Ньыль выль кинозалъёс усьтозы Удмуртиын
Ужпумэз быдэстон понна 500 сюрс адямилэсь ӧжыт улӥсьем каръёсысь кинозалъёслы юрттэт сётонъя вожвылъяськонлы йылпумъянъёсъя «Фонд кино» оглом 20 миллион манет висъя. Конкурсын элькунысьтымы ньыль вазиськонъёс вормисе потӥзы. Озьы, шаерамы Глазкарысь лулчеберетъя но спортъя «Победа» центрысь, Кизнерысь «Зори Кизнера» лулчеберетъя центрысь, Сарапулысь лыдӟетъюртысь но Ярысь лулчеберетэз но туризмез азинтонъя центрысь кинозалъёсты выльдозы. Ужъёсты быдэстон понна котькудаз быдэн вить миллион манетэз келялозы.
«Лулчеберетъя юртъёс коньдонэз ваньбурзэс выльдонлы кутозы. Кылсярысь, лулчеберетъя но спортъя «Победа» центрын 5.1 рос-прос куараен выль 3D-кинозал кылдоз. Экран, сервер, акустикая система, 3D-проектор но кассалы кулэ луись арбериос басьтэмын луозы», — ивортэ Удмуртиысь тӧролэн но кивалтэтлэн пресс-службазы.
Электрон амалэн аукцион 2019-тӥ арын 16-тӥ куарусёнэ йылпумъяськоз.
Кинозалъёсын мынӥсь фильмъёс пӧлысь ӝыныез кунамы лэсьтэмъёсыз луозы
Туннэ нуналлы элькунамы Вотка ёросысь Новый каргуртысь «Звёздный» лулчеберетъя юртын, Можгаысь «Дубитель» лулчеберетъя юртын, Кезысь лулчеберетъя ёрос юртын но мукет интыосын оглом тямыс кинозалъёс ужало. 2018-тӥ арын «Фонд кинолэн» вожвылъяськонэзлы йылпумъянъёсъя сизьым кинозалъёс усьтӥськизы. Арнялы быдэ соос ӟуч но кунгож сьӧр киноосты возьмато.