«Тэчы, поттомушка, пыр ик, сарачи, капон, лыназе, эля, нёпо… Вавожысь ке тон, тодод, мае возьмато та кылъёс. Удмурт Кун университетысь удмурт кылосбуръя факультетэз быдтэмъёслэн куд-огезлэн йыразы кылиз на, дыр, диалектология параосын кылэм тунсыко кылъёс. Нош кылемъёсызлы оло воксё но удмурт кылъёс кадь ик уг пото, дыр», — верало Вавож ёросысь кенешчиос.
Удмурт кыллэн дунневыл нуналэз азьын Вавожысь шаертодонъя музейын ужасьёс но кенешчиос вавож диалектной кылъёсын выжлёгет «куизы», нош Выль Бия школаысь дышетӥсь Нина Ефремова со кылъёслэсь кылбур «пӧраз».
Кызьы мачко вавожъёс?
Чудӟаысь Дурга Серга
Ведра тыр кутэм дарга,
Нош Ӟамбай эшез Толя
Куать кило калтэм эля.
Толя кышно, эля кӧт,
Кытысь-мар тодэм – ӧйтӧд,
Эляез, пе, базарын
Вузало дуно дунын.
Картэз борды ериськиз,
Дарга сямен пештырскиз,
Мын, пе, чорты Сергаез –
Солэн но трос даргаез.
Ваньбурез малы быдтод,
Эсьмаса, коньдон жильдод:
Калык лыназе вискын
Ванмыз сямен базарын…
…Тани пуко кык эшъёс –
Воксё ӟудэмын соос:
Огез басьяськись лыктӥз,
«Шӧнтэмъёс» шуса кошкиз.
Мукетыз тани вуиз –
Ой, гориз ук, ой, гориз!..
Собере «Та «марымдэс»
Асьтэос сие», — шуиз…
Воргоронъёс, жадьыса,
Берто, нёпо коласа,
Кышнооссы нош пуко,
Поттомушка куадаса.
Толяез йыръе Оля:
«Эн кутылы ни эля…»
Сергаез тарка Верка,
Кожалод, ачиз дарга:
«Юнме дыр быдтид тӥни,
Эсьма кут вал чукырни…
Ма, марзэ басьтод солэсь,
Пештыр эля-даргалэсь?..
Табере, пе, кык эшъёс
Шурысь ваё чипейёс,
Ведра тыр ӧвӧл ке но,
Ӵок, уг зульы ни кышно…
Тэк пукемлэсь – кыл но бур,
Пӧрмиз оло ӧз кылбур –
Валады меда, эшъёс,
Кызьы мачко вавожъёс?..
Йылпумъяны кылбурме
«Лушкай» одӥгзэ кылме,
Вождэс эн вае, эшъёс,
Валалозы уйпалъёс…
Туннэ Удмурт автономи кылдытонлы инъет сётэм огез азьветлӥсьлы — Трокай Борисовлы — вордӥськемез дырысен 131 ар тырме.
Удмурт калыклэсь дано пизэ буре вайыса, «Удмурт Кенешлэн» исполкомчиосыз ужан нуналзэс солэн Ижкарысь синпелетэз дорын мытӥзы, Трокай Борисовлэн пыд азяз сяська поныса, сӥлы каризы.
Тодады вайытом, Трокай Борисовлэн вордӥськем нуналэз катэн тодэ ваён нунал сямен юнматэмын.
Пичи Пурга ёросысь Гожня гуртын дышетӥсьёс но бадӟым классын дышетскись пиналъёс понна «Инву гурез утчаса» фестиваль ортчиз. Ужрад радъямын вал Удмурт кыллэн нуналыз улсын.
«Кыллэн кужымез туж бадӟым. Вордскем кыллэн — вормонтэм ! Кылмылы юрттоно гинэ бурдъёссэ вӧлъяны», — шуэ «Удмурт Кенешлэн» ёзэтэзлэн кивалтӥсез Надежда Степанова.
Фестивальын пиналъёс понна ужазы 6 пумо кыл-куаос: «Хоккуысен верлиброзь», «Удмурт ке — кырӟа», «Шунды эктонъёс», «Шудон пӧл», «Удмурт дебат», «Кусаллям ми оригами».
Удмурт кыллэн туала ужпумъёсыз но вордскем кылмес ӟеч дышетон амалъёс сярысь котырес ӝок сьӧрын кенешизы удмурт кылъя дышетӥсьёс но «Удмурт Кенеш» огазеяськонлэн азьветлӥсьёсыз.
Бускель улосвылъёсын улӥсь удмуртъёс дорын удмурт культуралы сӥзем нуналъёс азьланьтӥсько. Эшшо одӥгез пумиськон ортчиз Киров улосвылысь Уни каргуртын.
Ужрад пленарной люкетэн кутскиз. Вань люксаськемъёсты пумитаса вераськизы элькунысьтымы йӧскалык политикая министр Эдуард Петров, Уни муниципал кылдытэт администрацилэн кивалтӥсезлэн воштӥсез Иван Машковцев, Киров улосысь Калыкъёслэн эшъяськон юртсылэн валтӥсь ужъёсызъя директорлэн воштӥсез Ирина Никитина.
Пумиськон азьланьтӥськиз тематической площадкаосын. Пусъём, котькуд улосын соос пӧртэмесь луо. Таяз радэ но дасямын вал Киров улосвылын улӥсь удмуртъёслэн куронъёсызъя. «Чипчирган» ансамбльлэн хореографез Лилия Леонтьева удмурт калык эктонъёсъя но шудонъёсъя мастер-класс возьматӥз, «Арт-резиденциысь» ӧнерчи Дарали Лели йӧскалык дэремъёслэн аспӧртэмлыкъёссы сярысь вераськиз, Калыкъёслэн эшъяськон юртысьтызы ужасьёс удмурт егитъёслэн азинлыко ӵектосъёсынызы тодматӥзы. Нимысьтыз «Удмурт Кенешлэн» площадкаез но ужаз. Татын удмурт кылэз но лучберетэз утён, азинтон но вӧлмытон пумысен юанъёсты сэрттӥзы-пертчизы.
Пумиськон Ижкарысь «Чипчирган» ансамбльлэн концертэныз йылпумъяськиз.
Ужрад туэ кыкетӥ ползэ радъяськиз ини «Удмурт нылкышно кенеш» огазеяськон сюлмаськемъя. Кылем арын конференция онлайн амалэн ортчиз вал, нош таяз радэ пиналъёс пумиськыны быгатӥзы.
Удмурт кылын тодос но эскерон ужъёсъя конференция 22-тӥ шуркынмонэ Кузебай Герд нимо йӧскалык гимназиын ортчиз. Отын асьсэлэсь ужъёссэс возьматӥзы быдэс элькунысьтымы покчи классъёсын дышетскись 42 пиналъёс.
Покчи тодосчиос ужъёссэс 3 ӧръя дасязы: шаертодон, адями но дунне, инкуазь. Дышетскисьёс вордскем гуртъёссылэн, улосчиоссылэн, выжыоссылэн улон-вылонзы сярысь тодӥзы, озьы ик ошмес вулэсь ӟечлыксэ, мамонтлэсь лыоссэ эскеризы, будосъёсты чаклазы.
Озьыен вормисе потӥзы Алнаш ёросысь Азаматысь Ксения Глазкова, Ульяна Евдокимова но Валенсия Абрамова, Шаркан ёросысь Карсашурысь Николай Вахрушев.
Конференциез йылпумъяса, пиналъёс понна зэмос праздник радъямын вал. Соос понна «Чебеляй» но «Крезь куара» ансамбльёс концерт возьматӥзы.
Туспуктэмез Максим Егоровлэн
Удмуртиысь поръёслэн «Одо Мари Ушем» но «Ижевск Мари» огазеяськонъёссы интернациональной семьяос понна вожвылъяськон радъяло. Отчы возьмало семьяосты, кытын кузпалъёс пӧртэм выжыысь луо.
Вожвылъяськон 18-тӥ толсуре Калыкъёслэн эшъяськон юртазы ортчоз. Нош куриськонъёсты келяно луоз 10-тӥ толсурозь yamakov@inbox.ru электрон адресъя.
Пыриськисьёс семьяязы утиськись сям-йылолъёсынызы, йӧскалык сиён-юонлэн рецептэныз тодматозы, творчествоя номер возьматозы. Вормисьёс пӧртэм номинациосъя пусйиськозы.
Вожвылъяськонлэн положениез чӧлскетъя.
Бускель улосвылъёсын улӥсь удмуртъёс дорын удмурт лулчеберетлы сӥзем нуналъёс кутскизы. Нырысетӥез пумиськон Пермь улосвылысь Куеда ёросын ортчиз. Удмурт калык люкаськиз Бадӟым Гондыр гуртын.
Удмуртиысь делегация быдэс автобусэн вуиз. Куноосты кырӟаса но эктыса лулчеберет юртысь ужасьёс пумитазы.
Ужрад кутскиз пленарной кенешонэн. Люкаськемъёс азьын вераськизы ӧтем куноос: Пермь улосысь йӧскалык но вӧсьбур кусыпъёсъя Департаментлэн директорез Анастасия Субботина, Куеда муниципал кылдытэтлэн кивалтӥсез Анатолий Верхоланцев, Удмурт Элькунысь йӧскалык политикая министр Эдуард Петров, «Удмурт Кенеш» огазеяськонлэн вице-президентэз Елена Ленцова, Пермь улосысь удмуртъёслэн йӧскалык лулчеберетъя центрзылэн кивалтӥсез Алина Туктагулова.
Удмурт лулчеберетъя нуналъёс азьланьтӥськизы секциосын но мастер-классъёсын. Кылсярысь, Бадӟым Гондыр школаын дышетӥсьёс но дышетскись пиналъёс понна история тодосъя кандидат, доцент, Кузебай Герд нимо йӧскалык музейысь тодосъя секретарь Юрий Перевозчиков удмурт калылкэн историез но культураез сярысь вераз. Чеберлыко киужъёсъя йӧскалык центрлэн ёзчиосыз люкаськемъёсты калык ӧнерлыкъёсын тодматӥзы. Калык эктонъя «Чебеляй» образцовой студилэн кивалтӥсез Наталья Чиркова удмурт йӧскалык эктонъёслы дышетӥз. Удмурт егитъёслэн «Шунды» огазеяськонзы проектъёссы сярысь мадиз, пиналъёсты «Шундыкар» лагере ӧтиз. Нош «Удмурт Кенешлэн» площадкаяз удмурт кылэз, лулчеберетэз утён но азинтон пумысен юанъёсты ӝутӥзы.
Яркыт но пуштросо ужрад йылпумъяськиз бадӟым концертэн. Люкаськемъёсты шулдыртӥзы Ижкарысь «Чебеляй» студиысь нылпиос но Пермь улосысь йӧскалык коллективъёс.
Удмурт кыллы но лулчеберетлы сӥзем нуналъёс 2- тӥ толсурозь кыстӥськозы. Вуоноез пумиськон ортчоз ини 24-тӥ шуркынмонэ Киров улосвылын. Ужрадъёс улсын озьы ик чакламын котырес ӝӧк сьӧрын кенешонъёс, билингва нылпиосын но соослэн анай-атайёсынызы семинаръёс, егитъёсын пумиськонъёс, эктыны дышетонъя но мукет мастер-классъёс. Пусъём, таӵе ужрадъёс тупал удмуртъёс дорын арлы быдэ ортчыло.
Шуркынмон толэзь туж узыр дано праздникъёсын. Соосты пусйыса, пиналъёсты пыриськыны ӧтё «Мон — удмурт» нимо вожвылъяськонэ.
Вожвылъяськонэ пыриськыны быгато 3 аресысен 11 аресозь нылпиос. Суредъёс быдэстэмын луыны быгато котькыӵе техникаен (акварель, гуашь, пастель, карандаш, фломастер, компьютерной графика но мукет).
Ужъёстэс возьмалозы 30-тӥ шуркынмонозь swetlanazinkova@yandex.ru электрон почтае. Вормисьёс пусъемын луозы Дипломъёсын но синпель кузьымъёсын.
Пыр-почгес вожвылъяськон сярысь тододы Положениысь.
Суред вотэсысь басьтэмын.
Удмурт лулчеберетлы сӥзем нуналъёс ортчозы бускель улосвылъёсын улӥсь удмуртъёс дорын. Таӵе ужрадъёс котькуд ар ортчыло кусыпъёсты тупатон но огазеян, палэнысь удмуртъёслэсь сюлэм шугъяськонъёссэс тодон но кылдэм ужпумъёссэс серттон-пертчон, пӧртэм ӵектосъёсты улонэ валче пыӵатон вылысь.
Таяз радэ пумиськонъёс чакламын Татарстанын, Башкорстостанын, Киров, Марий Эл но Пермь улосъёсын. Программа дасяське котькуд регионлы нимысьтыз, соослэсь мылкыдъёссэс, куронъёссэс но маин ке но кулэяськонзэс лыдэ басьтыса.
Ужрадъёс улсын удмурт кылэз но лулчеберетэз дышетон, утён но азинтон ужпумъёсъя котырес ӝокъёс, эктонъя но киужъёсъя мастер-классъёс, егитъёслы сӥзем площадкаос но трос мукет ужрадъёс радъяськозы. Нош йылпумъяськозы пумиськонъёс бадӟым удмурт концертъёсын. Удмурт лулчеберетэз возьматозы кырӟанъя но эктонъя «Айкай» кун театр, эктонъя «Чебеляй» студия но «Чипчирган» ансамбль.
Нырысетӥез пумиськон радъяськоз ини 18-тӥ шуркынмонэ Пермь шаерысь Бадӟым Гондыр гуртын.
Ужрадлэн радъясьёсыз: «Удмурт Кенеш» огазеяськон, Йӧскалык политикая министерство, Калыкъёслэн эшъяськон юртсы, Камсьӧр удмуртъёслэн центрзы но удмурт егитъёслэн «Шунды» дэменлыксы.
10-тӥ шуркынмонэ Калыкъёслэн эшъяськон юртазы «Удмурт Кенеш» огазеяськонлэн Пичи кенешез ортчиз. Люкаськемъёс вань удмуртъёслэсь азьвыл чакламтэ ӧтчамзэс, огазеяськонлэн уставаз воштонъёсты пыртон сярысь вераськизы, озьы ик мукет ужпумъёсты но эскеризы.
Ӧтчамез 7-тӥ толсуре ортчытыны чакламын. Ужрадэ Удмуртиысь, Башкортостанысь, Марий Элысь, Татарстаынысь, Киров, Пермь но Свердловск улосвылъёсысь, Москваысь, Санкт-Петербургысь делегатъёс пыриськозы. Соос огазеяськонлэн кык ар ӵоже ужамезлы йылпумъянъёс лэсьтозы, азьвыл ӧтчамын кутэм резолюциез быдэсъямлы дунъет сётозы.
Со сяна делегатъёс «Удмурт Кенешлэсь» выльдэм уставзэ юнматыны кулэ. Огазеяськонлэн валтӥсь ужкагазаз воштонъёсты, тупатонъёсты пыртонэз Пичи кенешлэн ёзчиосыз учкизы. «Туж трос выль куронъёс мерлыко огазеяськонъёс азе пуктэмын федерал катъёсы. Выльдӥськонъёс кутэмын луозы соосты чакласа. Кылсярысь, кызьы асьмеос быгатӥськом дистанционный амалэн ужрадъёсмес ортчытъяны, решениосмес кутылыны. Азьвыл со чалкамын ӧй вал. Нош пандемия возьматӥз: Пичи кенешъёсмес но, Исполкомъёсмес но, мукет куд-ог совещаниосмес но мукет сямен радъяно луылӥз», — шуиз «Удмурт Кенешлэн» Тӧроез Татьяна Ишматова.
Ӧтчамлы йылпумъянъёс лэсьтыса, Трокай Борисов нимо йӧскалык премилэсь лауреатсэ но огазеяськонлэн Данъян книгаяз пыртэм муртъёсты сӥлы карозы.
Пичи Пургаын Семён Самсонов нимо ёрос премилэсь лауреатъёссэ пусйизы. Данъян ортчиз Удмурт Элькунлэн нуналэзлы сӥзем сӥё-дано ужрад улсын.
Туэ данъетэз басьтӥзы «Удмурт Кенешлэн» Пичи Пурга ёзэтэзлэн азьветлӥсьёсыз:
— Галактионова Анна Фёдоровна — удмурт кылэз утён но азинтон удысын тыршемез понна;
— Владимир Федосеевич но Нина Ивановна Ботниковъёс — шаертодон но этнотуризм удысын азинлыко тыршемзы понна;
— Елизарова Зинаида Семёновна — литература но искусство удысын азинлыко тыршемез понна.
Туннэ, 4-тӥ шуркынмонэ, удмурт калыклэн Кунлык басьтэмез дырысен 102 ар тырмиз.
Таяз радэ но Ижкарысь Иосиф Наговицынлы, Трокай Борисовлы но Кузебай Гердлы сӥзем синпелетъёс доры уно адямиос люкаськизы: Элькун кивалтэтлэн Тӧроез, Кун Кенешысь депутатъёс, удмурт министръёс, «Удмурт Кенешлэн» азьветлӥсьёсыз, мукет йӧскалык огазеяськонъёслэн ёзчиоссы, егитъёс, пиналъёс.
Люкаськемъёс тодазы ваизы историез, Удмуртилэсь кунлыксэ кылдытонэ пыриськемъёслы трос шуныт кылъёссэс веразы, тау каризы удмурт калыклэн дано пиосызлы.
«Тыро-пыдо» конференцие ужъёсты келян дыр бырытозь кылиз на кык нунал гинэ. Дыртэ! Отчы возьмало 1-тӥ-4-тӥ классын дышетскись удмурт пиналъёслэсь тодослыко (научной) ужъёссэс. Радъясез: «Удмурт нылкышно кенеш» огазеяськон.
Эскеронъёсты таӵе ӧръёсъя дасяны луэ:
• Краеведение — Шаертодон
• Обществознание — Адями но дунне
• Естественные науки — Инкуазь
Конференцилэн радлыкез таӵе:
10-30 октябре возьмало тодослыко уждэс но соя PowerPoint программаын лэсьтэм презентациез udmurtnyl@yandex.ru почтае
31 октябре – 7 ноябре — оргкомитет устооссэ 30 ужъёсты быръёз
15 ноябре — соослэсь авторъёссэс Кузебай Герд нимо гимназие ӧтёзы. Нылпиос ужзы сярысь вералозы, жюри соосын кенешоз, юанъёс сётъялоз, быръёз тужгес но ӟечъессэ. Татын ик нылпиос понна наукая тунсыко шудонъёс радъяськозы.
Вань покчиос кузьым но таукарон басьтозы. Юанъёсын жингыртоно 8-950-155-23-56 телефонъя, яке вазиськоно проектлэн кураторезлы Наталья Образцовалы. Пыр-почгес гожтэм положениын.
Вери эскерон ужзэ келяса вуттӥз ни. Нош тон?
22-тӥ коньывуонэ Глазовысь ЗАГС ёзэтын удмурт сюан гуръёс чузъяськизы кык пар кузпалъяськисьёс – Анна Урсегова но Даниил Мусихин, озьы ик Мария Гагарина но Сергей Главатских – понна. Со сярысь ивортӥзы Глаз ёросын потӥсь «Иднакар» газетлэн вотэс бамаз.
Удмурт кылын гожтӥськон радлыкез ортчытӥз ЗАГС-ын ужась Наталья Вениаминовна Касаткина, со кемалась ини сюлмаз возьыса улӥз удмурт сюан ортчытонэз, ачиз ик малпаз, сценарий гожтӥз. Ужез пӧрмиз!
Удмурт йылолъёсты возьматӥзы но удмурт гуръёсты кырӟазы Глазов ёросысь «Чупчи гуръёс» калык ансамбль. Кивалтӥсез Ольга Бегишева но коллективын кырӟасьёс – ваньзы ик удмуртъёс, умой тодо сюан ортчытон сямез.
Егитъёслы шуныт кылъёссэ вераз «Удмурт Кенеш»-лэн Глазов карысь но ёросысь ёзэтэзлэн кивалтӥсез Елена Пономарева.
— Сюлмысьтым ик шумпотӥсько, егитъёс гажало но валало удмурт йылолъёсты. Удмурт сямъёсъя сюан ортчытон – со удмурт калыкез гажан гинэ ӧвӧл, со кылдэм семьядэ шуг-секытъёслэсь, керетонъёслэсь, син усемлэсь утён но. Тани, шуом, егитъёслэсь киоссэс ӵушконэн керттӥзы – со шудон ӧвӧл ук, куспетӥзы ортчисьёс, люкисьёс медаз луэ шуыса со ортчытӥське, – шуиз Елена Вениаминовна.
Дэри ёросысь Изгуртын Эрик Батуев нимо ёрос премиез сётон ужрад ортчиз. Туэ премиен пусъемын ёросысь дышетонъя управлениен кивалтӥсь, Росси Федерациысь огъя дышетон удысысь сӥё-дано ужась, Удмурт Элькунысь дано дышетӥсь Ирина Васильевна Гаврилова.
Ирина Васильевна вань улонзэ сӥзиз дышетон удыслы, кема аръёс ӵоже ужа ини дышетонъя управлениын. Озьы ик со «Удмурт Кенешлэн» ёрос ёзэтэзлэн ёзчиез луэ. Дырыз вань-а, ӧвӧл-а, котьку но удмурт ужрадъёсы пыриське.
Ватсалом, тодмо удмурт кылбурчи, прозаик но журналист Эрик Батуев улонысь кошкиз 2003-тӥ арын. Улосчизэс буре вайыса, Дэри ёросын солэсь нимзэ нуллӥсь премиез юнматӥзы. Татчыозь соин 22 мурт пусъемын ни.
23-тӥ коньывуонэ 90 арес тырмысал Удмуртиысь калык кылбурчилы, культура удысысь дано ужасьлы, прозаиклы но нылпи писательлы Герман Ходыревлы.
Г. Ходыревлэн 90 арес тырмонэзлы сӥзьыса, Йӧскалык библиотекаын туннэ, 20-тӥ коньывуонэ, 17.00 часын ортчоз литература ӝыт. Писательлэн улон сюресэныз но творчествоеныз тодматозы Удмурт кун университетысь филология наукаосъя доктор Татьяна Зайцева, Удмуртиысь искусство удысысь дано ужась, крезьгурчи Юрий Толкач, Удмуртиысь дано журналист Николай Кузнецов. Атаез сярысь тодэ ваёнъёссэ вералоз кылбурчилэн нылыз, Удмуртиысь композиторъёслэн огазеяськонзылэн кивалтӥсез Марина Ходырева.
Озьы ик библиотекаын радъямын луоз Герман Ходыревлы сӥзем «Кизилиос уг кысо» адӟытон.
Гай Сабитовлэн творчествоезлы сӥзем тодосъя но эскеронъёсъя «Дорад ӧте тодмо сюрес» калыккуспо конференциез радъяло Удмуртиысь йӧскалык дышетонъя институт но Татарстанысь Кукмор ёросысь Сутэр Починка гуртысь школа.
Конференцие пыриськыны быгато Удмуртиысь, Татарстанысь но мукет улосвылъёсысь школаын удмурт кылэз «Удмурт кыл» огъетъя дышетӥсь 5-тӥ-11-тӥ классъёсысь пиналъёс.
Ужъёсты таӵе ӧръёсъя кутозы:
— «Г. Сабитовлэн улон сюресэз но творчествоез»: Гай Сабитовлэн биографиезъя но творчествоезъя эскерон ужъёс;
— «Г. Сабитов но солэн вордскем шаерез»: шаертодонъя эскерон ужъёс;
— «Г. Сабитов но туала улон»: туала удмурт лулчеберетъя эскерон ужъёс.
Куриськонъёсты 15-тӥ шуркынмонозь sabitovconference@mail.ru электрон почтае келяны кулэ луоз, нош ужъёсты утён 2-тӥ толсуре Сутэр Починка школаын ортчоз.
Вормисьёсты но призёръёсты дипломъёсын пусъёзы. Тужгес усто ужъёсты удмурт кылэз но литератураез дышетонъя «Удмурт кылдунне» порталэ поттозы.
Конференция сярысь пыр-почгес татын.
Гай Сабитович Сабитов – удмурт кылбурчи, радиожурналист. Вордскиз 15-тӥ куарусёнэ 1915-тӥ арын Татарстанысь туала Кукмор ёросысь Выль Каньсар гуртын. СССР-ысь гожъясьёслэн огазеяськонзылэн ёзчиез, УАССР-ысь лулчеберет удысысь дано ужась, УАССР-лэн кун премиезлэн лауреатэз.
Музейын пичильтыкъёс понна экскурсиос ортчытъяло. Татын соос вордскем шаеренызы, солэн лулчеберетэныз, удмурт калыклэн сям-йылолъёсыныз но дано адямиосыныз тодматско.
«Родничок» нимо нылпи садлэн кивалтӥсез Алёна Петрова ивортэмъя, музеен кивалтэ визьнодасьсы Светлана Куликова. Экскурсиос сяна, нылпиосын со пöртэм тунсыко ужрадъëс, мастер-классъëс, кенешонъëс радъялля на.
Удмуртлыкез гажан но утëн бордын ужан амалъëсты улонэ пыӵатыны алнашъёслэн луонлыксы кылдӥз ӵектос гожтыса, озьы ик нимысьтыз «Удмурт Кенеш» огазеяськон юрттэмен.
Ӵектос улсын интерактив-музее басьтэмын вал адӟытонэз радъян вылысь арбериос, мунёос, вуремын лымшорпал но уйпал удмурт дэремъёс.
Сое интыязы Улын Юри школалэн борддор вылаз.
Людмила Ильинична — Росси Федерациысь дышетон удысысь сӥё-дано ужась, Росси Федерациысь ужысь ветеран, Пичи Пурга ёрослэн дано нылыз, Семен Самсонов нимо Пичи Пурга ёрос премилэн лауреатэз, Улын Юри школалэн азьвыл директорез но калыктодос музеез кылдытонлэн кичӧлтӥсез.
Людмила Федероваез данъяса, буре ваён ужрадэ люкаськизы солэн ӵыжы-выжыосыз, дышетӥсьёс, дышетскисьёс, «Удмурт Кенеш» огазеяськонлэн ёзчиосыз но мукетъёс. Люкаськемъёсты пумитаса вераськизы Пичи Пурга ёросысь депутатъёслэн кенешсылэн кивалтӥсез Василий Москвин, «Удмурт Кенешлэн» Тӧроез Татьяна Ишматова но огазеяськонлэн Пичи Пурга ёросысь ёзэтэзлэн кивалтӥсез Надежда Степанова. Тау карон кылъёсын вазиськизы Людмила Ильиничналэн кузпалыз Михаил Федоров но пиез Сергей Федоров.
Нош дышетӥсьёс но дышетскись пиналъёс пичильтык концерт возьматӥзы. Пумиськон туж шуныт радъяськиз.
Пусъём, мемориал пул лэсьтэмын Улын Юриысь Удмурт мерлыко центрлэн кичӧлтэмезъя но «Удмурт Кенеш» огазеяськонлэн юрттэменыз.
«Гербер 2023» удмурт йӧскалык шулдыръяськонлы дасяськон кутскиз. Туннэ Вотка ёрос администрациын праздникез радъясь комитетлэн нырысетӥ пумиськонэз ортчиз.
Кенешонэ пыриськизы йӧскалык политикая министр Эдуард Петров, Вотка ёрослэн йырыз Илья Прозоров, «Удмурт Кенеш» огазеяськонлэн ёзчиосыз, Йӧскалык политикая министерствоысь но Калыкъёслэн эшъяськон юртысьтызы ӧнерчиос.
Люкаськемъёс ужрадлэсь пуштроссэ, валтӥсь ӧръёссэ, ортчытон интызэ пыр-поч эскеризы. Матысь дыре ини праздниклэн концепциез тодмо луоз.
Министр Эдуард Петров осконзэ вераз, ужрадлы дасяськон капчиен мыноз но сӥё-дано ортчоз шуыса.
Пусъём, 2023-тӥ арын «Гербер» шулдыръяськонэз 17-тӥ инвожое Пихтовка гурт вӧзысь Сива шур дурын радъяны чакламын.
Удмуртъёслэн «Гербер» праздниксы 1992-тӥ арысен ортчытӥське ни. Удмурт Элькунынысь сяна, шулдыръяськонэ Россиысь пӧртэм улосвылъёсысь но куноос вуо. Кылсярысь, таяз арын празднике 20 сюрлэсь трос калык люкаськиз.
Туннэ, 7-тӥ коньывуонэ, «Удмурт Кенешлэн» исполкомез люкаськылӥз. Бадӟым ужпумъёс витё огазеяськонэз.
Толсуре вань удмуртъёслэн азьвыл чакламтэ ӧтчамзы ортчыны кулэ, нош солэсь азьвыл — Пичи кенешлэн пумиськонэз. Ӵапак отын делегатъёс но ӧтчамлэн нуналэз юнматэмын луозы.
Валтӥсез юан герӟаськемын «Удмурт Кенешлэн» уставаз тупатонъёсты пыртонэн. Кызьы пусйиз огазеяськонлэн Тӧроез Татьяна Ишматова, туннэ мерлыко огазеяськонъёслэсь ужзэс радъян пумысен федерал катрадлыке туж трос воштӥськонъёс пыртэмын, со дыре ик мукет кунъёсын кусыпъёсты радъян-возён ласянь куронъёс но чурытгес пуктэмын. Соин ӵош огазеяськонлэн уставез выльдӥськонэз кулэ каре, нош сое ӧтчам гинэ юнматыны быгатэ.
Али дыре «Удмурт Кенешлэн» котькуд кар но ёрос езэтъёсаз кык ар ужамзылы йылпумъянъёсын конференциос радъяськозы. Озьы ик ӧтчамын но быдэс огазеяськонлэн ужамезлы йылпумъянъёс лэсьтозы, азьланезлы ужпумъёс пуктозы.
«Удмурт нылкышно кенеш» нош ик ялӥз нылпиослы «Тыро-пыдо» конференция сярысь. Отчы 1-тӥ-4-тӥ классын дышетскись удмурт пиналъёс пыриськыны быгатозы.
Ужъёсты куинь ӧръёсъя дасяны луэ: «Шаертодон», «Адями но дунне», «Инкуазь». Ужъёс но соин тодматонъёс одно ик удмурт кылын луыны кулэ.
Ужъёсты 10-30 коньывуонэ udmurtnyl@yandex.ru электрон адресъя возьмало. Собере, 7-тӥ шуркынмонозь, жюри устооссэ 30 ужъёсты быръёз. Соослэсь авторъёссэ 15-тӥ шуркынмонэ Ижкарысь Кузебай Герд нимо гимназие ӧтёзы. Отын ини пиналъёс ужзы сярысь вералозы, дунъясьёслэн юанъёссылы валэктонъёс сётъялозы.
Котькуд ӧръя быръемын луозы куинь тужгес ӟеч быдэстэм ужъёс. Ужрад улсын ик нылпиос понна наукая тунсыко шудонъёс радъяськозы.
Конференцилэн куронъёсыныз пыр-почгес тодматскыны луэ гожтэм положениысь. Кылдэм юанъёсын жингыртоно 8-950-155-23-56 телефонъя.
Якшур-Бӧдья ёросысь нылпиосын семьяос понна «пукон корка» выллем удмурт шулдыръяськон ӝытъёс радъяськозы. Ужрадъёс тямыс гуртъёсын ортчытыны чакламын.
Радъясьёслэн верамзыя, озьы соос удмуртлыкез калыке пыӵатозы. Ӵектосэ пыриськисьёсты соос удмурт сям-йылолъёсын, фольклорен, калык праздникъёсын тодматозы, ӵошен эктозы-кырӟалозы, пӧртэм шудонъёсын шудозы, одно ик ческыт сиё-юонъёсты но пӧралозы.
Та нуналъёсы ӵектос улсын нырысетӥез пумиськон ортчиз ини. Радъяськиз со Якшур гуртысь удмурт культурая «Туклячиос» центрын.
«Куноосмы шумприч гинэ вуизы, гань-гань кылзӥськыса пукизы, тодматскизы сӥзьыл дыръя ортчытъяськись удмурт сям-йылолъёсынымы. Табере соос туж умой тодо «Виль», «Пукрол» но «Сӥзьыл юон» праздникъёсты. Мӧйыослы но, пичиослы но туж кельшиз кадь «пукон коркамы». Вуонояз пумиськонъёсамы но курисько ини», — вера проектлэн одӥгез радъясез Татьяна Колхир.
Шулдыръяськон ӝытэ пыриськемъёс удмурт шӧмо пичильтык синпелет кузьымъёсын кошкизы. Нош вуоноез пумиськон радъяськоз ини 7-тӥ коньывуонэ Сюровайын.
29-тӥ куарусёнэ Удмурт кылын шонер гожъяськонъя элькун ӧрилэн ёзчиосыз люкаськылӥзы. Пумиськонлэн мугез — удмурт кылын шонер гожъяськонъя кыллюкамез эскерон. Со сярысь ивортэ Йӧскалык политикая министерстволэн пресс-службаез.
Ӧрилэн ёзчиосыз тупатъям правилоос пумысен мылкыдзэс шараязы, споръяськоно юанъёсты сэрттӥзы-пертчизы, дасям кыллюкамлэсь кулэлыксэ пусйизы.