Мадиськонъёс – удмуртские загадки

Зор

Лыктэ - гудыртэ,
Тапыр эктэ,
Зар-зар бӧрдэ.

Очки

Пуке ныр вылын,
кукыз пель вылын

Сьӧд куака

Сьӧд Макар
Кесяське "кар"!
Со лыктэ - тудву потэ

Фотоаппарат, камера

Шорад учкоз,
Тустэ пуктоз,
Суредатэк
Суред вуттоз.

Выж но вӧлдэт

Огзы шоры огзы учкыса уло, нош огзылы-огзы ноку но уг вазьыло

Мумыкор но вӧлдэт

Мумиз одӥг, нылыз-пиез уно

Ӧс ӵогет

Жильтрак усёз но, пырыны уз лэзь ни

Укноос

Пияла тэркы пу дуро

Гур

Толалтэ ваньмызлэсь шуныт, гужем ваньмызлэсь кезьыт

Гын сапег

Тышказы, посӥзы, пыдазы кутчазы

Картуз

Нуназе юбо вылын, ӝыт ӵогын

Зундэс

Сӥль вышкы корт эгесо

Керттӥськон

Вить братъёс корка ӝуто

Венен сӥньыс

Чӧльы быдӟа дыдылэн йырсиез сизьым иськем

Адями

Скамъя кук вылын пуклёк, пуклёк вылын арбуз, арбуз вылын сик

Сылэ кык ӵог,
Ӵогъёс вылын вышкы,
Вышкы вылын муӵ,
Муӵ вылын ӝокыт нюлэс

Йыр

Одӥг пуклё бордын сизьым усьто

Кыл, син, пель

Одӥгез вераське, кыкез учке, кыкез кылзӥське

Кыл

Мудэт вылын горд кунян кылле 

Шунды

Гордо-ӵужо бадым туп
Лумбыт инметӥ лоба.
Кут вылэм – дораз уд туб:
Ӧвӧл на сыӵе тубат.

Чипей

Шиё ке но, ӧвӧл ӵушъял,
Бурдо ке но, вуын уя.
Ваё-ваё солэн быжыз,
Суриз ке но, нуоз пыжез.

Арня нуналъёс

Толэзяз ньыль пуза, пузысьтыз сизьым потэ

Нунал

Ӝыт быре, ӵукна султэ

Люкмес

Пурысь улошолэн кӧтурдэсыз пась

Пилем

Бусыез сьӧд улошо котыртэ

Вуюись

Чильтыр-чильтыр воштӥськоз но – ингур улэ пыроз

Чорыг

Бурдыз но вань — уг лоба, пыдыз ӧвӧл ке но — ветлэ

Вуын улӥськом, вутэк ми быром

Син

Веньлэсь йылсо мар луоз?

Тӧл

Мае серметэн кутыны уг луы?

Курегпуз

Мае ӵоге ошыны уг луы?

Губи

Музьемысь потэ шуак,
Йырыныз мычиськыса.
Изьызэ нуллэ пыдаз
Асэныз даньяськыса

Вордски пинал пипу улын,
Ӵапак тупаз зоро нунал,
Котрес, вольыт но туж чебер,
Кукы зӥбыт, векчи, шонер.

Кӧжы

Вож коркамы ӟоскытгес:
Кузь, но сюбег, вольытгес.
Артэ пуко та коркан
Котрес вожесь пиналъёс.
Сӥзьыл адӟон каръяськиз -
Вольыт корка пилиськиз.
Котрес тӧдьы пиналъёс
Кудӥз кытчы, дыр, пегӟиз

Тыква

Бакчаын бадӟым ӵуж туп,
Тэтчаса уг вЕтлы , уг.
Тыр толэзь кадь со ачиз,
Трос ческыт тысьёс пушказ

Лымы

Мамык валес валтэстэм

Ми доры со лыктэ пилемысь,
Со капчи, азвесё но югыт.
Куддыръя со луэ бышкиськись,
Но куддыр пуштырес но небыт.

Котырак - лудъёсты, садъёсты,
Чылк-тӧдьы шубаен шобыртэ.
Кияды ке сое кутӥды,-
Шуналоз со тӥляд кияды

Кияр. Огреч

Милям парсьпиосмы
Будо убоямы.
Шунды шоры урдсын,
Быжзы купыртэмын.
Ми со парсьпиосын
Шудӥм ӵош ватскемен.

 Укнотэм но ӧстэм,
Быдэс корка калыкез.

Сугон

Пуке пересь сю шубаен(пасен). Кин сое кыле, со синвузэ кисьтэ

Картофка

Ми сое ӵоксамы музъеме,
Сю нунал поттытэк возимы.
Сӥзьылпал гудӟыны кутскимы,
Нош одӥг интые... ог дассэ поттӥмы

Коньы

Ветлӥсько пуштрес пасен,
Улӥсько пеймыт тэльын.
Тыпыысь шуныт гыркын
Йырйисько мон пушмульы

Арбуз

 Ми доры вуизы бакчаысь
Ворино туж ческыт вож тупъёс

Кубиста

Бусыын сылэ нылаш,
Куамын куинь кышет вылаз.
Тэтчаса лудкеч вуиз,
Кочонэз гинэ кылиз

Гурткеч вера: " Гурткечъёс
Роза зынэз ярато".
Нош малы та экеос
Куаж! зынъяло ...

Сизьымдон полэс дэремез, ваньмыз ик бирдытэк

Нылпи пыдкутчан

Котькытын ми кыкнамы,
Ветлӥськом люкиськытэк.
Возь кузя калгиськомы,
Вож ӝужыт ярдуръёстӥ.
Падӟатӥ бызьылӥськом,
Урамтӥ вамышъяськом.

Нош пеймыт ке ӧжытак,
Кылиськом ми пыдъёстэк.
Пыдъёстэк - со туж начар,
Уд ни мын отчы-татчы!

Ма, кровать улэ пыром,
Шыпытак отын изём,
Нош пыдъёс ке бертӥзы,
Бызьылом сюрес вылтӥ

Пуны

Вешаськод - мусояське, исаськод - куртчылӥське

Ӟазег. Ӵӧж

Вуын пыласькиз, нош кӧс кылиз?

Улмо

Котырес, ӵыжыт, писпуысь усиз, пияшлэн ымаз пыриз

Троллейбус

Дугдэ,
Нош ик азьлань ширтэ,
Быдэс гуртэз
Дораз пыртэ.
Небыт питран вылын
Сылэ —
Чугун сюрес —
Ӧвӧл кулэ.
Возиськыса
Езтыл борды,
Ворттылытэ ни
Милемды.
Поромыса
Нунал ӵоже,
Уйпал гинэ
Дораз коже.
Мар йыртӥян со —
Ребус,
Я, кин тодӥз?..

Унябей

Вазь тулыс
Ӵуж чипыос
Возь выл тыр
Пазьгиськизы.
Бурд потӥз гинэ –
Соос
Инбамозь ик
Ӝутскизы.

Трамвай

Сюръёсыз солэн —
Вӧл-вӧл,
Но чырткем пужей
Ӧвӧл.
Корт сапег
Ӝог пыдъёсаз,
Тыл пиштэ
Юн кымысаз.
Ветлэ —
Андан сюрестӥ,
Ортчылэ
Корка вӧзтӥм.
Я, пичие,
Тодад вай.
Нимало сое…

Мунё

Синъёссэ кыне,
Усьтэ,
Ас кожаз
Каре тэтэ.
Йырсмез
Чилясь мертчан,
Вылтыраз –
Дӥсяг-кутчан.
Куддыръя вераськылэ,
Куддыръя но
Бӧрдылэ.
Тон шонер тодӥд,
Данё,
Нимало сое...

Йӧл

Тӧдьы шур
Чурен бызе,
Ведраын
Шукы пӧзе.
Анаймы
Пыртоз доре,
Пуксёмы
Ӝӧк котыре.
Кин нянен,
Нош кин
Няньтэк,
Ӝӧк сьӧрын
Ум пуке
Тэк.
Солэсь
Ческытэз
Ӧвӧл,
Тодӥды!
Шонер!
Со...

Ӵушъял

Туп выллем
Бинялскыса,
Каллен погыля,
Ӝуштэ.
Кин ке сое
Кутэ, иса —
Ачиз ик берло
Бӧрдэ.

Шунды

Гордалэс-ӵуж
Кунянэн
Шудӥськом
Быдэс нунал.
Уин —
Анайзэ нонэ,
Кӧлыны уг сёт
Ӵукна.

Компьютер

Букваос но со бича,
Киноос но адӟытэ,
Суреда, вера, кырӟа,
Юаськод – ваньзэ тодэ.

Мадиськонъёсын  –  удмурт букваос

Ульфат Бадретдинов

Чурыт …

Кыллэн азяз ноку со уз султы,
Гласной буква сьӧрын ӧвӧл инты.
Эшъёсыз нош чурытэсь, куать гинэ.
Люкаськемзы уг поты огинэ.

Очкиен

Очкитэк сое уд тодма,
Вордӥськемын со очкиен.
Кема эн малпаське токма,
Шедьтэ сое «йӧл»-ысь, «вӧй»-ысь.

Ӟечбур!  

«Ӟуч» но монтэк уз «улы»,
«Ӟичы» луоз мукет пӧйшур.
Монтэк ӟечбур но уд шуы –
Тӥни сыӵе пӧрмиз кылбур.

Ӝӧк вылын – ӝук

Ӝӧк вылын пӧсь ӝук.
Мон но отын туннэ.
Сиеме уг поты, уг,
Уже вите монэ –
«Ӝӧк»-ысь но «ӝук»-ысь
Уд кошкы нокызьы,
Мон угось «возьмаськись».

Ӵын

Ӵындэ ни ӵукнаысен,
Ӵындоз ай ӵуказе но.
Ваньмыз со монэн сэрен.
Оло, тусме воштоно?

Губи

Владимир Котков

Уг сиы писэй но, пуны но уг си,
Кунян но, така но, курег но уз си.
Нош мон туж ческыт потыса сиисько,
Сое мон ачим ик сикысь ваисько.
***
Октыку но яра,
Сиыку но яра.
Нош ӧд окты дыраз –
Интыяз супыраз.

Пуны

Владимир Котков

Со монэ зынъя, зынъя
Но шедьтэ монэ зынъя.

Гитара

Владимир Котков

Куать-сизьым йырсиё,
Векчи куско,
Куараез -
Усто!

Шур

Владимир Котков

Весь бызисько каре.
Картэз - зарезь.

Кикы

Владимир Котков

Лыдъя-чота но ялкаре
Мынам сикысь бухгалтере.
Лыдъясь улэ бере сикын,
Иське, нимыз солэн …

Узьы гумы

Владимир Котков

Турын пӧлын на соос,
Будозы –
Лэсьтом насос.

Аквариум

Владимир Котков

Ма сыӵе со -
Пияла ярдур,
Вань шурез,
Но уг бызьы шур.

Со шурын нош, уть-ай, -
Выжыкыл!
Зарниям чорыг,
Русалкы-ныл...
Ву пушкын
Дворец тӥни пуке...
Ма сярысь вераськиськом, эке?

Тон ачид ик тод,
Ум вералэ ми, ум.
Вот-вот-вот...
Тодӥд -...

Изьы

Владимир Котков

Педлон кезьыт вакытэ
Пельыныз пельме шунтэ.

Коӵыш

Владимир Котков

Вырӟытэк улэ чарак,
Дыр вуэ ке -
Цап-царап!..

Картошка

Владимир Котков

Уно синмо ке но,
Уг адӟы нокинэ.

Сурым

Владимир Котков

Яратэ улыны
Гурын.
Вазь пытсад ке,
Потоз…

Тунгон

Владимир Котков

Уг ке но быгаты
Утыны,
Озьы но быгатэ
Утьыны.

Музъем

Владимир Котков

Мынэмъя потэ мынэм
Со вылтӥ.
Вань калык шуэ:
«Мынам!»
Со - одӥг.

Ай тазэ потэ пусъем,
Со, пе, курегпуз тусъем.

Электросчётчик

Владимир Котков

Нокинлэсь но со уг ват,
Кӧня ватт но киловатт.
Учкыса туннэ валай,
Со лыдъям ини далай!

Ухват но чугун

Владимир Котков

Соослэн - пӧсь яратон!
Гур шорын ӟыгыръясько.
Ог-огзылы тупало ке,
Гур азьын нэ люкисько.

Нянь

Владимир Котков

Питырес-котырес.
Вандӥськод - нырпелес.
Нырпелес, нырпелес…
Копакыз нырпелес.

Вуюись

Владимир Котков

Гужем вуиз,
Зоро луиз.
Зорем бӧрсьы
Марым потӥз.
Марым кылдэм, шуо,
Вуысь.
Солэн нимыз но

Кезьыт

Владимир Котков

Кин
Вулы дуре
Вулэсь дурет?

Кампет

Владимир Котков

Чупасько но чупасько,
Чупасько но чупасько.
Чупанъям сои быре,
Ма, кытчы меда пыре?

Шырпу

Владимир Котков

Мертчиське, ява, туж ӝог
Пичильтык гинэ пу ӵог.
Пичиеныз ик, дыр,
Кутске тазьы: шыр…

Качы

Владимир Котков

Шортӥз сое герӟаллям,
Заклёпкаен дуриллям.
Ымъёс нош уг уло лач:
«Клач! Клач! Клач!»

Ву

Владимир Котков

Кытчы гинэ уг ву
Бызёд - сьӧраз уд ву.
Угось нимыз но - ...

Градусник

Владимир Котков

Понӥськомы
Шонтыса,
Поттӥськомы
Шунтыса.

Поезд

Владимир Котков

Сю корка!
Этажен уг тубы выллань.
Котькудаз берга
Питран.

Лымы

Владимир Котков

Со- инмысь усьылэмын,
Со - тӧдьы-тӧдьы …

Сапег

Владимир Котков

Толалтэ, сӥзьыл, тулыс
Асьмелы уг лу сотэк.
Резина, коть гын -
Нимыз
Кык слоге тэре - …

Ведраос

Владимир Котков

Кырӟаса мынӥзы,
Бӧрдыса бертӥзы

Чонари

Владимир Котков

Азьпал улонзэ малпаса,
Сиён шедьтоно шуыса,
Гозы со поттэ кытысь ке,
Кутэ но пумен ошиське.

Бубыли

Владимир Котков

Сяська доры васька,
Ачиз но тёп сяська.

Сизь

Владимир Котков

Сикын улӥсь,
Морзе кылэз тодӥсь
Телеграфист.
Нош калыкын шуо
«Доктор» гинэ.
Кинэ?

Автомобиль

Владимир Котков

Соос шумприч сямо,
Уйин адӟись синмо.
Чебер,
Но туж дуно
Соос пӧлысь ино…