«Удмурт Кенеш» ассоциацилэн Пичи кенешез ортчиз

Удмуртия кунлык басьтэм дырысен 100 ар тырмонэн валче чаклам ужрадъёслэн быдэсъяськемзы сярысь ивортӥз йӧскалык политикая элькун министрествоысь ёзэтэн кивалтӥсь Елизавета Ложкина. Солэн верамезъя, азьланьтӥське медиа-план кылдытон. Котькуд выль малпан, ужрад санэ басьтӥсько. Тужгес но бадӟым ужрад — юбилейлы сӥзем арез усьтон — ортчоз Глазкарысь йӧ дворецын.

«Со луоз театр возьматон, кытчы ӧтемын Россиын улӥсь вань удмуртъёс. Ортчоз со туэ 4-тӥ шуркынмонэ. Быдэс ужрадэз «Мынам Удмуртие» ТРК возьматоз», — шуиз Елизавета Ложкина.

Удмурт лулчеберетъя центр пуктыны уксё луоз — оскытӥз люкаськемъёсты лулчеберетъя элькун министр Владимир Соловьёв. Южтолэзе культурая Росси министрен та пумысен вераськон мытэмын вал. Со шуиз — проект дась луиз ке, коньдон ужпумъёсъя кенешонэз азьланьтозы. Вераськон мынэ ог 400 миллион манет сярысь. Али тодмо — ӟуч театр интые выль юрт ӝутозы, отын «Айкай» театр ужалоз, самодеятельной коллективъёс интыяськозы. Нимыз сярысь нош элькун тӧро ӵектон сётэ.

«Александр Владимирович Бречалов сыӵе дэмлан сётӥз – умой луысал центр  Короленко нимо кыльысал ке», — шуиз Владимир Соловьёв.

Аналоговойысь цифровой амалэн ужан программае выжон сярысь рос-прос валэктӥз «Мынам Удмуртие» телерадиокомпанилэн кивалтӥсез Марина Городилова. Солэн верамезъя,  туннэ нуналлы Триколор спутник операторен кенешонъёс ортчытэмын.

«60 %-эзлэн гуртын улӥсьёслэн Триколорен «тарелкаос» пуктылэмын. Соин ик ӝоген ми Троиколорын но возьматом», — шуиз Марина Городилова.

http://www.myudm.ru/