд, усьтон!
    Тонтэк доре уд пыры,
    Сылоно луоз кырын.

    Каратэ

    Пичи Петя куаретэ:
    – Басьтэ мыным каратэ!
    – Кытысь басьтом ми сое?
    Со уг вузаськы, пие.

    Лангаед сётэ куара

    Куа, куа, куа – со куака?
    Чик ӧвӧл ук со куака!
    Куа, куа, куа – со куара?
    Лангаед сётэ куара!


    Ланга – эхо

    Лобасал

    Унябей сяськаос ӝужаку,
    Вож турын выллане ӝутскыку,
    Лобасал возь вылтӥ муш выллем,
    Собере луысал зор пилем,
    Вуэн ӵош пыӵасал будосэ,
    Улӟысал сяськаен кабатсэ.*

    Кабат – вуоно ар

    Ӝуа тэльмы…

    Ӵуж-горд тылын ӝуа тэльмы,
    Паймод-бырод – ӵындэ шурмы.
    Кысӥсь ӧвӧл гомась тылэз,
    Кузёяське пушказ – Вакыт.
    Ӝутскись ӵынэд уг сут бамез,
    Сямыз солэн, шӧдске, лякыт.
    Тылпу кысӥсь таӵе дыре
    Беромыса вуэ зорен.

    Укное ноку уг кӧл

    Укное ноку уг кӧл,
    Мылкыдыз котьку вӧл-вӧл.
    Мадьыны гинэ уг дыш,
    Оло, мон ачим янгыш?
    Юаме ноку ӧвӧл,
    Малы со улэ дол-дол.

    Пукы

    Эн пукы тон, пукы,
    Тон сыл, тон часовой.
    Эн вунэты ноку:
    Вулэсь уд потты вӧй.

    Тон ул чылкыт вуын,
    Эн уя кырсь вӧйын.
    Кин люкетоз тыныд,
    Кутод курикеныд.

    Шур пыдсозь

    Эн шуэ монэ пичи –
    Кышкатэк вуэ тэтчи.
    Зымыса шурмы пыдсозь,
    Мон потӥ отысь туж сэзь.
    Сачырмиз йыры мынам…
    Кытысь со дэри бичам?
    Паймисько…

    Кытчы ке

    Кытын, Кытӥ, Кытчыке
    Мыно кема кытчы ке.
    Юаны нош кытчызэ
    Валанзы ӧвӧл кабзэ.
    Потӥды ке кытчы ке,
    Тӥ эн сюре юмоке.
    Сюресты медло вольыт,
    Вамышты котьку йыгмыт.
    Кытын, Кытӥ, Кытчыке
    Ялан мыно кытчы ке,
    Утчаса сюрес пумез…

    Ма каром?

    Огыр-бугыр дорамы.
    Куара поттэ Макармы.
    – Ма каром на, ма каром?
    Ӧз на пӧзьы макарон.
    Ӝоген вуоз куномы,
    Маин сое сюдомы?
    Азбар шорысь «коркамы»
    Пыриз гольтрес куркамы.
    – Чик ӧм ӧте ми сое,
    Ма каром ни, мусое?
    Бурдо пуке тӧршорын.
    Нош ми – кыре пегӟемын.

    Ку вуоз кезьыт?

    Анае басьтӥз пальто,
    Устолэсь но со усто.
    Нош педлон ялан шуныт,
    Ку вуоз меда кезьыт?

    Выльмиз

    Туннэ мон, песяй.
    Укыр зол пӧсяй.
    Дэреме воксё выльмиз –
    Тыбыры сое миськиз.

    Куно

    Пичи Толик укыр етӥз,
    Туннэ дораз куно ӧтиз.
    Ӝӧксы сьӧры ӝоггес пуксиз,
    Нырысь куно луиз ачиз.

    Бӧчы

    Отчы-татчы
    Ветлэ бӧчы.
    Ымыз – качы,
    Йырыз – сяртчы.
    Утча чечы
    Оло пучы…
    Вольыт пуӵысь.

    Шундыберган

    Ӧвӧл, чик ӧвӧл со огшоры,
    Потэ учкемез шунды шоры.
    Шунды кудлань, со но солань –
    Берга, берга шундыберган.
    Синмаськем будос ӵуж шундылы,
    Нош соиз уг вала дугдылын:
    Уйлы ватскыса инвис сьӧры,
    Ӵукна потэ выль эшез доры.
    Берга, берга шундыберган.
    Шунды кудлань, со но солань.

    Мадиськонъёсын – удмурт букваос

    Чурыт …

    Кыллэн азяз ноку со уз султы,
    Гласной буква сьӧрын ӧвӧл инты.
    Эшъёсыз нош чурытэсь, куать гинэ.
    Люкаськемзы уг поты огинэ.

    Очкиен

    Очкитэк сое уд тодма,
    Вордӥськемын со очкиен.
    Кема эн малпаське токма,
    Шедьтэ сое «йӧл»-ысь, «вӧй»-ысь.

    Ӟечбур!

    «Ӟуч» но монтэк уз «улы»,
    «Ӟичы» луоз мукет пӧйшур.
    Монтэк ӟечбур но уд шуы –
    Тӥни сыӵе пӧрмиз кылбур.

    Ӝӧк вылын – ӝук

    Ӝӧк вылын пӧсь ӝук.
    Мон но отын туннэ.
    Сиеме уг поты, уг,
    Уже вите монэ –
    «Ӝӧк»-ысь но «ӝук»-ысь
    Уд кошкы нокызьы,
    Мон угось «возьмаськись».

    Ӵын

    Ӵындэ ни ӵукнаысен,
    Ӵындоз ай ӵуказе но.
    Ваньмыз со монэн сэрен.
    Оло, тусме воштоно?

    Веньёс

    Ӵушъял вордӥське, пе, веньёстэк,
    Улэмез нош уг лу соостэк.
    Аръёс пыр ортчыса асьмеос
    Малы ке луиськом лек веньёс.


    Семён Карпов

    Куараё-лангаё

    Жингыр-жин!куараё
    Нуналмы воринъя,
    Ульчамес лангаё
    Куараен эркея.
    Ми но ваньмы отын-
    Со куара жильырын
    Уясьёс.

    Адӟо

    Кенер йылэ чаль тубо но
    Котькинлэсь ӝужыт луо.
    Тӥнь соку адӟо,тодо мон,
    Будыса кыӵе луо.

    Уг лэзьы на

    Кин ке учкылэ синмам,
    Бамъёсам но йӧтскылэ.
    Тодэме уг лу аслам…
    Уг,уг лэзьы на монэ
    Изем потонэ:
    Кӧлы на,шуэ,пыкылэ.
    Нош малы
    Меми куараен
    Вераське монэн?
    Ой, мемие,тон со вылэм.
    Шунды сиосты пыргытса
    Нуныяд,лэся.
    Котьку но,меми,
    Тон сайкатъяськод монэ
    Вешаса.

    Ӵукна

    Ини вылез ӵукна сайкам-
    Буй-буй бус валесаз лэйка.
    Льӧльыр ӵушконэныз шунды
    Инлэсь бамзэ льӧльма кыштыр.
    Улосэзлы шулдыреныз кузьмаськыса,
    Тылсиоссэ пазьгоз ни куаныса.

    Бертӥз

    Шырчик шултӥз-
    Йырмес ӝутӥз.
    Сопала но тапала
    Чыртыосмес бергатӥз.
    Валамы:азбарамы,
    Ульчае,шаерамы
    Тулысмы бертӥз.

    Кисьтэ

    Дырекъясь мылкыдзэ
    Буйгатны вормытэк,
    Тымиськем синвузэ
    Инбам жаль-жаль кисьтэ.

    Чеберъяй

    Ульчамес но суредай,
    Коркамес но чеберъяй.
    Кызьпуос но льӧмпуос,
    Шупудъёс.палэзьпуос
    Котыразы сяськаос-
    Чебересь бубылиос…
    -Дыдые,тон вунэтэмед:
    Шундыез
    Куное ӧтьымтэед.
    -Шат валантэм?
    Суредакум быдэс инбам вал-
    Курмем бам.

    Пичи нуны

    Ӵук тӧл уг дырты сайканы-
    Чылкак пичи нуны.
    Шып-шып чусомыса улэ
    Инкуазь шобыр улын.
    
    Ӝужам шунды сое ыштэм-
    Тылсиосын югдэ…
    Адӟиз гинэ,бичыятӥз-
    Ӵук тӧл синзэ усьтӥз
    Шильыртыса,
    Дышем ужзэ мытӥз.

    Кичӧлтӥсь

    Тунсыкозэ малпаса,
    Эшъёсме паймытыса,
    Мыным но огпол ке но
    Кичӧлтӥсь коть луоно.
    
    Бурезлы,паллянэзлы,
    Кудӥзлы-о нош килы
    Кичӧлтӥсь кариськоно?
    Кудӥзэ киме чӧлтом,
    Кин визьнод сётоз?

    Шулдыртом Выль армес

    Яркытэсь тылъёсын,
    Чильпырась весьёсын
    Ворекъя Выль армы.
    Милемлы шумпотон,
    Ми дорын пальпотон.
    Ворекъя но пиштэ
    Выль армы.
    
    Пыре, пыре, ваньды,
    Асьтэос адӟоды.
    Кырӟалом, шулдыртом
    Выль армес.
    Яркытэсь тылъёсын,
    Чильпырась весьёсын
    Ворекъя но пиштэ
    Выль армы.

    Кузьмало

    – Кузьмало, эше, тыныд
    Лӥятӥсь пальпотонме:
    Сӥялэс мылкыдъёсыд
    Медаз люкетэ, юнме.
    – Мон пумит уг луы.
    Бен,
    Кöтӝоже вань на уга…
    Одӥгтэм ке со буйгаз,
    Пунэмме тыныд берен
    Берыкто пальпотонэн.
    …Кыӵе лякыт ӟеч эшен.

    Малы озьы?

    - Малы озьы сультыр-р!
    Шыддэ ӟузьылиськод?
    Юн дыртытэк,
    Кыштыр но
    сиськыса вуттод.
    - Шыдлэн пӧсез
    вазе сультыр.
    Кӧтлы озьы
    Луэ шулдыр.

    Тау

    Муспотон кылэз
    Кин-о вунэтӥз?
    Ӝӧк сьӧры сое
    Огназэ кельтӥз?
    Соин ӵош ваньмы
    Луимы куно.
    Сием-юэмлы
    Мар-о шуоно?
    - Тау...

    Алексей Ельцов

    Мунчокузё

    Мунчоысь
    Пеймыт сэргын,
    Оло нош
    Лапча улын,
    Гур сьӧрын, лэся,
    Изе
    Кӧшкемыт
    Мунчо кузё.
    
    Сьӧд тушез
    Музозь солэн,
    Синъёсыз
    Пишто тылын,
    Пиньёссэ
    Ӟакыр-р! сыске,
    Шурали* кадь
    Кесяське.
    
    Пыдессинъёс
    Шальтрамын,
    Йырсие
    Пештырскемын.
    Пыкыло
    Муми-буби,
    Серекъя
    Эше Габи.
    
    “Мон ӧвӧл шат
    Воргорон!
    Шат мунчо луоз
    Бырон?”
    Кутыса киям
    Кокро**,
    “Йыр ке йыр! —
    Эшшо пыро. ”
    
    Калленак
    Ӧсэз усьтӥ,
    Тылэз гинэ
    Ӝуатӥ.
    Ӵуштыр-ӵаштыр,
    Дымбыр-йыг!
    Ӝуась син,
    Кузь быж, мыйык…
    
    “Мяу!” —
    Кеськиз корка кузё,
    “Мар ишан та,
    Ой, усё.”
    
    *Шурали - филин, сыч, леший, чёрт.
    **Кокро - клюшка

    Мыдланес чуръёс

    Кутӥ огпол мон нюлэскысь,
    Оло шурысь огпол кутӥ.
    Кутӥ огпол пельтӥз, лэся.
    Лэся, быжтӥз огпол кутӥ.
    Кутӥ оло быдэс песьтэр,
    Песьтэр оло быдэс кутӥ.
    Оло отчы шедьтос ӧз тэр,
    Оло бичай отчы сутэр,
    Оло намер, оло пушнер,
    Оло палэзь, оло эмезь…
    Оло анай дорысь ӧз лэзь.

    Лымыпог

    Апачшур гурезьын
    Нунал лумбыт шудӥм.
    Ву ӟиза гын пӧзьысь,
    Мон быдэс ни тӧдьы.
    
    Тумошо лымы ныл
    Бамалэ ми ӝутӥм.
    Кышкасько бертыны –
    Шедьтозы сӧрыны.

    Кужмогес вылэм (Сӥзьыл)

    Гужемез
    Сӥзьыл вормем –
    Кужымез
    Золгес вылэм.
    Саесъёсыныз
    Шонтӥз,
    Шундыез
    Пилем кысӥз.
    Тылсиез бен
    Зол вылэм –
    Синвузэ поттӥз
    Пилем.

    Леонид Ившин

    Ыжпи

    Али гинэ тулыс вуиз,
    Дунне вылэ ыжпи вордскиз.
    Тöдьы но, сьöд но кисьтаське –
    Туж тумошо со адӟиське
    
    Ыжъёс туннэ лудэ пото,
    Соос туж юн шумпото.
    Туннэ ыжпи но отын,
    Лусьтро анаез вöзын.
    
    Я со ноныны вуэ,
    Я усе матысь гуэ,
    Тани анайзэ ыштӥз,
    Писпу сьöрын ӝожмыт бöксиз…

    Коньы

    Толалтэ вуиз ини,
    Дасяськиз солы коньы:
    Вай вылын куасьтӥз тӥни
    Губиос но пушмульы.
    
    Нош усиз гинэ лымы,
    Сиёнзэ коньы ватӥз:
    Яралоз ай со ваньмыз,
    Сиемез ке туж потӥз!

    Лозо шуре

    Ӵукна ик вазь туннэ мон васькисько
    Яратоно шуре – Лозо - доры,
    Векчи чорыгъёслы весь паймисько…
    Шумпотонэн тырме сюлэм дары.
    
    Шыпыт, каллен бызись интыетӥз,
    Турын-куарен узыр ярдуръёстӥз,
    Будо пӧртэм выжы вож бадьпуос,
    Адско азвесь бурдо вуберганъёс.
    
    Шунды дыръя ке учкисько
    Каллен бызись азвесь вуэз,
    Чагыр инмез кадь адӟисько
    Лысву кадь дун выль малпанэз.
    
    Визыласа гуждор вылтӥ,
    Азвесь вузэ Лозо нуоз.
    Кузь сюресэз но ортчыса,
    Чебер музъемъёсты адӟоз.

    Вордскем гуртэ

    Сюлэмлэсь номырєн люконтэм,
    Туж мусо но дуно ас гуртэ
    Нош кырын куартолэсь вуэмен,
    Котьмалэсь но чебер со потэ.
    
    Жадьытэк весь чирдо уӵыос
    Сяськаен ворекъясь садъёсын.
    Гуртэлэсь шулдырзэ, дыр, соос
    Данъяло кылымтэ гуръёсын.
    
    Нош льöмпу юг-тӧдьы дэремен
    Шып кылзэ уӵылэсь чирдэмзэ.
    Шуныт тöл каньылля пеллямен
    Лабыртэ, мыкыръя йыртышсэ.
    
    Лыз шурмы, ас понназ кырӟаса,
    Кытын ке но гылӟе дыртыса.
    Весь азьлань но азьлань со дыртэ…
    Кыӵе-мар, бен, чебѓр-а гуртэ?

    Арганчи

    Арганчи шулдыр гурзэ кисьтэ,
    Ӝом уй ваське музъем вылэ.
    Пеймыт ваньзэ пушказ ватэ,
    Тöдь кызьпу гинэ та уе югдэ…
    
    Тöлъя выро но шильырто куаръёс,
    Соос пыртӥ усё зор шапыкъёс.
    Кызьпу вадьсын пурысь пилем бöрдэ,
    Аслаз сьöраз юг толэзез ватэ.
    
    Нош мар таӵе: лек тöл потӥз ӵукна,
    Вож кызьпуэз сынэн кадь со сына.
    Пилем сьöрысь шунды но поттэмын,
    Бен, ваньзы, ваньзы туж шумпотэмын.

    Марӟан лысву

    Ӝужась шундылэн тылсиез
    Марӟан лысвуэз чильдытӥз –
    Сизьым буёлэн кисьтаське,
    Чебер, туж чебер адӟиське.
    
    Тазьы учкиськод – малахит,
    Мукет сямен нош – бирюза.
    Янгыш ке нош тон вамыштӥд,
    Васькоз ини со возь кузя…
    
    Учкисько мон лысву шоры,
    Матэгес лыктӥсько со доры –
    Кырмыштэ, эшезлы кадь мыным,
    Нош ачиз ватскемын турынын.

    Вордскем шаер

    Вамыштӥсько сюрес кузя
    Огшоры мон, дыртытэк.
    Шунды тылсиоссэ пазя,
    Нокыӵе кариськытэк.
    
    Сюреслэн одӥг палаз
    Кыстӥсько ӟег бусыос,
    Учкиськод ке сопалаз –
    Адӟисько сьöд нюлэсъёс.
    
    Вырйылэ ке тубисько –
    Син азьын быдэс дунне:
    Шур читыр-чутыр кошке,
    Поезд дыртыса мынэ.
    
    Котырак мон учкисько,
    Ваньмыныз ӟечъяськисько.
    Эх, кыӵе шулдыр, чебер,
    Вылэмед вордскем шаер!

    Малпанъёс

    Туннэ инмын толэзь пиштэ,
    Музъем вылэ югыт кисьтэ.
    Нош котыраз – кизилиос –
    Курег вӧзын ӵуж тютюос.
    
    Туж кыдёкын адско соос,
    Инмысь пичиесь виштыос.
    Али отчы мон лобысал,
    Матысенгес учкылысал.
    
    Отын уло адямиос –
    Ӵемгес мон весь малпаллясько.
    Асьме кадесь ик, дыр, соос,
    Асьме сямен, дыр, верасько.

    Нюлэс

    Нюлэс, нюлэс, кыӵе чебер адӟиськиськод,
    Тöло нуналъёсы кужмо куашетӥськод.
    Пушкад трос пöйшуръёс но бурдоос,
    Котьку вожесь кызъёс но ньылпуос.
    
    Адямилэсь кема тон улыны кулэ
    Нош котьку шат озьы луэ?..
    Дауръёсын тон будӥськод но кыдаськод –
    Лэчыт тӥрлы луса, тон пограськод…

    Нунал ортчыса

    Нош ик, нунал ортчыса,
    Шунды инвисэз гордмаз,
    Берпум шунытсэ шокчыса,
    Нуиз югытсэ ас сьӧраз.
    
    Нош ик пеймыт уй вуиз,
    Ватӥз дуннеез ас пушказ.

    Пётр Кубашев

    Денис

    Пичи Денис нырысьсэ
    Школае мынӥз туннэ.
    Анаез басьтӥз солы
    Выль сумка.
    Атаез дасяз пилы
    Ӵуж ручка.
    Выль тетрадь сётӥз. Усто!
    Горд тусо.
    Чекляос* лэсьтӥз уно,
    Ог дасо.
    Денис ветлэ школае.
    Кыӵе меда дышетске?
    Парта улын костаське
    Сумкаез.
    Чернилаен наштаськем
    Книгаез.
    Тетрадез воштэм туссэ,
    Горд вылзэ.
    Ыштылэм чекляоссэ
    Унозэ.
    Уг-а пукы классады
    Денис кадь йӧнтэм пиды?
    
    * - лыдъяськон палочка.

    Вениамин Ившин

    Кин шаплы вералоз?

    Турын куре тӧри.
    Тари куре тури.
    
    ***
    Вераломе: "Шу" но "шы",
    Шупуын шула шушы.
    
    ***
    - Пукыльна пуклё пилем, -
    пальпотэ мушко пилем.
    

    Вукылэс выжыкыл

    Мур нюкын тымет пукиз...
    Выжыкыл, дыды, кутске.
    Тыметэз тудву кыриз...
    Выжыкыл йылпумъяське.

    Лымыос

    Бамъёсам лымыос
    Вешаса йӧтскыло,
    Лымыос-инӟыос
    Ымдурам шунало.
    
    Нуналъёс вырӟонтэм
    Дугдӥллям кадь огпол,
    Гурт котыр пумйылтэм
    Юг мамык лымы тол.
    
    Дуннеын зор вуос
    Мыным вань коть овол,
    Котырам лымыос
    Кылдыто шуныт тол.

    Кече-пеле

    Ой, кече-пеле, малы
    Бакчае пырид?
    
    Гочатӥсь кубисталы
    Туж-а синмаськид?
    
    Куртчы, си кубистаез,
    Пичие, мусокае.
    
    Ой, капка вазиз дымбыр,
    Кузь пеле пегӟиз тапыр.

    Сӥзьыл

    Сӥялмизы шуръёс,
    Уг чиля шур визыл.
    Ӵужесь ву дур куаръёс
    Лулӟо: "Вуиз сӥзьыл".

    Ужась тӧл

    Садэ усем ӵуж куаръёсты
    Ыр тӧл ӵуш-паш ӵуже,
    Чылкытатэ гуждоръёсты,
    Шуэ: "Потӥ уже".

    Песяен ке кылисько…

    Песяен ми огнамы,
    Ӵаш! вазе корка пушмы.
    
    Гыж-ж! донги мон пуконэз,
    Йыг! ворсай висъет ӧсэз,
    Дынгыртӥ ведраосын,
    Жингыртӥ пуньыосын,
    Гулбечез усьяй дымбыр,
    Выж вылын тэтчай дамбыр...
    
    Песяен ке кылисько,
    Мон кузё кадь луисько.
    
    Анае ке бордамы,
    чус луэ корка пушмы.

    Иосиф Иванов

    Кинэ ӧз лыдъя Света?

    Светамы ни быгатэ
    Дасозь лыдъяны.
    Чиньызэ выллань урдэ:
    Одӥг, кык, куинь, ньыль...
    Со лыдъя:
    Анай - одӥг,
    Кык нош - со атай.
    Куинь - со агае Ондӥ,
    Ньыль нош - песятай,
    Вить - Наташа сузэре,
    Куать луоз - песяй.
    Лыдъяськон тани быриз,
    Ваньмыз куать кузя.
    - Янгышад ӧжыт, эке, -
    Серектӥз Ондӥ.-
    Одӥгзэ тон кинэ ке
    Лыдъятэк кельтӥд.
    Зэм но, кудзэсты меда
    Лыдъятэк кельтӥз Света?

    Укноысь экран

    Тол Бабай тӧдьы шуба, дыр,
    Уин возъям укное -
    Уд но кесьы, уд но ванды,
    Уд но ишкалты сое!
    
    Мӧзмыса чылкак огнам мон
    Шат чус-чус пуком коркан?
    Укнолэн шораз пелляй но -
    Устӥськиз пичи экран.
    
    Телевизорын выллем ик
    Адӟиське оти ульча:
    Нискыла Васи, Илья нош
    Куасъёссэ али кутча.
    
    Салазки ширтэ - Семи со
    Ӝог ваське гурезетӥ.
    Нош кытчы озьы Лариса
    Вамышъя укыр етӥз?
    
    Киноын шудӥсь муртъёс кадь
    Адӟисько вань эшъёсты.
    Уг, коркам огнам уг пукы-
    Пырисько шудоназы!

    Исаськись Витя

    Витямы ӝыт пал бертӥз -
    Синдурыз лызэктэмын.
    Юамы но - ӵыжектӥз -
    Волегӟи, пе, урамын.
    
    Нош берат ӧз чида ни,
    Вераз
    Мырдэм кылымон:
    -Ваньмызлы янгыш Вани...
    Со ачиз кутскиз... Нош мон...
    
    Со ачиз донгиз нырысь,
    Уськытӥз шуак монэ...
    Мон ӧй кутскы... Мон, марым...
    Исаськи гинэ...

    Кин ваёз на ӟардонэз?

    Сюдыкум курегъёсмес,
    Мон ӧй адӟы атасэз.
    Со малы-о беромем?
    Калгонъяз шат йыромем?
    Малпаса ӵуказезе,
    Сергимы бӧрдэ-вузэ:
    – Кин чортоз на вазь ӵукна,
    Ӟардонэз ваён понна?
    Кинлэн жин-жин куараез
    Уллялоз пеймыт уез?

    Гужем

    Ой, ӝокыт ук! Саюлын но
    Пӧсяно сучырмытозь.
    Чидамтэ пӧсьлы тӧлэд но,
    Саюлтӥ калге ӝытозь.

    Ӧжытлы ке но, тӧл, пот ай,
    Пелля пӧсь шунды шоры.
    Кӧня ке но сӥялскоз я
    Юзмалоз ӧжыт омыр.

    Кызьы уд лу дэриесь!

    – Учкы, нош ик дэриен
    Наштаськем ни тон, пие.
    Кӧня пол мон вералом,
    Кызьы, кызьы визьмалом?

    – Выль корка пуктӥськомы,
    Муръёзэ поттӥськомы.
    Кирпичез шукко сюйлэсь,
    Бен кызьы уд лу сюесь?!

    Азьлань

    Вал вылэ сэзь тэтчыса
    Лобисько тушмон пала,
    Эшъёсме азьпалтыса
    Кеськисько:
    – Ӝоггес! Азьлань!
    Нош анай монэ алэ:
    – Шыпытгес!
    Геля кӧлэ.

    Пичи зор

    Одӥг пол шуиз нэнэ:
    – Ойдо ай, нылы,
    Ветломы магазинэ
    Кыкнамы зорлы.

    Ӵужекто, пе, убоос,
    Тырмытэк мускыт.
    Басьтомы, пе, асьмеос
    Пичи зор тыныд.

    Мынӥсько мон паймыса:
    Вузаське шат зор?
    Нош берло валатскыса
    Серектӥ гор-гор.

    Убомес мон табере
    Весь мускыт возё.
    Учкы ай, кыӵе зоре,
    Шапыкъёс усё!

    Юзмыт му вылын будос
    Йыбырттэ, лэйка.
    Улонзэс утиз угось
    Пичи зор – лейка.

    Ю-нянь

    Зарни нянё бусы кузя
    Ширто-дырто машинаос.
    Соос сьӧры улляськыса
    Бызё-бызё ю тулкымъёс.

    Потэ, лэся, тыр шепъёслэн
    Кисьтӥськемзы кузовъёсы.
    «Комбайн лыктоз-а ни ӝоген?» —
    Ӵем юалля зарни бусы.

    Ӝыт

    Ӝытазе тэль дурысь тыметын
    Вань улос чалмытскиз, чусомиз.
    Луд ӵӧжъёс буйгазы пеймытын,
    Вож эбек но умме ни усиз.

    Вӧтало чорыгъёс мур кожын,
    Чайылэн но уммез туж ческыт.
    Нош шашы, шур шорысь вож шашы,
    Шыпыртэ на ялан:
    – Ш-ш-ш-шыпыт…

    Выль дэрем

    Городысь, пе, ваем
    Выль дэрем анае.
    Эктӥсько кырӟаса,
    Ураме потыса.

    Ой, ваньмыз ик эктэ:
    Писпуос, коркамы…
    Паськытгес пальпотэ
    Юг шунды инбамын.

    Ваньзы ик монэн ӵош
    Шумпото кузьымлы…
    Выль дэрем сярысь нош
    Кин верам соослы?

    Выль молот

    Кытысь шуоды выль молотэ?
    Атае гинэ сое тодэ.
    Со угось ачиз мыным толон
    Кебитын лэсьтэм пичи молот.

    Ну бен ужало ни табере:
    Пуны кар лэсьто корказь бере,
    Чигиськем куасме но тупато,
    Оло, выль пукон но пӧрмыто…

    Котьма ик луоз ни лэсьтэме,
    Молотлэн ӧз лу ке азьтэмез.

    Ужпи

    Максимен кыкнамы
    Ужпиез кыткимы.
    Ворттылӥм азбартӥ,
    Ураме но потӥм.

    Гонӟыртон куспамы
    Тып! дугдӥз ужпимы:
    – Мон жади ни, тырмоз,
    Мед Максим вал луоз

    Сикын

    Сикын губи бичакумы,
    Коньыпиез ми адӟимы.
    Картузэныз Петя лэзиз,
    Нош картузэз вае дэмӟиз.

    Зӥртӥз Миша но кепказэ,
    Ӧз ву – кугӟаз ӝужыт кызэ.
    Тау карыса кадь, шорамы
    Вылӥысен коньы учке:
    – Та саламдэс – губиостэс –
    Толалтэлы куасьто, иське.

    Чонари

    Чонари выре чырткем,
    Шудэмез, лэся, потэм.
    Со лэзькиз мынам азям
    Шундылэн сиез кузя.

    Ю бусы

    Чырмыт тулкымъёс шудыса веттасько вал,
    Ыстэ вал сюлме шунытсэ ю бусы.
    Али нош бусы тырттэммем ини, чал-чал,
    Бадӟым узырлык ватэмын кеносын.

    Бушам ю бусы тулкымен уг ни лэйка,
    Калго ни татӥ юзырес лек тӧлъёс.
    Зарни тулкымо зарезьлэсь мӧзмыса кадь
    Сыло бусыын корабльёс-зуродъёс.

    Пуктӥсько мон выль гурт

    Пуктыло мон шур дуре
    Выль юртъёс.
    Мерттыло гурт котыре
    Вож садъёс.

    Инбаме югыт шунды
    Ӝуато.
    Возь вылэ сяськаосты
    Ӝуӝато.

    Нош тырмиз на ке эшшо
    Буёлэ –
    Тракторъёс суредало
    Луд вылэ.

    Нискылась

    Ӝӧк сьӧрын суредаса,
    Туж кема пукиз Фиса.
    Салазки но пӧрмытэм –
    Гурезьысь огназ ширтэ.
    Суредзэ бубиз адӟиз:
    – Кытын нош, нылы, ачид?
    Валэктӥз Фиса лякыт:
    – Тани та лымы люкын.

    «Лымы мунё»

    Кин озьы азбар шоры
    Лымылэсь мунё пуктэм?
    Пальтоез гоно, пурысь,
    Нош паллян киыз пӧзьтэк…

    Ма, таид вырӟиз, лэся?!
    Вамыштӥз ук! Ой, усиз!
    – Мон лымы ӧвӧл – Вася, —
    Султонъяз «мунё» вазиз.

    Толэзе пукси

    Гурезьтӥ салазкие
    Тӧллэсь ӝог лобе –
    Со мынам ракетае
    Толэзе тубе.

    Ворекъя котыр чиль-воль,
    Со – кизилиос.
    Кышканэн йырин ӧвӧл:
    – Ӟеч луэ, эшъёс!

    Лӧптэмын мылкыд чылкак,
    Шеръямын киос..
    Нош сюрес вылын ӵапак
    Выль лымы пуктос!

    Эшъёсы монэ горо:
    – Питыраз, усиз!..
    – Мон ӧй усьы, — шуисько, —
    Толэзе пукси!

    Льӧль ӟардон

    Льӧль ӟардонэз нош кин меда кисьтэм
    урысялэс тулыс лымы вылэ?
    Лымы ӝуа… бусы льӧль-горд пиштэ,
    Льӧль буёлэн гома батыр нюлэс.

    Ваньмыз ик льӧль – гуртмы, возь выл, тымет,
    Льӧль бурдоос чирдо гомась инмын.
    Сюрес кузя выжыкылын сямен
    Ворттэ кин ке чырмыт льӧль вал вылын.

    Ӵукна

    Куазь ӟардыку, корка пушкы
    Югыт пыре пезьгыт тылсиосын.
    Пеймыт нош куалектэ,
    Солы кышкыт.
    Со кӧдэктэ,
    Пегӟе серегъёсы.

    Кытысь тодӥзы

    Мон потӥ вал ульчае
    Шудыны чималиен.
    Эшъёсы нош уллязы:
    Миськымтэ, пе, бамъёсыд.
    Бен, зэмзэ, туннэ ӵукна
    Ымнырме ӧй пылат на.
    Со сярысь нош эшъёсы
    Кытысь меда тодӥзы?

    Эшъёс

    Мунёез Леналэн
    Эшъяське мынамен.
    Пумисько нуназе –
    Люкисько ӝытазе.
    Куспазы тупаса,
    Шып пуко шудыса,
    Ми уго асьмеос
    Ленаен ӟеч эшъёс.

    Кызьы нимыд

    – Кыӵе мусо пичи ныл!
    Кызьы ай тынад нимыд?
    – Эн вера солы, Тома! –
    Нылашез выныз визьма.

    Мон но, тон но, ми но тӥ

    Уй куспын выль лымылэсь
    Азбарын кылдэм гурезь.
    Пазяське пуштрес лымы –
    Ми туннэль лэстӥськомы.
    Ветломы со туннэльтӥ
    Мон но, тон но, ми но тӥ.

    Малы мӧзмыт

    Чупырес Павлик выны
    Чик маза уг сёт мыным.
    Со кыска книгаосме,
    Шудыны ёртэ монэ.

    Киысьтым тупез басьтэ,
    Портфельме шуак усьтэ.
    Ерпечка выны вӧзам
    Шокчыны уг сёт маза.

    Нош туннэ тани Павлик
    Дорамы ӧвӧл али.
    Песянай сое нуиз,
    Возьмало ӧжыт шуиз.

    Мон дасяй урокъёсме,
    Утялт книгаосме.
    Коркамы шыпыт гинэ,
    Ёртӥсез ӧвӧл монэ.

    Малы ке шудэм уг пот,
    Малы ке мылкыд урод.
    – Анай, кытын Павликмы,
    Утчаны шат потомы?

    Узыр сӥзьыл

    Бен, узыр ик вылэ та сӥзьыл,
    Милемлы со дасям трос кузьым:
    Пушмульы, губиос трос пумо,
    Помидор, горд палэзь но улмо.
    Пудолы нош паськыт возь вылын
    Бадӟымесь зуродъёс будэмын.

    Писпуослэн сюлмаськонзы

    Садамы писпуос
    Дасясько ни рос-прос
    Доразы матэктӥсь лек толлы.

    Усьылэм куаръёслэсь
    Лэсьто буй-буй валес:
    Мед небыт, пе, луоз мугорлы.

    Зол гинэ ужазы –
    Я, вуиз валессы.
    Нош уг выдо ялан писпуос.

    Ма, кызьы выдозы,
    Ай ӧвӧл шобретсы,
    Шобреттэк мар изем, пе, луоз.

    Тол вуиз чупырес,
    Ваиз вӧл-вӧл шобрет,
    Писпуос нош уг выдо ялан.

    Ма кызьы, пе, выдод,
    Шӧдытэк ук кылёд
    Тулыслэсь вуэмзэ ми пала!

    Зор бере

    Пукисько укно дурын
    Зор киьстэ ведра дурын.
    Малпаса ул кема,
    Нош вуэз сутӥ ке – ма?

    Бызьыса потӥ кыре
    Ву аслыз сюрес кыре.
    Ворттыса зор ву сьӧры,
    Вуиськем гуртмы сьӧры.

    Валады ини, дыр, тӥ,
    Мон ӧй чакласькы, дыртӥ.
    Сапегам ву омыртӥ,
    Ведь уд мыны омыртӥ.

    Бусытӥ, бакча бертӥ
    Бызьыса доре бертӥ.
    Котмем дӥсьёсме кыли,
    Майка кож гинэ кыли.
    Апае мынам Вера
    Йыркурен мыным вера:
    – Лӧпотыны эшшо дӥсьтэ,
    Наштамед ук вань дӥсьтэ!

    Уть, выльысь кыре потэ,
    Висемед, оло, потэ.
    Атаед тани вуоз,
    Небыт азяд е вуоз.

    – Мон езе гурын суто,
    Нош вуэз одно суто!

    Шур

    – Кытчы ай сыӵе, шурмы,
    Дыртӥськод?
    Туж сюлмо жильыртыса
    Бызиськод?
    – Ужъёсы укыр уно, —
    Шур вазе. –
    Мыным ӝогак вуоно
    Зарезе.
    Нуоно та нюлоэскысь
    Пуръёсты.
    Дун вуэн пылатоно
    Лудъёсты.
    Гурт пумын бергатоно
    Вукоез.
    Люктано колхоз гидысь
    Пудоез.
    Ужъёсы, адӟиськоды,
    Туж уно.
    Ӝеганы мыным уг лу –
    Дыртоно.
    Но озьы ке но, эшъёс,
    Мон ӧжыт
    Бергало ай тӥ вадсьын
    Мур кожын.
    Я бен кылиське серыт –
    Пылато.
    Мугордэс юзмыт вуэн
    Кыдато!

    Кизиз пилем зор шапыкъёс

    Кезьыт, лек тол ортчем бере,
    Тулыс лыктӥз шулдыр зорен.
    Чагыр пилем кизиз туж трос
    Бусыямы зор шапыкъёс.
    Чебер, шулдыр нуналъёсы
    Вож-вожектӥз быдэс бусы.
    Зор шапыкъёс, лэся, озьы
    Вож узьымен бычыязы.

    Кызьпу но мон

    Юртмы вӧзысь веськрес кызьпу
    Чылкак гольык кылиськыку,
    Мон, потоно ке шудыны,
    Дӥсяьскисько шуныт-шуныт.
    Кызьпу дӥся ке вож дэрем,
    Гольык мон потӥсько кыре.

    Ваменэс туп

    – Эй, Петя, али ик пыр,
    Кӧлыны вуиз ни дыр!
    – Пырысал но, малы ке
    Тупе туж ваменъяське.
    Шудэме потэ на, пе,
    Киысь питырске тупе.

    Сэзь ӵукна

    Мон туннэ
    Ӟардэмлэсь азьло султӥ.
    Пыласьки,
    Кырӟаса кыре потӥ.
    Мон адӟи
    Нуналлэсь вордӥськемзэ,
    Ӵукналэсь
    Шорам шулдыр пальпотэмзэ.

    Паймыса учки
    Ӝужась шунды шоры,
    Бызьыса мынӥ
    Сайкась нюлэс доры.
    Нош малы меда, малы тӥ, шуоды,
    Мылкыды
    Ӝытозь ик вал шулдыр?

    Тюрагай

    Пумтэм-йылтэм луд вылын
    Веттаське ю-нянь тулкым.
    Шундыя воринъяське –
    Зарниям кадь адӟиське.

    Вазь ӵукна со тулкыме
    Тюрагай чуак зыме.
    Юэ азвесь лысвуэз –
    Куараез луэ жингрес.

    Лысву весь

    Лысвуос вож вылын
    Пиштыло юг-юг тылын,
    Жиль марӟан кадесь.
    Соосты адӟиз шунды –
    Бичамез потӥз, вылды:
    Пӧрмоз усто весь!

    Быльырась лысву доры
    Сиоссэ лэзиз сэрыт –
    Коштанъяськемез ӧз лу.
    Куар вылысь жиль марӟанэз
    Юнме луиз бичамез –
    Бус луиз лысву.

    Эмезясь

    – Малы, Вани, бамъёсыд
    Луиллям сыӵе ӵыжыт?
    – Жадьыса со сыӵе горд,
    Нюлэскы ветлӥ уго
    Бичаны эмезь.

    – Бен сокем жадид бере,
    Пырыса тыныд доре,
    Ӟеч шутэтсконо.
    Нош ӝытпал ини ваньмы
    Эмезьдэ веръяломы,
    Пичиен ке но.

    – Банкаме ик нуллыса
    Катьтэмми мон, эсьмаса, —
    Кельтӥ тэль куше.
    Пыдэссэ но банкалэсь
    Ӵоксамон ӧвӧл эмезь –
    Бичамон ӧз шедь.

    Кисьмамез, ма, отын трос
    Но бичад ке, со быроз
    Банкаын юнме,
    Паньгалоз отын тач-тач,
    Тӥнь соин сое ӧйлась
    Бичатэк ыме!

    Ӝыт шунды

    Лумбыт ӵоже
    Шунды юг-юг пиштӥз но
    Ӝытпал лэзькиз
    Нюлэс вылэ каллен.

    Ӝыны кылиз,
    Оло нош, вандиӥськиз со,
    Пила выллем,
    Лэчыт пинё тэлен?

    Вуюись

    Тэтчаса пал пыд йылаз,
    Зор кошкиз нюлэс пала.
    Пилемлэн нош бервылаз
    Вуюись ини паля.

    Вуюись – чибор пукыӵ,
    Ньӧлъёсыз – шунды сиос,
    Ву вылэ усем шапык –
    Пуктылэ мишень кругъёс.

    Дыртӥсь пилем

    Ӝытазе бадӟым пилем
    Инбаме огназ кылем.
    Мӧзмыны кутскем бераз
    Ӟеч млпан лыктэм йыраз:

    – Ветлоно ай куное,
    Адӟиськоно шундыен.

    Дыртонъяз нош со пилем
    Кызьы ке янгыш кылем –
    Шунды сиен бышкалскем,
    Бадӟым кӧтсэ пась карем.

    Соин тӥни табере
    Ӝыт жаль-жаль зоре.

    Кин янгыш?

    Витямы ӝыт пал бертӥз –
    Синдурыз лызэктэмын.
    Юамы но – ӵыжектӥз,
    Волегӟи, пе, урамын.

    Нош берат ӧз чида ни,
    Вераз
    Мырдэм кылымон:
    – Ваньмызлы янгыш Вани…
    Со ачиз кутскиз… Нош мон…

    Со ачиз донгиз нырысь,
    Уськытӥз шуак монэ…
    Мон ӧй кутскы… Мон, марым…
    Исаськи гинэ…

    Уин

    Катаос – койка улын,
    Штаниос – пукон вылын,
    Дэрем – шкафе понэмын,
    Картуз – ӵоге ошемын.

    Сэзь ӵукна тани вуоз –
    Павликмы но сайкалоз.
    Та дӥсьёс соку ваньзы
    Шулдырак пумиськозы!

    Сӥзьыл сад

    Гуртэ зарни сӥзьыл, шуо, вуэм,
    Соин, пе, вож садмы ӵуж-ӵуж луэм.
    Мыно ай чалякгес мон сад улэ –
    Адӟем потэ аслам со сӥзьылэз.

    Бен, зэм но, писпуос ӵужектэмын.
    Ачиз но зарниям сӥзьыл кытын?
    Со ӵуж бере, ӵуж писпуос пӧлысь
    Уг адӟиськы, луоз, нырысь-валысь.

    Бусыын

    Сӥзьыл пал мон потӥ бусые –
    Со бушам ни, гыро ни сое.
    Кельтыло бӧрсязы тракторъёс
    Ӵошкытэсь-ӵошкытэсь сьӧд чуръёс.

    Ма сярысь со чуръёс верало,
    Кин меда лыдӟыны валалоз?
    Пальпотӥз мон шоры тракторист:
    – Нянь сярысь со чуръёс, — валэктӥз.

    Шунытэз пулэн уно

    Ужаськом ми шулдырен –
    Вандӥськом люкам пумес.
    Кезьыт тол вуэм бере
    Со шунтоз корка пушмес.

    Шунытэз пулэн уно,
    Туж шырыт солэн сямыз:
    Ай гуре ӧз пыр ке но,
    Шунамы ни, пӧсямы.

    Укноысь экран

    Тол Бабай тӧдьы шуба, дыр,
    Уин возъям укное –
    Уд но кесьы, уд но ванды,
    Уд но ишкалты сое!

    Мӧзмыса чылкак огнам мон
    Шат чус-чус пуком коркан?
    Укнолэн шораз пелляй но –
    Усьтӥськиз пичи экран.

    Телевизорын выллем ик
    Адӟиське отӥ ульча:
    Нискыла Васи, Илья нош
    Куасъёссэ али кутча.

    Салазки ширтэ – Семи со
    Ӝог ваське гурезетӥ.
    Нош кытчы озьы Лариса
    Вамышъя укыр етӥз?

    Киноын шудӥсь муртъёс кадь
    Адӟисько вань эшъёсы.
    Уг, огнам коркан уг пукы –
    Пырисько шудоназы!

    Куасэн

    Бызьылыны ми потӥмы,
    Нош мышкамы куас пытьымы
    Кык рельса кадь кыле.
    Шаплы-шаплы ширтӥськомы
    Чурен, огмы бӧрсьы огмы –
    Трос вагонъёс выллем.

    Капчи гылӟо куасъёс азьлань,
    Но тубоно тани выллань –
    Ӝужыт гурезь баме.
    Я, кин ӝоггес – ӵошатскомы!
    Тубим.
    Жадим.
    Шокаськомы,
    Паровозъёс сямен.

    Выль пальто

    Выль пальто басьтэм бере,
    Кызьы, пе, уд пот кыре!
    Эшъёслы возьматоно,
    Ӧжытак ушъяськоно.

    Дӥсяськиз Мики сэрыт.
    Выль дӥсез кыӵе шуныт!
    Табаре та пальтозэ
    Со нуллоз кык-куинь арзэ.

    Кык-куинь час ортчем бере
    Микимы дораз пыре.
    Малы ке йырыз ошкем,
    Викышъя пияш лушкем.

    – Укыр, — шуэ, — ляб вылэм
    Басмаез та пальтолэн.
    Писпуэ туби-васьки –
    Нош пальто ини кеськиз.

    Анаелы кузьым

    Урамын котыр тӧдь-тӧдь лымы,
    Кезьыт тол отын кузёяське.
    Нош укно дурысь горшокамы
    Вож будос сюйысь ни мычиське.

    Мон ачим сое отчы мерттӥ –
    Сьӧд сюе соги ӵуж кидысэз.
    Арняскын нош кидысэ потӥз,
    Ӵуж ӧвӧл ни – вож луэм быдэс!

    Ву мон киськасько будос вылэ,
    Чидатэк шораз учкылӥсько.
    Оскисько: Тямыс март нуналэ
    Будосэ одно сяськаяськоз!

    Март

    Ыбылэ ни март толэзь
    Пальпотӥсь тусын
    Акылес кезьыт толэз
    Шунды сиосын.

    Тол куазед кужмо ке но,
    Куалектэ, лэся.
    Ожмаськон понна, уно
    Кивалтос дася.

    Липетъёс борды оше
    Ӥӧ ӟузыриос.
    Соосын потоз оже –
    Мартэз бышкалтоз…

    Нош тулыс серекъяса
    Ыбылэ золгес.
    Бӧрдытэ со, эсьмаса,
    Катьтэммем толэз.

    Кытчы гинэ учкисько – букваен пумиськисько

    Агаеным кыкнамы
    Ми улмо бичаськомы.
    Лапеггес мон агайлэсь,
    Нош сузисько вылэгес.
    Кызьы озьы шуоды?
    Мон –
    А выллем тубатын.

    Бызьыса бертӥ но мон,
    Нош ӧсын – бадӟым тунгон.
    Шат йӧнзэ шедьтод солэсь –
    Пырыны монэ уг лэзь
    «Нырысь, — шуэ, — шедьтод тон
    Б буква выллем усьтон».

    Вынылэсь книгаоссэ
    Лыдӟылэ ӵемысь песяй.
    Но векчи букваоссэ
    Шугенгес адӟе, лэся.
    Кияз книга кутыса,
    Гожтэмзэ ке со учкиз,
    Одно поноз синъёсаз
    В буква выллем очки.

    Гурын тыл ӝуа гом-гом,
    Ми туннэ шаньги пыжом.
    Эгырез кыскоз нэнэ
    Г тусо гур суранэн.

    Дыртыса бызе тудву –
    Бызьыны бӧрсяз уд ву.
    Тӧлпоё пыжме вуттӥ,
    Мон лэзё сое вутӥ.
    Со уз выйы мур коже,
    Д буква выллем пыже!

    Ерпечка ик та Вова –
    Мажессэ тӥяз, ява!
    Куинь пиньыз гинэ кылиз –
    Чылкак Е буква выллем.

    Ёртыса монэ выны
    Крокодил суредатӥз.
    Нош ачиз шуиз мыным:
    – Ё буква, лэся, кылдӥз.

    Жу-у-у! Жу-жу! мынам азьтӥм
    Вукарнан лобӟиз-ортчиз.
    Сачокме ӝогак басьтӥ,
    Ярдуре сэрыт тэтчи…
    Вукарнан ӝиптӥськыса
    Сачокам лап-лап кылле.
    Чик ӧвӧл карнан кадь со –
    Ӵапак Ж буква тусо.

    Ӝуй бичаз Ӝакы ӝикыт,
    Ӝогак ӝук пӧзьто, пе, ӝыт.
    Ӝыт Ӝакы ӝуксэ ӝутӥз,
    Ӝогомиз ӝоген ачиз –
    Ӝог ӝуам гураз тылӝу,
    Ӝуаны ӝимем ӝуй ӝук.

    Зурк тэтчо кык такаос
    Огызылы пумит огзы.
    Шорк! гинэ вазё золос
    З буква кадь сюръёссы.

    Ӟукыртэ ӟезьы ӟиры:
    – Ӟигары ини быриз
    Ӟезьыын ӟардэм дырысь
    Ӟечыра ни ӟольгыри.

    Изьытэк пуны кылиз –
    Ӝыт со мурт куара кылӥз.
    Уйбыт куаньгетӥз, утӥз,
    Кузёзэ озьы утиз.
    Инбамын чилектылэ
    Пилемо гужем ӝытэ.

    Ӥ буква тусыз тыллэн,
    Синъёсыз ик мальдытэ.

    Йӧнылэн йылол йӧнтэм,
    Йыдыез тӥни ёртэм:
    – Йыбыртты мон азьын тон
    Йырсазьдэ ик ыштымон!
    Йӧнъяськонъяз кытысь ке
    Йыды лудэ вуэм кеч.
    Йыдылы кылиз эркын –
    Йӧнтэм йӧны йыръемын.
    Кортӵоге гинэ азьло
    Ошемын вал дӥсьёсмы.
    Нош атай шуккиз толон
    Выль ӵогъёс борддорамы.
    Урдсысен котькуд ошет
    Букварьысь К-лы кельше.

    Лэсьтӥз милем атаймы
    Шудон корка
    Садамы.
    Л буква кадь липетсэ
    Буямы чагыр-лызэн.

    Макем трос лэчыт пиньёс
    Пилалэн тыбыр вылаз.
    – Быдэс чур М букваос! –
    Паймыса вераз Мила.

    Натӥлы шуиз Игнат:
    – Йӧндыри мон выль тубат.
    Кык пуӵез ӵогай вамен…
    – Та тубат ке шат?
    Та – Н!

    Олялы туннэ мумиз
    Городысь эгес ваиз.
    Олямы паймиз, ява:
    – Ой, ма быдӟа О буква!

    Ӧчкетӥсь сямо Натӥ
    Мунёлэсь йырзэ чигтӥз.
    Чингыльтӥсь-султӥсь Вани
    Ӧлексы кылиз тани.
    Ӧ буква выллем тусо,
    Шудыны уг мын ни со.

    Пиослэн киосазы
    Конгроесь клюшкаоссы.
    Зол шукко ке шайбаез,
    Торк! пыре со капкае.
    П буква выллем капка
    Шайба пыремлэсь кышка.

    Ручкаен гожъяськыны
    Дышетон понна монэ,
    Р выллем ручка мыным
    Басьтыса ваем нэнэ.

    Сэзь инмын кизилиос
    Уногес, дыр, со сюрслэсь.
    Соосты уйбыт утёз
    С буква тусо толэзь.

    Тулысэд ни матэктэ –
    Уморто ини кулэ.
    Т буква кадь молотэн
    Кортӵогъёс йыгай пулэ.

    Ужамысь агай бертоз –
    Мыномы чорыганы.
    Мон дасяй У кадь ӵогъёс
    Визнан ньӧрмес пыкыны.

    Физзарядка лэсьтыны
    Ӧдъяськом ке выныным,
    Кускамы кутӥськиськом,
    Синучкон пыр учкиськом –
    Ф буква кадь адскиськом.

    Халатлы анай вандэ
    Ӝӧк вылын чебер басма.
    Нош качы мыным потэ
    Х буква кадь ик, эсьма.

    Циркысен адӟем слонэз
    Дорысен мон суредай.
    Суредме учкиз нэнэ:
    – Ц буква-а, мар-а та?
    – Тон ӧд вала, шуисько, —
    Йырчукин учкид уго.

    Чукинтыса пыд ласянь
    Пукты ай та пуконэз –
    Ч буква луоз азяд,
    Учкид ке шораз урдэс.

    Ӵогырес ӵышкем ӵушъял
    Ӵыжинэз ӵыжиз ӵук пал.
    Ӵабъяськись ӵыжин питраз –
    Ӵемтӥз ӵӧжлэн пыд бордаз.
    Ӵуж пыдзэ ӵӧж янгышен
    Ӵабтӥз ӵогрес ӵыжинэн.

    Шур дурын сылэ зурод,
    Нуоно гидэ куро.
    Мон кутӥ ваё саник –
    Ш буква кадь со тани.

    Щёткалэн кадь ӵогырес
    Та буквалэн вылтырыз.
    Щёткалэсь висъян понна,
    Купыртэм быжыз вань на.
    Шыр пичи ке но йыръем,
    Книгаез бадӟым йыръем.
    Уть, тӥни кыӵе йӧнтэм,
    Ваньбурез со изъянтэм.

    Ыжъёсме ваи гуртэ –
    Сюломе куштӥ сэргы.
    Бодыме понӥ артэ…
    Ма буква пӧрмиз ай? –
    Ы!
    Вай доры Лена сузе
    Палэзьлэсь льӧль весь сузье.
    Ӵыж-ӵыж пиштоз мӧлявыл,
    Весез угось ӵыжак выль.

    Эктыса кадь гопъёстӥ
    Уробо туж ӝог потӥз.
    Одӥгез нош питранэз
    Тӥяськиз но луиз Э.

    Юн керттӥм эгес борды
    Ми вакчи гинэ боды.
    Учкыса огпалласянь
    Ю буква кылдӥз азям.

    Яши суредам эгес,
    Кык пыдо со малы ке.
    Йыг-йыг гинэ вамышъя…
    – Шат ӧд тодмалэ?
    Со – Я!

    Чимась но пегӟись

    – Икча-кукча, кучапи,
    Тон утчась, нош мон – пегӟи!
    Тон шедьтӥд ке монэ ӝог,
    Мон ватско соку эшшо.

    Мар паймид?
    Тыныд одно
    Усто пуны луоно!
    Тэльысь коткыӵе дыре

    Мед шедьтод тон пӧйшурез.
    Вот соин ки тон – чимась.
    Я бен утча!
    – Гав! Мон дась!

    Выль нунал вордскыку

    Чортӥз атас,
    Кисьтӥз ӵукна гурзэ –
    Гуртмы сайказ,
    Усьтӥз ӵуж синъёссэ.

    Нош муръёос,
    Песятайёс сямен,
    Ӵын юбоос
    Ӝуто ини инме.

    Вазиз капка –
    Ӟазрес на куараез,
    Ӧвӧл на кадь
    Сайкиськемын уммез.

    Ӟукыр! каре
    Пыдъёс улын лымы.
    Турлы гурен
    Вордске выль нуналмы.

    Турлы ужъёс
    Витё ни котькинэ.
    Я вай, эшъёс,
    Лэсьтом ӟечсэ гинэ!

    Сяськаос но кык эшъёс

    Ченгешо кык пияшъёс:
    – Ку тынад кӧтыд тыроз?!
    Ма мында сяська тӥяд,
    Уть, уг тэры ни кияд!

    – Нош ачид азьтэмъяськид.
    Тэк калгид но – вожъяськид?
    Коркамес мон шулдырто,
    Тон нош буш киын бертод!

    – Сяськатэк бертӥ ке но,
    Тэльысьсэ адӟем дуно.
    Нош тынад тугокоед
    Ӵуказе луоз кыед…

    Лыктӥзы тэле пиос,
    Нош малы вогъё соос?
    Кудзы ке янгыш, вылды…
    Кызьы тӥ малпаськоды?

    Куакаос но шырчик

    Вуизы сьӧд куакаос,
    Кесясько чырмыт:
    – Кар-р! Кар!
    Мар карод – кулэ уго
    Лэсьтыны ӝоггес выль кар.

    Нош шырчик тани лоба:
    – Фьюить! Фьюить! –
    Мылкыд капчи.
    Солэн карез дась уга,
    Тыршонэз ӧвӧл ни чик!

    Зорон азьын

    Ӧй но шӧд мон, кызьы вань улос
    Нуназе ик луэм ӝомалэс.
    Ма мында лусьтроесь такаос
    Быдэсак возъяллям инбамез!

    Нош така,
    Тодскоды асьтэос,
    Сямыныз луэ котьку но лек.
    Шат кудӥз ке така чидалоз,
    Мукетсэ такаез лексьытэк?

    Инбамысь такаос но озьы –
    Ваче сюр дыбыр-шорк! мырӟисько.
    Лекасько…
    Нош сюръёсысьтызы
    Югак тыл пырыос пазьгисько.

    Ушъяськон но кышъяськон

    Лусьтроесь луиллям пилемъёс –
    Тӧл кесям жалятэк соосты.
    Кин меда табере кышъялоз,
    Кин ваче бырттылоз ваньзэсты?

    – Мон вуро! –
    Черектӥз гудыри. –
    Шерыса ни дасяй тыл веньме!
    Урмыса кадь ужаз, ӝог вуриз,
    Тыршемез нош луиз кадь юнме.

    Дыртыса выронъяз, тросэтӥ
    Пасьяллям со ваньзэ пилемез.
    Табере ини со пасьёстӥ
    Жаль! вия пилемлэн зор вуэз.

    Гудыри но инбам

    Шузимем кадь тачыртӥз
    Урмем гудыри.
    Пильыны, дыр, со турттӥз
    Инбамез шори.

    Но ӧз сетӥськы инбам.
    Гудыри чигназ,
    Тэль сьӧры кошкиз ӝыт пал,
    Ӟурыса понназ.

    Ин ӧз сётскы…
    Юн сямзэ
    Данъяса солэсь,
    Гадь вылаз медаль музэн
    Ворекъя толэзь.

    Кытын улэ шумпотон

    – Кытын улэ шумпотон?
    – Мон уг тодӥськы.
    Нош тон?
    – Тодысал ке,
    Мыныса
    Быдэс куды вайысал.
    Эх, улысал соку мон,
    Ваньмызлы вожъяськымон!

    – Мон нош со шумпотонэз
    Вайысал
    Эшшо тросгес…
    – Тон, иське, сыӵе аксым?
    – Трос уг кельты мон аслым.
    Тон ӧд вала но, оло? –
    Эшъёсылы
    Люкыло!

    Кытысь – маин?

    Нюлэскы – кудыен,
    Нюлэскысь – губиен.
    Шур дуре – визнанэн,
    Шур дурысь – чорыген.
    Тэль куше – сарваен,
    Тэль кушысь – узыен.
    Походэ – рюкзакен,
    Походысь –
    Кырӟанэн!

    Ошмес

    Мыкырски
    Ошмес вадьсы чусак.
    Учкисько но –
    Паймымон мыным:
    Ошмес син учке.
    Учке туж сак
    Мон шоры
    Аслам синъёсыным.

    Вуюись

    Зор кошкиз но,
    Чибор тылъёсын
    Ворекъя ни карнан
    Гурт вадьсын.
    Нош ведра интые
    Со пумын
    Тэль дурысь тыметмы
    Ошемын.

    Сураськиллям ке шат?

    Бакчаос сьӧрти огсыр
    Шур бызе читыр-чутыр.
    Со кузя нош кыстӥське
    Луд сюрес уно иськем.

    Лазега пӧсен шур кож,
    Бен соин вуэз но пож.
    Нош сюрес вылын тузон,
    Со но ӵап шур ву тусо.

    Уяло шурын ӵӧжъёс,
    с но татын трос.
    Курегъёс нош малы бен
    Пыласько на тузонэн?

    Вуизы шат шур дуре,
    Ӟигарзы чылкак бырем?
    Оло, нош сураськиллям,
    Сюресэз шур кожаллям?

    Азбарын-футбол

    Шудӥськом лулысь-сюлмысь,
    Азбарын – футбол!
    Кин меда ни пӧлысь
    Пыртоз нырысь гол?
    Тупмес туж кужмо лэзи
    Мон капка пала!
    Нош малы жинграк вазиз
    Укно пияла?,,

    Эх, одно ик мон туннэ
    Пыртысал ай гол…
    Азбарын –
    Чал-чал гинэ. Пегӟемын футбол!

    Дыше ини

    Велосипедэн ворттылыны
    Лумбыт дышетске ини эше.
    Ветлыны, ӧйтӧд…
    Усьылыны
    Со ини умой-умой дыше.

    Кисьмам куаръес

    Сӥзьыл садэ
    Потӥм ми эшеным
    Паймытскыса.
    Эше шуэ мыным:
    – Писпу куаръёс
    Ӵуж-горд ни луиллям,
    Ежесь ӧвӧл ни –
    Ваньзы кисьмаллям.

    Гужем гужаны кутскыку

    Туж шуныт на куазь, шулдыр,
    Шундыед пиштэ сюлмысь.
    Ай уг вера на номыр
    Гужемлэн пумыз сярысь.

    Сӥзьылозь кема на, дыр.
    Но адӟи, кызьы ӵуж куар
    Чонари вотэс борды
    Ошиськем но зыл-л лэйка.

    Мон соку тӥни валай:
    Гужемед ини гужа.
    Улонзэ возе на ай
    Туж векчи гинэ нюжа.

    Возь

    Вжик! гинэ
    Вазе лэчыт кусо.
    Турнаса возез быдтэ ни со.
    Син куспын
    Возь выл, ява, кыле
    Ӵышкем йыр выллем,
    Чылкак пилеш.
    Ма угось
    Сыӵе кузь йырсиен
    Чиданы луоз шат
    Пӧсь куазен?
    Нош кылиз ке
    Пилеш йыр тусо,
    Туж пӧсен но .

    Котме-а ӟазег?

    Туннэ кызь пол, оло, мон
    Пыласькисько ни, дыр.
    Вылтырысьтым пигон но
    Пуке ини пештыр.

    Чылкак ӟазег вылтыр кадь
    Луиз ини куэ.
    Озьы ке но, пыро на
    Эшшо огпол вуэ.

    Ӟазег, шуо, котьку но
    Вуысь потэ кӧсэн.
    Тани ӝоген тодо мон,
    Пӧян со яке зэм…

    Урамысен эшъёс нош
    Каро монэ серем:
    – Бен малы бӧрдӥськод тон,
    Котмем курег выллем?!

    Пӧсьтолэзь

    Туж кема ини куазь
    Чидантэм пӧсь сылэ.
    Ю бусы кемалась
    Пумыса кадь улэ.

    Пилемъёс нош ӧвӧл,
    Зор уг вуы ялан…
    Но тани ыркыт тӧл
    Шокыштӥз тэль палась.

    Зор кисьтӥз шулдырен,
    Вань улос кадь выльмиз.
    Мугорыз бусылэн
    Эзылаз, кисальмиз.

    Толэзьысь ныл

    Толэзьысь чебер егит нылэз
    Вань-а адӟемды?
    Пельпумаз – карнан…
    Сылэ, сылэ…
    Туж мӧзме, вылды.

    Со угось отын улэ-вылэ
    Одӥгназ дымбыр.
    Учкыса нош музъеммы вылэ
    Бӧрдылэ но, дыр…

    Куараез гинэ со нылашлэн
    Музъемозь уг ву…
    Нош кытысь ӵукна
    Турын вылэ
    Усьылэ лысву?..

    Шунды но мон

    Лумбыт зол ужаз шунды
    Пиштыса-серекъяса.
    Нош ӝыт пал жадиз, вылды,
    Кӧлэмез потэм, лэся.

    Усиське ни со умме,
    Кынисько ни синъёсыз,
    Ланьырске ини пумен
    Небыт тэль вылэ йырыз.

    Мон но выдо ини, дыр, —
    Ӵуказе уже туж трос.
    Вазь ӵукна монэ шунды
    Пальпотыса сайкатоз.

    Ассэ эскере

    Гурт вӧзтӥ огсыр бызись
    Пичигес гинэ шурмы
    Куддыръя луэ шумприч –
    Кужымзэ поттэ чырмыт.

    Погылське тулкымъёсын,
    Пазяське тӧдь шукыен,
    Шып уясь тылыосыз
    Яр борды но шуккылэ.

    Со лазег, сюбег на ай,
    Но ортчоз уно иськем…
    Зарезе вуон понна,
    Со али ик дасяське.

    Эскере ассэ ачиз,
    Мерта озьы кужымзэ.
    Но ум кышкаське ми чик –
    Валаськом уго сямзэ.

    Мӧзмыт мыным

    Тӥляд вань-а дорады
    Песяйды, песятайды?
    Нош мынам тани – ӧвӧл.
    Соостэк, шуо, вӧл-вӧл.

    Бен, квартирамы пушкын
    Ваньмылы милем эркын,
    Быдэн комнатамы вань –
    Коть тон пук,
    Коть выд гань-гань.
    Анае но мынам ӟеч,
    Атае но мынам ӟеч…
    Но малы ке но мылкыд
    Ӵем дыръя луэ мӧзмыт.

    Мон кема меда тазьы
    Жум пуко корка азьын?
    Мед ӝоггес ни вуоз вал
    Мӧзмонлэсь мозмон нунал!

    Кучапи

    Кучапи туннэ мыным
    Атае басьтоз.
    Мон солы ас киыным
    Чебер кар лэсьто.

    Кар пушсэ котьку но мон
    Возё сузяса.
    Бен, кароз монэ сюлмо
    Кучай, эсьмаса.

    Ужаны кутско тани
    Косытэк гинэ.
    Мон, анай, пото ини,
    Дӥся ай монэ!

    Эшелы гожтэт

    Мон гожтэт гожтӥсько.
    Эшелы.
    Нырысьсэ.
    Син азям пуктӥсько
    Солэсь шумпотонзэ.

    Верасько гожтэтам
    Улэмме-вылэмме:
    Ма адӟи уйвӧтам,
    Нискылтӥ кудкеме.

    Пуныме ку сюдӥ,
    Кин мынам песяе…

    Гожтэтме мон вуттӥ –
    Нуисько почтае!
    Мон одно ик тодо,
    Ку вуоз гожтэтэ –
    Эшеным ми уго
    Улӥськом но
    Артэ!

    Тодӥсько кин луонме

    Ми палан эшшо огзэ
    Пукто выль ӝужыт корка.
    Нуйтыса кузь чыртызэ,
    Кран солэн вадьсаз берга.

    Со адямилы юрттэ –
    Ӝог ӝутэ кирпич, бетон…
    Ведь крантэк ӝужыт юртэз
    Нокызьы
    Уд пукты тон!

    Мон, быдтӥ ке школаме,
    Малпаса уг улы чик.
    Тодӥсько кин луонме –
    Луо одно
    Крановщик!

    Сылал сиыса

    Песятай индылэ весь монэ:
    –Пиёке, тон ай чылкак юмал.
    Валаны понна та улонэз
    Сиёно на тыныд
    Пуд сылал!

    Мон уг валаськы –
    Малы сылал?
    Со визез шат трослы будэтэ?
    Песятай нош:
    – Юмал на, юмал… —
    Малы ке лушкемак палпотэ.

    Пызьнасько сылалэз сиёнам
    Данаклы уногес азьлолэсь.
    Йырвизьмы нош йылэ-а мынам? –
    Малы ке но
    Уг шӧдӥськы весь.

    Бӧрдгазет

    Классамы юр-яр! вазе –
    Ошемын выль бордгазет.
    Тумошо суредъёсын
    Кыкчиос возьматэмын.

    Тани соос лыдӟизы –
    Тёп-тёп вия синвузы.
    Тӥни сыӵе бордгазет.
    Шонергес ке –
    Бӧрдгазет.

    Пӧрмостэм дурбасьтӥсь

    Буш кылиз ю бусы,
    Юзырес-мӧзмылэс.
    Вылтыраз кынмыса
    Пежырскем пигонэз.

    Шунтыны шуыса
    Ӟыгыртэм сое тэль,
    Нош ачиз но кынмем,
    Шунытэз тырмымтэ.

    Пӧрмостэм дурбасьтӥсь –
    Юзмылэс сӥзьыл тэль.
    Ваозьдаськем со ачиз –
    Ӵыжектэм-гордэктэм

    Школае мынэ Вани

    Школае мынэ Вани,
    Ванимы бадӟым ини.
    Сумкаез но тани вань,
    Йыг-йыг вамышъя Иван.


    Ӧчкарем кадь – волегӟиз,
    Ымдурзэ уллань ошиз.
    Синвузэ кисьтэ Вани:
    – Школае уг мыны ни-и-и…

    Атаез нош буйгатӥз:
    – Я бен мисьтӥськы етӥз.
    Эшъёсыд утчалозы,
    Бӧрдэмдэ валалозы.
    …Школае мынэ Вани,
    Ванимы бадӟым ини…

    Лымы шортлэсь дэра

    Туж уно мамык выллем
    Бусыын лымы кылле.
    Малы так кылле ай со? –
    Мамыклэсь ведь шорт черсо.

    Кин кутскоз та уж борды?
    – Мон! – вазиз Тулыс шулдыр.
    Шундылэн сиосыныз
    Со черсэ жингрес сӥньыс.

    Сӥньысэз жильыр! вазе,
    Ӧръяське, азьлань бызе.
    тӥяз нош со пыре
    Паськыт куиськон ӧре.

    Тӧдьы мамык кыдыра,
    Нош пӧрме пурысь дэра.

    Выль ӵукналы оскыса

    Яркыт тылын
    Гомӟиз вордскись нунал.
    Ӟырдыт ӝуаз,
    Шунтӥз со котькинэ.
    Нош югытэз
    Пумен бездӥз ӝыт пал –
    Эгыр выллем
    Пиштэ на горд гинэ.
    Берат луиз
    Кысэм эгыр кадь сьӧд.
    Юзмыт уе
    Выиз котыр улос.
    Адямиос адӟо ини
    Уйвӧт,
    Но весь оско:
    Вылез ӵукна вуоз!

    Малы бӧрдӥз лымы мунё

    Шундыед, эсьма, мыня ук –
    Ерпечка выллем шудэ.
    Азбарысь лымы мунё нош
    Малы ке тёп-тёп бӧрдэ.

    Каньсырам, чылкак жуммем со,
    Ошиськем кешыр нырыз.
    ӧня ке нунал сылӥз но –
    Шуназ-быриз мугорыз.

    Бервылаз номыр ӧз кыльы,
    Лошъяське кешыр гинэ…
    Учкисько но –
    Иньбамын ни Мунёмы уя туннэ!

    Оштолэзь

    Лек толэд ай кужмо на зэмзэ –
    Ӟар поттэ ӟузыри пиньёссэ.
    Малпанэз но ӧвӧл на солэн
    улыслы сётскыны каньылэн.

    Ай чигтоз на ошлэсь со сюрзэ,
    Инбамысь тӧдьы шорт но черсэ.
    Шур вылын но ай юн йӧ дурет,
    Бусыын валемын зӧк шобрет…

    Но мерске, мытылэ ни тулыс.
    Исаса жумдыре лек толэз.
    Бичатӥсь сиеныз шундылэн
    Толлэсь йӧ пиньёссэ чигтылэ.

    Малы мон ӧй кынмы?

    Урамын шудо вань эшъёсы.
    Кытын пальтое, сапегъёсы?
    Сьӧд воротнико лыз пальтоме
    Дӥсяса потӥ мон ураме.

    Бызьылӥ, шудӥ эшъёсыным.
    Куазь шуныт потӥз мыным –
    Ма, воротнике вылэ вылез
    Воротник кылдэм – тӧдь-тӧдьыез!

    Гурезьын луэм учыр

    Куасъёсме кутчай но – гурезе!
    Мон бӧрсьы Ондӥ пудэн бызе.
    Куас солы ӧвӧл на басьтӥллям,
    Нош вужзэ Ондӥ чигтӥз валлян.

    Эх, нискыласько ук, эсьмаса!
    Нош Ондӥ сылэ вожъяськыса.
    Валасько мон мылкыдзэ солэсь –
    Со куастэк ук. Ма солы гурезь…

    Ӝогак пертчылӥ мон куасъёсме:
    – Онд тон но нискыла ни, ме!
    Нош эше гурезь уллань ширтӥз,
    Питыраз но – куасъёсме чигтӥз.

    Ма карод на – бертӥськом доре…
    Малы ке но чик уг пот пырем…
    – Я, тырмоз, — буйгатӥсько асме, —
    Мон ачим тӥяй ук куасъёсме!

    Кыл вӧзы кыл

    Эшъёсын ми трос кузя
    Васькиськом ульча кузя.
    Вуимы Коли пала,
    Со нош картошка пала.

    ***

    Шур вамен лэсьтӥм выль выж,
    Мын ни, сопал яре выж!

    ***

    Я, Пети, тэк эн пукы,
    Адӟиськод, выиз пукы!

    ***

    Пегӟиз кузь гоно пуны –
    Йырсиме, пе, эн пуны.

    ***

    Потыса ыбес пыртӥ,
    Бакчае мон ву пыртӥ.

    ***

    Нинамы тырше на весь
    Палэзьлэсь сузье со весь.

    ***

    Ноль, одӥг, кык, куинь, ньыль, вить
    – Мон пото ини, уг вить!

    Шунды сайка серекъяса

    Шунды сайка серекъяса,
    Шурын миське со ымнырзэ,
    Бус ӵушконэн ӵушиськыса,
    Ӵем тэль борды сына йырзэ.

    Лумбыт ӵоже со туж уно
    Пальышаса пиштэ-ужа.
    Ӝыт выдыкуз, жаде ке но,
    Тусаз луэ серем нюжа.

    Учкыса быдтӥ

    Мон сайкай –
    Усьтӥ синме,
    Сайкамме
    Шӧдӥз песяй.
    Со шуэ:
    – Арня туннэ,
    Вазь эн султы,
    Изь на ай.

    Шуисько:
    – Арня ке но,
    Чик уг пот ни
    Иземе –
    Учкыса быдтӥ ни
    Мон
    Ваньзэ-ваньзэ
    Вӧтъёсме!

    Бадӟым ӵукна

    Сыӵе бадӟым,
    Сыӵе эркын –
    Ӵукна!
    Нокызьы но
    Уг тэр со
    Укное.
    Сое быдэсаксэ
    Адӟон понна,
    Ӝогак ни
    Потӥсько мон
    Ульчае.
    Сэзесь киосыныз
    Монэ ӵукна,
    Шумпотыса кадь,
    Ӝик-ӝик
    Ӟыгыръя.
    Кырын омыр
    Пезь-пезь
    Юзмыт ке но,
    Быдэс гадьпуш
    Шуна
    Таӵе дыръя!

    Уйвӧтысь трамвай

    Вот вӧтай ке мон, вӧтай –
    Гуртамы вуэм трамвай!
    Со монэн ӟечбуръяськиз,
    Туж ӝожмыт
    шорам учкиз.

    Акыльтӥ, пе, городын –
    Шоканы ик шуг отын.
    Ӝужыт из юртъёс пӧлын
    Пытсаськиз, шуэ, лулы.

    Кошкимы ӵош
    возь вылэ,
    Эшъяським отын валэн,
    Бызьылӥм, шудӥм артэ,
    Бичамы сяська керттэт.

    Мон ӵукна шуак сайкай
    Ӧвӧл нокыӵе трамвай.
    Ӧй но вал со.
    Но уин
    Пумисько мон нош соин!

    Шундыё шыд

    Шыд пӧзьтӥз мыным анай,
    Нош мынам уг пот сием.
    Ӧжытак пуко на ай,
    Мон учко ай укное.

    Пилемъёс инмын – тыраз,
    Нош огез валлы укша.
    Со ӧте монэ дораз:
    – Ӵошен ворттылом ке шат?

    Пуксьыса со вал вылэ,
    Ӝог вуи мон инбаме,
    Сиосыз юг шундылэн
    Мальдыто ни синъёсме.

    Вазиське шунды лякыт,
    Куараез солэн ненег:
    – Шыд ӝутӥ ни мон тыныд,
    Сӥялоз, эн пукы тэк!

    Толсур уй

    Сьӧд инметӥ
    Калго кезьыт тӧлъёс –
    Инсьӧр дунне
    Быдэс ни йӧӟектэм.
    Дырекъяло,
    Кынмо кизилиос,
    Кудӥз-огез
    Усё чиптэм-чаптэм.

    Быдэс уез
    Зыгыр куалекъяса,
    Соос ортчытозы ни
    Табере.
    Юг толэзез
    Шуныт, дыр, кожаса,
    Юнме ӝиптӥськозы
    Со котыре.

    Вуоз ӵукна –
    Шунды но ӝужалоз.
    Туж пӧсь ӧвӧл ке но ни
    Тол шунды,
    Кизилиос понна
    Пӧсез тырмоз –
    Шунтоз но сылмытоз со
    Ваньзэсты!

    Уллане но выллане

    Ыбиськем кадь ширтӥмы
    Куасъёсын ми уллане.
    Пытьымы нош, пытьымы –
    Пукыӵ ньӧл кадь ик шонер!

    Нош выллань тубыкумы,
    Со ини шонер ӧй вал.
    Туж каллен мы-нӥсь-ко-мы –
    Куасъёсмы кошко шер-вай.

    Пыжем пилемъёс

    Митя шуэ:
    – Кезьыт дыръя
    Пилемъёсыз
    Пыжо гурын.
    Ма, тӥни ук
    Котькуд муръё
    Инме лэзе
    Бугыр нап ӵын.
    … Ӧй вала мон
    Нырысь-валысь,
    Учки шораз
    Паймем выллем.
    Нош со:
    – Нап ӵын потэ гурысь,
    Инме тубе –
    Луэ пилем!

    Ӟырт кезьытэн

    Кыре ик потыны, ява,
    Уд дӥсьты –
    Вань улосэз
    Дурем ни ӟырт кезьыт.
    Тӥни корка но,
    Зол кынмемысьтыз, дыр,
    Йыраз изьям
    Бадӟым тӧдьы изьы.

    Куасъёссы сётскиллям

    Толалтэ мон
    Нуналлы быдэ
    Поталляй куасэн
    Паськыт лудэ.
    Табере тани
    Кӧня нунал
    Куасъёсы
    Сыло ини чал-чал.

    Урдэмын соос
    Корказь бере.
    Ма карод на –
    Лымыед быре.
    Тулыслы сётӥськыса
    Выллем,
    Киоссэс
    Куасъёс ни
    Урдӥллям.

    Лызэн ӵуж сураськыса

    Тулыс пал
    Инбам луиз
    Лыз-лыз.
    Яркыт-ӵуж шунды
    Пиштэ дол-дол.
    Нош лызэн
    Ӵужзэ буёлъёсыз
    Сураса
    Пӧрме, пе,
    Вож буёл.
    Вот соин, дыр,
    Сьӧд-пурысь
    Дунне
    Вож дӥсьсэ
    Мерта ини
    Туннэ.

    Малы лымы луэм пурысь

    Тулыс лудын
    Лымы луэм
    Пурысь.
    Дэри пыдын
    Сое
    Шат лёгаллям?
    Тӧдь-тӧдь вал со.
    Али нош малы –
    Кырсь?
    Жаль зор сое
    Миськиз вал ук
    Валлян?!

    Ужпи-зор

    Кытысь ке,
    Ужпи музэн,
    Ворттыса кадь
    Вуиз зор.
    Кисьтыса
    Кельтӥз вузэ,
    Ӝог вуиз –
    Кошкиз но зол.

    Со дыртӥз
    Мукет гуртэ,
    Тэль сьӧртӥ
    Ини мынэ.
    Тэль вадьсын нош
    Югыртэ
    Чибор
    Букоез гинэ.

    Ӧжыт кӧсгес

    Куазь жаль-жаль зоре ке но,
    Пукеме коркан уг пот.
    Потоно ай, учконо,
    Кыӵе-мар ни со – зор-кот…

    Чум-чум пукись зор вуэз
    Эскеро ай, куд мурда,
    Сапегелэн кунчиез
    Со пушкы ышоз меда?

    Дэриез но лёгаса
    Утчано пичи ке но,
    Чур вуэз уйылыса,
    Ӧжытак бызьылоно.

    Эскери, тодӥ, валай –
    Зор вылэм зэмзэ ик кот.
    Нош пырем берам анай
    Мон шоры учке урод:

    – Нош ик-а колад вуэз?
    Суч-суч кот, дыр, пыдъёсыд!
    Шуисько:
    – Зэмзэ, котгес
    Ӧжытак сапегъёсы.
    Но, марым, ӧжыт кӧсгес
    Штание, носкиосы…

    Курыт бам

    Книжкаез шып учкыса
    Пуке пичи Лариса.
    Книгаяз солэн туж трос
    Турлы-турлы суредъёс.

    Улмоос ӵыж-ӵыжытэсь,
    Сьӧд сутэр, льӧль-горд эмезь…
    Нош таиз жалем кешыр –
    Пинь улын вазе куажыр…

    Книжкаысь огзэ бамез
    Лариса пытсаз ӝоггес.
    Мон юай:
    – Малы-о тон?..
    – Фу! Отын курыт сугон!

    Буд, ӵушъялэ!

    Ӵушъялэз мон учкисько –
    Ӵушъялэз мон жалясько:
    Уд но маялля сое,
    Уд но веша тон сое…

    Бордаз йӧтскытэк гинэ
    Лӥятод:
    – Муспотонэ,
    Мон тыныд валес валё,
    Тэркыяд поно лёлё.
    Си но буд, вень комоке,
    Нош гужем лэзё сике!

    Пукись вуос но зор

    Толон гинэ
    Зориз золос,
    Туннэ но
    Кыдыра.
    Кырсёмемын
    Пукись вуос,
    Ымныръёссы –
    Шадра.

    Инмысь виясь
    Чылкыт зор ву
    Гылтэ
    Ымныръёссэс.
    Но тусбуйзы
    Чылкыт уг лу –
    Луэ эшшо кырсьгес.

    Жугиським — эшъяським

    Обидиз Петя
    Монэ толон.
    Нош валлян
    Ассэ жуги вал мон.
    Вот соин ик
    Туннэ кыкнамы
    Туж матысь эшъёс
    Ми луимы!

    Зоро нуналэ

    Туннэ тани
    Выльысь жаль-жаль зориз,
    Сучырмемын ини
    Будэс улос.
    Сюрес вылын
    Сачыр вазе дэри,
    Ортчылыку отӥ
    Машинаос.

    Пазьгиськылэ дэри
    Питран улысь,
    Ӧд лу ке сак –
    Бырод паньсаськыса.
    Дӥсед луоз
    Сучыр-сучыр но кырсь –
    Кытын на, пе,
    Чаляк гинэ кӧсан!

    Анай нош:
    Тышкаське ни со понна:
    – Ма, кызьы ветлӥськод тон,
    Албасты!
    Вуэн тырмытэмын ини
    Ванна,
    Миськон понна
    Ваньзэ кырсь дӥсьёсты.

    Понназ ялан
    Пыкыласа монэ,
    Анай кырсь дӥськутме
    Вуэ месэ.
    Ачиз нош,
    Валантэм улсын гинэ,
    Шукыяськись
    Майтал вуэ понэ
    Аслэсьтыззэ но
    Дэриӟем дӥсьсэ.

    Лифт

    Туж усто арбери ук со –
    Лифт:
    Васькытэ, тубытэ…
    Со пушкы пырытэк ке кылид,
    Лыдъялод тубатэз.

    Школаысь ке нош мон вуисько,
    Дугдытэк лифт ужа:
    Тубисько-васькисько-тубисько
    Кыкетӥ этажам.

    Инбамлы матэгес

    Жадемме
    Атай валаз –
    Лӧб ӝутӥз
    Пельпум вылаз.
    Табере вот
    Инбамез
    Мон учко
    Матысенгес!

    Ваньдылы люкыло!

    – Я, эн ӝегатэ монэ
    Дыртӥсько магазинэ!
    Шат уд тодске на, оло, –
    НОТКЕРЕС, пе, вузало.
    Нош аслам потэ серем,
    Ватскисько корка бере.
    Учкисько, макем шаплы
    Весь ваньзы бызё вузлы.
    Но тани вуо берен,
    Ымнырзы нош – кунэрес.
    Урдскизы мыным пумит:
    – Со вуздэ ӧм шедьтэ ми!
    Мон нош:
    – Ваньдылы сое
    Люкыло ай пичиен,
    Со понна уг кур коньдон:
    НОТКЕРЕС – со
    СЕРЕКТОН!

    Кӧмтэм книга

    Ай толон
    Колимылэн
    Книжкаез
    Ӵыж-выль вылэм.
    Нош туннэ

    Кӧмтэм ни со –
    Кылем
    Одӥг пушкесо.

    Кулэ ӧвӧл автомат

    Вань мынам автоматэ –
    Гумытӥз тылыз потэ!
    Куараез вазе тачыр,
    Кышкатэ ваньзэ котыр.

    Кутыса автоматме
    Потӥсько ке ураме,
    Шуэрско вань эшъёсы,
    Ӝог кошко доръёсазы.

    Урамын оген – вӧл-вӧл!
    Но, марым,
    Шулдыр ӧвӧл…
    Эх!
    Куштӥ автоматме!
    Чале –
    Ӵош ик шудоме!

    Суред

    Суредасько мон городэз –
    Ӝужыт юртъёс, машинаос…
    Тани татын вань заводэз,
    Отын андан пӧзьто, пе, трос.

    Муръёысьтыз со заводлэн
    Нап ӵын ӝутске бугыр-бугыр.
    Мон тодӥсько: андан кулэ.
    Нош кырсёме ӵынэн
    Омыр!

    Азьлантӥсько мон суредме –
    Пӧрмиз тани бадӟым завод.
    Ӝужыт муръё учке инме,
    Но нап ӵыныз
    Отысь
    Уг пот!

    Кыдёкысь эше сярысь

    Космосын но, пе, улон вань –
    Паймымон ке паймымон!
    Пал синмын коть адӟоно вал,
    Лобысал кадь отчы мон.

    Мурт планетаысь кинэ ке
    Шуак ке пумитасал,
    Оскисько: соин одно ик
    Пыраклы эшъяськысал!

    Эшелы мон жалятэк ик
    Сётысал ни котьмаме:
    Яблокме но, великме но,
    Кучайме, конфетъёсме…

    Пунэмзэ эше мыным но
    Кузьмасал шудонъёссэ…
    Котьма шу но, одно, одно
    Лобало мон космосэ!

    Эшъёсы мынам татын
    Ваньзы ик бен умоесь.
    Мурт планетаысь эше нош
    Кырмышъя, ӧте кадь весь.

    Мыным кышкыт ӧвӧл

    Укыр бадӟым бӧчы сямен
    Мыйыкъёссэ выретыса
    Потэ троллейбус ураме,
    Дыртэ ни со ас удысаз.

    Бызэтыса бызе шӧртчи,
    Мыйыкъёсыз тачыр каро…
    Мыным кышкыт ӧвӧл со чик –
    Дугдӥз ке,
    Мон пушказ пыро!

    Майбыр нумыр

    Улмолэн пушказ –
    Нумыр.
    Улэмез солэн
    Майбыр:
    Коркаез но –
    Вож улмо,
    Сиёнэз но – вож улмо.

    Бусы возьма

    Кысык вакыт со – аран дыр,
    Ю бусыын соку шулдыр:
    Машинаос но комбайнъёс
    Кисьто татын турлы гуръёс.

    Нош тракторез Кузьмагайлэн
    Малы меда чус-чус сылэ?
    Трактористэз шонтӥз кизэ:
    – Солы висён йӧтэм – кызэ…

    Со корт валзэ люктаз, вӧяз,
    Мылысь-кыдысь сое эмъяз.
    Вуттӥз. Шуиз Кузьма агай:
    – Бурмид-а бен, учком ни ай.

    Трактор нырысь вазиз вуӵыр,
    Ӵоксузьыса поттӥз сьӧд ӵын,
    Кизьнӥз, кызйиз на кӧня ке –
    Корт ньылонзэ сузяз, шӧдске.

    Нош собере огсыр гурен
    Ширтӥз со нош удыс дуре.
    Кизэ шоназ милем Кузьма:
    – Я ӟеч! Монэ бусы возьма!

    Куноын

    Куноын бен
    Усто ик улон!
    Кузёос шуо:
    – Лу дорад кадь!
    Сиёнъёс но
    Кылдэ ик ньылод,
    Алӥсез но ӧвӧл –
    Котьма кар…

    Туж умой куноын…
    Но, марым,
    Бертыны мон
    Али ик ни дась.
    Кемалась-а кошки вал
    Дорысь?
    Бен, толон…
    Ой, кыӵе кемалась!

    Бертон понна

    Сӥзьыл – кошко,
    Тулыс – берто
    Бурдо юлтошъёсмы.
    Дор палазы соос дырто,
    Сьӧрлон уго –
    Мӧзмыт.

    Ортчо секыт, кузь сюресэз,
    Но доразы вуо!
    Кисьто шулдыр кырӟанъёссэс,
    Ныло-пиё луо.

    Сӥзьыл лыктэ ке,
    Бурдоос
    Кошко асьме дорысь.
    Но малы бен кошко соос?
    Бертон понна
    Выльысь!

    Кызьы пегӟиз гужем

    Кошкись гужемез
    Кутыны турттыса кадь,
    Сетьёс-вотэсъёс
    Ошылӥз вал инкуазь.
    Гужем нош ӧз ӝега –
    Кошкиз пегӟыса со:
    Сетьын вал уго
    Укыр уно пась.

    Мады дасямтэ вазьгес?

    Дасяське инкуазь толлы –
    Кӧлэмез ини потэ.
    Ӟеч тушак кулэ солы,
    Мед изёз со небытэн.

    Нош валес лэсьтон вылысь
    Кулэ буй-буй мамык гон.
    Вот соин ик инбамысь
    Со мамык куртке уго.

    Люкаське мамык, куашка…
    Но пазя ни сое тӧл.
    Ведь пырак мамык пушкын
    Нокин но
    Ноку уг кӧл.

    Табере ни кемалась
    Вуысал небыт валес,
    Луысал миндэр но дась.
    Вунэтэм ке шат инкуазь
    Дасяны пуйы вазьгес?

    Унябей сяськаос

    Унябей сяськаос возь вылын
    Пиштӥзы вал яркыт ӵуж тылын.
    Кожалод, со озьы ас туссэ
    Ӵуж шунды пазьгылэм улосэ.

    Лыктӥсько возь вылэ нош ик мон.
    Но татын ни ваньмыз – паймымон!
    Унябей сяськаос луиллям
    Тӧдь-тӧдьы йыроезь но бабля.

    Йырсизы нош тӧлъя пурӟылэ –
    Ярдуре, писпуэ, куак вылэ…
    Верало сяськаос серемпыр:
    – Ӵуказе ми кылём гольык йыр!

    Зонт

    Лумбыт ӵоже ини зонт
    Шкаф вылын кылле.
    Мылкыдыз солэн урод –
    Висисьлэн выллем.

    Ай толон гтинэ зонт вал
    Шулдыр мылкыдо,
    Зор ултӥ быдэс нунал
    Со калгиз шудо.

    Нош туннэ инбам чылкыт,
    Юг пиштэ шунды.
    Вот соин зонтлэн мылкыд
    Чик ӧвӧл шулдыр.

    Лумбыт лулскылэ ни зонт:
    – Куазь туннэ макем урод!

    Апельсин но лимон

    Вал одӥг апельсинмы…
    Кызьы

    сое люкомы?

    Одӥг пичи пилетэн
    Нылъёслы тырмиз быдэн.
    Пиослы ӧз кыль ни чик –
    Апельсин уго пичи.

    Со понна вал трос лимон –
    Вань пиослы тырмымон.

    Но пиос ӝоӝомизы –
    Лимонэз оскалтытэк ик,
    Чырс луиз ымныр туссы.

    Шулдыр чай

    Тыл вылын тапыр гинэ
    Чайникмы эктэ.
    Ваньместы со огинэ
    Ӝӧк сьӧры чортэ.

    Кырӟаса но шуласа,
    Со ӧте ваньмес:
    «Шулдыр чайме юыса,
    Мылкыдды но, эсьмаса,
    Луоз шулдыргес!»

    Бакчаям будэ шунды

    Бакчаямы будэ шунды.
    Кытысь потэм со, шуоды?

    Пичи гинэ сьӧд кидысысь!

    Со туж пичи на вал нырысь,
    Но весь будӥз, будӥз пумен…

    Огнуналэ огкутскемен,
    Шулдыр серектыса выллем,
    Ас ымнырзэ усьтӥз милем.

    Мыня шораз инмысь шунды –
    Аслаз пиез кожа, вылды!

    Ерпечка тӧл

    Серекъяса, погыльскыса туж сэзь,
    Урам шорын ыр тӧл шудэ-пелля.
    Ураметӥ мынӥсь-ветлӥсьёслэсь
    Шляпаоссэс шӧртчи со ишкалля.

    Уё адямиос шляпаоссэс,
    Тӧллы вожзэс ик поттыса нырысь.
    Тышкаськыса асьсэ понна тӧлэз,
    Лек вазисько со ерпечка сярысь.

    Бӧрысь нош валатско ини соос –
    Шудэ гинэ угось соосын тӧл.
    Ымныразы ни – пальпотон сиос,
    Вожпотонзы пичи но ни ӧвӧл.

    Пумен ни соослэн но мылкыдзы,
    Тӧллэн выллем, луэ капчи но сэзь.
    Шляпаоссэс гинэ киынызы
    Куто, сэзь тӧл выльысь ишкалтэмлэсь.

    Пилемпи

    Бабля тӧдь пилемпи уя инмын,
    Пичи на со, али ай вордскемын.

    Ӧте ни анаез сое дораз,
    Сётэ тэркы – отын зор ву тыраз.
    Шуэ со пиезлы:
    – Ме, си трослэсь тросгем –
    Ӝоггес луод зоро бадӟым пилем!

    Ура!

    Ворттӥсько мон вал вылын туж сэзь,
    Ворекъя мече шунды шорын –
    Вань тушмонъёсты пазьго резь-пезь,
    Шуозы герой монэ дорын.

    Кышканэн йырин ӧвӧл мыным,
    Лобисько азьлань: «Ура! Ура-а!»
    Кӧкыын кыллись пичи выны
    Дась кадь монэн ӵош ожмаськыны,
    Со но кесяське: «Уа! Уа-а!»

    Сӥзьыл тэльын

    Вож тэле сӥзьыл вуиз чупрес,
    Со вошъя писпуослэсь дӥсьсэс:
    Ӵуж луиз кызьпу, нош горд – бадяр,
    Нокытысь уг адскы ни вож куар.
    Палэзьпу, льӧмпу, пипу, беризь –
    Ваньзы дӥсязы ни ӵуж-горд дӥсь…

    Но ялан ай вож – пужым но кыз,
    Ньылпулэн но вож ик на тусыз.
    Сӥзьылэд кышказ, дыр, соослэсь –
    Лысъёссы угось бышкаськисесь!

    Зуродъёс

    Возь вылын туннэ шулдыр –
    Нош ик вуиз турнан дыр!
    Котыр-котыр улосын
    Вӧлскемын ни турын зын.

    Уть ай тон, оп! шуытозь
    Чылкак пилеш кылиз возь.
    Со вылын ини туж трос
    Сыло турын зуродъёс.
    Озьы вӧлскем, кожалод,
    Возь вылэ пудо-живот.

    Сылозы соос кир-пазь,
    Вуытозь татчы тол куазь.

    Нош вуиз ке толалтэ,
    Пудоос кадь, зуродъёс но
    Бертозы ини гидэ!

    Йыромем тӧл

    Тӧл эркын калгиз быдэс нунал –
    Луд вылын шудӥз, гуртын но вал…
    Нош бер ӝыт вуиз но нюлэскы –
    Йыромиз трос писпуос пушкы.
    Туж ке но утчаз потон сюрес,
    Пеймытэн ӧз лу ни шедьтэмез…

    Ма карод, выдӥз но кыз улэ,
    Чалмытскиз но ныс-ныс ни кӧлэ.
    Нош ӵукна, югыт луэм бере,
    Со шедьтоз тэльысь потон сюрес.
    Лумбыт нош ик тӧл калгоз эркын,
    Но уз ни, дыр, пыра нюлэскы.

    Скалъёс

    Ӝыт пал скалъёс берто дэмен гуртэ,
    Котькудӥз ик аслаз дораз дыртэ.
    Возьёс вылын угось быдэс нунал
    Уно нап йӧл люказ котькудӥз скал.

    Со йӧл люкаськемын вераосын,
    Огшап ортчоз – луоз ведраосын.

    Котьмалэн-аслаз дырыз

    Улосэ сӥзьыл лыктӥз но –
    Кошкемез уг поты ни.
    Ӝегатон вылысь толэз, со
    Дун понна дася зарни.

    Писпуосысь куаръёсты но
    Зарнилы ни пӧрмытӥз…

    Но толлэн ӝегам ӧз поты,
    Улосэ вуиз етӥз.

    Сӥзьыллэсь зарниоссэ со
    Дунъяны ӧз вала чик,
    Ишкалляз но ваньзэ-ваньзэ
    Сэрпалляз музэ шӧртчи.

    Нош ӝоген вань улосэ со
    Пазьгылӥз тӧдьы чигвесь.
    Тулысэз ӝегатыны шат
    Дасялляз озьы азвесь?

    Но со азвесез уз дунъя –
    Ас дыраз лыктоз тулыс…

    Инкуазьын уго котьку но
    Котьмалэн – аслаз дырыз.

    Пилем но шунды

    Шундылы пилем вазем:
    – Ойдо шудом чимасен!
    Тон ватскод – мон утчало,
    Ӝог гинэ шедьто, оло.

    Одӥг, кык… Икча-кукча…
    Шундыез пилем утча.

    Но уг шедьты, котьма кар!
    Со бӧрдэ ини зар-зар.
    Синвуэз ӵужыр ваське:
    – Мон уг шуды ни, иське…

    Ватскемысь потэм шунды,
    Пилемлы вазе шулдыр:
    – Шедьтэмед ӧз лу бере,
    Тон ни пегӟы табере!

    Писпуос но бурдоос

    Вуиз ини сӥзьыл.
    Ӝоген толмоз,
    Лыктоз кезьыт но лымыё вакыт.
    Лымшор пала кошко ни бурдоос,
    Отчы, кытын котьку луэ шуныт.

    Мӧзмыт

    гурен лобо соос каллен,
    Люкиськыса вордскем палъёссылэсь.
    Ӵуж писпуос нош, ӝожомем выллем
    Синвуоссэс ӵушылтыло ни весь.

    Сыло соос, вайзэс шоналляса,
    Бурдоослы капчи сюрес сӥзё.
    Куаръёс нош, вайёсысь ишкалскыса,
    Со бурдоос сьӧры улляськыса,
    Лобо-лобо но… муз вылэ усё.
    

    Зурод пушкын

    Турназы возез шаплы
    Шулдыр гужем нуналэ.
    Табере со возь вылын
    Трос гинэ зурод сылэ.

    Котькудаз со зуродын,
    Консерва пушкын сямен,
    Тол вуытозь ватэмын
    Зынъёсыз пӧсь гужемлэн.

    Чибор ӵушконэн

    Жаль-жаль зориз ог час ёрос,
    Сучыр коттӥз вань улосэз.
    Котькытын ни – ву пырыос,
    Ӧз кыль ни номыр но кӧсэз.

    Потӥз шунды пилем сьӧрысь,
    Чибор ӵушкон кутӥз кияз –
    Ваньзэ, мар суч-суч кот но кырсь,
    Ӵущылыны ини ӧдъяз.

    Кытын кӧла шунды

    Ӝытазе жадем тусо шунды
    Коркамы пыриз укноетӥ.
    Кӧлэмез солэн потэм, вылды, —
    Ватӥськиз пеймыт сергы етӥз.

    Уй ӵоже ӧз возьматъяськы чик –
    Бадӟым шкаф сьӧрын кӧлӥз ныс-ныс.
    Вазь ӵукна сайказ со туж капчи,
    Бичатӥз монэ сиосыныз.

    Кӧня ке шудӥз корка пушкын,
    Но кема ӧз ӝегатскы юнме –
    Выж вылтӥ погылськыса эркын
    Укнотӥ тэтчиз пырак инме.

    Лыз инмын ни со пиштэ яркыт,
    Котькинлы ик серектэ шулдыр.
    Нош вуиз ке улосэ бер ӝыт,
    Ми дорын со нош кӧлоз ни, дыр.

    Кызьы мон тулыслы юрттӥ

    Тол ӵоже азбарамы
    Люкаськиз туж трос лымы,
    Но тулыс матэктэмъя,
    Шунаны ни со ӧдъя.

    Копано, дыр, чалякгес
    Со бадӟым лымы люкез –
    Мед вазьгес вуоз тулыс
    Жильыртӥсь вуосыныз.

    Мон копай лулысь-сюлмысь
    Лымыез со букосысь.
    Нош пыдсаз вуэм берам
    Кылӥськиз ненег куара.

    Валаса но ай ӧй ву –
    Мон азе потӥз тудву,
    Туж пичи гинэ на со,
    Но ини тулыс тусо.

    Шулдырак мыным вазе:
    – Ӟеч-а, бур-а, юрттӥсе!

    Ӵӧжпиос но шапыкъёс

    Ву вылын ӵӧжпиос уяло,
    Трос соос – ог кызё, дыр, оло.
    Нош инмысь зыл-ӵошкыт ву вылэ
    Туж уно зор шапык усьылэ.

    Кокчало соосты ӵӧжпиос –
    Кожало, кӧттырлы яралоз!
    Но огзэ но усем шапыкез
    Огезлэн но уг лу кутэмез.

    Шат выё шапыкъёс ву пыдсы? –
    Зымыса но ини утчазы.
    Шедьтэмзы одӥгзэ но ӧйлась,
    Бӧрдыны но ини соос дась.

    Я кытчы, кин меда валэктоз,
    Ышыло ву вылысь шапыкъёс?!

    Коли но бубыли

    Возь вылэ лыктӥз Коли.
    Адӟе – лоба бубыли,
    Бурдъёсыныз лопыръя,
    Сяськаос вадьсын поръя.

    Малпаське вал ни пияш
    Кутыны сое кияз.
    Уйылӥз сьӧраз кема –
    Тыршемез луиз токма!

    Жадьыса пуксиз Коли.
    Нош кытын-о бубыли?
    Сяськаос вылын пуке:
    «Шедьты на монэ, эке!»

    Тӧллэн дӥсьёсыз

    Пӧсь гужем улостӥ
    Ӵукысен бер ӝытозь
    Тӧл калге но лоба
    Эркынак но вӧл-вӧл.
    Шыр гольык со ветлэ –
    Нокинлы но угось
    Пӧсь-ӝокыт нуналэ
    Дӥсь кулэ но ӧвӧл.

    Но тани матэктӥз
    Шаере сӥзьыл куазь,
    Кезьытъёс но зоръёс
    Вайыса ас сьӧраз.
    Ыр тӧллы но соку
    Малпатэк ни ӧйлась:
    Мар меда дӥсяно
    Та кынмись вылтыраз?

    Но кема ик ӧз ул,
    Малпанэ выйыса,
    Марлэсь дӥсь кароно –
    Ӝог гинэ со валаз:
    Писпуысь куаръёсыз,
    Кырымен ишкаса,
    Дӥсялляз-бырттылӥз
    Дыртыса ас вылаз.

    Быдэссэ сӥзьылэз
    Со ветлоз ни озьы –
    Ишкаллям куаръёслэсь
    Сурыкмем ӵуж дӥсен.
    Нош вуиз ке тол куазь,
    Со дӥськут но изьы
    Йӧндыроз лымылэсь,
    Чильпаса азвесен.

    Зорлэсь пегӟизы

    Ву вылысь вож куар вылын
    Бакаос пуксьылэмын.
    Шып гинэ соос пуко но
    Шунтӥсько шунды шорын.

    Но тани шӧдтэк шорысь
    Инбам луиз сьӧд-пурысь.
    Дас минут но, дыр, ӧз ортчы –
    Кисьтӥськиз жаль зор отысь.

    Бакаос соку ваньзы
    Ву пушкы тэтчаллязы –
    Зор улын, вылды, ӧз поты
    Сучыр-сучыр котмемзы.

    Кык ӟольгыри но одӥг нумыр

    Бакчаысь убо вылын валлян
    Кык ӟольгыриос пумиськиллям.
    Одӥгез шедьтэм сюйысь нумыр,
    Нош мукетызлэн ӧвӧл номыр.

    Эшезлэсь куре ни ӟольгыри:
    – Ойдо нумырдэ каром шори! –
    Соизлэн нош сётэмез уг пот:
    Ӝыны нумырен уз тыр, пе, кӧт.

    Куспазы потто ни соос ӵаш,
    Кесясько но жугисько тыш-таш!

    Нумырзы нош со куспын лушкем
    Гызмыляк гинэ пегӟем-кошкем!

    Тулыс сярысь вӧт

    Шур сьӧрын – арама,
    Нош вӧзаз – паськыт возь.
    Туж кема на, кема
    Вож тулыс вуытозь.

    Возь кӧлэ на ныс-ныс,
    Ку ай со сайкалоз!
    Уйвӧтаз нош – тулыс,
    Уйвӧтаз – сяськаос.

    Турнан дыр сярысь со
    Уйбыртэ тол шорын:
    Ж-жик! вазе кадь кусо,
    Лач выдэ вож турын…

    Возь кӧлэ на, кӧлэ
    Тӧдь-тӧдьы ын улын.
    Сюлэмаз нош

    солэн
    Шаугетэ ни тулыс.

    Тулыс пужыос

    Тулыс! Тулыс! Тулыс вуэм!
    Быдэс дунне шулдыр.
    Пачыл пукись тулыс вуэ
    Зымем питрес шунды.

    Со тудвуэ пыро ай мон,
    Шунды доры – эшлы!

    Но пилиськиз со – вот паймон! –
    Векчи пырыослы.

    Со пырыос пазьгиськизы,
    Ӵуж-ӵуж ворекъяса.
    Кӧняез ке лякиськизы
    Мынам но бамъёсам!

    Ӟечыран

    Ӟечран – со ма гинэ:
    Пул но кык гозы…
    Нош пукси ке, со монэ
    Ӝог ӝутоз чагыр инэ –
    Пилемъёс вӧзы!

    Лобисько, бурдо выллем, –
    Эх тон, ӟечыран!
    Нош инмын пичи пилем
    Эшъёсыз сьӧрысь кылем,
    Жальмаса шорам.

    Лӧптэмын шунды зэмзэ –
    Эктэ бергаса.
    Со мыным, ӟеч эш музэн,
    Пумитам мыче кизэ
    Ӟечбуръяськыса!

    Пилем тушак

    Пилем –
    Со тушак кадь небыт:
    Выдӥд ке,
    Уз пот султэмед,
    Тон кӧл
    Коть уйбыт но лумбыт,
    Озьы но
    Уз тыры уммед.

    Буй-буй тӧдь пилем –
    Йыр вадьсам,
    Люкем со
    Инэз ик шорию
    Вылаз нош,
    Зорен вӧтаса,
    Изе на пичи гудыри.


    Николай Никифоров

    Азьтэм час

    Ой, азьтэм бере азьтэм —
    Уйшоре часмы дугдэм.
    Вунэтэм жингьртыны,
    Атасмес сайкатыны.
    Ма, соин ик бабиськем —
    Школае беромиськем

    Нимъёс

    Шыр, лэся, кизем кӧжы,
    Нюлэс куш тыр — шыркӧжы.
    Нош пуны мерттэм шат льӧм? -
    Кисьмамын сьӧд пуныльӧм.
    Яратэ ӟазег гумы,
    Трос жужам ӟазеггумы.
    Чуньыед быжзэ ыштэм —
    Чуньыбыж возез согем.
    Ой, кӧня пӧртэм будос!
    Нош кӧня пӧртэм нимъёс!
    Кин меда сое малпам,
    Будосэз ваньзэ нимам?
    Чеберлык сётэм инкуазь,
    Нош калык луэм нимась!

    Олег Батуев

    Пуны но Егор

    Азбарын пуны утэ,
    Кине меда кышкатэ?
    Пагӟатын пуке Егор,
    Нош кияз горд помидор.
    "Мон тыныд уг сёт"- шуэ,
    Помидор аслым кулэ!
    Бакчае лушкем потай,
    Картузам ӝоген бичай,
    Пырэмме агай адӟиз,
    Одӥгзэ аслыз йортӥз.
    Апайлы но дыр сёто,
    Кылемзе ачим сиё.
    Пуныез визьмо, валаз,
    Дыртытэк пыриз караз,
    Виымо лыэ,пе, вань,
    Салкымын йыръё гань-гань.

    Р. Фархади

    Бегемот, бегемот

    Бегемот,
    Бегемот
    Нош вите ческыт компот.
    Нуназе шорын гинэ
    Со вить сю чаша юэм!
    Вань калык пайме туннэ:
    - Кӧтыд ма быдӟа луэм!
    Бегемот,
    Бегемот,
    Ӧд ке султы - шугомод.
    Бызьылы - 
    Таза луод!

    Ирина Самигулова

    Нылкышно вань дыръя

    Нылкышно вань дыръя,
    Улон сяськая.
    Шунытэн, чеберен тырмылэ.
    Тулыс куазь кадь мусо мыняса,
    Яратон крезьгурен пачылме.
    Нылкышно вань дыръя,
    Югыт но чылкыт.
    Пиналъёс но шудо вордӥсько.
    Шунытэсь верам кылъёсмы,
    Котькыӵе ужъёсы бурдъяло.
    Нылкышно вань дыръя,
    Улон крезьгурен,
    Вуюись буёлэн тырмылэ.
    Кыдёкысь но матысь сюресэд
    Котьку ик дор пала ӧтьылэ.
    Нылкышно вань дыръя,
    Нылпиос но шудо,
    Пиосмурт кужмогес луылэ.
    Секытэсь ужъёсты со ворме,
    Нылкышно ке возьма но оске.
    Нылкышно вань дыръя,
    Улон чеберске,
    Кылбуръёс, кырӟанъёс пӧрмыло.
    Осконтэм но пыдлось малпанъёс
    Улонэ зэмаса пыӵало.
    Нылкышно вань дыръя!

    Ку вуоз Тол бабай?

    "Ку вуоз ни Тол бабай,
    Кузь тушо нюлэс атай? –
    Шугъяське пичи Оли. –
    Возьмаса жади ини.
    Ку ваёз ни со мыным
    Аслэсьтыз кузьымъёссэ?
    Кампетсэ но пряниксэ,
    Чебересь шудонъёссэ".
    Олимы весь возьмаське,
    Нюлэс палась чаклаське.
    "Йыромем, дыр, со отчы,
    Ӝужыт писпуос пӧлы.
    Дышетӥ ни кылбурме,
    Эктонэ но ӟеч пӧрме.
    Мон сое паймытысал,
    Мадиськон но верасал".
    Тӥнь соку корка ӧсэ
    Йыгаськись каллен луиз.
    Бадӟым мешок ӝутыса,
    Тол бабай корка пыриз.
    "Уть, кыӵе со Тол бабай.
    Мон уз вуы, дыр, малпай.
    Нош пересь монэ кылэм,
    Коркаме но со шедьтэм".

    Николай Байтеряков

    Кинэн тон, нуные?

    – Кин бен тонэ яратэ,
    Нуные?
    – Анае.
    Со мон вӧзын
    Уйёссэ ортчытэ,
    Со – осконэ но вӧтэ.
    
    – Кин бен тонэ, нуные,
    Юнматоз?
    – Атае будэтоз.
    Со ик сётоз
    Аслэсьтыз кужымзэ
    Но ӟечлы осконзэ.
    
    – Кинлы эшшо, нуные,
    Йыбырттод музъемозь?
    – Ас шаерме
    Мон возё сюлэмам,
    Шундые кысытозь.

    Мон суредай

    Тетрадь листэ
    Буяй горд шар —
    Ӝужаз шунды.
    Нош улӥяз -
    Вож куар.
    Вӧзаз - гондыр.
    Атай учкиз
    Суредме,
    Монэ ушъяз.
    Но чик ӧз тодма
    Гондырме,
    Шуиз: «Ӵушъял»

    Флор Васильев

    Шудмы огъя

    Будо, ӝутско трос писпуос. Быдэс нюлэс.
    Бен, нокудӥз отын ӧвӧл мултэс,
    Нюлэс дурысь корад ке тон арамаез,
    Нюлэсэдлэн уз тырмы чеберез.
    
    Ведь адями но одӥгназ ӧвӧл шудо,
    Калык пӧлын гинэ шудэз лыктэ.
    Бускельёсыз но улыны солы юртто,
    Ачиз но со калыкъёслы юрттэ.
    
    Бен, Волга но Каматэк уз лу чебер,
    Волгамытэк нош Кама но ӧвӧл.
    Россиятэк ӧвӧл Удмурт шаер,
    Нош мон понна
    Удмуртитэк Россия но ӧвӧл.

    Родной кыл

    Кинлы кулэ на, пе,
    удмурт кылэд?!
    Гуртад сяна,
    Уд вераськы соин.
    
    Сыӵе вераськонэз ке кылӥсько,
    Котьку солы туж лек вожпотӥсько.
    
    Анай кыл - улонэ
    нырысь вамыш,
    Сотэк уд лэсьты
    мукетсэ вамыш.
    
    Анай музэн,
    Анай кылыд юрттоз,
    Улон сюрес кузя
    Йыгмыт валтоз.
    
    Бадӟым шуръёс
    кошко ошмесысен,
    Нош вераськон кутске
    Анай кылэн.
    
    Умой ӧд ке вала
    анай кылэз,
    Ӟечгес уд тоды тон
    мукет кылэз.
    
    Соин ик мон
    Тыныд йыбырттӥсько,
    Соин ик мон
    Тонэн данъяськисько!

    Ми ужам атаеным

    Уй ӵоже азбарамы
    Пыдесозь ик лымыям.
    Ми ӵошен атаеным
    Огазе сое люкам.
    Паськыт пу лопатаен
    Лымы люказ атае.
    Бадӟым кызьпу исьнерен
    Мон ӵужи атай бере.

    Тау кариз курег

    Туннэ ӵукна мон вазь султӥ –
    Курегъёсты сюдоно.
    Мон соослы сиён сётӥ,
    Тусе ву но кисьтоно.
    
    Нош нуназе пересь нэнэ
    Курегпуз корка пыртӥз,
    Топ-топ вешаз со тыбырме –
    Курегед, пе, тау кариз.

    Николай Васильев

    Дырез возьматӥсь

    Ӝӧк вылын-а, борддорын-а –
    Со мынэ весь, тиккетэ.
    Нуназе-а, уйшорын-а –
    Дырез шонер возьматэ.
    
    Со мынэ, мынэ но –
    Чик уг тоды жадёнэз.
    Асьмелы ялан вера со:
    "Утёно дуно дырез".
    Мар со, пиналъёс,
    Уд-а вералэ?
    
    Уж дуре но, школае но –
    Соя ваньмы мынӥськом.
    Ӝыт изьыны выдоно ке,
    Со шоры нош учкиськом.
    
    Со мынэ, мынэ но –
    Чик уг тоды жадёнэз.
    Асьмелы ялан вера со:
    "Утёно дуно дырез".
    Мар со, пиналъёс,
    Уд-а вералэ?

    Сергей Матвеев

    Лымы усён

    Инбамез кин-ке ӵуже-а? –
    Юг пыры отысь куашка.
    Инсьӧры мугор выже кадь,
    Кизили – азям, мышкам.
    
    Люкаське со букосэ но
    Тулкымъёс тусо выдэ.
    Нош сюлэм сое косэ на
    Усьыны пумтэм-йылтэм.
    
    Кин шуиз: кезьыт со ӟар-ӟар?! –
    Йӧтскиськод – тылын сутэ.
    Со азьын мылкыд кырӟа кадь,
    Бам – улмо, синъёс – сутэр.
    
    Кинлы ке дуно гужем-а,
    Мон понна – лымы усён.
    Инбамез сюлмо ӵуже кадь
    Инсьӧрысь лякыт бусён*.
    
    *Бусён – базя (кышнолэн сузерезлэн картэз)

    Владимир Возняков

    Шудо лу, Выль армы!

    Ваче ки кутскиськомы ми
    Чебер кыз котырамы.
    Выль ар гур кырӟан улӟиз но,
    Куномес ӟечбурамы.
    Выль армы, Выль армы
    Нош вуиз ни дорамы.
    
    Кезьыт тӧл но вожъяське, дыр –
    Шокышъя укноямы:
    Кырӟанмы вӧлме корка тыр,
    Тол бабай ни дӥнямы.
    "Выль армы, Выль армы" –
    Шулдырмиз быдэс юртмы.
    
    Шудыны но, эктыны но
    Туж етӥз быгатскомы:
    Тол бабай но, Лымы ныл но
    Пальпото ни вӧзамы.
    Выль армы, выль армы,
    Мед шудо луоз армы.

    Е. Макарова

    Тулыс

    Секытэн ветлэ ини инкуазь:
    Я туннэ, я ӵуказе ваёз.
    Мар ай та валатскыны ӧйлась,
    Ку, зэмзэ но, вордонэз вуоз.
    
    Со вордскиз, мусо пальышаса, –
    Ма, озьы но вордскыло вылэм.
    Капи-кап! бӧрдэ серекъяса,
    Капи-кап! вазе солы сюлэм.
    
    Ай, мусо нош со, туж-туж мусо!
    Учкыса шораз уг тыр сюлэм!
    Ма, со чылкак ук шунды тусо,
    Шундыныл, дыр, со – айиз тусъем!
    
    Ӟольгыри солы, э, шумпотэ,
    Тэбине бордаз бӧтьыртыны.
    Ай уг кары на нуны тэтэ,
    Ӟольгыри ёртэ ни шудыны.
    
    Нунал лумбыт со шорын синъёс,
    Нунал лумбыт – со гинэ дунне.
    Мед озьы со котьку но луоз:
    Вордскылоз Тулыс – улоз Дунне.

    Ольга Ведрова

    ***

    Мон ӝоген луо ини анай,
    Ӟыгырто бордам шундыпиме.
    Кин-о тон, но кыӵе меда тон
    Сюлмаськон ваёд? Я шумпотон?
    
    Уйвӧтам мон адӟисько вуэз,
    Ву вылын чилясь тылсиосты.
    Ой, кинэ меда, кинэ
    Мон вордо югыт дунне вылэ?
    
    Чебере но быремын огӝамдэлы,
    Ваньзэ, ваньзэ мон тыныд сётӥ.
    Озьыен, тон ныл-а яке пи?
    Шунды-Мумые!
    Шат тон ке тодӥськод?!

    Зоя Трухина

    ***

    Кулэ ӧвӧл зарни зундэс,
    Кулэ ӧвӧл буртчин дэрем.
    Зарни бусы сюлмам улэ,
    Веттаськыса лыктэ дорам.
    Кулэ ӧвӧл марӟан весьёс,
    Кулэ ӧвӧл пель угыос.
    Шаерелэн уж крезьгурез
    Каре монэ шудбурогес.
    Кулэ ӧвӧл мукет палъёс,
    Кулэ ӧвӧл лымшор куазьёс, –
    Татын, вордскем музъем вылам,
    Ваньмыз дуно, ваньмыз аслам!

    Лилия Рыбакова

    Шудо луэ!

    Шуд кыл вакчи, шуд кыл капчи,
    Нош пуштросыз ӧвӧл пичи.
    Сое сизё, сое витё,
    Сое вӧсяськыса куро.
    
    Шудо луэ, шудо луэ,
    Шуддэс номырин эн воштэ.
    Шудо луэ, шудо луэ,
    Шуддэс нокинлы эн сётэ.
    
    Котькуд корка, котькин доры
    Со мед пыроз йыгаськытэк.
    Котькуд сюлмын, вань дуннеын
    Со мед улоз йӧнаськытэк.
    
    Шудо луэ, шудо луэ,
    Шуд котькинлы котьку кулэ.
    Шудо луэ, шудо луэ,
    Нылпидылы шуд сӥзелэ.
    
    Мед со пушъёз, сяськаялоз
    Лулъёсамы - пушъёсамы,
    Мед кырӟалоз, мед гурлалоз
    Гуртъёсамы, каръёсамы.
    
    Шудо луэ, шудо луэ,
    Шуд бурдъятэ, кужым сётэ.
    Шудо луэ, шудо луэ,
    Ог-огдылы шуд сӥзелэ

    Людмила Хрулёва

    Буйгаз

    Уськытӥз Кати тусьты,
    Бӧрдэмысь уг ни дугды.
    – Шырпилэн быжыз ведь кузь,
    Со куштӥз, дыр, бызьыкуз, –
    Нылызлы анай вераз.
    Пальпотӥз дыды. Буйгаз.

    Нина Коновалова

    Кӧня? Лыдъя?

    Шырчикъёс ни вуиллям,
    Гуждор вылэ пуксиллям.
    Ваньмыз ик соос тямыс.
    Одӥгез туж ӝог ӝутскиз,
    Кызьпу вае со пуксиз.
    Кӧняез али шырчик
    Гуждор вылэ ик кылиз?
    
    Ӵушъял пуксем кыз улэ,
    Лыдъяны губиоссэ:
    Кык шедьтэм пипугуби,
    Куинь шедьтэм со шыргуби,
    Тямысэз – лӥялгуби.
    Юрттэ, тӥ но, пиналъёс,
    Лыдъяны но чотаны,
    Кӧня ваньмыз губиос?
    
    Пере-пере-перепеч
    Анае пӧра туж ӟеч.
    Кубистаен-тямысэз,
    Нош сӥльын-дас одӥгез.
    Дас кыкез нош губиен
    (Песятай губи ваем),
    Кӧня перепеч ваньзэ
    Милемлы анай пыже?

    Николай Бигбашев

    Тол вуиз

    – Учкы ай, мусо нылы, –
    Верасько Машаелы, –
    Лобало кырын туж трос
    Пичиесь бубылиос.
    Куаратэк гинэ, лушкем,
    Котькытчы соос пуксё.
    Шобырске соку музъем
    Юг-тӧдьы дӥсен.
    
    Серемпыр вераменым
    Паймемын нылы мыным:
    – Урамын сыӵе кезьыт –
    Шат соос лобалозы?
    
    Укное учкем бераз
    Чиньызэ шорам сэзъяз:
    – Шудӥськод монэн, атай,
    Табере мазэ валай:
    Тол вуэм гидкуазямы,
    Музъемез ӵокса лымы!

    Семён Перевощиков

    Малы ке но…

    Анае но атае
    Уно пол вераллязы:
    – Ваньзэ ке сиид тае,
    Киосыд юнмалозы.
    
    Ӝук сии ӵукна ик вазь,
    Кобыен юи сюкась.
    Ох, кужмо луо ӝоген,
    Ӟазегез потэ ӝугем!
    Чепыльтӥз монэ бурдо,
    Ньыль-вить пол тэтчиз шорам.
    Табере боды урдо,
    Уз ни уйиськы сьӧрам.
    Куртчисько на вӧен нянь,
    Ньылӥсько на дас пельнянь,
    Сэрытак ӟузи на йӧл –
    Нокинлэсь кышкан ӧвӧл.
    Потӥсько коргид азе,
    Пумитам... айы ӟазег!
    
    Пегӟисько мырдэм, мырдэм,
    Шоканэ но секытгем...
    Малы ке но, малы ке
    Ляб, лэся, тазалыке.

    Андрей Самсонов

    Сандыкын — пичи дыры

    Мынэсьтым будэмме
    Шат ӧз шӧды анай?
    Пичи дыр дэремме
    Со понэм сандыказ.
    
    Дӥселэн мугораз
    Кибервыл тодметъёс.
    Черсӥллям, куиллям,
    Вуриллям сое киос.
    
    Туж ӵемысь поттасько
    Пичи дыр дэремме.
    Мон отысь адӟисько
    Ерпечка дыръёсме.

    Владимир Самсонов

    Коньы

    Кызысь кызэ тэтчасько
    Шулдыр нюлэскын.
    Ужаса ке жадисько,
    Коркае — гыркын.
    Трос куасьтэмын губие,
    Мульы куадасько.
    Кинлэн потэ веръямез
    Дорам ӧтисько.

    Ашальчи Оки

    Бублиос

    Ми - чебер бублиос,
    Возь вылын лобасьёс,
    Ми - чебер бублиос,
    Лобаса бергасьёс.
    
    Чагыр ин ми вылын,
    Сяськаос
    Ми улын,
    Нюлэсъёс но шуръёс
    Котькытын котырын.
    
    Милемыз ярато,
    Милемлы синмасько.
    Чебересь сяськаос
    Милемын эшъясько.
    
    Мугормы но чебер,
    Бурдъёсмы но чибор,
    Мылкыдмы но капчи,
    Кусъёсмы но векчи.
    
    Лумбыт ми лобаськом
    Лумбыт ми бергаськом,
    Та гужем нуналэз
    Шулдырен келяськом.
    
    Тӥ, мусо пиналъёс,
    Милемыз эн уе,
    Чик юнме милесьтым
    Бурдъёсмес эн сӧре!

    Г. Данилов

    Ӟеч кӧлэ

    Мон туннэ лыдтэм ужай -
    Бызьылӥ, тэтчай, шудӥ.
    Зор вуэз но мон пожай...
    Кӧнялы меда будӥ?
    
    Пыдъёсме гыж кыскаса,
    Пеймытэн вуи дорам.
    Тодматэк кадь, паймыса
    Анае учке шорам.
    
    Сиеме но туж потэ -
    Дасямтэ на урокъёс.
    - Я, тӥ ӟеч кӧлэ, эшъёс!
    Мон вормо ум потонме,
    Дасяло урокъёсме.

    Татьяна Харисова

    Висиськом

    Коӵышмы висе,
    Гур вылын изе.
    Маиныз меда
    Курадӟе Мурка?
    Мон но висисько,
    Валес мерттасько.
    Сиыса лымы -
    Пыктэм ньылонэ.
    Коӵышмы но шат
    Лымыез сием?
    Муркалэн но шат
    Ньылонэз пыктэм?

    Владислав Хлебов

    Толалтэ

    Инбамысь лымы усе,
    Шобыртэ тӧдь музъемез,
    Ма, кызьы таӵе куазен
    Дорын возед пиналэз?
    
    Пиос меӵкыт гурезьысь
    Тӧлпери сямен ширто.
    Нылъёс - лымы гур азьын
    Ческыт сиён пӧрмыто.

    Автор заглавной иллюстрации – ходожник Василий Мустаев