Ужрад улсын люкаськемъёс эктӥзы, кырӟазы, сяська бичазы, панно но веник керттӥзы, мунчое пыризы, шурын пыласькизы, туж ческыт ӝук сиизы но турын чай юизы.
Ужрадэз радъязы но ортчытӥзы «Удмурт Кенеш» огазеяськонлэн Вавож ёросысь ёзэтэз но «Ошмес» нимо шутэтскон база. Нош Выль Биялась фольклоръя «Гербер» калык ансамбльлы луыса пумиськонзы эшшо но шулдыргес пӧрмиз.
«Удмурт Кенеш» огазеяськонлэн Вавож ёросысь ёзэтэз ивортэ:
«Вавож удмуртъёслэн Кипанча йылолзы сярысь тросэзлэн кылылэмзы но ӧвӧл. Мар веранэз, асьмеос, вавожъёс, гинэ но троссэ йылолэн герӟаськемзэ вунэтӥськом ини. Мӧйыосын вераськыса, тани мар тодӥм.
Пӧсьтолэзьлэн сизьыметӥ нуналаз ӟучъёслэн языческой Иван Купала, нош православнойёслэн Рождество Иоанна Предтечи праздникъёсынызы ӵош ми ортчытӥськом Кипанча сям-нергемес. Та нуналэ котькуд семьяын мунчо эсто, азьвыл ӝытаз котькудӥзлы сяськаен, ческыт зыно турынэн сураса бичам веник дасяло. Со веник лысву пӧлын уйзэ «пыласькыны» кулэ. Лысву тазалык кузьма. Веник пумез уг корало. Воргоронъёслы бадӟымесь веникъёс дасяло. Пӧлаз тыпы, кызьпу вайёсыз тросгес луэ, нош сяськаосыз – ӧжытгес. Нылкышноослы пичиесьгес веник кертто, кызьпу ваёгес каро, пӧлаз быдэн тыпы, палэзь вайёс поно. Егит нылъёслы дасям венике тросгес поно сяська, нош пичи пиналъёслы пичи сяська веник кертто.
Парем веникен кокаськыкузы, кызьпу кадь веськрес, тыпы кадь юн, сяська кадь чебер мед луо, та веник вань висёнъёсме мед басьтоз шуыса, кыл верало. Потон азязы гондыркуарен ӵушисько, гондыр кадь кужмо, провор мед луо шуыса. Мунчоысь потыкузы, солы мышкин султыса, вениксэс мунчо липет йылэ таӵе кылъёс вераса сэрпалто: «Вань висёнэ веник сьӧры мед кошкоз!» Чаклало вылэм на, кызьы веник липет вылысь усе: ныдыныз уллань ке, умойлы ӧвӧл. Веникез бичаса, шур кузя лэзё вылэм, веникен ӵош вань висёнэз, уродзэ шур ву мед нуоз, пе».
Отчы пыриськизы солэн Удмуртиысь ёзчиосыз но: Ассоциацилэн тӧроезлэн воштӥсез, Удмурт Элькунлэн Кун Кенешезлэн тӧроезлэн воштӥсез Татьяна Ишматова, УдГУ-ысь профессор Наталья Кондратьева но «Удмуртия» телерадиокомпанилэн валтӥсь редакторезлэн воштӥсез, «Удмурт Кенеш» огазеяськонлэн исполкомчиез Сергей Касаткин.
Кенешонын эскеризы Свердловск улосвылын финн-угор лулчеберетэз азинтон, кылэз дышетон ужпумъёсты. Сергей Касаткин ивортон лэсьтӥз удмурт кылэз, культураез утёнын но азинтонын удмурт СМИ-ослэн интызы пумысен. Со пусйиз «Удмуртия» телерадиокомпанилэсь, Йӧскалык прессалэн юртэзлэсь но Даур-ТВ удмурт интернет ТВ-лэсь но радиолэсь ужамзэс.
Ужрад улсын ик Свердловск улосвылысь финн-угор калыкъёслэн культурая огазеяськонъёсынызы пумиськон радъямын вал. Вераны кулэ, Свердловск улосвылын удмуртъёслэн огазеяськонъёссы но ужало, соос кичӧлтэмъя отын уно гинэ удмурт ужрадъёс ортчыло.
Озьы ик Ассоциаци но Свердловск улосвыллэн Кивалтэтэз куспын валче ужан сярысь тупанкыл юнматэмын вал. Со улэ гожтӥськизы Россиысь финн-угор калыкъёслэн ассоциацилэн тӧроез Петр Тултаев но Сверловск улосвыллэн губернаторез Евгений Куйвашев.
Ижкарын праздник 2-тӥ гудырикошконэ ортчоз. Туэ со радъяськоз Космонавтъёслэн парказы, кутсконэз — 18.00 часын.
Праздник улсын пӧртэм интерактив площадкаос радъяськозы, чеберлыко киужъёсын адӟытон-вузкарон ужалоз. Валтӥсь сцена вылын фольклор коллективъёс концерт возьматозы. Калыкез озьы ик шулдыртозы яратоно, тодмо удмурт кырӟасьёсмы — Анна Плотникова но Геннадий Кузнецов.
Семьяос быгатозы «Удмурт емыш мунё» вожвылъяськонэ пыриськыны — бакчаязы будэтэм емышъёссэс возьматыны, соослэсь тунсыко композициос лэсьтыса вайыны.
Вань люкаськем калык вӧсям ӝукен кунояськоз
Толон, 12-тӥ инвожое, Киров нимо парк ас котыраз удмурт лулчеберетэз яратӥсьёсты но дунъясьёсты люказ. Татын «Ижкар Гербер» шулдыръяськон ортчиз.
Яркытэсь йӧскалык дэремъёс, жингрес калык кырӟанъёс, чалмисьтэм арган куараос, задоресь тыпыртонъёс — удалтӥз ке удалтӥз!
Ужрад Семьялэн арезлы сӥземын вал, соин ик та нуналэ сцена вылысен сӥлы каризы адӟем карымон, удмурт калык йылолъёсты утись но азинтӥсь егит семьяосты. Озьы ик парклэн валтӥсь сцена вылаз потазы Ижкарысь эктонъя но кырӟанъя коллективъёс, соос вань люкаськем куноослы мылкыд кузьмазы. Учкисьёс интыязы пукыны ик ӧз чидалэ, огзы бӧрсьы огзы эктыны дыртӥзы.
Ӧз ортчы шулдыръяськон интерактивной программатэк но. Пичиос мастер-классъёсын кышетъёсты чеберъязы, суйпоскесъёс пунӥзы, пӧртэм вожвылъяськонъёсы пыриськизы. Мукет площадкаосын вань мылкыд карисьёс удмурт шудонъёсын шудӥзы, калык визькылъёсын тодматскӥзы, егит крезьгурасьёсты кылзӥзы. Нош литератураен тунсыкъяськисьёс удмурт гожъяськисьёс сярысь тодон-валанъёссэс эскеризы.
Быдэс нунал ӵоже элькунысь кибашлыослэн ужъёсынызы адӟытон-ярмарка ужаз. Котькудӥз быгатӥз аслыз синпелет басьтыны. Тунсыкоесь туспуктэмъёс но лэсьтыны луэ вал, со понна юри дасямын вал чебер фотозонаос.
Вань калык пӧсь чаен, перепечен, табанен но ӝукен кунояськиз. Йылпумъяськиз шулдыръяськон удмурт позыръяськонэн.
29-тӥ инвожое Татарстанын «Гырон быдтон» праздник ортчоз. Удмурт лулчеберетлы сӥзем шулдыръяськон туэ Менделеевск ёросысь Енабердино гуртын радъяськоз.
Вуэм куноосты вите бадӟым концерт. Люкаськемъёс азьын кырӟалозы-эктозы «Айкай» кун театрысь артистъёс, Брангуртысь песянайёс, Татарстанысь фольклор коллективъёс.
Дышем сямъя ини шулдыръяськон бусыын ужалозы трос пӧртэм площадкаос. Вузкарон-адӟытон ярмаркаысь басьтыны луоз чеберъяськонъёс, мылкыд карисьёс удмурт йӧскалык шудонъёсы но киужъёсъя мастер-классъёсы пыриськыны быгатозы, егитъёс понна «Чеберина но Батыр», семьяос понна «Шудо-буро удмурт семья» вожвылъяськонъёс радъяськозы.
Со сяна, праздникын зэмос удмурт сюан шудозы.
Йылпумъяськоз ужрад этно-дискотекаен, кытын ваньзэс шулдыртозы егит удмурт кырӟасьёс — Shoner Paul, Иван Белослудцев, Иван Котельников но Алёна Тимерханова.
Та нуналъёсы Мӧнняллан, кык ар талэсь азьвыл сямен ик, туж шулдыр но жингрес вал. Татын ӵужонболэн шудӥзы.
Ужрадазы вуизы Кионысь, Уёысь, Ӟамбайысь но Водӟиысь командаос. Озьы ик асьсэлэсь командаоссэс шудон бусые поттӥзы территориальной отделъёслэн кивалтӥсьёссы, «Удмурт Кенешлэн» Вавожысь ёзэтэз но кузёоос.
Нырысь шудоназы шальк-шальк пиос шудӥзы ке, таяз радэ нылкышноос но пыриськизы. Эсьмаса ёрос тӧролэсь ужзэ быдэсъясь Сергей Зорин но пӧлазы мыло-кыдо бызьылӥз. Нош кенешчимы, ёрос депутатъёслэн Кенешсылэн тӧроез Александр Шишкин туж усто комментатор вал.
Шудон бусыын ваньмызлэсь шӧртчи луэмзэс возьматӥзы водӟи пиос. Соос ик утӥзы Йӧскалык театре билетъёс. Билетъёсын пусъемын ужрадэз радъясьёс но, мӧння калык (бригадирзы Светлана Буркова). Таӵе кузьымен шудӥсьёсты шумпоттӥз «Удмурт Кенешлэн» Тӧроез Андрей Ураськин. Кыкетӥ интые потӥзы ӟамбай «Ерпечкаос», нош куинетӥ луизы мӧння «Батыръёс». Брызгаловской территориальной отделэн кивалтӥсьлэсь Виктор Кислицинлэсь кузьымзэ басьтӥз самой мӧйыез но шӧртчиез шудӥсь – Зямбайгуртской теротделэн кивалтӥсь Сергей Александров.
Россиысь калыкъёслэн ассамблеязылэн Кенешезлэн тӧроез Светлана Константиновна Смирнова Удмуртие вуылӥз. Со лулчеберетъя йӧскалык огазеяськонъёслэн кивалтӥсьёсынызы но азьветлӥсьёсынызы пумиськылӥз.
Пумиськон улсын йӧскалык кусыпъёсты юнматонъя ужпумъёс но пӧртэм выжыысь калыкъёслэсь анай кылзэс утёнъя юанъёс ӝутэмын вал.
Ӵапак ассамблея туннэ Россиын улӥсь калыкъёсты одӥг бадӟым семьяе огазея, йӧскалык ӵектосъёсты улонэ пыӵатыны луонлык кылдытон сярысь сюлмаське. Светлана Смирнова туж вылӥ дунъяз Удмуртилэсь калык лулчеберетэз азинтонъя но калыкез огазеянъя ужзэ. Нош бадӟым ужлы кутскон 30 ар талэсь азьвыл сётэмын вал — соку элькунын Йӧскалык ужъёсъя комитет кылдытӥзы. Со вакытэ калык кусыпъёсын огыр-бугыр вал, соин ик югдурез тупатон капчиен ӧз сётӥськы. Нош туннэ ини Йӧскалык политикая министерство но Эшъяськон юрт юрттэмен, лулчеберетъя йӧскалык огазеяськонъёс азьлань ӵошен вамышъяло, ӵошен югдытон уж нуо, ӵошен шулдыръясько.
Элькунамы улонэ пыӵало пӧртэм проектъёс. Кылсярысь, 2023-тӥ арын гинэ Удмуртиысь 80-лэсь ятыр ӵектосъёс вормизы Азьмуртлэн грантъёсъя фондэзлэн ялэм вожвылъяськоназ. Соос сӥземын лулчеберетэз, анай кылэз утёнлы, егитъёслы Атыкай музъемез гажан мылкыдэз пыӵатонлы но мукет.
Исполкоммылэн кенешаз Ашальчи Оки нимо йӧскалык премилэсь лауреатъёссэ юнматӥзы. 2024-тӥ ар понна сӥё-дано нимез басьтозы – эмчи, Ижкарысь эм академиысь ӧнерчи, эм тодосъя кандидат, «Удмурт Кенеш» огазеяськонлэн ёзчиез Ботникова Елена Аркадьевна но Удмурт кун университетлэн Можга филиалэзлэн кивалтӥсез, филологи тодосъя кандидат, «Удмурт Кенеш» огазеяськонлэн ёзчиез Кибардина Татьяна Михайловна.
Ӟечкылан ужрад дышем сямъя радъяськоз Ашальчи Окилы сӥзем лыдӟонъёс улсын 16-тӥ оштолэзе.
Пусъём, Ашальчи Оки нимо премиен пусйисько шаерысьтымы адӟем карымон нылкышноос, кинъёс трос кужымзэс но дырзэс сёто анай кылмес, удмурт лулчеберетмес, тодос, дышетон, эм удысъёсты азинтонлы.
Яр ёросысь кенешчиос пиналъёс понна урам шудонъёс радъязы. Ужрад Юдчино гуртын ортчиз.
Ольга Барышникова, ёрос ёзэтлэн кивалтӥсез ивортэ: «Эшъëсын ӵош шутэтскыны но, ужаны но капчи. Нылпиосын шулдыр дырмес ортчытим. Шантрапа шудонъёс радъям. Укватэн но ужам, гынсапеген но шудӥм, гольф удмурт сямен но эскертӥм. Но туж шумпотон ваиз Синербол шудон. (Милям синер шуо исьнерез)».
Та вакытэ бадзымъëс но тэк ӧз улэ. Лымы вылтӥ лашкинтон машинаосын ӵошатскизы, мыло-кыдо гирьёсты ӝутканэ пыриськизы.
Озьы ик ужрад улсын люкаськемъёсты ческыт турын чаен но пӧсь табанен куноязы.
Та нуналъёсы «Удмурт Кенеш» огазеяськонлэн Тӧроез Андрей Ураськин
Эгра ёросысь Кабачигуртэ вуылӥз, гурт калыкез быдэсак выльдэм П.К.Поздеев нимо лыдӟиськоннилэн усьтӥськеменыз ӟечкылаз.
Ужрадэ озьы ик пыриськизы культурая министр Владимир Соловьев но йӧскалык лыдӟетъюртлэн кивалтӥсез Татьяна Тенсина.
Кабачигуртысь выльдэм лыдӟиськонни модельной шуыса лыдъяське ни. Табере татын книгаосын ӝажыос гинэ интыямын ӧвӧл, мылкыд карисьёс ужаны но, фильмъёс но учкыны, пӧртэм ужрадъёс но ортчытъяны быгатозы. Озьы ик лыдӟиськонниын нимысьтыз историлы сӥзем инты висъямын, интерактивной зона лэсьтэмын, удмурт гожъясьлы Петр Поздеевлы сӥзем музей кылдытэмын.
Этнокультурая дышетонлэн азинскемезлы сӥзем эчешон площадка радъяськиз туннэ тодон-валан сётон удысын ужасьёслэн Август конференцизы улсын. Ужрад ортчиз Кузебай Герд нимо йӧскалык гимназиын.
Элькунысьтымы анай кылъя но литературая дышетӥсьёс, дышетон ужъюртъёслэн кивалтӥсьёссы, ватсаса тодон-валан сётон удысысь ӧнерчиос, нылпи садын ужасьёс, озьы ик мыло-кыдо анай-атайёс аспӧртэмлыко кейс-технология амалэз ужазы кутыса, дышетонын сюлмаськытӥсь ужпумъёсты сэрттӥзы-пертчизы, анай кылэз дышетонъя пӧртэм сюлмаськытӥсь юанъёслы валэктонъёс утчазы-шедьтӥзы, азинскыны выль тунсыко амалъёсты малпазы-кылдытӥзы.
Конференцие модераторъёс, нодъясьёс но экспертъёс чотын пыриськизы огазеяськонмылэн ёзчиосыз но.
Туэ шаерысьтымы нимо-дано нуналъёслэн календарязы кылдӥз выль праздник — Йӧскалык костюмлэн нуналыз. Пусъёмы сое арлы быдэ куарусён толэзьлэн 3-тӥ удмуртарняяз.
Таяз арын праздник тупа 15-тӥ куарусёнэ. Сое пусйыны ӧтчаське Пичи Пурга черкогурт — отын 16-тӥ куарусёнэ «Учке мынэсьтым дэремме!» фестиваль ортчоз.
Ужрад сӥземын удмурт культураез азинтонлы, удмурт калык дӥсьлэсь чеберзэ, аспӧртэмлыксэ возьматонлы но данъянлы. Радъясьёсыз: Лулчеберетъя но Йӧскалык политикая министерствоос, «Удмурт Кенеш» огазеяськон но Пичи Пурга ёрос администрация.
Фестивале пыриськон понна куриськонъёсты ыстоно 1-тӥ сентябрёзь. Юанъёсъя вазиськоно:
— 8-34138 — 4-11-20 — фестивале пыриськон понна (Степанова Надежда Андреевна)
— 8-34138-4-16-08 — фестивальлэн вожвылъяськон люкетаз куриськонъёсты кутон (Матвеева Оксана Леонидовна, Филимонова Ирина Олеговна)
Ужрад сярысь пыр-почгес ивор шедьтыны луоз фестивальлэн вотэс бамысьтыз — Фестиваль “Оцените моё платье”
Пусъём, фестиваль радъяське ни 2017-тӥ арысен. Отчы арлы быдэ тросгес но тросгес калык пыриське. Асьсэлэсь вурем-пӧрмытэм дӥськутсэс калыклы возьмато пӧртэм мастерскойёсысь вуриськисьёс, модая школаосысь нылъёс но пиос, дэремъёсты суредась-кылдытӥсь дизайнеръёс, шаермылэн пӧртэм сэрегъёсысьтыз кибашлыос.
Башкириысь Татышлы ёросысь В.М. Комаров нимо лагерьын удмурт пиналъёс понна 20-тӥ ползэ ини ӧсъёссэ усьтӥз «Усточикар» лагерь.
Туэ пиналъёс «Дӥськут дизайн», «Суредаськон», «Театр», «Фольклор» ӧръёсъя тодон-валан люкалозы, озьы ик ваньмон дыръязы удмурт сям-йылолъёсты дышетозы, удмурт ужрадъёсы пыриськозы. Пиналъёсын Башкортостанысь но Удмурт Элькунысь ӧнерчиос ужалозы.
Толон, 10-тӥ гудырикошконэ, лагерез усьтонлы сӥзем ужрад радъяськиз. Отчы лыктэм пиналъёс пӧртэм ласянь быгатонлыкъёссэс возьматӥзы.
Нылпиосты ӟечкыласа вераськизы Татышлы ёрос администрацилэн кивалтӥсез Ф.Р. Шайхисламов, мер ужпумъёсъя воштӥсез А.У. Шайнурова, Башкортостанысь удмуртъёслэн лулчеберетъя йӧскалык центрзылэн кивалтӥсез Л.Л. Зидымаков, удмурт огазеяськонлэн Янаул ёросысь ёзэтэныз кивалтӥсь Ю.С. Саитов, лагерен кивалтӥсь М.Л. Шаритдинов. Куноос пусйизы, «Усточикар» лагерь анай кылэз, культураез, сям-йылолъёсты утьыны юрттэ шуыса.
Выль емышъёсты, бакча сиёнъёсты сӥлы карыса, ужез данъяса, Можга карын «Выль» йӧскалык шулдыръяськон ортчиз. Яркыт, бусьтыр но туж шулдыр праздник пӧрмиз! Ужрадэ Удмуртиысь, Башкортостанысь, Киров улосвылысь куноос вуизы.
Шулдыръяськонэ вань люкаськемъёсты ӟечкыласа вазиськизы Удмурт Элькунысь Кун Кенешлэн Тӧроезлэн воштӥсез Татьяна Ишматова, Удмурт Элькунысь йӧскалык политикая министр Эдуард Петров, «Удмурт Кенеш» огазеяськонлэн Тӧроез Андрей Ураськин, Можга карлэн йырыз Эрик Уразов, Быдэс дуннеысь башкиръёслэн курултаенызы кивалтӥсь Юлдаф Юсупов.
Шудонъёсын но кырӟанъёсын, удмурт дӥсен но ческыт ӝукен, паймымон киужъёсын но выль емышен тырмемым вал Можга карысь шутэтскон парк. Ужрад улсын емышъёсын вузкарон ярмарка ужаз, пӧртэм вожвылъяськонъёс радъяськизы, бакчасульдэръёслэсь адӟытон ортчиз, стадионын удмурт но башкир батыръёс кужымзэс мерттазы, пиналъёс йӧскалык шудонъёсы пыриськизы, вань люкаськемъёс вӧсям ӝук сиизы. Нош шулдыртӥзы калыкез фольклор коллективъёс но тодмо удмурт кырӟасьёс.
Ӟеч сямлы пӧрмемын ни – «Выль» праздникын йӧскалык лулчеберетэз азинтонын, калык сям-йылолъёсты утёнын, анай кылэз вӧлмытонын трос тыршись адямиосты сӥлы карыны. Туэ понна данъетэн пусйизы Можга кар но ёрос ёзэтмылэсь ёзчизэ, Пазял школалэсь кивалтӥсьсэ Олег Чувашовез. Ӟечкыласьком!
Выль – вашкала дауръёсысь вуэм, удмуртъёслэн одӥгез яратоно шулдыръяськонзы. Со нырысь ик Инмарлы, Куазьлы но Кылдысинлы тау карон, выль вуэм емышъёсты данъян нунал. Озьы ик удмурт лулчеберетлэн, эшъяськонлэн праздникез луэ.
Сяме пыремъя, та нуналэ выль емышъёсты пӧраны кутылӥзы, выль изэм пызьлэсь нянь пыжылӥзы. Кузёос бусыысь ӟег но йыды шепъёс вайылӥзы но вӧсяллязы, бичам емышсы понна Инмарлы тау каризы. Тазалык, шудбур курыса солы вазиськылӥзы. Нош йылолъёсты быдэстэм бере ваньзы ик шулдыръяськыны люкаськылӥзы.
Тани туннэ но, ваньмы ӵошен кариськыса, вӧсям ӝук сиим, Инмарез данъям, ӟеч сётэм емышъёсызлы тау карим, собере шулдыръяським, концерт учким!
«Выль» празднике туж трос калык люкаськиз. Котькудӥз аслыз татын тунсыко уж шедьтӥз. Кин ке «Вузкарон урамын» кибашлыослэсь синпель кузьым басьтӥз, мукетъёсыз «Ческыт азбарын» пӧсь перепечен но табанен кунояськизы. Пиналъёс дырзэс пайдаё ортчытӥзы «Нылпи азбарын», мастер-классъёсы пыриськизы, йӧскалык шудонъёсын шудӥзы. Мылкыд карисьёс «Тазалыкъя азбарын» шутэтскизы, тазалыксэс чаклазы. Котькудӥз ӝук веръяз!
Люкаськемъёсты ӟечкылазы «Удмурт Кенеш» огазеяськонлэн Тӧроез, Кун Кенешысь ялан ужась ӧрилэн тӧроез Андрей Ураськин, шаерысьтымы Ӟуч культурая огазеяськонлэн азьветлӥсез Виталий Тюльпин.
Калыкез шулдыртӥзы «Чильтэр», «Задор мылкыд», «Ягдор», «Инвожо», «Инкрезь», «Эшъёс», «Тюрагай», «Инльӧль» ансамбльёс, «Виктория», «Сюрприз», «Отрада» нылпи коллективъёс, пичи кизили — Арина Севастьянова. Со сяна люкаськемъёслэсь мылкыдзэс ӝутӥзы удмурт эстрадаысь артистъёс — Геннадий Ганьков, Марина Галичанина, Артемий Гаврилов, Вероника но Юлияна Романоваос.
Кык кылолыкъем пиналъёслы чаклам «Билингва» центр нош ик ужзэ мытоз 1-тӥ куарусёнэ.
Со пумысен кенешыны люкаськылӥзы ӵектос бордын тыршисьёс. Соос гожтэм планзэс пыр-поч эскерыса учкизы, матысь дырлы быдэстоно ужпумъёс асьсэ азе пуктӥзы.
Тодады вайытом, «Билингва» ӵектос туэ Азьмуртлэн фондысьтыз грант утӥз. Соин валче выль луонлыкъёс кылдӥзы.
Быдэс дышетскон ар уж пиналъёсын но семьяосын гинэ уз нуиськы, визьнодасьёслы, дышетӥсьёслы но нимысьтыз саклык висъямын луоз.
Люкаськем калыклы шулдыръяськыны, ческыт пӧръёсын кунояськыны куазь зор но ӧз люкеты!
Пичиез но, бадӟымез но пӧртэм радъям вожвылъяськонъёсын быгатонлыкъёссэс возьматыны быгатӥз. Люкаськемъёс понна озьы ик интерактивной площадкаос ужазы: киужъя мастер-классъёс, удмурт эктонъёс, кырӟанъёс. Со сяна, фестиваль улсын «Узыё-борыё инты» нимо ярмарка ужаз. Татын котькудӥз емышъёслэсь пыжиськемъёсты веръяны быгатӥз.
Нош тужгес паймымонэз фестивальын — сюмсиос арысь аре кунооссэс бадӟым пыжем пироген пумитало. Туэ со 31 килограммъем пӧрмиз, нош диаметрез — 1,5 метр. Сое чеберъяны 5 литр узы кулэ луиз.
2-тӥ гудырикошконэ Космонавтъёслэн парказы 18.00 часын выль емышъёслы сӥзем «Выль» праздник ортчоз
Вашкала йылолъя выль емышъёсты, ӝукез вӧсялозы, нош бӧрысь концерт возьматозы.
Озьы ик та нуналэ пичиос понна мастер-классъёсын, йӧскалык шудонъёсын «Нылпи азбар» ужалоз, мылкыд карисьёс «Тазалыкъя азбарын» шутэтскыны, тазалыксэс чакланы быгатозы, «Вузкарон урамын» кибашлыослэсь синпель кузьым басьтыны но «Ческыт азбарын» пӧсь перепечен но табанен кунояськыны луоз.
Со сяна вань мылкыд карисьёс быгато «Шуд, арган! Жингырты, такмак!» вожвылъяськонэ пыриськыны.
Марий Элысь Мари-Турек ёросысь Карлыган гуртын удмуртъёслэн вашкала гуръёссыя «Чакара» фестиваль ортчиз.
Туэ фестиваль 15-тӥ ползэ радъяськиз ини. Отчы Марий Элысь, Киров, Свердловск, Тюмень улосвылъёсысь, Пермь шаерысь, Удмурт Элькунысь, Татарстанысь, Башкортостанысь, Санкт-Петербургысь но Москваысь куноос люкаськизы.
Пусйыны кулэ, туэ «Чакара» пӧртэм выжыысь калыкъёсты огазеяз. Люкаськемъёс тодматскизы удмуртъёслэн, бигеръёслэн но пӧръёслэн вашкала кырӟанъёсынызы, сям-йылолъёсынызы. Со сяна, фестиваль улсын кыбышлыослэн ужъёсынызы адӟытон-вузкарон ужаз, радъяськизы на йӧскалык шудонъёс, вожвылъяськонъёс но этнодискотека.
Сое радъязы ёросысь «Удмурт Кенеш», «Удмурт нылкышно кенеш» огазеяськонъёс. Семьяосты дунъяны вуылӥз «Удмурт нылкышно кенешлэн» кивалтӥсез Елена Миннигараева но.
Кунооссэс яръёс туж шулдыр, кырӟаса-вераса, сюкасен, перепечен пумитазы. Фестиваль туж шулдыр интыын, черк вӧзысь возь вылын, радъяськиз. Балезино, Глазов, Кез, Яр ёросысь семьяос вожвылъяськизы. Ваньзы синмаськымонэсь! Соос кырӟазы-веразы, асьсэ сярысь мадизы, удмурт пӧрамъёссэс возьматӥзы, сяська тугоко, веник керттӥзы, пу пилизы, ву вайизы… Оглом возьматӥзы ӵош ужаны но шутэтскыны быгатэмзэс.
Фестиваль йылпумъяськиз ческыт ӝук сиёнэн, турынэн чай юонэн.
Ма со сыӵе пинал гырк? Кызьы будосъёс ву юо? Кин со сыӵе крезьгуръя тодосчи? Кыӵе полюсъёсыз вань магнитлэн? Малы инкуазьлы кулэ ву? Кыӵе ужез быдэстэ механизатор?
Та но мукет юанъёслы валэктонъёс утчазы уйпал ёросъёсысь покчи тодосчиос. Нош соослэсь быгатонлыкъёссэс шараяны юрттӥзы анай-атайёссы но визьнодасьёссы.
Уйпал ёросъёс пӧлын вормисьёс луизы:
Форумлэн очной люкетаз пыриськем котькудӥз пинал кузьымъёсын пусъемын вал.
Вуоноез ужрад 25-тӥ оштолэзе Алнашысь «Родничок» нылпи садын ортчоз. Отчы лымшор ёросъёсысь пиналъёс люкаськозы.
Арлы быдэ радъяськись ужрад туэ сӥземын вал нырысетӥ удмурт нылкышно кылбурчилэн, эмчилэн, фронтовиклэн Ашальчи Окилэн (Акилина Векшиналэн) 125 ар тырмонэзлы но «Удмурт нылкышно кенеш» огазеяськонлэн 30 ар тырмонэзлы.
Конференцие тодосчиос, гожъясьёс, журналистъёс, мерлыко огазеяськонъёслэн ёзчиоссы, егитъёс, Ашальчи Оки нимо йӧскалык премилэн лауреатъёсыз пыриськизы. Ужрадын вить валтӥсь докладъёс шараяськизы, соос Ашальчи Окилэн творчествоезлы, эмчи сямен ужамезлы, Юкаменск ёросын улон вакытэзлы сӥземын вал.
Озьы ик лыдӟонъёсын шараямын вал Ашальчи Окилэн улон но ужам сюресэз сярысь архивысь выль документъёс.
Ужрад йылпумъяськиз Ашальчи Оки нимо йӧскалык премилэсь лауреатъёссэ сӥё-дано пусъёнэн. Сое туэ кылбурчи но эмчи басьтӥзы.
АДИЯ (АДА) ЗАИТОВНА ДИЕВА – удмурт нылкышно кылбурчи, кылысь кылэ берыктӥсь, кырӟанъёс гожъясь, кырӟась, Россиысь писательёслэн но журналистъёслэн Союззылэн ёзчиез, Удмурт Элькунысь лулчеберетъя сиё-дано ужась, «Удмурт Кенеш» огазеяськемлэн Ижысь Ленин ёросысь ёзчиез. Вордӥськиз но будӥз Башкортостанысь Янаул ёросысь Вотская Ошья гуртын. Данъяське удмурт луэменыз, ас выжыосыныз но калыкеныз. Ада Диевалэн тросэз кылбуръёсыз сӥземын вордскем палъёссэ данъянлы, ӵыжы-выжыоссэ, эшъёссэ сӥлы каронлы, инкуазьлэсь чеберлыксэ шӧдонлы. Солэн творчесвояз бадӟым инты басьто лирической кылбуръёс, калык гуръёслы матын луись эстрада кырӟанъёс. Вань мылкыдзэ, быгатонлыксэ кылбур чуръёсаз вераны тырше. Ада Диева мыло-кыдо пыриське мерлыко уже, сюлмаське удмуртлык понна, трос тунсыко пумиськонъёс ортчытъя, пӧртэм ужрадъёс радъя.
ЛИДИЯ ВАСИЛЬЕВНА КРЕСТЬЯНИНОВА — нылпиосты эмъянъя 9-тӥ номеро поликлиникаысь эмчи, тодмо удмурт мерлыко ужась, Удмурт Элькунысь тазалыкез утён удысысь сӥё-дано ужась, «Удмурт Кенеш» огазеяськемлэн Ижкарысь Октябрь ёросысь ёзчиез. Лидия Васильевна яратэ удмурт культураез, вордскем кылзэ, тодэ ас калыкезлэсь сюлмаськонъёссэ но висёнъёссэ, котьку тунсыкъяське мерлыко ужен, эшъяське «Удмурт Кенеш» огазеяськонэн. Лидия Васильевна Крестьянинова удмурт движениез мытӥсьёс пӧлысь одӥгез луэ. Удмурт калыкез сайкатонын, удмуртлыкез ӝутон но солэсь асваланзэ будэтон удысын трос кужымзэ сётӥз, калык пӧлын валэктон уж нуиз. 90-тӥ аръёсы удмуртъёсты утчаса Москваозь но, Эстониозь но, Казахстанозь но вуылӥз. Нырысетӥ Бадӟым ӧтчамез ортчытонын но радъянын одӥгез кичӧлтӥсь луиз. Удмурт калыкез утёнын, нылпиослэсь тазалыксэс эскеронын, нылпи висёнъёсты эмъянын, дун-чылкыт сямъёсты пыӵатонын, эшъяськон кусыпъёсты юнматонын вань кужымзэ, тодон-валанзэ сётыса тыршиз но тырше Лидия Васильевна Крестьянинова.
Вавожысь лулчеберетъя ёрос юртын усьтӥзы элькун архивен дасям «Кузебай Герд и Ашальчи Оки: к 125-летию со дня рождения» адӟытонэз.
Архивын ужасьёслэсь экскурсиязэс аслаз тодэмъёсыныз йылэтӥз Гердлэн музей-юртаз ужась Лидия Сидорова. Ужрадлэсь пуштроссэ озьы ик узырмытӥз пичильтык дасям концерт. Вавожысь шаертодонъя музейысь «Туривесь» но Ӟозлудысь «Бӧляк» ансамбльёс ӵошен крезен шудӥзы-кырӟазы, Выль Биялась Нина Ефремова аслэсьтыз кылбуръёссэ лыдӟиз, Итчи Докъя школаысь дышетскись нылъёс Гердлэн кылъёсызъя гожтэм «Чагыр кышет» кырӟанэз быдэстӥзы».
Ашальчи Окилэн вордскемез дырысен 125 ар тырмонлы сӥзем сӥё-дано ужрад ортчиз Алнашысь лулчеберетъя юртын. Удмурт нылкышно кылбурчиез но врачез буре вайыны люкаськиз быдэс зал.
Ужрад улсын лулчеберетъя юртысь артистъёс А. Окилы сӥзем быдэс постановка пуктӥзы. Улон сюрессэ, творчествозэ туж быгатыса возьматӥзы. Нош ёросысь удмурт коллективъёс Окилэсь кылбуръёссэ лыдӟизы, солэн чуръёсызъя пӧрмытэм кырӟанъёсты быдэстӥзы.
Люкаськемъёсты ӟечкыласа вазиськизы элькунысьтымы лулчеберетъя министр Владимир Соловьёв, Алнаш ёрослэн кивалтӥсез Алексей Семёнов, Кун Кенешысь лулчеберетъя, туризмъя но йӧскалык политикая ялан ужась ӧрилэн кивалтӥсез, «Удмурт Кенеш» огазеяськонлэн Тӧроез Андрей Ураськин, «Удмурт дунне» газетлэн валтӥсь редакторез, «Удмурт нылкышно кенеш» огазеяськонлэн кивалтӥсез Елена Миннигараева.
Сяме пыремъя ини, та нуналэ ик Ашальчи Оки нимо ёрос премилэн лауреатъёсыз пусъемын вал. Туэ лауреат нимез басьтӥзы педагогика тодосъя кандидат, УдГУ-ысь доцент, элькунысьтымы калыкез дышетон удысысь дано ужась, Удмуртилэн кун премиезлэн лауреатэз Любовь Фёдорова но Асан совхоз-техникумысь дышетон удыслэн ветеранэз, шаерчи, 8 книгаослэн авторзы Лариса Шушкова.