«Мисс студенчества Финно-Угрии» вожвылъяськонэ быръён ортчоз УдГУ-ын 9-тӥ оштолэзе
Быръёнэ пыриськисьёслы куронъёс сокем трос ӧвӧл, но соос чурытэсь.
«Удмурт кылэз тодон, лулчеберетэз тодон, малы ке шуоно вожвылъяськонын одӥгез эскерон кыӵе ке йылолэн герӟаськемын луэ», — вера УдГУ-ысь дышетсконэн герӟаськымтэ ужез радъянъя но визьнодан ужъя ёзэтлэн кивалтӥсез Максим Стерхов.
Озьы ик солэн верамезъя, быръён ужрадэ вожвылъяськонын кылем арын вормисез Евгения Арковаез ӧтёзы.
«Мисс студенчества Финно-Угрии — 2019» вожвылъяськон куартолэзе Ханты-Манскийскын ортчоз. Азьвыл конкурс вормись нылашлэн караз радъяськылэ вал, но УдГУ-ын дышетскись Алина Антонова вормем бере, Ижкар 2015-тӥ арын финн-угор чеберайёсты пумитаз ни вал. Соин ик радъясьёс вожвылъяськонлэн валатэтаз воштонъёс пыртӥзы.
«Куинь улосвылъёсын гинэ та конкурс радъяськылӥз – Йошкар-Олаын, Мордовиын но Удмуртиын. Финн-угор университетъёслэн ассоциацизы пумкылъян кутӥз, Ханты-Манскийске ветлыны, отысь лулчеберетэн тодматскыны кулэ ни шуыса, угось со одӥг пол но ӧз на утылы», — шуэ Максим Стерхов.
Пусъём, вожвылъяськонэ Финн-угор университетъёслэн ассоциациязы пырись вылӥ дышетсконниос пыриськыны быгато. Удмуртиын огазеяськонлэн ёзчиосыз луо Удмурт кун университет но Глазкарысь пединститут. Кылем арын УдГУ-лэсь данзэ утиз Евгения Аркова, Глазкарысь дышетсконнилэсь – Елизавета Третьякова, со «Мисс вокал» ним басьтӥз.