Нылпиослэн фольклоръя «Гуждор» улосвылкуспо праздниксы ортчоз Удмуртиын

Ужрад пиналъёсты сяме пырем лулчеберетэн тунсыкъяськытон, сям-йылолъёслы туала улонэ пыртон вылысь ортчытӥське.

Празднике пыриськыны Удмуртилэн каръёсысьтыз но ёросъёсысьтыз но Россилэн улосвылъёсысьтыз «калык крезьгур», «фольклор», «сяме пырем лулчеберет», «калык эктон» но мукет ӧръёсын ужась нылпи коллективъёсты ӧтё.

Котькуд коллективлэн программаяз ас калыкезлэсь сям-йылолъёссэ возьматӥсь номеръёс пыртыны кулэ. Праздниклэн темаез – тулыс но гужем йылолъёс. Фестивале вуэмъёс асэнызы тодматозы, ужрадэз усьтонэ пыриськозы но концерт номерзэс возьматозы.

Со сяна, котькуд коллектив аслэсьтыз ибырвесьсэ (талисманзэ) но ас улосэзлэсь куншетсэ вайыны кулэ. Тодметпус луыны быгато  сяме пырем калык шудонъёс, улонын кутӥськись арбериос но мукет. Со сярысь коллективъёс асэнызы тодматыку верано луозы.

Фольклор праздник улсын ужрадэз усьтон но ворсан сӥё-дано ужрадъёс, йӧскалык лулчеберетъёслы сӥзем шулдыръяськонъёс, тодматскон ӝытъёс, йӧскалык шудонъёслы сӥзем шулдыръяськон, пыриськисьёслэн гала-концертсы, Удмуртиысь муниципал кылдытэтъёсысь нылпи йӧскалык коллективъёсын пумиськонъёс луозы. Со сяна, пыриськисьёсты элькунысь тунсыко интыосы нуллозы: Воткае П. И. Чайковскийлэн музей-юртаз, Ижкарысь зоопарке, М. Т. Калашников нимо музее, Кузебай Герд нимо йӧскалык музее.

Пыриськыны мылкыд карисьёслэсь куриськонъёссэс 15-тӥ оштолэзёзь rdnt-nt@mail.ru электрон почтае возьмало (коллективе 7-17 аресъем троссэ 12 пиналъёс пыриськыны быгато). Ужрадлэн валатэтэныз рос-просгес татын тодматскыны луэ.

Ужрадэз  Калык творчествоя элькун юрт Удмуртиысь Лулчеберетъя министерство юрттэм улсын дася.

Тодэ вайытом, 14-тӥ оштолэзе Пичи Пургаын удмурт кылын спектакльёс возьматӥсь нылпи театръёслэн «Артэ» элькун фестиваль-конкурссы ортчоз.

https://udmurt.media/udm/news/kultura-i-turizm/54054/