Казаньысь чеберлыкъя «Хазинэ» йӧскалык галереяын удмуртъёслэн азьвыл улонзылы но лулчеберетсылы сӥзем «Даур Куара» адӟытон ужа.
Экспонатъёс Татарстан Элькунысь Балтач но Кукмор ёросъёсысь шаертодонъя музейысь люкамын. Соосын матысьгес тодматскыны луэ 16-тӥ коньывуонозь.
Адӟытон сяна, «Хазинэ» галереяысь ӧнерчиос нылпиос понна нимысьтыз пӧртэм ужрадъёс ортчытъяло. Та нуналъёсы йӧскалык воскресной школае ветлӥсь пиналъёслы экскурсия радъямын вал, соос удмурт калыклэн лулчеберетэныз но сям-йылолъёсыныз матысьгес тодматскизы, озьы ик удмурт пужыосын дэмдор лэсьтӥзы.
Пусъём, ужрад радъямын Россиысь калыкъёслэн лулчеберет кылёсбурзылы сӥзем ар улсын Татарстанысь удмуртъёслэн йӧскалык лулчеберетъя автомизылэн юрттэмезъя.
Курсъёсы вань мылкыд карисьёс гожтӥськыны быгато. Нырысетӥ пумиськон 1-тӥ коньывуонэ ортчоз ини.
Урокъёс радъямын луозы пӧртэм интыосын:
1. Ижкар, УдГУ, 2-тӥ корпус
2. Ижкар, И.Наговицын нимо лыдӟетъюрт
3. Ижкар, В.Маяковский нимо лыдӟетъюрт
4. Ижкар, Йӧскалык музей
5. Ижкар, В.Короленко нимо пединститут
6. Шаркан, ёрос лыдӟетъюрт
7. Игра, К.Митрей нимо лыдӟетъюрт
8. Дэри ёрос, Октябрьский черкогурт, А.Кузнецова нимо лыдӟетъюрт
Расписание нимысьтыз поттэмын луоз удмурт кылэз дышетонъя курсъёслэн вотэс бамаз, отын ик кылдэм юанъёстылы валэктонъёс но сётозы. Озьы ик вазиськыны луэ 68-77-98 телефон пыр.
Визьбур шудон нош ик ӧсъёссэ усьтэ. Куриськонъёсты 26-тӥ коньывуонозь кутозы.
Шудон сӥземын пӧртэм калыкъёслэн кылъёссылы но йылолъёссылы. Таяз радэ со викторинаосты, импровизациез но экспормт-театрез огазеялоз.
Визьбур шудонэ пыриськыны быгато 13-17 аресъем пиналъёс. Котькуд ёросысь куинь командалы пыриськыны луонлык сётӥське (командаын куать адями луыны кулэ).
Нырысь ик шудонлэн куать зональной турниръёсыз ортчозы. Соос радъяськозы коньывуонэ – шуркынмонэ. Собере ини, отын нырысетӥ куинь интыосты басьтэм командаос 8-тӥ толсуре Ижкаре финалэ люкаськозы.
Куриськонъёсты etno-noch@yandex.ru электрон почтае лэзёно. Пыр-почгес визьбур шудонлэн гожтэм положенияз.
23-тӥ куарусёнэ удмурт кылбурчилы, писательлы, журналистлы 53 арес тырмысал.
«Удмурт Кенеш» огазеяськонлэн Дэри ёросысь ёзэтэз Эрик Батуевез буре вайыса акцие пыриськыны ӧте. Ёзэтлэн кивалтӥсез Лидия Биянова вера: «Акция улсын ӵектӥськом «Мон тодӥсько, Эрик Батуев…» предложениез азьланьтыса, Валера сярысь тодэ ваёнъёсмес гожтыны, малпанъёсынымы люкиськыны».
Эрик Батуев сярысь тодэ ваёнъёстэс, малпанъёстэс «ВКонтакте» мерлыко огинэ #ЭрикБатуевезБуреВайыса хештегъёс улын интыяны кулэ.
Удмурт центр итыяськоз Тыло гуртысь Самсоновъёслэн музей-юртазы. Сыӵе киӵӧлтонэн потӥз «Удмурт Кенешлэн» Пичи Пурга ёросысь ёзэтэз.
Центрез усьтыны чакламын 24-тӥ куарусёнэ 11.00 часын.
Та нуналэ ик музей котырын удмурт кылын бард кырӟанъя «Тылобурдо» фестиваль ортчоз. Ужрад туэ витетӥ ползэ радъяське ини. Отчы мылкыд карисьёс пыриськыны быгатозы 14 аресысен. Куриськонъёсты куто 8 (34138) 42439 телефон номеръя. Пыр-почгес фестивальлэн Положенияз.
Дэри ёросысь Лудорвай шор ёзо школалэн кивалтӥсез, удмурт кылъя но литературая дышетӥсь Надежда Мерзлякова «Золотые имена народов Росии» вожвылъяськонлэн элькун люкетаз вормисе потӥз.
Али дыре Надежда Николаевна Ханты-Мансийске мыныны дасяське. Ӵапак отын вожвылъяськонлэн федерал люкетэз — финалэз — ортчоз. Ужрад радъяськоз 4-тӥ-6-тӥ коньывуонэ Йӧслыкъёслэн огкылысь луэмзыя огъяросси форум улсын.
Пусъём, «Золотые имена народов России» — Россиысь калыкъёслэн ассамблеязылэн но Ханты-Манси автоном округлэн кивалтэтэзлэн федерал ӵектоссы. Солэн валтӥсь ужпумез — Россиысь пӧртэм нациен адямиосты, кудъёсыз асьсэ ужазы но кунмы понна бадӟым пайда лэсьтӥзы, шараяны но соослы юрттэт сётыны.
Ужрадэ вань мылкыд карисьёсты возьмало. Ортчоз со 22-тӥ куарусёнэ 18:30 часын таӵе адресъя: Ижкар, Милиционной урам, 4 юрт.
Удмурт чеберлыкен тырмем проектлэн презентацияз туала мода возьматозы, ӵектос улсын лэсьтэм дырпусэн тодматозы, удмурт дэремлы сӥзем «Айшон» вожвылъяськонын вормисьёсты пусъёзы, кибашлыос но дизайнеръёс вузкарозы.
«Айшон» ӵектослэсь йылпумъян ужрадзэ озьы ик меӵак эфир пыр но учкыны луоз. Онлайн учкон понна, выжоно ДАУР ТВ огинэ.
Вазиськонъёсты кутозы 10-тӥ коньывуонозь. Вожвылъяськонэ пыриськыны ӧтё нылпи садъёсы ветлӥсь пиналъёсты но покчи классъёсын дышетскисьёсты.
Вожвылъяськон онлайн амалэн ортчоз. Радъяськоз со 25-тӥ шуркынмонозь. Пичи Чеберай но Батыр ним басьтон понна пиналъёслы удмурт кылын куинь ӧръя быгатонлыкъёссэс возьматыны кулэ луоз: асьсэ сярысь вераны, кылбур лыдӟыны яке кырӟаны, калыклэн узырлыкез сярысь мадьыны.
Вормисьёсты Калыкъёслэн эшъяськон юртазы сӥлы карозы — дипломъёсын но кузьымъёсын пусъёзы.
Конкурслэн куронъёсыныз пыр-почгес тодматскыны быгатоды гожтэм положениысь. Сак учке!
10-тӥ куарусёнэ Ижкарысь Космонавтъёслэн парказы «Рыжий фестиваль» ортчиз. Татын «Удмурт Кенеш» огазеяськонлэн но площадкаосыз ужазы.
Эшъяськон садысь «Валче» сэрегын «Ми будӥськом валче» проект улсын вань мылкыд карисьёс понна удмурт мунё-оберег лэсьтонъя но перепеч чебер кутыны дышетсконъя мастер-классъёс радъямын вал. Киужен вырисьёслы мылкыд сётыса кырӟазы «Инвожо» ансамбльысь артистъёс.
Эшшо одӥгез «Горд берекет» нимо сэрег ужаз пичи сцена вылын. Лыктэм куноос удмурт дэремъёсын тодматскизы. Этно-дӥськутэн пӧрмытскем модалиос куспын конкурс ортчиз. Татын ик, «Кырӟась арама» площадкаын, люкаськемъёсты шулдыртӥзы мусо пичыльтыкъёс.
Мастер-классэ но вожвылъяськонэ пыриськемъёслы синпелет кузьымъёс кузьмамын вал.
9-тӥ куарусёнэ Ижкар котырысь «Ёлочка» лагерьын «Шундыкар» улосвылкуспо смена усьтӥськиз. Удмурт пиналъёс 10 нунал ӵоже татын шутэтскозы но пӧртэм ӧръёсъя выль тодон-валан басьтозы.
Туэ «Шундыкар» сменалэн ужан ӧръёсыз кӧня ке воштӥськизы. Кылсярысь, выль ӧръёс усьтӥськизы – мунё лэсьтон но эктон. Дышетскем сяна, пиналъёс вожатойёсын малпам трос тунсыко ужрадъёсы пыриськозы.
Пусъём, «Шундыкарлы» туэ 30 ар тырмиз. Аръёс ӵоже лагерь уно тодмо кивалтӥсьёсты но азьветлӥсьёсты будэтӥз.
Таяз радэ вожвылъяськонэ быдэсь шаерысьтымы пичиосты возьмало. Та дыре куриськонъёсты кутон мынэ. Со сярысь ивортэ Татарстан Элькунысь удмуртъёслэн йӧскалык лулчеберетъя автономизы.
Вожвылъяськонэ пыриськыны ӧтё удмурт калыклэн лулчеберетэныз тунсыкъяськись нылпи садэ ветлӥсь но покчи классъёсын дышетскись пиналъёсты. Соос быгатонлыкъёссэс пӧртэм номинациосъя возьматыны быгатозы:
— «Удмурт выжыкыл» темая суред;
— Удмурт калык эктон;
— Удмурт кылын кырӟан. Коллектив;
— Удмурт кылын кырӟан. Нимаз быдэстӥсьёс;
— Удмурт кылын кылбур лыдӟон.
Вожвылъяськонэ пыриськон понна 23-тӥ коньывуонозь ссылкая https://forms.gle/kRLQqHPhuQSPoAuF6 заявка келяно.
Вожвылъяськон сярысь пыр-почгес положениын гожтэмын.
10-тӥ куарусёнэ Ижкарысь Космонавтъёслэн парказы горд йырсиё адямиослы сӥзем фестиваль ортчоз. Котьку сямен праздник улсын «Удмурт Кенеш» огазеяськонлэн площадкаосыз ужалозы.
Индустри ёросысь кенешчиос вань мылкыд карисьёсты возьмалозы Эшъяськон садысь «Валче» сэрегын. Отын пиналъёслы удмурт мунё-оберег лэсьтонъя но перепеч чебер кутыны дышетсконъя мастер-классъёс ортчозы.
Со сяна, паркысь пичи сцена вылын ортчоз этно-дэремлы сӥзем ӵошатскон. Со улсын лыдэ басьтӥськозы пӧртэм пумо номинациосъя дасям тусбуръёс:
— Покчи усточи (нылпиослы костюм, пыриськыны быгато 12 аресозь пиналъёс);
— Тусбурчи (профессионалъёслэсь фешн-образ, ДПИ-ысь мастеръёс понна номинация);
— Зарни арлыд (арлыдоослэсь тусбур);
— Катар (тужгес усто презентация);
— Вашкала (калык дӥськутэз возьматон);
— Сад-бакча (выль удалтэм емышъёсын кылдытэм образ);
— Горд-кельыт (ужады горд тусэз аспӧртэмлыко кутон);
— Кильтро (туала шӧмо костюмъёс) но мукет. Номинациос сярысь пыр-почгес учкыны луэ положениысь.
Ӵошатсконэ котькуд пыриськись одӥг образ дасяны кулэ. Возьматыны быгатэ ачиз яке модали вылын. Одӥг-кык минут дыр сётӥське. Та дыр куспын костюм сярысь вераны, кырӟаны-эктыны, калыкен шудыны луэ.
Ӵошатсконэ пыриськон понна келяно зявка.
(Туспуктэм басьтэмын вотэсысь)
Ас лулчеберет сярысь ӟуч кылын сочинениосъя но ӟуч лулчеберет сярысь анай кылын гожтонъя огъяросси конкурслэн улосвыл люкетаз пыриськыны ӧте Дышетон удысысь йӧскалык ужпумъёсты тодон-эсекронъя институт.
Вожвылъяськонэ пыриськыны быгато элькунысьтымы 4-тӥ-11-тӥ классын дышетскись пиналъёс. Вормисьёсты шараялозы арлыдъя ньыль группаосъя.
1-тӥез группа – 4-тӥ классъёсын дышетскисьёс;
2-тӥез группа – 5-тӥ-7-тӥ классъёсын дышетскисьёс;
3-тӥез группа – 8-тӥ-9-тӥ классъёсын дышетскисьёс;
4-тӥез группа – 10-тӥ-11-тӥ классъёсын дышетскисьёс.
Конкурсэ пыриськон понна ужъёстэс келяно 20-тӥ куарусёнозь niino@udm.net электрон почтае.
Элькунын вормисьёслэн ужъёссы вожвылъяськонлэн федерал люкетаз келямын луозы. Конкурслэн куронъёсыныз пыр-почгес тодматскыны быгатоды сётэм положениысь.
Удмурт кылбурчилэн тусыз кылдӥз Дзержинский ульчаысь 87 номеро юртлэн борддор вылаз. Удмуртилэн шоркарысьтыз улон коркаос вылын со одӥгез тужгес бадӟымез буёло мурал луиз.
Муралэз сӥё-дано усьтонэ трос калык вуиз. Туж шуныт пӧрмиз ужрад. Чузъяськизы кылбурчилэн чуръёсыз, кылъёсызъя гожтэм кырӟанъёс. Программаез нуись Светлана Пикулева мадиз А. Окилэн улонэз но творчествоез сярысь.
Тодады вайытом, проект лэсьтӥськиз Кун Думаысь депутатлэн Лариса Бурановалэн кичӧлтэмезъя.
— Мон понна туннэ туж шудо нунал. Табере Ашальчи Оки шоркарамы улоз, учкоз, кызьы улӥськом. Малпасько, котькуд удмурт адями та портретъёсысь ассэ шедьтоз. Суред туж шуныт, мур пуштросо пӧрмиз, — шуиз депутат.
Ужез улонэ пыӵатыны юрттӥзы Ижкар Думалэн тӧроез Фарит Губаев, «Удмурт нылкышно кенеш» (кивалтӥсез Елена Миннигараева ) но « ЖРП№8» огазеяськонъёс (кивалтӥсез Ирина Плигина). Суредъёслы эскизъёс дасяз художник Денис Никонов, нош юрт вылэ сое пуктӥз Дмитрий Костицын.
Ужрадэз учкыны луоз «Даур ТВ» интернет-телеканаллэн видеотрансляциысьтыз.
Кияса ёросысь «Тӥгырмен кенакъёс» ансамбльлы шуд усиз Псков улосысь Сигово гуртэ вуылыны. Отын 28-тӥ гудырикошконэ сето калыклэн «Сетомаа. Семейные встречи» фестивалез ортчиз.
Кенакъёс верало, таӵе ужрадъёс луонлык сёто мукет выжы калыклэн сям-йылолъёсыныз тодматскыны, соослэсь калык кырӟанъёссэс улэпкын кылзыны (сетоослэн «леело» кырӟанзы ЮНЭСКОе пыртэмын), чебересь но аспӧртэмлыкоесь диськутсэс учкыны, йӧскалык сиён-юонзэс оскалтыны, озьы ик эшъёсын пумиськыны но выль тодмоос шедьтыны.
Фестиваль улсын Эстониысь, Псков улосысь, Ленинградысь но Удмуртиысь творческой коллективъёс концерт возьматӥзы. Нош ужрадлэн пумаз вань люкаськемъёс ӵошен финн-угор калыкъёс куспын эшъяськон писпу мерттӥзы.
23-тӥ гудырикошконэ Ижкарысь Флор Васильев нимо лыдӟетъюртын удмурт дышетскись пиналъёслэн нырысетӥ слётсы ортчиз. Ужрадэз радъяз «Шокан» огин.
Ар но ӝыны талэсь азьло элькунысьтымы пӧртэм сэрегъёсысьтыз но бускель улосъёсысь нылпиос ас мылкыд каремзыя огазеяськыны малпазы. Удмурт кылэз азинтон, удмуртлыке выль омыр пыӵатон, малпанъёссэс шараян вылысь. Кызьы шуо огинлэн азьветлӥсьёсыз, удмурт огазеяськонъёс вань гинэ ке но, школаын дышетскисьёс понна соос нимысьтыз ӧвӧл.
Нырысетӥ слётазы люкаськемъёс та дыр ӵоже лэсьтэм ужзы сярысь вераськизы. Школаосын дышетскисьёс пӧлын удмурт кылэз азинтыны амалъёс утчазы. Кенешизы марлы азьланяз саклык висъяно. Кылсярысь, «Шокан» огинэ пыриськись пиналъёс малпало Интернет вотэсэ удмурт подкастъёс поттыны, пӧртэм марафонъёс, ӵошатсконъёс ортчытыны, ӵемгес таӵе пумиськонъёс радъяны, котькуд ёросъёсын ёзэтъёссэс усьтыны но вӧзазы тросгес выль дышетскисьёсты кыскыны.
Нош вань удмуртъёслэн «Удмурт Кенеш» огазеяськемзы но удмурт егитъёслэн «Шунды» дэменлыксы пиналъёслы юрттыны дась луэмзэс веразы.
Геннадий Корепанов-Камскийлэн творчествоезлы сӥзем ёроскуспо фестиваль арлы быдэ ортче крезьгурчилэн вордскем палъёсаз – Дэбес ёросысь Тыловай гуртын.
Фестивале вуылӥзы Дэбес, Шаркан, Кез, Воткинск ёросъёсысь но Ижкарысь творческой коллективъёс. Соос Геннадий Михайловичлэсь кырӟанъёссэ быдэстэм сяна, удмурт сям-йылолъёсты возьматӥзы, вашкала гуръёсты кырӟазы.
Озьы ик фестиваль улсын нылпиос понна площадкаос но ужазы. Пиналъёс ӟабыль поттыса ик «Пӧсь табанен», «Лодӥгаен», «Чингылиен» шудӥзы. Книгаосты учкыса визьзэс сыназы: удмурт батыръёсты синйылтӥзы, шаерысьтымы каръёсты тодазы ваизы, будосъёсты но кибыосты тодмазы.
Россиысь финн-угор калыкъёслэн ассоциацизы но Йӧскалык ужпумъёсъя федерал агентство анай кылын гожтэм кылбуръёслы но веросъёслы вожвылъяськон ялӥзы. Отчы пыриськыны ӧтё финн-угор но самоди выжыосысь 17 аресыен 36 аресозь гожъяськисьёсты.
Конкурс куинь номинацияя радъяське:
«Анай кыл мынам улонам» (анай кыллы но солэн улонын интыезлы сӥзем гожтосъёс);
«Мынам калыке» (калык сямъёсты, тодмо адямиослэн Россилэн историяз но лулчеберетаз ватсэтсы сярысь гожтосъёс);
«Кунлэн калыкъёсыз — огъя семья» (эшъяськон но калыкъёслэн кусыпъёссы сярысь гожтосъёс).
Конкурсэ пыриськон понна гожтыны луэ кылбур, вакчи верос, очерк, новелла яке эссе. Ужъёс одно ик быдэстэмын луыны кулэ анай кылын, но озьы ик берыктэмын ӟуч кылэ.
Гожтэм ужъёсты кутозы 31-тӥ гудырикошконозь, соосты келяно afunrf@yandex.ru электрон почтае, «Наше поколение» шуыса пусйыса, яке «ВКонтакте» мерлыко вотэсысь нимлыко огиназы, яке +79093255148 телефон номеръя «Ватсап» но «Вайбер» сервисъёсы.
Вожвылъяськонлы йылпумъянъёс лэсьтэмын луозы 30-тӥ коньывуонозь.
Куронъёсын пыр-почгес чӧлсконпусъя тодматскыны луэ.
Ужрад Чечы спас кутсконэн тупа. Соин ик валтӥсь малпанэз – мушез, чечыез, ужась адямиез сӥлы карон. Таяз радэ но элькунысьтымы пӧртэм сэрегъёсысь муш возисьёс люкаськизы.
Яркмаркае люкаськем калыкез ӟечкыласа вераськизы вуэм куноос. «Удмурт Кенеш» огазеяськонлэн Тӧроез Татьяна Ишматова шумпотыса пусйиз, туэ ярмарка удмурт шӧмо пӧрмиз шуыса. Зэм но, Глазкарлэн йырыз Сергей Коновалов но удмурт дэрем дӥсяса празднике лыктӥз. Шӧдӥськиз со нимпулъёсын но – ӟученыз артэ удмурт кылын гожтэмъёс адӟиськизы.
Туэ нырысьсэ сцена вылын этномода возьматӥзы. Тросэз коллекциос но удмурт шӧмоесь вал: удмурт кырӟанъёс улсын возьматэмын вал муресазьёс, дэремъёс, туала дӥськут но чеберъяськон арбериос. Удмуртэныз оградын вал бесерман, ӟуч но бигер культураос.
Нош мушкасьёслэн быгатонлыкъёссы адскизы ӝӧкъёссы вылын. Пӧртэм посудаосы тырем чечы палэнтӥ ортчыны нокинлы но ӧз сёты. Татын ик котькудӥз быгатӥз сувениръёс но, турын-куаръёс но басьтыны, мастер-классъёсы пыриськыны, концерт учкыны.
Ярмарка зэмос праздниклы пӧрмиз.
(Туспуктэмъёс вотэсысь басьтэмын)
«Ойдо дышетом удмурт кылэз тодмо удмуртъёсын!» ӵектос ялӥзы кылем арын Глазкарысь «Зеленый мир» нылпи лыдӟетъюртын. Радъяське со быдэсак онлайн амалэн.
Ӵектослэн авторез Елена Блинова видео пыр тырше пиналъёсты удмурт кыллы дышетыны, озьы ик соослы удмурт книгаосмес возьматыны.
Пиналъёсты удмурт кылъёсын тодматӥзы ини «Удмурт Кенеш» огазеяськонлэн Тӧроез Татьяна Ишматова, «Удмурт дунне» газетлэн валтӥсь редакторез, «Удмурт нылкышно кенеш» огазеяськонлэн кивалтӥсез Елена Миннигараева, «Удмуртие» телерадиокомпанилэн валтӥсь редакторезлэн воштӥсез Сергей Касаткин, «Иднакар» газетлэн валтӥсь редакторез Елена Пономарева но мукетъёсыз.
Тунсыко но аспӧртэмлыко ӵектосэн пыр-почгес тодматскыны быгатӥськоды «Время приключений в Зелёном мире» огинэ выжыса.
Арысь аре, 2-тӥ гудырикошконэ, Ижкарысь Кызьпу арама удмурт калыкез «Выль» шулдыръяськонэ люка. Таяз радэ но куноос трос гинэ люкаськизы.
Огинэ люкаськем калыкез праздникен ӟечкылазы Кун Думаысь депутат Олег Гарин, йӧскалык политикая министр Эдуард Петров, Индустри ёрослэн кивалтӥсез Любовь Зайцева, «Удмурт Кенеш» огазеяськонлэн Тӧроез Татьяна Ишматова но мукет бадӟым куноос.
Татьяна Витальевна тау кариз вань люкаськемъёслы, ужрадэз радъясьёслы но вуэм фольклор коллективъёслы. Озьы ик со праздникен ӟечкылаз но шумпотонзэ вераз сям-йылолъёсмы туала арын но утисько шуыса. «Берло аръёсы элькунамы «Выль» праздник выль но выль кужым басьтыса калык пӧлы вӧлме. Со вера одӥгез сярысь: удмуртлыкмы азинске, асьмеос азьланьтӥськом удмурт лулчеберетмес. Со тӥляд тыршемдылы луыса! Азьпалан но ог-огмес валаса, тупаса улыны мед быгатомы. Праздникен эшъёс! «Выль» шулдыръяськонэн!» — шуиз со.
Празднике люкаськем куноосты шулдыртӥзы но шумпоттӥзы элькунысьтымы дано артистъёс Геннадий Бекманов но Геннадий Кузнецов, ӝужась кизилиос Оля Ипатова, Ирина Полякова но Александр Ешкеев, озьы ик Ижкарысь но Дэри ёросысь фольклор коллективъёс: «Тюрагай», «Чильтэр», «Мечтатели», «Ӟардон», «Ягдор» но «Задор мылкыд».
Пичиос но мӧзмыса ӧз улэ. Удмурт эпосысь геройёс – Батыр, Италмас но Лӧпшо Педунь – соосын ӵош йӧскалык шудонъёсын тодматскизы но шудӥзы.
Нош мылкыд карисьёс ас бакчаязы будэтэм емышъёсынызы «Удмурт емыш мунё» конкурсэ пыриськизы но кузьымъёс утӥзы. 1-тӥ интыез «Пыре ни азбарамы» лэсьтэм композициеныз Валентина Ившина басьтӥз. 2-тӥ «Лӧпшо Педунь» композициеныз Людмила Исхакова луиз. 3-тӥ интые «Бакча натюрморт» композициеныз Галина Эскендерова тубиз. Вормисьёс но котькудӥз, кин пыриськиз конкурсэ, имысьтыз синпель кузьымен пусъемын вал.
Выль емышъёслы сӥзем удмурт йӧскалык шулдыръяськон радъяськиз «Удмурт Кенеш» огазеяськонлэн Грак ёросысь ёзэтэзлэн кичӧлтэмезъя.
Грак ёросын «Выль» шулдыръяськон арлы быдэ ортче. Таяз радэ но со туж шулдыр праздниклы пӧрмиз. Люкаськем калыкез ӟечкылазы Грак ёрослэн йырыз Виктор Белов, «Удмурт Кенеш» огазеяськонлэн Тӧроез Татьяна Ишматова, Грак ёросысь ёзэтмылэн кивалтӥсез Александр Аблаев.
Праздникын радъямын вал кибашлыослэн ужъёсынызы вузкарон, выль сиён-юонъёсын адӟытонъёс. Сцена вылысен чузъяськизы шулдыр кырӟанъёс. Мылкыд карисьёсты мае ке ас киынызы лэсьтыны дышетӥзы. Пичи пиналъёс понна нимысьтыз площадкаос ужазы. Нош егитъёс вожвылъяськонын кужымзэс мерттазы. Праздник пумын вань люкаськемъёсты ческыт ӝукен куноятӥзы.
«Удмурт калыклэн сям-йылолъёсыз утисько шуыса тау карисько ёросъёсын но каръёсын тыршись кенешчиосмылы. Малы ке шуоно таӵе выллем праздникъёс семья куспын возисько ик ай, нош куке соос радъясько быдэс ёрос понна, со туж бадӟым огазеяськон, удмуртлыкез утён мылкыд сётэ калыклы, нимысьтыз егитъёслы! Туж шулдыр но асшӧмо ортчиз «Выль» шулдыръяськон Грак музъем вылын! Ӝутскем мылкыдын бертӥ сомында тодмоосын адӟиськыса, кырӟаса- вераськыса, выль бакча сиёнъёсын куно луыса», — гожтӥз мылкыдзэ аслаз вотэс бамаз Татьяна Ишматова.
Ижкарысь 284-тӥ номеро нылпи сад дасяське выль дышетскон арысен удмурт группа усьтыны. Али со бордын нимысьтыз ӧри ужа ини.
Нимысьтыз ужась ӧрие пырисько — садысь дышетӥсь, психолог, валтӥсь визьнодась, крезьгуръя кивалтӥсь но удмурт группаосын ужаны дась визьнодасьёс. Ваньзы ик люкаськемъёс бадӟым мылкыдзэс веразы «Удмурт Кенеш» огазеяськонэн кусып тупатыса ужаны.
«284-тӥ номеро нылпи сад туж мыло-кыдо пыриське пӧртэм удмурт ужрадъёсы, инъетсы соослэн дась», — шуэ «Удмурт Кенеш» огазеяськонлэн Ижкарысь Октябрь ёрос ёзэтэзлэн кивалтӥсез Валентина Ившина.
«Удмурт Кенеш» огазеяськон ивортэмъя.
23-тӥ-27-тӥ инвожое Чувашиысь Чебоксарыын нырысьсэ Нылпиослэн огъяросси фольклориадазы ортчиз. Со улсын Нылпиослэн фольклоръя росси Ассамблеязы – конкурс ужрад радъяськиз. Ижкарысь Кузебай Герд нимо йӧскалык гимназиысь калык эктонъя «Чебеляй» образцовой студия вожвылъяськонлэн вормисез луиз.
Нылпиослэн нырысетӥ огъяросси фольклориадаязы кунысь 76 улосвылъёсысь коллективъёс но нимаз быдэсъясьёс пыриськизы. Оглом 1 сюрс 100-лэсь трос 10-17 аресъемъёс люкаськизы. Соос пӧлысь Нылпиослэн фольклоръя росси Ассамблеязы пыриськыны 56 улосвылъёсысь 43 коллективъёсты но 17 нимаз быдэсъясьёсты бырйизы. Пиналъёс калык шудонъёсты, сям-йылолъёсты, шулдыръяськонъёсты возьматӥзы, калык кырӟанъёсты но крезьгурез быдэсъязы.
Удмуртиысь «Чебеляй» ансамбль тужгес бадӟымез делегация луиз – ужрадэ 22 кузя пыриськизы. Соос программаысьтызы пӧртэм эктонъёсты быдэстӥзы, пӧлаз, кылсярысь, «Ваче эктон», «Пумитан эктон», «Юмшан эктон». Пиналъёс шаермылэсь данзэ туж усто утизы. Ансамбльёс пӧлын конкурслэн лауреатъёсыз луизы.
«Чебеляй» сяна, фольклориадае Алнаш ёросысь пинал арганчи Никита Катаев (дышетӥсез Валерий Гоголев) но пыриськиз. Солы но ассэ конкурсын возьматыны шуд усиз. Пияш нимаз быдэсъясьёс пӧлын вожвылъяськиз но дипломант луиз.
«Удмуртия» агентство гожтэмъя. Туспуктэм вотэсысь басьтэмын.